ནོར་བསམ།
སྐད་ཡིག་སློབ་ཚན་ནི་སློབ་ཚན་གཞན་དང་མི་འདྲ་བར་ང་ཚོས་མི་ཚེ་ཧྲིལ་པོར་བེད་སྤྱོད་བྱ་རྒྱུའི་སློབ་ཚན་གཅིག་ཡིན་པ་མ་ཟད། སྐད་ཡིག་ནི་སློབ་ཚན་གཞན་དང་བྱ་གཞག་གང་ཞིག་གསར་དུ་སྦྱོང་པའམ། ལག་བསྟར་བྱེད་སྐབས་སྒོ་མོ་ཕྱེ་བའི་ལྡེ་མིག་ལྟ་བུ་ཆགས་ཡོད། ཚན་རིག་དང་ཨང་རྩིས། སྤྱི་ཚོགས་ཚན་རིག་སོགས་སློབ་ཚན་གང་ཞིག་སྦྱོང་ནའང་། ཐོག་མར་སྐད་ཡིག་གི་གནས་ཚད་ཡག་པོ་ཡོད་དགོས། དཔེར་ན། ནང་ཆོས་གཏིང་ཟབ་པོ་སློབ་སྦྱོང་བྱེད་རྒྱུར་དེང་སྐབས་བོད་ཀྱི་སྐད་ཡིག་ཡག་ཤོས་ཡིན་པ་ཡོངས་གྲགས་སུ་ངོས་འཛིན་བྱེད་ཀྱི་ཡོད། དེ་བས་ནུབ་ཕྱོགས་ཡུལ་ཁག་ནང་ཚན་རིག་པ་སོགས་མི་སྣ་མང་པོས་ནང་ཆོས་ལ་གཏིང་གཟབ་ཤེས་རྒྱུར་བོད་ཀྱི་སྐད་ཡིག་སྦྱོང་གི་ཡོད།
ནུབ་ཕྱོགས་ཡུལ་ཁག་ལ་མི་རིགས་འདྲ་མིན་སྣ་ཚོགས་ཡོད་སྟབས་སྐད་ཡིག་དང་པོ་དང་། གཉིས་པ། གསུམ་པ་སོགས་སྦྱོང་མཁན་ཡོད་པ་བཞིན། ནུབ་ཕྱོགས་ཡུལ་ཁག་གི་བོད་ཕྲུག་ཚོས་ཀྱང་བོད་ཀྱི་སྐད་ཡིག་དང་རིག་གཞུང་སློབ་གྲྭའི་ནང་ལ་བོད་ཀྱི་སྐད་ཡིག་ནི་སྐད་ཡིག་གཉིས་པའི་ངོ་བོར་སྦྱོང་གི་ཡོད། བོད་པས་རང་གི་ཕ་སྐད་སྐད་ཡིག་གཉིས་པའི་ངོ་བོར་སྦྱོང་དགོས་པའི་གནས་སྟངས་ཐོག་མར་མཐོང་ཐོས་བྱུང་མཁན་རྣམས་ལ་ཚོར་བ་སྐྱུར་མོ་བྱུང་ངེས་ལ། སྣ་ཁུག་ལ་ན་ཟུག་ཡང་གཏོང་སྲིད། འོན་ཀྱང་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བོད་ཕྲུག་ཚོས་བོད་ཀྱི་སྐད་ཡིག་སྦྱོང་རྒྱུར་སྤྲོ་སྣང་ཡོད་པ་མཐོང་ཐུབ་ལ། དེ་བས་དགེ་རྒན་དང་ཕ་མ་ཚོས་བོད་ཀྱི་སྐད་ཡིག་ལ་དུང་ཞེན་གཟབ་མོ་ཡོད་པ་མཐོང་ཐུབ།
ཐེངས་ཤིག་ཕྲན་གྱིས་ཕྱི་རྒྱལ་ཡུལ་ཁག་གི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་དགེ་རྒན་ཁ་ཤས་ཀྱིས་ཡིག་ཚད་གཏོང་ཕྱོགས་སྐོར་བགྲོ་གླེང་གནང་བ་ཉན་རྒྱུའི་གོ་སྐབས་བྱུང་། དགེ་རྒན་ཁ་ཤས་རྒྱ་གར་ནང་ལ་དགེ་རྒན་གྱི་ཕྱག་ལས་གནང་མྱོང་ཡོད་སྟབས་རྒྱ་གར་གྱི་སློབ་གྲྭ་ཁག་ལ་ཡིག་ཚད་གཏོང་སྲོལ་ཡོད་པ་ལྟར་ལོ་གཅིག་ལ་ཡིག་ཚད་ཐེངས་གཉིས་གསུམ་བཏང་ནས་འགྲོ་དགོས་པ་གསུངས་པ་དང་། ད་དུང་ཕྲད་དང་རྣམ་དབྱེའི་གྲངས་འདྲེན་ཙམ་ལས་སྐད་ཡིག་གི་རྩལ་བཞི་བཤད་འབྲི་ཉན་བཤད་ཀྱི་ཡར་རྒྱས་ཇི་བྱུང་གི་ཤེས་ཚད་འཇལ་ཐབས་རྒྱུན་དུ་གནང་གི་མེད་པའི་མཐོང་སྣང་ཕྲན་བུ་བྱུང་། འོན་ཀྱང་། ཕྲན་གྱིས་མཐོང་བ་ནི་དགེ་རྒན་རེ་ཟུང་གི་བཀའ་མོལ་ཡིན་སྟབས་ཚང་མ་དེ་ལྟར་ཡིན་པ་བརྗོད་ཀྱི་མེད་ལ། བརྗོད་མི་ཐུབ་པས་གསན་འཇོག་མ་ནོར་བའི་རེ་བ་དང་གལ་སྲིད་ནོར་ཡོད་ན་དགོངས་སེལ་སྔོན་ཚུད་ནས་ཞུ་གི་ཡོད།
འོ་ན། སྐད་ཡིག་དང་སྐད་ཡིག་གཉིས་པ་སློབ་ཁྲིད་གནང་སྐབས་སློབ་ཕྲུག་གི་ཤེས་ཚད་ཇི་ལྟར་འཇལ་དགོས་པ་དང་། སློབ་ཁྲིད་ཡོ་ཆས་ག་རེ་བེད་སྤྱོད་བྱ་དགོས་སམ། ད་ལན་ཕྲན་གྱིས་སྐད་ཡིག་གི་ཤེས་ཚད་ཇི་ལྟར་འཇལ་དགོས་པ་དང་། སློབ་ཁྲིད་ཡོ་ཆས་གང་འདྲ་དགོས་པའི་ཐོག་ཕྲན་ཙམ་ཞུ་འདུན་བྱུང་པས་ཀློག་མཁན་རྣམ་པར་དོགས་སློང་ཙམ་ཞིག་ཡོང་རེ་ལས་མཐའ་ཅིག་ཕན་ཐོགས་ཡོང་གི་རེད་ཅེས་བརྗོད་མི་ཐུབ་པ་དེ་སྔའི་རྩོམ་ཡིག་ཁག་ནང་བརྗོད་པ་བསྐྱར་དུ་ཞུ་གི་ཡོད།
དགེ་རྒན་རྣམ་པས་རྒྱུན་དུ་སློབ་ཕྲུག་གི་སྐད་ཡིག་ཤེས་ཚད་དང་། དོ་དབྱིངས། སློབ་སྦྱོང་བྱེད་སྟངས། ལོ་ཚད་སོགས་ལ་རྒྱུས་ལོན་གསལ་པོ་ཐུབ་པ་དགོས་རྒྱུ་ནི་རྨང་གཞི་གལ་ཆེན་ཆགས་ཡོད། སློབ་ཕྲུག་གི་ཤེས་ཚད་རྒྱུས་ལོན་བྱེད་པར་ཐབས་ལམ་དང་། བརྒྱུད་རིམ་འདྲ་མིན་གང་དག་ཡོད་དམ། སློབ་ཕྲུག་གི་ཤེས་ཚད་རྒྱུས་ལོན་བྱེད་པར་ལོ་འཁོར་དང་སློབ་དུས་སོ་སོར་གཏོང་སྲོལ་ཡོད་པའི་ཡིག་ཚད་དང་། རྒྱུན་དུ་ཤེས་ཚད་ལ་རྒྱུས་ལོན་བྱེད་རྒྱུར་སྦྱོང་ཚན་དང་། འཛིན་གྲྭའི་ནང་དོ་སྣང་བྱེད་ཕྱོགས་དང་སྦྱང་འབྲས་ལ་བརྒྱ་ཆ་སྤྲོད་སྲོལ་ཡོད་པ་སོགས་ཐབས་ལམ་མི་འདྲ་བ་མང་པོ་ཡོད་པ་རྣམས་ལ་རྒྱུས་ལོན་ཡག་པོ་དགོས་པ་མ་ཟད། སློབ་ཁྲིད་ཀྱི་ཡོ་ཆས་གང་འདྲ་བེད་སྤྱོད་གཏོང་དགོས་པའི་ཐད་ལ་ཡང་རྒྱུས་མངའ་ཡོད་དགོས། སློབ་ཆས་ནི་སློབ་ཁྲིད་སྐབས་ལ་བེད་སྤྱོད་གཏོང་བ་ཙམ་མིན་པར་སློབ་ཕྲུག་གི་ཤེས་ཚད་རྒྱུས་ལོན་བྱེད་སྐབས་སུ་ཡང་བེད་སྤྱོད་གཏོང་དགོས། དགེ་རྒན་རྣམ་པས་སློབ་ཁྲིད་ཡོ་ཆས་བེད་སྤྱོད་གཏོང་སྐབས་གཙོ་བོ་ཁྲིད་གཞིའི་སློབ་ཚན་དང་འབྲེལ་བ་ཡོད་མེད་གཟིགས་དགོས་ལ། དེ་ལས་གལ་ཆེ་བ་ནི་སློབ་ཕྲུག་གི་སེམས་ཁམས་དང་། ལོ་ཚད། དོ་དབྱིངས་དང་འཚམས་མིན་གཟིགས་དགོས། ད་དུང་དགེ་རྒན་རང་ངོས་ནས་སློབ་ཁྲིད་ཡོ་ཆས་སྐོར་ལ་ཐུགས་སྣང་ཙམ་མིན་པར་སློབ་སྦྱོང་དང་སྦྱོང་བརྡར་། གསར་བཟོ། དངོས་གཞིའི་སློབ་ཁྲིད་མ་གནང་སྔོན་ལ་ཚོད་བལྟ་གནང་རྒྱུ་གལ་ཆེན་ཆགས་ཡོད། དམིགས་བསལ་སྐད་ཡིག་དགེ་རྒན་ཞིག་དང་། སྐད་ཡིག་གཉིས་པ་སློབ་ཁྲིད་གནང་མཁན་དགེ་རྒན་ཞིག་ཡིན་ན་དེ་མཚུངས་ཀྱི་སློབ་ཁྲིད་ཡོ་ཆས་གང་དགོས་པ་འཚོལ་ཞིབ་དང་། གསར་གཏོད། དེ་བཞིན་སློབ་ཚན་ཁྲིད་སྐབས་བེད་སྤྱོད་ཚད་ལྡན་དང་ནུས་པ་ལྡན་པ་ཡོང་ཐབས་སུ་དགེ་རྒན་རང་ངོས་ནས་སློབ་སྦྱོང་དང་། སྦྱོང་བརྡར་། ཚོད་བལྟ་གནང་རྒྱུ་ཧ་ཅང་གལ་ཆེར་མཐོང་།
སྐད་ཡིག་དགེ་རྒན་ཚོས་སློབ་ཕྲུག་གི་སྐད་ཡིག་གི་ཤེས་ཚད་ཤེས་རྟོགས་ཡོང་ཐབས་སུ་ཡིག་ཚད་དམ་ཤེས་ཚད་རྒྱུས་ལོན་གྱི་ཐབས་ལམ་གང་ཞིག་བེད་སྤྱད་ནའང་། གཙོ་བོ་སློབ་ཕྲུག་གིས་སྐད་ཡིག་གི་རྩལ་བཞི་སྟེ་འབྲི་ཀློག་ཉན་བཤད་ཀྱི་ཤེས་ཚད་ལ་རྒྱུས་ལོན་གནང་རྒྱུ་མ་བརྗེད་པ་གནང་དགོས། དགེ་རྒན་ཁ་ཤས་ཀྱིས་ཕྲད་རྣམ་དབྱེའི་གྲངས་འདྲེན་དང་། སྦྱོར་ཚུལ་ངོས་འཛིན་ཐུབ་པ་ཙམ་གྱིས་བོད་ཀྱི་བརྡ་སྤྲོད་ཤེས་པར་ངོས་འཛིན་བྱེད་མཁན་དངོས་སུ་མཐོང་མྱོང་ལ། ཕ་མ་རེ་ཟུང་གིས་ཕྲུ་གུ་ཚོ་རིག་པ་དང་དྲན་ཤེས་བརྟན་པས་ཕྲད་རྣམ་དབྱེ་བློ་འཛིན་གྱིས་ངག་སྐྱོར་ཐུབ་ནའང་། བོད་སྐད་བཤད་ཉན་མི་ཤེས་པ་དང་། བོད་ཡིག་འབྲི་ཀློག་མི་ཤེས་པ་བརྗོད་མཁན་འདུག དེ་བཞིན་སྐད་ཡིག་གི་ཤེས་ཚད་འཇལ་སྐབས་གནས་སྟངས་ལ་གཞིགས་ནས་ཐབས་ལམ་གཅིག་མ་ཡོང་ན་གཞན་ག་རེ་བེད་སྤྱོད་གཏོང་དགོས་པ་ངོ་འཕྲོད་པ་དང་། ཤེས་ཚད་འཇལ་སྐབས་སློབ་ཁྲིད་ཡོ་ཆས་ག་རེ་བེད་སྤྱོད་གཏོང་དགོས་པ་དང་བེད་སྤྱོད་ཇི་ལྟར་གཏོང་དགོས་མིན་མཁྱེན་དགོས་པ་མ་ཟད། དགེ་རྒན་རང་ངོས་ནས་སློབ་ཁྲིད་ཡོ་ཆས་གསར་བཟོ་གནང་དགོས་པ་གལ་ཆེན་ཆགས་ཡོད། ཕྲན་དེ་ལྟར་བརྗོད་སྐབས་ཉམས་མྱོང་ལྡན་པའི་དགེ་རྒན་མང་པོ་ཞིག་གིས་གནང་མྱོང་བ་དང་། མཁྱེན་པ་ཤ་སྟག་ཡིན་སྟབས་དགད་མོ་ཤོར་སྲིད་ཀྱང་། ཕྲན་གྱིས་རང་ཉིད་འདྲ་བའི་དགེ་རྒན་ལས་དང་པོ་བ་རྣམས་ལ་ཅུང་ཟད་ཕན་རེས་བྲིས་པ་ཡིན་སྟབས་དགོངས་བཞེས་གནང་རོགས།
དུས་རྒྱུན་འཛིན་ཁང་ནང་ལ་སློབ་ཁྲིད་གནང་བའི་སྐབས་སུ་དགེ་རྒན་གྱིས་བཤད་རྐྱང་མིན་པར་སློབ་ཕྲུག་ལ་བཤད་ཉན་འབྲི་ཀློག་གི་གོ་སྐབས་མང་པོ་སྤྲོད་དགོས་པ་དང་། སློབ་ཕྲུག་གི་ཤེས་ཚད་འཇལ་སྐབས་སུ་ཡང་སྔ་མོའི་ལུགས་སྲོལ་ལྟར་དྲི་ཤོག་ཐོག་ལན་འདེབས་བྱ་རྒྱུ་ཙམ་མིན་པར་བཤད་རྩལ་དང་། ཉན་རྩལ་སོགས་བྱེད་སྒོ་འདྲ་མིན་ཐོག་ནས་ཤེས་ཚད་འཇལ་དགོས། དེ་ཡང་སློབ་ཁྲིད་དང་། ཡིག་ཚད་སྐབས་སུ་བྱེད་སྒོ་འདྲ་མིན་སྣ་ཚོགས་སྤེལ་དགོས་པ་ལས་ཡིག་ཐོག་གི་དྲི་བ་དྲི་ལན་ཙམ་དང་། བར་སྟོང་བསྐོངས་རྒྱུ་ཙམ་གྱིས་སློབ་ཕྲུག་གི་ཤེས་ཚད་གོང་མཐོར་སྤེལ་བ་དང་། ཤེས་ཚད་རྒྱུས་ལོན་བྱེད་པར་ནུས་པ་ཆེན་པོ་ཐོན་མི་ཐུབ། བྱེད་སྒོ་འདྲ་མིན་བརྒྱུད་སློབ་ཁྲིད་བྱེད་ཐུབ་ན་སློབ་ཕྲུག་རྣམས་ཉོབ་སྣང་མི་སྐྱེ་བ་དང་། སྐད་ཡིག་གི་རྩལ་བཞི་ཡར་རྒྱས་འགྲོ་བར་ནུས་པ་ཆེན་པོ་ཐོན་ཐུབ་པ་ཞིབ་འཇུག་ལམ་ནས་གསལ་སྟོན་བྱུང་ཡོད།
འབྲེལ་ཡོད་རྩོམ་ཡིག
