ཧོང་ཀོང་བདེ་སྲུང་ཁྲིམས་ཡིག་ཟེར་བ་བཏོན་ཏེ་དཀའ་རྙོག་བསླངས།

འཛམ་གླིང་གི་གནད་ཡོད་མི་སྣ་དང་གྲོས་ཚོགས་འཐུས་མི་༢༠༠ ལྷག་གིས་རྒྱ་ནག་དམར་ཤོག་ཚོགས་པའི་ཚོགས་ཆེན་ཐོག་ཧོང་ཀོང་དང་འབྲེལ་བའི་བཙན་གནོན་ཁྲིམས་ཡིག་བཏོན་པར་སྐྱོན་བརྗོད་ཀྱི་ཡོངས་ཁྱབ་བསྒྲགས་གཏམ་སྤེལ།རྒྱ་ནག་གཞུང་གིས་ཐེངས་འདིའི་རྒྱལ་ཡོངས་འཐུས་མི་ཚོགས་ཆེན་སྐབས་ ༡༣ པའི་གྲོས་ཚོགས་ཚོགས་ཐེངས་ ༣ པའི་ཐོག ཧོང་ཀོང་དང་འབྲེལ་བའི་བདེ་སྲུང་ཁྲིམས་ཡིག་བཏོན་པར་བརྟེན། ་ཁ་སང་ཕྱི་ཚེས་ ༢༤ ཉིན་ཧོང་ཀོང་གི་གྲོང་ཁྱེར་ལྟེ་བར་དམངས་གཙོ་དོན་གཉེར་བ་སྟོང་ཕྲག་མང་པོས་ཁྲིམས་འཆར་དེར་ངོ་རྒོལ་གྱི་རྔམ་སྟོན་ཁྲོམ་སྐོར་བྱེད་སྐབས། ཧོང་ཀོང་ཉེན་རྟོག་པས་ལས་འགུལ་བའི་ཐོག་མིག་ཆུའི་དུག་རླངས་གཏོར་ཡོད་པ་མ་ཟད། ཁྲིམས་མཐུན་མ་ཡིན་པའི་འདུ་འཛོམས་ནང་ཞུགས་པའི་ཉེས་མིང་འོག་ལས་འགུལ་བ་ ༡༢༠ འཛིན་བཟུང་བྱས་ཡོད་འདུག

རྒྱ་ནག་གཞུང་གིས་འདས་ལོའི་ཧོང་ཀོང་གི་ཁྲིམས་རྒོལ་ལས་འགུལ་ལྟ་བུའི་རིགས་བཀག་འགོག་སྟངས་འཛིན་བྱ་རྒྱུར་དམིགས་པའི་ཁྲིམས་ཡིག་དེར། ཨ་རི་གཙོས་པའི་དབྱིན་ཡུལ་དང་། ཨོ་གླིང་། ཁེ་ན་ཌ་བཅས་ནས་བློ་འཚབ་དང་སྐྱོན་བརྗོད་དྲག་པོ་ཡོང་གི་ཡོད་ཅིང་། ཁ་སང་རྒྱལ་ཁབ་ ༢༣ གྱི་ཆབ་སྲིད་མགོ་འཁྲིད་རྒན་གྲས་དང་གྲོས་ཚོགས་འཐུས་མི་ ༡༨༦ ལྷག་གིས་མཉམ་འབྲེལ་ཐོག་ནས་ཡོངས་ཁྱབ་བསྒྲགས་གཏམ་ཞིག་སྤེལ་ཏེ། ཁྲིམས་ཡིག་དེ་ནི་རྒྱ་གཞུང་དང་དབྱིན་གཞུང་གིས་མཉམ་འབྲེལ་ཐོག་བཞག་པའི་ཕྱི་ལོ་ ༡༩༩༧ ལོའི་ཡོངས་ཁྱབ་གསལ་བསྒྲགས་དང་འགལ་ཟླར་གྱུར་ཡོད་ལ། གལ་ཏེ་ཁྲིམས་ཡིག་དེ་གཏན་འབེབ་བྱུང་ཚེ་ཧོང་ཀོང་ནང་མང་ཚོགས་ཀྱི་གཞུང་རྒོལ་ལས་འགུལ་སྔར་བས་ཤུགས་ཆེ་བ་འབུད་ངེས་ཡིན་པའི་ཉེན་བརྡ་བཏང་ཡོད་འདུག

ཧོང་ཀོང་ནང་ངོ་རྒོལ་ལས་འགུལ་བསྐྱར་ལོག་ཡོང་རྒྱུར་ཞེད་སྣང་གིས་རྒྱལ་ཡོངས་འཐུས་མིའི་ཚོགས་ཆེན་ཐོག་རྒྱ་ནག་གི་ཕྱི་སྲིད་བློན་ཆེན་ཝང་དབྱི་ཡིས། ཁྲིམས་ཡིག་གསར་པ་དེ་རྒྱལ་ཁབ་མགོ་རྟིང་སློག་པ་དང་། གྱེན་ལོག་གིས་མཚོན་པའི་བདེ་སྲུང་ལ་གནོད་པའི་བྱ་སྤྱོད་ཁག་བཀག་འགོག་ཆེད་ཡིན་པ་ལས། ཧོང་ཀོང་གི་ཚད་མཐོའི་རང་སྐྱོང་དང་། ཧོང་ཀོང་མི་མང་གི་ཐོབ་ཐང་དང་རང་དབང་། ཧོང་ཀོང་གི་ཕྱིའི་ཚོང་གཉེར་བའི་ཁེ་དབང་བཅས་ལ་དོ་ཕོག་གང་ཡང་ཐེབས་རྒྱུ་མིན་སྐོར་དང་། ད་ལན་གྱི་ཁྲིམས་ཡིག་འདིས་ཧོང་ཀོང་གི་ཁྲིམས་སྲོལ་ཡར་རྒྱས་བཏང་སྟེ། ཧོང་ཀོང་གྲོང་ཁྱེར་གྱི་བརྟན་བརླིང་དང་ཁྲིམས་ཀྱི་དབང་བསྒྱུར་སྲ་བརྟན་བཟོ་རྒྱུར་དམིགས་ཡོད་སྐོར་བརྗོད་ཡོད་འདུག དེར་མཚུངས་ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་སྤྱི་ཁྱབ་ཁེ་རི་ལེམ་གྱིས་ཀྱང་ཁྲིམས་ཡིག་དེ་གང་མགྱོགས་གཏན་འབེབ་ཡོང་རྒྱུར་མོས་མཐུན་ཡོད་སྐོར་བརྗོད་ཡོད་འདུགཁ་སང་ཨེན་བྷི་སི་ (NBC) གསར་ཁང་ལ་ཨ་རིའི་རྒྱལ་སྲུང་སློབ་སྟོན་པ་རོ་བྷར་ཊི་ཨོ་བྷེ་རེན་(Robert O’brien) གྱིས་ཁྲིམས་ཡིག་དང་འབྲེལ་ནས་ ཕར་བལྟས་ན་རྒྱ་ནག་གིས་བདེ་སྲུང་ཁྲིམས་ཡིག་དེ་ཧོང་ཀོང་རང་གི་སྟངས་འཛིན་འོག་སླེབས་ཆེད་བཟོས་པ་ཞིག་རེད། གལ་ཏེ་རྒྱ་ནག་གཞུང་གིས་དེ་ལྟར་བྱས་ཚེ། ཨ་རིའི་རྒྱལ་སྲིད་དྲུང་ཆེ་པོམ་པིའོ་( Mike Pompeo) ཡིས་ཧོང་ཀོང་ལ་ཚད་མཐོའི་རང་སྐྱོང་ཡོད་པའི་ངོས་འཛིན་བྱེད་ཐབས་མེད་ཅིང་། དེའི་རྐྱེན་པས་ཨ་རིས་རྒྱ་ནག་དང་ཧོང་ཀོང་ཐོག་དཔལ་འབྱོར་ཉེས་ཆད་འགེལ་སྲིད་པ་རེད། ཅེས་བརྗོད་ཡོད་འདུག འདས་ལོའི་ཧོང་ཀོང་གི་ཁྲིམས་རྒོལ་ལས་འགུལ་ཁྲོད་རྒྱ་ནག་དང་ཧོང་ཀོང་གཞུང་གིས་ལས་འགུལ་བའི་ཐོག་དྲག་གནོན་ཤུགས་ཆེར་བྱས་པའི་རྐྱེན་གྱིས། འདི་ལོར་ཨ་རིའི་གཞུང་གིས་ཧོང་ཀོང་གི་རྒྱབ་སྐྱོར་ཁྲིམས་ཡིག་(Hong Kong Support act of  2019) གཏན་འབེབ་གནང་སྟེ། ཁྲིམས་ཡིག་དེའི་དགོངས་དོན་གཞིར་བཟུང་ཨ་རིའི་འཛིན་སྐྱོང་ངོས་ནས་ལོ་ལྟར་ཧོང་ཀོང་གི་རང་སྐྱོང་གནས་བབ་ལ་ཞིབ་འཇུག་བྱེད་དགོས་ཤིང་། གལ་ཏེ་རང་སྐྱོང་མེད་ཚེ་ཧོང་ཀོང་གི་དམིགས་བསལ་ཚོང་དོན་གནས་བབ་ཕྱིར་འཐེན་བྱེད་དགོས་ཀྱི་ཡོད་པ་རེད།

འདས་ལོའི་ཕྱི་ཟླ་ ༦ ཚེས་ ༩ ཉིན་མགོ་བརྩམས་པའི་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་འཆར་དེ་ཉིད་ཏོག་དབྱིབས་ནད་ཡམས་ཀྱི་རྐྱེན་པས་གནས་སྐབས་རིང་མཚམས་བཞག་ཡོད་ཀྱང་། ཉེ་ཆར་བདུན་ཕྲག་གཅིག་ཙམ་གོང་ཧོང་ཀོང་ཉེན་རྟོག་པས་གྲོང་ཁྱེར་གྱི་དམངས་གཙོ་དོན་གཉེར་བའི་མི་སྣ་གྲགས་ཆེན་མི་ཉུང་བ་འཛིན་བཟུང་བྱས་པའི་རྐྱེན་གྱིས་ཁྲོམ་སྐོར་ལས་འགུལ་བསྐྱར་དུ་བསླངས། ཡིན་ནའང་ཧོང་ཀོང་གཞུང་གིས་ཏོག་དབྱིབས་ནད་ཡམས་ལ་ཁག་དཀྲིས་ཏེ་འདི་ལོའི་ཕྱི་ཟླ་ ༦ ཚེས་ ༤ བར་མི་མང་འདུ་འཛོམས་རིགས་བྱ་མི་ཆོག་པའི་བཀའ་བསྒྲགས་པར་བརྟེན། དམངས་གཙོ་དོན་གཉེར་བའི་ཁྲོད་ཧོང་ཀོང་གཞུང་གིས་ཏོག་དབྱིབས་ནད་ཡམས་ཁ་ལ་ཁྱེར་ཏེ་སྨྲ་བརྗོད་དང་འདུ་འཛོམས་རང་དབང་རྡོག་རོལ་གཏོང་བཞིན་ཡོད་པ་མ་ཟད། ལྷག་པར་དུ་ལོ་ལྟར་འཚོག་བཞིན་པའི་གནམ་བདེ་སྒོ་མོ་ཆེའི་དྲུག་བཞིའི་དོན་རྐྱེན་རྗེས་དྲན་ལས་འགུལ་ལ་དམ་དྲག་བྱ་ཆེད་ཡིན་སྐོར་སྐྱོན་བརྗོད་བྱས་ཡོད་པ་རེད།

ཟླ་འདིའི་ཕྱི་ཚེས་ ༢༨ ཉིན་རྒྱ་ནག་རྒྱལ་ཡོངས་འཐུས་མིའི་ཚོགས་ཆེན་གྱིས་ད་ཐེངས་ཀྱི་བདེ་འཇགས་ཁྲིམས་ཡིག་གི་འཆར་ཟིན་ལ་འོས་ཤོག་འཕངས་རྗེས། འཐུས་མིའི་ཚོགས་ཆེན་གྱི་རྒྱུན་ལས་ནས་མཐའ་མའི་ཐག་གཅོད་བརྒྱུད། འདི་ལོའི་ཕྱི་ཟླ་ ༦ པའི་མཇུག་ཏུ་ཁྲིམས་ཡིག་ཏུ་གཏན་འབེབ་བྱ་རྒྱུ་ཡིན་སྐོར་བཀོད་ཡོད་འདུག སྤྱིར་ཕྱི་ལོ་ ༢༠༠༣ ལོར་ཧོང་ཀོང་གཞུང་གིས་ཧོང་ཀོང་གི་གཞི་རྩའི་བཅའ་ཁྲིམས་ཀྱི་དགོངས་དོན་གཞིར་བཟུང་། བདེ་འཇགས་ཁྲིམས་ཡིག་གཏན་འབེབ་བྱེད་སྐབས་མང་ཚོགས་འབུམ་ ༥ ལྷན་འཛོམས་ཀྱིས་རྔམ་སྟོན་ཁྲོམ་སྐོར་ལས་འགུལ་ཤུགས་ཆེར་སྤེལ་བའི་རྐྱེན་གྱིས་གནས་སྐབས་ཕྱིར་འཐེན་མ་བྱེད་ཀ་མེད་ཆགས་ཡོད། ཧོང་ཀོང་གི་དམངས་གཙོ་དོན་གཉེར་བ་མང་པོས་ཁྲིམས་ཡིག་དེ་ནི་རྒྱལ་ཁབ་གཅིག་དང་ལམ་ལུགས་གཉིས་ཀྱི་མཐའ་མ་ཡིན་སྐོར་གྱི་སྐྱོན་བརྗོད་དྲག་པོ་བྱས་ཡོད་པ་རེད།

གསར་འགོད་པ། པ་སངས་ཚེ་རིང་།