རྒྱ་ནག་བཅིངས་གྲོལ་དམག་གི་གསང་ཉུལ་བ་ཞིག་ཨ་རིས་འཛིན་བཟུང་བྱས།

ཨ་རིའི་ཉེན་རྟོག་པས་ཞིན་ཝང་ལ་འདྲི་གཅོད་བྱེད་སྐབས། རྒྱ་ནག་ནང་ཡོད་པའི་མགོ་འཁྲིད་ཀྱི་ལམ་སྟོན་འོག ཁོ་རྒྱ་ནག་ནང་ཕྱིར་ལོག་སྟེ། ཁ་ལི་ཧྥོ་ནེ་ཡ་གཙུག་ལག་སློབ་གྲྭ་ཆེན་མོའི་ཞིབ་འཇུག་ལྟེ་གནས་ཁང་དང་གཅིག་མཚུངས་ཀྱི་ཞིབ་འཇུག་ལྟེ་གནས་ཁང་ཞིག་རྒྱ་ནག་མི་དམངས་བཅིངས་གྲོལ་དམག་གི་གཙུག་ལག་སློབ་གྲྭ་ཆེན་མོའི་ནང་འཛུགས་རྒྱུ་བྱས་ཡོད། ཅེས་བརྗོད་ཡོད་སྐོར་དང་།  ཞིན་ཝང་ཕྱི་ལོ་ ༢༠༡༨ ལོར་ཨ་རིར་ཡོང་སྟེ་འདས་པའི་ལོ་ ༢ ལྷག་ཙམ་རིང་ཁ་ལི་ཧྥོ་ནེ་ཡ་གཙུག་ལག་སློབ་གྲྭ་ཆེན་མོའི་ནང་ཞིབ་འཇུག་དང་འབྲེལ་བའི་གནས་ཚུལ་ཐོག་རྒྱུས་ལོན་བྱས་ཡོད་འདུག

ཨ་རིའི་ཁྲིམས་དོན་ལྷན་ཁང་ལྟར་ན། ཞིན་ཝང་རྒྱ་ནག་ནང་མ་ལོག་གོང་ཏག་ཏག་དེར་ཡིག་ཟམ་དང་སྐད་འཕྲིན་སོགས་བརྒྱུད་ཁ་ལི་ཧྥོ་ནེ་ཡ་གཙུག་ལག་སློབ་ཆེན་སྐོར་གྱི་གནས་ཚུལ་མང་པོ་རྒྱ་ནག་བཅིང་གྲོལ་དམག་མིར་བསྐུར་ཡོད་པ་དང་། གནམ་ཐང་ནས་ཁོ་འཛིན་བཟུང་བྱས་པ་དང་ཁ་པར་སོགས་ཞིབ་བཤེར་གཏོང་སྐབས། ཁོས་སྐད་འཕྲིན་དང་ཡིག་ཟམ་ནང་གི་ཡིག་འབྲེལ་ཚང་མ་ནག་གསུབ་བཏང་ཚར་ཡོད་འདུག  ཨ་རིའི་རྒྱལ་སྲིད་བདེ་འཇགས་དང་འབྲེལ། ཨ་རིའི་གཙུག་ལག་སློབ་གཉེར་ཁང་དང་རྒྱ་ནག་གི་དམག་མིའི་བར་འགལ་ཟླ་རིམ་པ་བྱུང་ཡོད་པ་དང་། འདི་ལོའི་ཕྱི་ཟླ་ ༥ ཚེས་ ༢༩ ཉིན་ཨ་རིའི་སྲིད་འཛིན་ཊོམ་ཕུ་མཆོག་གིས། རྒྱ་ནག་དམག་གི་ལྷན་ཁང་ཁག་ལ་ཨ་རིའི་ཚན་རྩལ་ཤེས་རིག་སོགས་རྐུ་འཁྱེར་བྱེད་མཁན་རྒྱ་ནག་གི་ཉམས་ཞིབ་པ་དང་། སློབ་མཐར་ཕྱིན་པའི་སློབ་མ་རྣམས་ཨ་རིར་ཡོང་རྒྱུ་བཀག་སྡོམ་བྱེད་དགོས་ཡོད། ཅེས་གསུངས་ཡོད་པ་དང་། བཀའ་རྒྱ་དེ་ནི་ཟླ་འདིའི་ཚེས་ ༡ ཉིན་ནས་དངོས་སུ་ལག་བསྟར་བྱེད་མགོ་བརྩམས་ཡོད་འདུག

གསར་འགོད་པ། སྐལ་བཟང་སྦྱིན་པ།