སྤྱི་ཚོགས་དྲ་ལམ་དུ་བཀའ་ཡིག་རྫུན་མ་སྤེལ་བ་དེར་ཕོ་བྲང་ནས་གསལ་བསྒྲགས་གནང་སྟེ་རྫུན་བཟོ་དེ་རིགས་མ་འོངས་པལའང་ཡོང་སྲིད་པས་ཚང་མས་ཐུགས་གཟབ་གནང་དགོས་སྐོར་གསུངས་འདུག 
ཁ་སང་ཕྱི་ཚེས་ ༢༠ ཉིན་སྤྱི་ཚོགས་བརྒྱུད་ལམ་ཁག་ཏུ། ༧གོང་ས་རྒྱལ་བ་རིན་པོ་ཆེ་མཆོག་གི་མཚན་ཐོག་ལ་བཀའ་ཡིག་རྫུན་མ་ཞིག་བཟོས་ཏེ། ཕྱི་ལོ་ ༢༠༢༡ ལོའི་སྲིད་སྐྱོང་གི་འོས་མིའི་ནང་ལབ་གླེང་རྩོད་གཞི་ཡོད་པ་ཞིག་མི་ཡོང་བར་བོད་མི་ཚང་མས་འགན་འཁུར་ཧུར་ལེན་དགོས་སྐོར་བསྒྲགས་པ་དེར། དེ་རིང་དགའ་ལྡན་ཕོ་བྲང་ནས་གསལ་བསྒྲགས་ཤིག་གནང་སྟེ། བཀའ་ཡིག་ཕྱག་རྟགས་སོགས་རྫུན་བཟོ་བྱས་ཏེ་མང་ཚོགས་ལ་མགོ་སྐོར་གཏོང་མཁན་རེ་ཟུང་ཡོང་གི་ཡོད་པས། ཚང་མས་སྤྱང་གྲུང་དང་ཚོར་སྣང་སྐྱེན་པོས་ཐུགས་གཟབ་གནང་དགོས་སྐོར་གསུངས་འདུག
དེ་ཡང་ཕོ་བྲང་གི་གསལ་བསྒྲགས་ནང་། སྤྱིར་ཡིག་འཁྱམ་ཁག་ལ་ལན་འདེབས་བྱེད་དགོས་མེད་ཀྱང་། ལས་ཤོག་དང་སྦུག་ཐམ་རྫུན་མའི་དབང་གིས་རྒྱུས་མངའ་མེད་པ་རྣམས་མགོ་བོ་རྨོངས་ཉེན་ཡོད་པ་མ་ཟད། འདི་གར་འདྲི་རྩད་བྱེད་མཁན་ཡང་ས་ཁུལ་གང་ས་ནས་མང་དག་ཅིག་ཡོང་བཞིན་པར་བརྟེན། དོགས་སེལ་གསལ་བསྒྲགས་ཤིག་དགོས་གལ་མཐོང་བས་གསལ་བཤད་ཞུ་རྒྱུར། བཀའ་ཡིག་རྫུན་མ་དེ་བཞིན་༧གོང་ས་མཆོག་གི་བཀའ་ཡིག་མིན་པར་རྫུན་གཏམ་ཁོ་ན་ཡིན་པ་མ་ཟད། ༧གོང་ས་མཆོག་ལ་མཚན་ཤས་དང་བོད་མིའི་མཐུན་སྒྲིལ་ལ་གནོད་གཞིའི་དམིགས་ཡུལ་ངན་བཅངས་ཡིན་པ་ཤིན་ཏུ་གསལ་བས་སུས་ཀྱང་ཡིད་ཆེས་གནང་དགོས་མེད། ཅེས་གསུངས་འདུག
ཡང་གསལ་བཤད་ནང་། ༧གོང་ས་མཆོག་གིས་ཕྱི་ལོ་ ༢༠༡༡ ལོར་ནས་ཆབ་སྲིད་ཀྱི་ཐུགས་འགན་ཅམ་བཞག་གནང་བ་ནས་བཟུང་བོད་མིའི་ཆབ་སྲིད་ཀྱི་ལས་རིམ་ནང་ཐེ་བྱུས་གནང་གི་མེད་པ་ཀུན་གྱིས་མཁྱེན་གསལ་དང་། དེ་སྔོན་ཡང་བཀའ་ཡིག་ཕྱག་རྟགས་ལྗགས་རྩོམ་སོགས་རྫུན་བཟོས་ཀྱིས་མང་ཚོགས་ལ་མགོ་སྐོར་གཏོང་ཐབས་བྱེད་མཁན་རེ་ཟུང་བྱུང་ཡོད་ཅིང་། ད་ལན་ཡང་གནས་ཚུལ་འདི་བཞིན་བྱུང་བ་དང་། འབྱུང་འགྱུར་ཡང་འདི་རིགས་ཡོང་སྲིད་ན། མང་ཚོགས་ནས་སྤྱང་གྲུང་དང་ཚོར་སྣང་སྐྱེན་པོས་ཐུགས་གཟབ་གནང་དགོས། ཞེས་གསུངས་འདུག
ཁ་སང་ཕྱི་ཚེས་ ༢༠ ཉིན་སྤྱི་ཚོགས་བརྒྱུད་ལམ་ཁག་ཏ་སྤེལ་བའི་བཀའ་ཡིག་རྫུན་མའི་ནང་དུ། སྲིད་སྤྱི་གཉིས་ཀྱི་འོས་བསྡུའི་སྐབས་སུ་མི་མང་རང་ཉིད་ནས་ཆ་ཤས་ལེན་དགོས་པ་དེ་ཧ་ཅང་གལ་ཆེན་ཡིན་ཡང་། སྲིད་སྐྱོང་ལས་ཐོག་པ་བློ་བཟང་སེང་གེ་ལགས་ནས་ད་བར་ལྷག་བསམ་རྣམ་དག་གིས་ཕྱག་ལས་རླབས་ཆེན་དེ་དག་ལ་བཀའ་དྲིན་དྲན་པའི་སྒོ་ནས་ཉིས་སྟོང་ཉེར་ཅིག་གི་སྲིད་སྐྱོང་དེ། ད་ལྟའི་སྲིད་སྐྱོང་གི་ལས་མཇུག་སྐྱོང་མཁན་མི་བུ་རྣམ་དཔྱོད་དང་ལྡན་པ་ཞིག་འོས་འདེམས་བྱེད་དགོས་པ་ལས། ལབ་གླེང་དང་རྩོད་གཞི་ཅན་གྱི་མི་ཞིག་ནམ་ཡང་འོས་མིའི་གྲལ་དུ་མེད་པ་བྱེད་རྒྱུ་དེ་བོད་མི་ཚང་མའི་འགན་འཁྲི་ཡིན་པས་ལྷོད་པ་མེད་པ་དགོས་སྐོར་བྲིས་འདུག
གསར་འགོད་པ། སྐལ་བཟང་སྦྱིན་པ།
གནད་དོན་འདི་རིགས་ལ་བོད་མིའི་སྒྲིག་འཛུགས་ལ་འགན་ཡོད་པ་རེད་ལ། ཚོགས་པ་དང་མི་སྒེར་སུ་ཡིན་ཡང་མགོ་རུལ་སྣ་ཡི་མ་ཚོར་བ་མ་ཡིན་པར་ས་འཕྱར་ན་རྡོ་ལྷུང་ལ་འབུད་ཟེར་བ་ལྟར་རྩད་གཅོད་ནན་མོ་བྱེད་རྒྱུ་གལ།
Such culprit must booked through Cyber Crime.
ལས་ཤོག་རྫུས་མ་ བཟོས་པས་མ་ཚད་ དགོན་པའི་ནང་་་ ད་ལན་སྲིད་སྐྱོང་ (སྐལ་རྡོར་) ཡིན་ཡིན་པ་རེད། ཁོ་མ་བླུག་ན་ སུ་བླུག་དགོས། ཁོ་ལ་སློབ་སྦྱོང་ནི་ཡོད། འཇོན་ཐང་ནི་ཡོད་ ད་ལྟ་ནས་་་ དགོན་པའི་ནང་འོས་སྡུས་་་ གསལ་བསྒྲགས་ སྤེལ་མཁན་མི་མ་སླེབ་གོང་ནས་ གསལ་བསྒྲགས་ད་ལྟ་ནས་འགོ་ཚུགས་བཞིན་འདུག བོད་པའི་ལས་དབང་། ལུང་པ་མེད་པས་སྒང་ལ་་་ ཕྱི་ནས་རྒྱ་གར་་་་ བོད་པ་རྒྱ་གར་རྒྱབ་ལ་ལང་དགོས་ཡོད་དོག་དོག ནང་ནས་ སྲིད་སྐྱོང་གིས་དཀའ་རྙོག
ཁྱེད་ཀྱིས་ཅི་ཞིག་གསུང་གི་ཡོད་ཤེས་མ་སོང་། ཕལ་ཆེར་དགོན་པ་ཚོར་སྐྱོན་བརྗོད་བྱེད་ཀི་ཡོད་པ་འདྲ། ཧཧཧཧ།