སྤྱི་ཟུར་ཆབ་བྲག་ལྷ་མོ་སྐྱབས།
ཁ་སང་དེ་རིང་གི་ཆེས་མཐོའི་ཁྲིམས་ཞིབ་ཁང་དང་སྤྱི་འཐུས་རྒྱུན་ལས་བར་གྱི་རྩོད་གཞིའི་བྱུང་རིམ་སོགས་མི་གླེང་བར་ཐད་ཀར་དུ་གནད་དོན་གཉིས་སྐོར་བསམ་འཆར་འདོན་རྒྱུར།
ཀ༽ རྒྱུན་ལས་ནས་ཚོགས་འདུ་ཕྱིར་འགྱངས་ཟེར་བ་བཅའ་ཁྲིམས་དང་འགལ་ཡོད།
“དོན་ཚན་བཞི་བཅུ་པ། སྤྱི་འཐུས་ལྷན་ཚོགས་ཀྱི་ཚོགས་འདུ།
འཆར་ཅན་སྤྱི་འཐུས་ལྷན་ཚོགས་ཀྱི་ཚོགས་འདུའི་ཚོགས་ཚེས་དང༌། དུས་ཡུན། ས་གནས་བཅས་སྤྱི་འཐུས་རྒྱུན་ལས་དང་གོ་བསྡུར་ཐོག་སྤྱི་འཐུས་ཚོགས་གཙོ་ལྷན་རྒྱས་ཀྱིས་གཏན་ལ་ཕབ་པ་ལྟར་ཚོགས་དྲུང་ལས་ཁུངས་ནས་སྤྱི་འཐུས་སོ་སོར་ཚོགས་བསྐོང་བརྡ་ཁྱབ་གཏོང་རྒྱུ་དང༌། ཚོགས་འདུ་སྔོན་མ་གྲོལ་བ་ནས་ཟླ་དྲུག་ནང་ཚུན་ཚོགས་འདུ་རྗེས་མ་དབུ་ཚུགས་ཟིན་པ་དགོས་རྒྱུ།”
དོན་ཚན་འདིས་ཟླ་དྲུག་རེ་ནས་སྤྱི་འཐུས་ལྷན་ཚོགས་ཀྱི་ཚོགས་འདུ་རེ་ངེས་པར་འཚོགས་དགོས་པ་གཏན་འཁེལ་ཟིན་ཡོད་པས། སྤྱི་འཐུས་རྒྱུན་ལས་ནས། “སྐབས་༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་༡༠ པ་དེ་བཞིན་དེ་སྔོན་གྱི་ཟླ་༩་ཚེས་༡༦ རེས་གཟའ་ལྷག་པ་ནས་ཚེས་༢༤ རེས་གཟའ་ཕུར་བུ་བར་ལས་དུས་ཉིན་གྲངས་བརྒྱད་རིང་འཚོགས་རྒྱུའི་གསལ་བསྒྲགས་བྱས་ཡོད་ཀྱང་། གཏན་འབེབས་དུས་ཚོད་ཐོག་འཚོགས་མི་དགོས་པར་བཙན་བྱོལ་བོད་མིའི་བཅའ་ཁྲིམས་དོན་ཚན་༦ པ་དང་། དོན་ཚན་༤༩ པའི་ནང་གསེས་༢ པའི་དགོངས་དོན་ལྟར་ཕྱི་ལོ་༢༠༢༡་ཟླ་༣ པའི་བར་ཕར་འགྱངས་གནང་བ་ཡིན།” ཞེས་བསྒྲགས་འདུག
འོ་ན། ཟླ་༣ པའི་ནང་ཚོགས་དུས་༡༡ པ་འཚོགས་དགོས་པས། ཚོགས་དུས་༡༠ པ་དང་༡༡་པ་གཉིས་བསྟུད་མར་འཚོགས་ན་ཡང་། “ཚོགས་འདུ་སྔོན་མ་གྲོལ་བ་ནས་ཟླ་དྲུག་ནང་ཚུན་ཚོགས་འདུ་རྗེས་མ་དབུ་ཚུགས་ཟིན་པ་དགོས་རྒྱུ།” ཞེས་པ་དང་འགལ་ཡོད་པ་བསྙོན་མེད་རེད། འོན་ཀྱང་རྒྱུན་ལས་རྣམ་པས་བཅའ་ཁྲིམས་ཀྱི་དགོངས་དོན་དང་འགལ་མེད་ཚུལ་ལ། བཅའ་ཁྲིམས་དོན་ཚན་༦ པ་དང་། དོན་ཚན་༤༩ པའི་ནང་གསེས་༢ པ་བཀོད་འདུག་པས། དེར་ཅིག་གཟིགས།
“དོན་ཚན་ཞེ་དགུ་པ། སྤྱི་འཐུས་ལྷན་ཚོགས་སུ་སྤྱི་འཐུས་ཀྱི་ཉུང་ཚད།
༡ སྤྱི་འཐུས་ལྷན་ཚོགས་དང༌། དེའི་རྒྱུན་ལས་གཉིས་ཀར་སྤྱི་འཐུས་རྩ་འབོར་གྱི་གསུམ་ཆ་གཉིས་འཛོམས་ན་ཚོགས་གཙོ་ཚོགས་གཞོན་འོས་བསྡུ་བྱ་རྒྱུའི་མཚོན་རང་རང་གི་ལས་དོན་བྱེད་པའི་དབང་ཆ་ཡོད། འོན་ཀྱང་སྤྱི་འཐུས་རྩ་འབོར་དང་ངོ་ཡོད་ཆ་བགོས་རྩིས་སྐོར་སྐབས་འཕྲོས་ལྷག་སྐར་ཆ་བརྩི་མ་དགོས།
༢ སྤྱི་འཐུས་ཉུང་མཐའི་གྲངས་ཚད་མ་ལོངས་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ།”
དོན་ཚན་འདི་ལས། ཉུང་མཐའི་ཚད་གཞི་ནི་སྤྱི་འཐུས་རྩ་འབོར་གྱི་གསུམ་ཆ་གཉིས་འཛོམས་དགོས་པ་དེ་རེད། ད་ལྟའི་སྤྱི་འཐུས་ཀྱི་གྲངས་འབོར་ནི་༤༥ ཡི་གསུམ་ཆའི་གཉིས་ནི་༣༠ ལོངས་དགོས། རྒྱ་གར་རང་ན་ཡང་སྤྱི་འཐུས་༣༠ ལྷག་ཡོད་འདུག ཚོགས་འདུ་ལ་ཡོང་ཐུབ་པ་མི་འདུག་ཅེས་སྙན་ཞུ་འབུལ་མཁན་ཡང་བྱུང་མེད་ཚོད། དེ་བས་རྒྱུན་ལས་ཀྱི་ཚོད་དཔག་འདི་ཡང་དག་ཅིག་མ་རེད། གང་ལྟར་ཚོད་དཔག་བྱས་ཏེ་ཚོགས་དུས་ཕར་འགྱངས་གནང་བ་དང་གཅིག ཕར་འགྱངས་ཀྱི་དུས་ཡུན་རིང་དྲགས་པའམ་ཚོགས་དུས་༡༠་དེ་ཕྱིར་བསྡུ་ཆགས་པ་འདི་གཉིས་ཁྲིམས་ཀྱི་དབང་ཚད་ལས་བརྒལ་བ་ཞིག་ཅི་ལ་མིན།
དེ་ནས་རྒྱུ་མཚན་གཉིས་པ་ལ།
“དོན་ཚན་དྲུག་པ། རྒྱལ་སྤྱིའི་ཁྲིམས་ལུགས་དང༌། ཡུལ་ཁྲིམས་ལ་བརྩི་སྲུང༌།
བོད་མིའི་སྒྲིག་འཛུགས་ཀྱི་ཁྲིམས་ལུགས་དང༌། ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་རྒྱལ་སྤྱིའི་ཁྲིམས་ལུགས་དང༌། ལྷག་དོན་བོད་མིའི་གནས་ཡུལ་རྒྱལ་ཁབ་ཁག་གི་ཡུལ་ཁྲིམས་དང་མི་འགལ་བ་བྱ་རྒྱུ།” ཞེས་པ་འདི་རེད། རྒྱ་གར་གཞུང་གིས་མི་གྲངས་སུམ་བཅུ་བརྒལ་བའི་འདུ་འཛོམས་བྱེད་མི་ཆོག་པའི་བཀའ་ཁྱབ་བསྒྲགས་ཡོད་དམ་ཅི། དེ་མེད་ན་ཡུལ་ཁྲིམས་དང་འགལ་ཚུལ་ཅི་ཡིན་ནམ།
མདོར་ན། ཚོགས་དུས་ཕྱིར་འགྱངས་གནང་ཚུལ་བཅའ་ཁྲིམས་ཀྱི་དགོངས་དོན་དང་མ་འགལ་ཚུལ་ལ་ཁག་དཀྲི་བྱེད་ས་མི་འདུག་པས། འདི་ངོས་ལེན་མ་གནང་ན་ཁྲིམས་འགལ་ཆེད་བཟོས་ཀྱི་ཉེས་པ་ཇེ་ལྕིར་འགྲོ་སྲིད།
ཁ༽ ཆེས་མཐོའི་ཁྲིམས་ཞིབ་ཁང་ལ་ཁྲིམས་ལུགས་དང་འབྲེལ་བའི་ཐག་གཅོད་དབང་ཚད་ཡོད།
དོན་ཚན་རེ་དྲུག་པ། ཆེས་མཐོའི་ཁྲིམས་ཞིབ་ཁང་གི་དབང་ཚད།
“ ༡ ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་མཐར་ཐུག་གི་ཞུ་གཏུགས་བྱ་ཡུལ་ཁྲིམས་ཞིབ་ཁང་དང༌། བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན།”
“ ཆ གོང་གསལ་དོན་ཚན་ཁག་ནང་མ་གསལ་བའི་རྩོད་གཞི་ཁག་བཅས་ལ་གཟུ་བོའི་ཚུལ་གྱིས་ཁྲིམས་ཞིབ་ཐག་གཅོད་བྱ་རྒྱུ་དང༌།
ཇ གཞན་ཡང་ཁྲིམས་ཞིབ་ཁང་འོག་མ་རྣམས་དང༌། ཁྲིམས་དོན་དང་འབྲེལ་བའི་ལས་ཁུངས་ཁག་གི་ལས་དོན་བྱེད་ཕྱོགས་དང༌། འཛིན་སྐྱོང་གི་བྱ་བར་ཞིབ་འཇུག་ལམ་སྟོན་དང༌། སྟངས་འཛིན་བྱ་རྒྱུའི་དབང་ཆ་ཡོད།” ཅེས་ཆེས་མཐོའི་ཁྲིམས་ཞིབ་ཁང་ནི་བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན་པས། དངོས་སུ་ཞུ་གཏུགས་ཡོད་མེད་ལ་མ་ལྟོས་པའི་“རྩོད་གཞི་ཁག་བཅས་” དང་ “ཁྲིམས་དོན་དང་འབྲེལ་བའི་ལས་ཁུངས་ཁག་གི་ལས་དོན་བྱེད་ཕྱོགས” ལ་ཁྲིམས་ཞིབ་ཐག་གཅོད་དང་སྟངས་འཛིན་བྱ་རྒྱུའི་དབང་ཚད་བཅའ་ཁྲིམས་ཀྱིས་གནང་འདུག་པས། སྤྱི་འཐུས་རྒྱུན་ལས་ཀྱིས་བཅའ་ཁྲིམས་དང་འགལ་བའི་དབང་ཚད་བཀོལ་ཉེས་འདིའི་ཐད་ལ་ཆེས་མཐོའི་ཁྲིམས་ཞིབ་ཁང་གི་འགན་འཁུར་སྟངས་འདི་འོས་པར་མ་ཟད་དགོས་ངེས་ཤིག་རེད།
མཐའ་དོན། ཚོགས་དུས་༡༠ པ་ཕར་འགྱངས་ཀྱི་གསལ་བསྒྲགས་དེ་ཕྱིར་བསྡུ་གནང་ནས་ཁྲིམས་དོན་དང་མཐུན་པ་ཞིག་གནང་མ་ཐུབ་ན། རྒྱ་ཆེའི་མི་མང་གིས་ཁྲིམས་ཞིབ་ཁང་ལ་ཞུ་གཏུགས་བྱེད་དགོས་པ་ལས་འོས་མེད་དོ།།
མཆན། གོང་གསལ་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ལངས་ཕྱོགས་ཡིན་པས་མ་ཁྱབ།
བཙན་བྱོལ་བོད་མིའི་བཅའ་ཁྲིམས་ནི་ཁྲིམས་ལུགས་ཡོངས་སུ་རྫོགས་པའི་རྩ་བ་ཡིན་པ་ནས་བཙན་བྱོལ་བོད་མིའི་དཀྱིལ་འཁོར་གྱི་ནང་དུ་ཡོད་པའི་བོད་མི་སྤྱི་སྒེར་ཚང་མས་བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་བློ་གཏད་བརྩི་བཀུར་ཉམས་ལེན་ཞུ་དགོས་པ་དེ་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་ཆེ་ཤོས་དེ་ཡིན་པའི་ངོ་སྤྲོད་ཞུ་འདོད་བྱུང་ལ་བཅའ་ཁྲིམས་དོན་ཚན་བརྒྱད་པའི་ནང་འཁོད་པའི་བོད་ཀྱི་ཡུལ་མི་ཟེར་བའི་ནང་གསེས་བཞི་པ་ནང་གསལ་། གོང་གསལ་དོན་ཚན་ཁག་ལག་ལེན་དུ་བསྟར་ཆེད་སྤྱི་འཐུས་ལྷན་ཚོགས་ཀྱིས་བོད་ཀྱི་ཡུལ་མིའི་ཁྲིམས་ལུགས་ཤིག་གཏན་འབེབས་བྱ་རྒྱུ་གསལ་ཡོད་ནཡང་བཅའ་ཁྲིམས་ཀྱི་ནུས་པ་འཐོན་ནས་མི་ལོ་བཅུ་ཕྲག་གསུམ་ལ་ཉེ་བའི་སྐབས་འདིར་བོད་ཀྱི་ཡུལ་མིའི་ཁྲིམས་ལུགས་ད་ལྟ་ཡང་བཟོ་མ་ཐུབ་པ་དེ་ཁྲིམས་བཟོ་སྡེ་ཚན་གྱིས་ཞན་ཆ་ལ་ངོས་འཛིན་ཞུས་ན་མ་འགྲིག་པའི་ཉེས་པ་གང་ན་ཡོད་།
ཁ་སྣོན་གསལ་བཤད་ཙམ་དུ།
རྒྱུན་ལས་ཀྱི་ཚོགས་དུས་༡༠ ཕར་འགྱངས་བྱེད་དགོས་པའི་གལ་ཆེའི་རྒྱུ་མཚན་གཅིག་ལ། “་་་གྲོས་ཚོགས་ཚོགས་པའི་དབང་དུ་བཏང་ཡང་རྒྱལ་སྤྱིའི་འགྲུལ་བཞུད་སྒོ་རྒྱ་བསྡམས་པའི་རྐྱེན་གྱིས་འགྲོ་འོང་གི་དཀའ་ངལ་ཡོད་པའི་ཆ་ནས་ཕྱི་རྒྱལ་དུ་ཡོད་པའི་སྤྱི་འཐུས་མང་ཆེ་བ་ཕེབས་མི་ཐུབ་པ་དང་། རྒྱ་གར་ནང་ནས་ཀྱང་སྤྱི་འཐུས་ཇི་ཙམ་ཕེབས་ཐུབ་ཀྱི་ཡོད་མེད་རྟོགས་ཐབས་དཀའ་བའི་གནས་སྟངས་ཀྱི་ཆ་ནས་ད་ལན་ཐག་གཅོད་དེ་འདྲ་ཞིག་མ་བྱས་ཀ་མེད་ཆགས་སོང་” ཞེས་གྲོས་ཚོགས་ཀྱི་ཉུང་མཐའི་གྲངས་ཚད་མི་ལོངས་པར་ཚོད་དཔག་བྱས་འདུག
ངས་བསམ་ཚུལ་འདི་ཕུལ་དོན། ཁྲིམས་ཞིབ་ཁང་ལ་རྒྱབ་སྐྱོར་དང་སྤྱི་འཐུས་རྒྱུན་ལས་ལ་ངོ་རྒོལ་གྱི་རྣམ་འགྱུར་བསྟན་པ་ཞིག་མིན་པར་གནད་དོན་འདི་གལ་འགངས་ཆེན་པོར་བརྩིས་ནས་བྲིས་པ་ཡིན།
རྒན་ལགས་ཀྱིས་ཡག་པོ་བྲིས་འདུག་པས་རྒྱབ་སྐྱོར་ཡོད་། ཆེས་མཐོའི་ཁྲིམས་ཞིབ་ཁང་གིས་རྩ་ཁྲིམས་མི་བརྩི་མཁན་ལ་ཆད་པ་ལྕི་མོ་གཅོད་དགོས་།
བཅའ་ཁྲིམས་དང་འགལ་བའི་ཐག་གཅོད་རེད་ལ་བཙན་བྱོལ་བོད་མིའི་བཅའ་ཁྲིམས་ནི་བཙན་བྱོལ་བོད་མིའི་སྒྲིག་འཛུགས་དང་བཙན་བྱོལ་མི་མང་གི་བླ་སྲོག་ཡིན་པ་དང་བཙན་བྱོལ་བོད་མིའི་བཅའ་ཁྲིམས་སྲུང་སྐྱོབས་ཀྱི་འགན་དེ་ཡང་མང་གཙོའི་ཀ་བ་གསུམ་ལ་ཡོད་ན་ཡང་སྤྱི་འཐུས་ནས་བཅའ་ཁྲིམས་སྲུང་སྐྱོབས་བྱ་རྒྱུའི་ཚབ་ཏུ་བཅའ་ཁྲིམས་ལ་འགན་མ་ཁུར་ནས་ཆེས་མཐོའི་ཁྲིམས་ཞིབ་ཁང་ནས་ཉེས་ཆད་ཀྱི་བཀའ་ཁྱབ་མ་གནང་ཐབས་མེད་བྱུང་བ་མ་རེད་དམ?
སྤྱི་ཟུར་ཆབ་བྲག་ལྷ་མོ་སྐྱབས་ཀྱིས་དོན་དངོས་བྲིས་འདུག་པར་ཐུགས་རྗེ་ཆེ།
དྲང་བདེན་གྱི་ཁྲིམས་ཀྱི་རྒྱབ་ནས་ལང་ཐག་ཆོད་ཡིན།