རྩེད་མོའི་ཁྲོད་ཀྱི་སློབ་གསོ་དང་དེའི་དགེ་མཚན།

བྱིས་པ་ཡག་པོ་ཞིག་སྐྱོང་བ་ལ་ཐོག་མར་སྐྱོང་ལུགས་སྣ་ཚོགས་སྦྱོང་རྒྱུ་གལ་ཆེ་ཞིང་། རང་གི་ཤ་ཁྲག་ལས་ཆད་པའི་བུ་ཕྲུག་ལ་བདེ་སྐྱིད་ལྡན་པའི་འཚོ་བ་ཞིག་མཁོ་སྤྲོད་བྱེད་དགོས་པ་ཡིན། བོད་པའི་མི་རབས་རྗེས་མ་རྣམས་ལ་མི་ཚེའི་ཁ་ཕྱོགས་ཕུགས་རྒྱང་རིང་པོ་ཞིག་སྟོན་འདོད་ན་དུས་རབས་དང་མཐུན་པའི་བྱིས་པ་གསོ་སྐྱོང་བྱེད་ལུགས་ཀྱི་སྐོར་ལ་ཤེས་རྟོགས་བྱེད་དགོས་པ་ཡིན། ལྷག་པར་དུ་བྱིས་པའི་སེམས་ཁམས་དང་དགའ་ཕྱོགས་ལ་ཞིབ་འཇུག་བྱས་ཏེ་ཆ་རྒྱུས་ཡོད་པའི་སྟེང་ནས་བྱིས་པ་གསོ་སྐྱོང་བྱེད་དགོས་པ་ཡིན། འོན་ཀྱང་། བོད་ཕྱི་ནང་གི་ཕ་མ་མང་པོར་བྱིས་པ་གསོ་སྐྱོང་བྱེད་ཐབས་ཀྱི་སྐོར་ལ་དོ་སྣང་བྱེད་པའི་གོམས་གཤིས་ཡག་པོ་ཞིག་མེད་པ་དང། ཕ་མ་རེ་ཟུང་ཕྱོགས་ཞེན་གྱི་དབང་དུ་སོང་སྟེ་བོད་རང་གི་རིག་གཞུང་ཁྲོད་དུ་མི་གསལ་བའི་བྱིས་སྐྱོང་གི་བྱེད་ཐབས་ཤིག་ཡིན་ན། བོད་ཀྱི་སྤྱི་ཚོགས་ལ་མི་འཚམ་པར་འདོད་དེ་དང་ལེན་བྱེད་ཐུབ་ཀྱི་མེད་པའི་གནས་ཚུལ་ཀྱང་ཡོད། ཕྱི་རྒྱལ་བ་དང་རྒྱ་རིགས་འདུས་སྡོད་བྱེད་སའི་གྲོང་ཁྱེར་དུ་འཚོ་བ་སྐྱེལ་བཞིན་པའི་བོད་པའི་ཕ་མ་མང་པོས་བུ་ཕྲུག་རྣམས་ཡུལ་ལུང་དེ་དང་།དེའི་ཡུལ་སྲོལ་ལྟར་བྱིས་པ་འཚར་ལོངས་བྱེད་དུ་འཇུག་གི་ཡོད་པ་ལས་བྱིས་སྐྱོང་གི་བྱེད་ཐབས་ལ་དོ་སྣང་སྤྲད་དེ་བུ་ཕྲུག་བོད་ལུགས་ལྟར་གསོ་སྐྱོང་བྱེད་ཐབས་ལ་བསམ་བློ་གཏོང་གི་མེད། དེ་བས་ཁྱིམ་ཚང་མང་བོའི་བྱིས་སྐྱོང་གི་བྱ་བཞག་ལ་འགལ་རྐྱེན་འཕྲད་ཀྱི་ཡོད་པ་ནི་སེམས་འཚབ་སྐྱེ་དགོས་པ་ཞིག་ཡིན། དེར་བརྟེན་བྱིས་སྒྲུང་གླིང་དུ་བཞུགས་པའི་བྱིས་སྐྱོང་སློབ་གསོའི་བྱེད་ཐབས་སྐོར་ལ་ཉམས་མྱོང་དང་ཤེས་རྟོགས་ཟབ་པའི་ཕ་མ་ཚོའི་དགོངས་ཚུལ་རྣམས་གཞིར་བཞག་སྟེ་རྩེད་མོའི་ཁྲོད་ཀྱི་སློབ་གསོའི་སྐོར་ནས་རོབ་ཙམ་གླེང་རྒྱུ་ཡིན།

རྩོམ་པ་པོ་དང་སྙན་ངག་པ། རྩེད་མོའི་ཕན་ནུས་ཞིབ་འཇུག་པ་སྐུ་ཞབས་ཝེན་སུ་རྒུ་བ་མོན་(Vince Gowmon) མཆོག་གིས་བྱིས་པའི་སློབ་སྦྱོང་གི་རྨང་གཞི་རྩེད་མོའི་ཐོག་ཏུ་འཇོག་ཐུབ་པ་ཡིན་ན། ང་ཚོས་བྱིས་པར་ཁྲིད་བྱ་ཆ་ཚང་བ་ཞིག་ཁྲིད་ཐུབ་ཅེས་སྡོམ་ཚིག་བཀོད་ཡོད། ཚན་རིག་དང་སློབ་གསོ་དར་ཁྱབ་ཚད་མཐོན་པོར་སོང་ཡོད་པའི་རྒྱལ་ཁབ་དཔེར་ན་བྱང་ཨ་རིའི་གླིང་གི་རྒྱལ་ཁབ་ཁ་ན་ཊ(Canada)དང་ནུབ་ཡོ་རོབ་ཀྱི་རྒྱལ་ཁབ་སུ་ཝེ་ཌེན་(Sweden)ལ་སོགས་པའི་རྒྱལ་ཁབ་མང་པོའི་སློབ་སྔོན་སློབ་གསོའི་སྒྲོམ་གཞི་རྩེད་མོ་ཡིན་པར་གྲགས་ཤིང་། རྩེད་མོའི་ཁྲོད་ནས་བྱིས་པར་སློབ་གསོ་སྤྲོད་པ་དེར་གཙིགས་ཆེན་བྱེད་བཞིན་ཡོད། གཙོ་ཆེ་ཤོས་བྱིས་པ་ལ་རྩེད་མོར་དགའ་བའི་རང་གཤིས་ཡོད་པ་དང་རྩེད་མོ་རྩེ་བ་ནི་བྱིས་པའི་ཐོབ་ཐང་ཡིན་པ་སོགས་གཞིར་བཞག་པ་ཞིག་ཡིན་པར་བརྗོད་ཅིང་།རྩེད་མོའི་ཁྲོད་དུ་སློབ་གསོ་སྤྲོད་ཐབས་ཀྱི་སྒྲོམ་གཞི་དེར་དགེ་མཚན་ཆེན་པོ་དང་མང་བོ་ཡོད་པའི་རྒྱུ་མཚན་བགྲངས་འདུག ཨ་རིའི་བུད་མེད་རྩོམ་པ་པོ་དང་སེམས་ཁམས་རིག་པའི་ཆེད་མཁས་པ་ཁེ་རེ་ཌི་ཧྥེལ་ཌི་ཇེ་མེན (Kay Redfieield Jamian) མཆོག་གིས བྱིས་པ་ལ་བསམ་བློའི་རང་དབང་དང་རྩེད་མོ་རྩེ་བའི་དུས་ཚོད་ཡོད་དགོས།  རྩེད་མོ་རྩེ་བ་ནི་རྒྱས་སྤྲོས་བྱེད་པ་མ་ཡིན་པར་ངེས་པར་དུ་རྩེ་དགོས་པ་ཞིག་ཡིན་ཞེས་གསུངས་ཡོད། དེར་བརྟེན་བྱིས་སྐྱོང་སློབ་གསོ་མཐོང་ཆེན་བྱེད་སའི་ཡུལ་ལུང་གི་ཕ་མ་ཚོས་བུ་ཕྲུག་གི་ལོ་ཚོད་ལ་གཞིགས་པའི་རྩེད་ཆས་མཁོ་སྤྲོད་བྱེད་པ་དང་རྩེད་མོ་རྩེ་སའི་ཁོར་ཡུག་བསྐྲུན་པ། བུ་ཕྲུག་དང་ལྷན་དུ་རྩེད་མོ་ལ་མཉམ་ཞུགས་བྱེད་པ་དང་ཁྱིམ་མཚེས་ཀྱི་བྱིས་པ་དང་ལྷན་དུ་རྩེད་མོའི་དུས་ཚོད་བཟོ་བ། རྩེད་ཐང་དུ་ཁྲིད་དེ་བྱིས་པ་མང་པོ་དང་ལྷན་དུ་ལུས་སེམས་བཀོལ་སྤྱོད་བྱེད་དགོས་པའི་རྩེད་མོའི་རིགས་སྣ་ཚོགས་ལ་ཞུགས་སུ་འཇུག་པ་ལ་སོགས་པ་བྱེད་དགོས། བུ་ཕྲུག་རང་ཉིད་ལ་འདོད་མོས་ཡོད་པ་དང་ཉེན་ཁ་མེད་པའི་རྩེད་མོ་ལ་ཞུགས་སུ་བཅུགས་པ་ཡིན་ན་མི་གཤིས་སྤྲོ་སྣང་གིས་ཁེངས་པའི་བྱིས་པ་གསོ་སྐྱོང་བྱེད་ཐུབ་པར་བཤད། དེ་ན་ང་ཚོ་བོད་པའི་ཕ་མ་ཚོས་ཀྱང་རང་ཉིད་ཀྱི་མི་རབས་རྗེས་མ་དང་། གངས་ཅན་བོད་པ་ཚང་གི་ཤུལ་འཛིན་པ་ཆུང་ཆུང་དེ་ཚོ་འཛམ་གླིང་གི་མི་རིགས་འདྲ་མིན་དང་མཉམ་དུ་མདུན་སྐྱོད་བྱེད་ཐུབ་པའི་ཆེད་དུ། གནའ་དེང་ཟུང་འབྲེལ་གྱི་བྱིས་པའི་རྩེད་མོ་སྣ་ཚོགས་ལ་ཞུགས་པའི་ཆ་རྐྱེན་བསྐྲུན་ཏེ་སློབ་གསོ་སྤྲོད་དགོས་པར་འདོད་དོ།།

ཨ་རིའི་ཁཱར་ནེལ་སློབ་ཆེན་གྱི་(Cornell University) སློབ་དཔོན་ཆེན་མོ་དང་། དངོས་ཁམས་རིག་པ་དང་རྩོམ་པ་པོ་སྒྲ་ཡན་ཨ་ཁཱར་མན་ (Diane Ackerman) མཆོག་གིས་རྩེད་མོ་ནི་འགྲོ་བ་མིའི་ཀླད་པས་ཆེས་དགའ་མོས་བྱེད་པའི་སློབ་སྦྱོང་གི་ཐབས་ལམ་ཡག་པོ་ཞིག་རེད་ཅེས་གསུངས་ཡོད་པ་ལྟར། བྱིས་པ་ལ་རྩེད་མོའི་གོ་སྐབས་སྤྲོད་པ་ནི་བྱིས་པའི་ཀླད་རྒྱ་ཆེ་རུ་གཏོང་བ་དང་བསམ་རྒྱ་ཡངས་སུ་གཏོང་བའི་བྱེད་ཐབས་ཆེས་ཡག་པོ་ཞིག་ཡིན་པ་ཚན་རིག་པ་ཚོས་དཔྱད་ཞིབ་ཁྲོད་དུ་ངེས་པ་རྙེད་པ་ཞིག་ཡིན་པ་ཡོངས་གྲགས་ཡིན།འཛམ་གླིང་ན་སྙན་གྲགས་ཆེ་བའི་ཚན་རིག་པ་ཨལ་བྷུར་ཊི་ཨ་ཡེན་སུ་ཐན(Albert Einstein) མཆོག་གིས་རྩེད་མོ་ནི་ཆེས་ཚད་མཐོ་བའི་དཔྱད་ཞིབ་བྱེད་ཐབས་ཤིག་རེད་ཅེས་གསུངས་ཡོད། རྩེད་མོ་ནི་བྱིས་པའི་འཇོན་ནུས་སྔོག་འདོན་བྱེད་པའི་ཆེས་བཟང་བའི་བྱེད་ཐབས་ཤིག་ཡིན་པ་དང་། མཚར་སྣང་ཆེ་ཞིང་ཤེས་འདོད་ཆེ་བའི་བྱིས་པའི་རང་གཤིས་གསོ་སྐྱོང་བྱེད་པའི་ཐབས་ལམ་མཆོག་ཏུ་གྱུར་བ་ཞིག་ཡིན།རྩེད་མོའི་ཁྲོད་ནས་བྱིས་པའི་རང་གི་མི་གཤིས་ཀྱི་རང་བཞིན་སྟོན་ཐུབ་པ་དང་། ཕ་མ་དང་བྱིས་པ་གཞན་ལ་འབྲེལ་འདྲིས་ཀྱི་གོ་སྐབས་བརྒྱུད་དེ་བསམ་བློ་གཏོང་སྟངས་དང་སྐད་ཆ་བཤད་སྟངས། ལུས་ཀྱི་རྣམ་འགྱུར་སྟོན་སྟངས་ལ་སོགས་པའི་ཤེས་བྱ་གྲངས་མེད་པ་ཞིག་སྦྱོང་ཐུབ། ཨ་རིའི་རྩེད་མོའི་དགེ་མཚན་ཞིབ་འཇུག་གི་ཆེད་མཁས་པ་དང་སློབ་དཔོན་ཆེན་མོ་ཧྥུ་རེ་ཊི་ཊོལ་ནོལ་སིན། (Fred Donaldson) མཆོག་གིས་བྱིས་པ་ཚོས་རྩེད་མོ་རྩེ་ཞོར་དུ་སློབ་སྦྱོང་བྱེད་ཐུབ། དེ་ནི་ཧ་ཅང་གལ་ཆེ་བས། ཁོ་ཚོས་རྩེད་མོའི་ཁྲོད་ནས་ཇི་ལྟར་སློབ་སྦྱོང་བྱེད་པའི་ཐབས་ཤེས་ཧ་གོ་བ་ཡིན་ཞེས་གསུངས་ཡོད། དེ་ན་ཕ་མ་ཚོས་བུ་ཕྲུག་ལ་ཟརྩེད་མོའི་ཁོར་ཡུག་ཡག་པོ་ཞིག་བསྐྲུན་ཏེ་བུ་ཕྲུག་གི་ལྷན་སྐྱེས་ཀྱི་རིག་སྟོབས་སྐྱེད་སྲིང་བྱེད་དགོས་པ་ཡིན། དེ་ལས་ལྡོག་སྟེ་བུ་ཕྲུག་གི་རྩེད་མོ་རྩེ་བའི་ཐོབ་ཐང་ལ་བརྩི་མེད་རྡོག་བརྫིས་བཏང་སྟེ་བུ་ཕྲུག་ལ་རྩེད་མོ་རྩེ་བའི་དབང་ཆ་དང་ཐོབ་ཐང་མ་སྤྲད་པ་ཡིན་ན། བུ་ཕྲུག་གི་རྣམ་དཔྱོད་ལ་ཚོད་འཛིན་དང་གསར་གཏོད་བྱེད་པའི་འཆར་སྒོ་བཀག་པ་ཡིན། ཨ་རིའི་སྤྱི་ཚོགས་རིག་པའི་སློབ་དཔོན་ནེ་ཁཱ་ལ་སུ་ཁུ་རེ་ཀྲ་ཁཱས་(Nicholas Christakis) མཆོག་གིས་བྱིས་པར་རྩེད་མོ་རྩེ་རུ་མ་བཅུག་པ་ཡིན་ན། དེ་ནི་བྱིས་པའི་འཇིག་རྟེན་ལ་ཤེས་རྟོགས་བྱེད་པའི་ཐོབ་ཐང་མ་སྤྲད་པ་རེད་ཅེས་གསུངས་ཡོད། དེ་ན་ང་ཚོ་གངས་ཅན་པའི་ཕ་མ་ཚོས་ཀྱང་བོད་ཕྲུག་ཚོར་རྩེད་རིགས་སྣ་ཚོགས་ལ་འཇུག་པའི་ཆ་རྐྱེན་བསྐྲུན་ཏེ་གསོ་སྐྱོང་བྱེད་རྒྱུ་གལ་ཆེ་བར་སེམས་སོ།།

རྒྱལ་སྤྱིའི་སྟེང་ན་སྙན་གྲགས་ཆེ་བའི་ཨི་ཊ་ལའི་སློབ་ཁྲིད་རིག་པའི་ཆེད་མཁས་པ་མ་རེས་ཡ་མོན་ཊི་སོ་རེ (Maria Montessori) མཆོག་གིས་རྩེད་མོ་ནི་བྱིས་པའི་ལས་ཀ་རེད་ཅེས་གསུངས་ཡོད་པ་དང་། རྩོམ་པ་པོ་དང་སྙན་ངག་པ། རྩེད་མོའི་ཕན་ནུས་ཞིབ་འཇུག་པ་སྐུ་ཞབས་ཝེན་སུ་རྒུ་བ་མོན་(Vince Gowmon) མཆོག་གིས་རྩེད་མོ་ནི་བྱིས་པ་དང་བྱིས་པའི་གསར་གཏོད་ཀྱི་ནུས་པའི་བར་གྱི་ལམ་ཐག་ཉེ་ཤོས་དེ་རེད་ཅེས་གསུངས་ཡོད། དེ་ན་བྱིས་པ་ཞིག་ལ་མཚོན་ན་ལུས་སེམས་ཀྱི་འཚར་ལོངས་ལ་ཕན་པའི་འཚོ་བཅུད་ལྡན་པའི་ཟས་མཆོག་ལྟ་བུ་དེ་རྩེད་མོ་ཡིན་པ་དང་། རྩེད་མོའི་ཁྲོད་དུ་བྱིས་པ་རང་བཞིན་གྱིས་འཚར་ལོངས་འབྱུང་ཐུབ་པར་བཤད།རྩེད་མོ་རྩེ་བའི་སྐབས་སུ་བྱིས་སེམས་ཞི་བར་གནས་ཤིང་སྤྲོ་སྣང་རྒྱས་ཐུབ་པ་ཡིན། སྐབས་དེར་བྱིས་སེམས་ལ་དཀའ་སྣང་བྲལ་ཞིང་སུན་སྣང་མེད། རྣམ་རིག་དྭངས་ཞིང་བློ་རིག་གསལ། རིག་པ་རྩེ་གཅིག་ཏུ་སྒྲིམ་ཐུབ་ཀྱི་ཡོད་པར་བཤད། ལྷག་པར་དུ་ཕྲུ་གུ་ཆུང་ཆུང་རྣམས་རང་དབང་གི་རྩེད་མོ་རྩེ་བར་ཧ་ཅང་དགའ་ཞིང་། རང་དབང་གི་རྩེད་མོའི་ཁྲོད་དུ་ཕྲུ་གུ་ཚོར་འཆར་སྣང་མང་ཞིང་སྤྲོ་སྣང་ལྡན་པའི་སྒོ་ནས་བྱ་དངོས་ངོས་འཛིན་དང་འབྲེལ་བའི་ཚོད་ལྟའི་བྱ་བ་སྣ་ཚོགས་ལ་འཇུག་པར་བཤད།  སྐབས་འདིར་ཕ་མའི་འོས་འགན་གཙོ་བོ་དེ་རྩེད་མོ་རྩེ་བར་དགའ་བའི་ཕྲུ་གུའི་སེམས་ཁམས་ཀྱི་རང་དབང་ལ་བརྩི་བཀུར་བྱེད་དགོས་ཤིང་། བུ་ཕྲུག་ལ་རང་མོས་ཡོད་པའི་རྩེད་མོ་རྩེ་རུ་འཇུག་དགོས་པ་དེ་ཡིན། དེ་དང་ལྷན་དུ་ཕ་མས་ཕྲུ་གུའི་ལུས་སེམས་འཚར་ལོངས་སུ་འགྲོ་བར་ཕན་པའི་རྩེད་ཆས་ངོ་སྤྲོད་བྱེད་པ་དང་། བྱིས་པ་དང་ལྷན་དུ་རྩེད་མོར་ཞུགས་ཏེ་བྱིས་པའི་དགའ་ཕྱོགས་འཚོལ་ཞིབ་བྱེད་དགོས། ཕྲུ་གུ་རེ་ལ་རྩེ་འདོད་ཡོད་པའི་རང་དབང་གི་རྩེད་མོ་རེ་ཡོད་པ་ཤེས་དགོས་ཤིང་། དེ་ལ་རྒྱབ་སྐྱོར་དང་མཐུན་རྐྱེན་བསྐྲུན་དགོས།དེ་ན་ང་ཚོ་བོད་ཀྱི་ཕ་མ་ཚོས་ཀྱང་རང་གི་གཅེས་ཕྲུག་ཚོའི་རྩེད་མོའི་རང་དབང་མི་འཕྲོག་པ་དང་རྩེད་མོར་དགའ་བའི་རང་གཤིས་ལ་ཚོད་འཛིན་མི་བྱེད་པར། གང་ཐུབ་ཅི་ཐུབ་ཀྱིས་ཁོ་ཚོར་ཉེན་ཁ་མེད་པའི་རྩེད་མོའི་ཁོར་ཡུག་ཅིག་བསྐྲུན་ཏེ་ངང་བ་ཆུ་ལ་ཞུགས་པའི་ངང་ཚུལ་ལྟར་ཕྲུ་གུ་རྩེད་མོར་ཞུགས་སུ་འཇུག་རྒྱུ་གལ་ཆེ། དེ་ལྟར་ན་ཕ་མ་ཚོས་གོ་སྐབས་དམ་འཛིན་གྱིས་བུ་ཕྲུག་དང་ལྷན་དུ་རྩེད་མོར་ཞུགས་ཏེ་བུ་ཕྲུག་གི་སེམས་ཀྱི་འཆར་སྒོ་ཇེ་མང་དུ་འགྲོ་བ་དང་གསར་གཏོད་ཀྱི་ནུས་པ་ཇེ་ཆེར་འགྲོ་བ། བྱིས་པའི་འཚོལ་ཞིབ་ཀྱི་རིག་པ་ཇེ་གསལ་དུ་འགྲོ་བ་དང་འགན་ཁུར་གྱི་འདུ་ཤེས་ཇེ་བརྟན་དུ་འགྲོ་བའི་བྱ་བཞག་སོགས་ལ་བརྩོན་དགོས་པར་སེམས་སོ།།

མདོར་བསྡུས་ན་བུ་ཕྲུག་རྣམ་དཔྱོད་དང་སྤོབས་པ་ལྡན་པ་ཞིག་གསོ་སྐྱོང་བྱེད་འདོད་པའི་ཕ་མ་ཞིག་ཡིན་ན། དུས་རབས་དང་ཡུལ་སྲོལ་ལ་མཐུན་པའི་བྱིས་པ་གསོ་སྐྱོང་བྱེད་ཐབས་ཀྱི་རྩེད་མོའི་སྐོར་ལ་མཉམ་འཇོག་བྱས་ཏེ་རང་གི་ཚེ་གཅིག་གི་འདུན་མ་བཅོལ་ས་དེར་བསམ་བློའི་ཁ་ཕྱོགས་ཡང་དག་པ་ཞིག་སྤྲོད་དགོས་པ་ཡིན། ལྷག་པར་དུ་རྩེད་མོ་ནི་བུ་ཕྲུག་གི་སེམས་ཁམས་ཞིབ་འཇུག་དང་དགའ་ཕྱོགས་ལ་འཚོལ་ཞིབ། བུ་ཕྲུག་གི་ལུས་ངག་ཡིད་གསུམ་ལ་བོད་པའི་ཆོས་དང་རིག་གནས་དང་ཡུལ་སྲོལ་གོམས་གཤིས་ཀྱི་ཞག་རྩི་འཇོག་ཐབས་ཡག་པོ་ཞིག་ཡིན་པ་ཤེས་རྟོགས་དགོས། ལྷག་པར་དུ་ཕྱི་རྒྱལ་དང་རྒྱ་ནང་དུ་འཚོ་བ་སྐྱེལ་བཞིན་པའི་བོད་པའི་ཕ་མ་ཚོས་ཀྱང་ཁ་གཡར་ས་དང་ཁག་འཇོག་ས་མང་པོ་ཞིག་བཙལ་ནས་མི་སྡོད་པར། རང་འགན་རང་གིས་ཁུར་ཏེ་རང་གི་བུ་ཕྲུག་བོད་ཕྲུག་རྣལ་མ་ཞིག་ཏུ་གསོ་སྐྱོང་བྱེད་པའི་ལས་དོན་དེ་ཨང་དང་པོར་འཇོག་དགོས། དེ་ལྟར་ལག་ལེན་སྟེང་ནས་བུ་ཕྲུག་ལ་མིག་དཔེ་ཡག་པོ་ཞིག་སྟོན་ཐུབ་པ་ཡིན་ན། བུ་ཕྲུག་གིས་ཕ་མར་མིག་ལྟོས་དང་སློབ་སྦྱོང་བྱས་ཏེ་མི་རབས་ནས་མི་རྒྱུད་ལ་ལམ་སྲོལ་དེ་རྒྱུན་སྐྱོང་བྱེད་ཐུབ་སྲིད་པ་ཡིན། དེ་ན་མི་ཚེ་དོན་དང་ལྡན་པ་ཞིག་སྐྱེལ་འདོད་པ་དང་བུ་ཕྲུག་ཚད་དང་ལྡན་པ་ཞིག་སྐྱེད་སྲིང་བྱེད་འདོད་མཁན་ཚོས་རྩེད་མོ་གཙོ་བོར་བྱས་པའི་བྱིས་པ་སྐྱོང་ཐབས་སྐོར་ལ་ཤེས་རྟོགས་བྱེད་དགོས་པར་སེམས་སོ།།