སྲིད་འཛིན་ཊོམ་ཕུ་མཆོག་གིས་སྲིད་དབང་རྩིས་སྤྲོད་ཀྱི་ལས་མགོ་རྩོམ་གྱི་འདུག

ཨ་རིའི་སྲིད་འཛིན་ཊོམ་ཕུ་མཆོག་གི་ཕྱོགས་ནས་སྲིད་འཛིན་འོས་བསྡུའི་གྲུབ་འབྲས་ངོས་བཞེས་མ་གནང་བར་བརྟེན་མངའ་སྡེ་ཁག་ཅིག་གི་འོས་ཤོག་ལ་བསྐྱར་དུ་གྲངས་བཤེར་བྱེད་ཀྱི་ཡོད་ཀྱང་བདམས་ཐོན་སྲིད་འཛིན་རྗོ་བྷའེ་ཌིན་མཆོག་ལ་སྲིད་དབང་རྩིས་སྤྲོད་ཀྱི་ལས་རིམ་མགོ་འཛུགས་ཀྱི་ཡོད་འདུགདེ་རིང་ནེའུ་ཡོག་དུས་བབ་ཀྱིས་གནས་ཚུལ་སྤེལ་བ་ལྟར་ན། ཨ་རིའི་མངའ་སྡེ་མི་ཆི་གྷན་(Michigan) གྱིས་མངའ་སྡེ་དེའི་སྲིད་འཛིན་འོས་བསྡུའི་རྒྱལ་ཁ་ཇོ་བྷའེ་ཌིན་མཆོག་ལ་ཐོབ་ཡོད་པའི་གཞུང་འབྲེལ་གསལ་བསྒྲགས་བྱས་པ་དང་བསྟུན། ཁ་སང་ཕྱི་ཚེས་ ༢༣ ཉིན་སྲིད་འཛིན་ཊོམ་ཕུ་མཆོག་གི་འཛིན་སྐྱོང་གིས་བདམས་ཐོན་སྲིད་འཛིན་ཇོ་བྷའེ་ཌིན་མཆོག་ལ་སྲིད་དབང་རྩིས་སྤྲོད་ཀྱི་བརྒྱུད་རིམ་མགོ་འཛུགས་བྱ་རྒྱུར་མོས་མཐུན་བྱས་ཡོད་འདུག

ཁ་སང་ཨ་རིའི་སྲིད་འཛིན་གྱི་སྲིད་དབང་རྩིས་སྤྲོད་ཐད་བཀོད་འདོམས་བྱེད་མཁན་གྱི་ལས་ཁུངས་ General Services Administration ཀྱི་འགན་འཛིན་ལྕམ་ཨེ་མི་ལི་མུར་ཧྥེ་ Emily Murphy ཡིས། བདམས་སྲིད་འཛིན་ཇོ་བྷའེ་ཌིན་མཆོག་ལ་གཞུང་འབྲེལ་ཕྱག་ཡིག་ཅིག་བཏང་བའི་ནང་། ཁོང་མོར་ཕོ་བྲང་དཀར་པོས་སྲིད་དབང་རྩིས་སྤྲོད་ཀྱི་བརྒྱུད་རིམ་དེ་ཉིད་འགོར་འགྱངས་བྱེད་དགོས་པའི་གནོན་ཤུགས་སྤྲད་མེད་པ་མ་ཟད། ད་ཐེངས་ཕྱོགས་ཞེན་དང་ཞེད་སྣང་གི་འོག་ནས་དངོས་སུ་རྩིས་སྤྲོད་བྱ་རྒྱུའི་ཐག་གཅོད་བྱས་མེད་པར། ཉེ་ལམ་འོས་བསྡུའི་གྲུབ་འབྲས་དང་འབྲེལ་བའི་ཁྲིམས་ཁང་གི་བཅད་ཁྲ་དང་། འོས་བསྡུའི་གྲུབ་འབྲས་ཀྱི་མཐའ་མའི་ཐག་གཅོད་བཅས་ལ་གཞིར་བཞག་སྟེ་རང་གིས་ཐག་གཅོད་བྱས་པ་ཞིག་ཡིན་སྐོར་བཀོད་འདུག་ལ། ཁོང་མོས་ཨ་རིའི་འབྲེལ་ཡོད་ལས་ཁུངས་ཁག་ལ་སྲིད་དབང་རྩིས་སྤྲོད་ཀྱི་ལས་ཀ་དངོས་སུ་མགོ་བརྩམ་དགོས་པའི་བཀའ་ཡང་བཏང་ཚར་ཡོད་འདུག

ལས་ཁུངས་དེའི་གཞུང་འབྲེལ་ཐག་གཅོད་དང་བསྟུན། སྲིད་འཛིན་ཊོམ་ཕུ་མཆོག་སྐུ་སྒེར་གྱི་སྤྱི་ཚོགས་དྲ་ལམ་ཊུ་ཝེ་ཊིར་སྟེང་། སྲིད་འཛིན་འོས་བསྡུའི་གྲུབ་འབྲས་ལ་མུ་མཐུད་ནས་འཐབ་རྩོད་བྱ་རྒྱུ་ཡིན་ཡང་། རྒྱལ་ཁབ་ཀྱི་ཁེ་ཕན་གྱི་ཆེད་དུ། ངས་ཨེ་མི་ལི་ (Emily Murphy) དང་ཁོང་མོའི་ལས་ཚོགས་ལ་སྔོན་འགྲོའི་ཁྲིམས་སྒྲིག་གཞིར་བཟུང་གང་བྱ་དགོས་པ་རྣམས་བྱེད་དགོས་པའི་བསམ་ཚུལ་འདོན་གྱི་ཡོད་ལ། ངས་རང་གི་ལས་ཚོགས་ལའང་དེ་ལྟར་གདམས་ཡོད། ཅེས་བརྗོད་དེ། ཨ་རིའི་ལྷན་ཁང་ཁག་གི་གཞི་རྩའི་བྱེད་སྒོ་ལ་བཀོད་འདོམས་བྱེད་པའི་རང་དབང་ཅན་གྱི་ལས་ཁུངས་ General Services Administration ངོས་ནས་སྲིད་དབང་རྩིས་སྤྲོད་ཀྱི་བརྒྱུད་རིམ་དག་མགོ་བརྩམ་ཆོག་པའི་བརྡ་ལན་སྤྲད་གནང་ཡོད་འདུག ཡིན་ན་ཡང་ཊོམ་ཕུ་མཆོག་གིས་སྲིད་འཛིན་འོས་བསྡུའི་གྲུབ་འབྲས་ལ་མུ་མཐུད་ནས་འཐབ་རྩོད་བྱ་རྒྱུ་ཡིན་སྐོར་དང་། ད་ལྟ་རང་ཉིད་འོས་བསྡུར་ཕམ་ཁ་ཤོར་བ་ངོས་ལེན་བྱ་རྒྱུ་མིན་སྐོར་བསྒྲགས་ཡོད་འདུག

ཉེ་ཆར་སྤྱི་མཐུན་ཚོགས་པའི་གྲོས་ཚོགས་འཐུས་མི་ཚུད་པའི་ཨ་རིའི་གནད་ཡོད་མི་སྣ་མང་པོས་ཨེ་མི་ལི་ (Emily Murphy)ལ་སྲིད་དབང་རྩིས་སྤྲོད་ཀྱི་བརྒྱུད་རིམ་དུས་ལྟར་མགོ་བཙུགས་ཐུབ་མེད་པ་དེར་སྐྱོན་བརྗོད་ཤུགས་ཆེན་པོ་བྱས་ཡོད་པ་དང་། དབྱེ་ཞིབ་པས་ད་ལན་གྱི་ཐག་གཅོད་འདིས་སྲིད་འཛིན་ཊོམ་ཕུ་མཆོག་གིས་ཇོ་བྷའེ་ཌིན་མཆོག་ལ་སྲིད་དབང་དངོས་སུ་རྩིས་སྤྲོད་བྱ་རྒྱུའི་བརྒྱུད་རིམ་མགོ་བཙུགས་ཟིན་པར་ངོས་འཛིན་བྱེད་ཀྱིན་འདུག་ལ། ད་ལྟའི་ཆར་སྲིད་འཛིན་ཊོམ་ཕུ་མཆོག་ལ་འོས་བསྡུའི་གྲུབ་འབྲས་རྩིས་མེད་གཏོང་རྒྱུའི་གདམ་ཀ་དེ་ཙམ་ལྷག་མེད་སྐོར་བཤད་ཀྱི་འདུགསྲིད་འཛིན་ཊོམ་ཕུ་མཆོག་གིས་ད་ལྟ་ཇོ་བྷའེ་ཌིན་མཆོག་ལ་རྒྱལ་ཁ་ཐོབ་པའི་ཨ་རིའི་མངའ་སྡེ་པེན་སིལ་ཝེ་ནི་ཡ་(Pennsylvania) དང་། མི་ཆི་གྷན། ཇོར་ཇི་ཡ་(Georgia)། ཝི་སི་ཁོན་སིན་ (Wisconsin) བཅས་ཀྱི་གྲུབ་འབྲས་ལ་རྩོད་གླེང་བྱས་ཏེ་མངའ་སྡེ་སོ་སོའི་ཆེས་མཐོའི་ཁྲིམས་ཞིབ་ཁང་ལ་གྱོད་གཏུག་བྱས་ཡོད་ཀྱང་། ཟླ་འདིའི་ཕྱི་ཚེས་ ༢༢ ཉིན་པེན་སིལ་ཝེ་ནི་ཡ་མངའ་སྡེའི་ཁྲིམས་ཁང་གིས་གྱོད་གཏུག་ལ་བདེན་དཔང་ངོ་མ་མེད་པའི་སྒོ་ནས་མངའ་སྡེ་དེའི་འོས་ཤོག་ས་ཡ་ ༧ ལྷག་རྩིས་མེད་གཏོང་ཐབས་བྱས་ཡོད་སྐོར་གྱི་ཐག་གཅོད་བྱས་ཡོད་པ་དང་། དེ་བཞིན་ཇོར་ཇི་ཡའི་ནང་འོས་ཤོག་བསྐྱར་དུ་གྲངས་བཤེར་བྱས་རྗེས་བྷའི་ཌིན་མཆོག་ལ་བསྐྱར་དུ་རྒྱལ་ཁ་ཐོབ་མིན་ལ་མ་ལྟོས་པར། ཊོམ་ཕུའི་ཕྱོགས་གཏོགས་ནས་ཡང་བསྐྱར་འོས་ཤོག་གྲངས་བཤེར་དགོས་སྐོར་བརྗོད་ཡོད་པ་དང་། ཝི་སི་ཁོན་སིན་མངའ་སྡེའི་ནང་འོས་ཤོག་བསྐྱར་དུ་གྲངས་བཤེར་བྱེད་མུས་སྒང་ལ་ཡིན་འདུག ད་ལྟའི་ཆར་སྲིད་འཛིན་ཊོམ་ཕུ་མཆོག་གི་འོས་བསྡུའི་གྲུབ་འབྲས་ལ་དོགས་སློང་དང་གྱོད་གཏུག་གི་ལས་འགུལ་དེར་སྤྱི་མཐུན་ཚོགས་པའི་ཚོགས་མི་མང་པོས་རྒྱབ་སྐྱོར་བྱེད་ཀྱི་ཡོད་ཀྱང་། དམངས་གཙོ་ཚོགས་པ་གཙོས་པའི་སྤྱི་མཐུན་ཚོགས་པའི་གནད་ཡོད་མི་སྣ་དང་ཆེད་མཁས་སློབ་སྟོན་པ། དེ་བཞིན་ཊོམ་ཕུའི་ཕྱོགས་གཏོགས་མི་སྣ་མི་ཉུང་བས་ཊོམ་ཕུ་མཆོག་ལ་འོས་བསྡུའི་གྲུབ་འབྲས་ངོས་ལེན་བྱ་རྒྱུའི་དགོས་འདུན་བཏོན་ཡོད་འདུག

ད་ལྟའི་ཆར་གཞུང་འབྲེལ་གྱི་ཨ་རིའི་སྲིད་འཛིན་འོས་བསྡུ་ཆེན་མོའི་གྲུབ་འབྲས་གསལ་བསྒྲགས་ཐོན་མེད་ནའང་། རྒྱལ་ཡོངས་ཀྱི་གསར་ཁང་ཆེ་ཁག་གི་གནས་ཚུལ་ལྟར་ན། ཨ་རིའི་འོས་འདེམས་ལྷན་ཚོགས་ཀྱི་ཞབས་བཀྱག་ཁྱོན་ ༥༣༨ ཁྲོད་ནས་ཇོ་བྷའེ་ཌིན་མཆོག་ལ་ ༣༠༦ དང་། སྲིད་འཛིན་ཊོམ་ཕུ་མཆོག་ལ་ ༢༣༢ ཐོབ་ཡོད་ཅིང་། རྒྱལ་ཡོངས་ཀྱི་འོས་ཤོག་ཐད་ནས་བཤད་ན་བྷའེ་ཌིན་མཆོག་ལ་ཊོམ་ཕུ་ལས་འོས་གྲངས་ས་ཡ་ ༦ གིས་མང་བ་ཐོབ་ཡོད་འདུག

གསར་འགོད་པ། པ་སངས་ཚེ་རིང་།