འཇིག་རྟེན་བཀོད་པ་པོ་ནི་བྱམས་བརྩེ་གཞལ་ཐབས་བྲལ་བའི་དཀོན་མཆོག་ཡིན་པ་དང་ང་ཚོ་འགྲོ་བ་མི་ཚང་མ་དཀོན་མཆོག་གི་བྱིན་རླབས་འོག་གི་མཆེད་གྲོགས་གཅེན་གཅུང་དང་དཀོན་མཆོག་གི་བྱིས་པ་ཡིན་ཞེས་གསུངས། 
འཇར་མན་གྲོང་ཁྱེར་(Potsdam)ནང་རྟེན་གཞི་བྱས་པའི་ཨ་ཡེན་སུ་ཐན་གླེང་སྟེགས་ (Einstein Forum) ཞེས་པའི་ཚོགས་པས་ཇི་ལྟར་གསོལ་འདེབས་ཞུས་དོན་ལྟར། དེ་རིང་ཕྱི་ཚེས་ ༢༥ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་རྒྱལ་བའི་ཕོ་བྲང་ནས་ཐད་ཀར་དྲ་ལམ་བརྒྱུད་༼སྙིང་རྗེ་དང་ཚན་རིག ནང་ཆོས་༽ཞེས་པའི་བརྗོད་གཞིའི་ཐོག་བཀའ་ཆོས་དབུ་འཛུགས་ཞུས་གནང་སོང་བ་དང་། སྐབས་དེར་༧གོང་ས་མཆོག་གིས། ངོས་ནས་ཁྱེད་ཚོ་ལཱ་ཊི་ཝེ་ཡ་(Latvia)དང་ལི་ཐོ་ནེ་ཡ་(Lithuania)། ཨེ་སི་ཊོ་ནེ་ཤི་ཡ་(Estonia)བཅས་ལུང་པ་ཆུང་ཆུང་དེ་ཚོ་གསལ་བོ་ཞེ་དྲགས་དྲན་གྱི་འདུག ངོས་རང་ཐོག་མར་སུ་ཝེ་ཌན་བརྒྱུད་ཧྥི་ལན་ཌིའི་ནང་ངལ་ཅུང་ཙམ་གསོས་རྗེས། ཨེ་སི་ཊོ་ནེ་ཤི་ཡའི་ནང་བསླེབས་པ་རེད། བྷལ་ཊེག་མཚོའི་ཁུལ་གྱི་དམངས་གཙོའི་རྒྱལ་ཁབ་དེ་ཚོ་ཆུང་ཆུང་ཡིན་ཡང་། ཁོར་ཡུག་ཧ་ཅང་གུ་ཡངས་ཡིན་པས་ལུང་པ་ཧ་ཅང་མཛེས་སྡུག་ལྡན་པ་རེད། ངོས་ནས་ལོ་ཤས་རིང་ལཱ་ཊི་ཝི་ཡའི་ཨུ་རུ་སུའི་ཆོས་ཞུ་བ་རྣམས་ལ་ཆོས་བཤད་རྒྱུ་བྱུང་། དེ་རིང་ང་ཚོ་ལུས་པོའི་ཆ་ནས་མཉམ་དུ་མེད་ཀྱང་དྲ་ལམ་བརྒྱུད་ཕན་ཚུན་མཐོང་ཐུབ་པ་དང་བགྲོ་གླེང་བྱེད་ཆོག་གི་ཡོད་པ་རེད། ཅེས་གསུངས།
དེ་རྗེས་ཚན་རིག་དང་ནང་ཆོས། སྙིང་རྗེ་ཞེས་པའི་བརྗོད་གཞི་དང་འབྲེལ་༧གོང་ས་མཆོག་གིས། འཛམ་གླིང་གི་ཆོས་ལུགས་ཚང་མས་བྱམས་སྙིང་རྗེ་གསུང་གི་ཡོད། རྒྱུ་མཚན་ནི་སེམས་པ་བཟང་པོ་དང་བཟོད་སྒོམ། དེ་བཞིན། འདོད་ཆུང་ཆོག་ཤེས་དང་རང་ཁྲིམས་སྲུང་དགོས་པ་སོགས་ནི་ཆོས་ལུགས་ཚང་མའི་ཐུན་མོང་གི་བསླབ་བྱ་ཆགས་ཡོད། ལྟ་གྲུབ་ཀྱི་ཐོག་ནས་འཇིག་རྟེན་བཀོད་པ་པོ་འདོད་མཁན་སོགས་ཆོས་ལུགས་ཕན་ཚུན་མི་འདྲ་བའི་ཕྱོགས་ཡོད། འཇིག་རྟེན་བཀོད་པ་པོ་འདོད་མཁན་གྱི་ཆོས་ལུགས་གཞིར་བཞག་བྱས་ན། འཇིག་རྟེན་བཀོད་པ་པོ་ནི་བྱམས་བརྩེ་གཞལ་ཐབས་བྲལ་བའི་དཀོན་མཆོག་ཡིན་པ་དང་། ང་ཚོ་འགྲོ་བ་མི་ཚང་མ་དཀོན་མཆོག་གི་བྱིན་རླབས་འོག་གི་མཆེད་གྲོགས་གཅེན་གཅུང་དང་དཀོན་མཆོག་གི་བྱིས་པ་ཡིན། དེར་བརྟེན། འཇིག་རྟེན་བཀོད་པ་པོ་འདོད་མཁན་ཚོས་ང་ཚོ་ཚང་མ་དཀོན་མཆོག་གཅིག་གི་འོག་ནས་བྱུང་བའི་གཅེས་གཅུང་ལ་ངོས་འཛིན་བྱེད་ཀྱི་ཡོད་པ་དང་། གཙོ་བོ་རྒྱ་གར་ནས་བྱུང་བའི་འཇིག་རྟེན་བཀོད་པ་པོ་མི་འདོད་མཁན་གྱི་ཆོས་ལུགས་དང་ངོས་རང་ནས་འགྲོ་བ་མིའི་ཆེས་རིན་ཐང་བྲལ་བ་ནི་བྱམས་བརྩེ་ཡིན་པར་ངོས་འཛིན་གྱི་ཡོད། ད་ལྟ་ཚན་རིག་པས་ཀྱང་ང་ཚོ་སྤྱི་ཚོགས་སེམས་ཅན་ཡིན་པ་དང་། སྐྱེ་དངོས་རིག་པའི་ཐོག་ནས་སྤྱི་ཚོགས་སེམས་ཅན་ཚང་མར་གཅིག་གྱུར་གྱི་འདུ་ཤེས་ཟབ་མོ་ཡོད་པ་བཤད་ཡོད། དེ་བས། ཁྱེད་ཀྱི་སྤྱི་ཚོགས་ཀྱི་བདེ་སྡུག་སྤྱི་ཚོགས་གཞན་གྱི་བདེ་སྡུག་ལ་གཅིག་རྟེན་ཆགས་ཀྱི་ཡོད། མདོར་ན་ང་ཚོ་ཚང་མ་དང་བྱ་བྱེའུ་ཞིག་གི་བདེ་སྡུག་དེ་སྤྱི་ཚོགས་ཧྲིལ་པོའི་བདེ་སྡུག་ལ་བརྟེན་བསྡད་པ་ཞིག་ཡིན། ཞེས་གསུངས།
གོ་མཚོན་དང་དམག་མི་མེད་པའི་འཛམ་གླིང་ཞིག་བསྐྲུན་ཐབས་དགོས་སྐོར་ལ་མགོན་པོ་གང་ཉིད་མཆོག་གིས། འཇིག་རྟེན་གྱི་ཆོས་ལུགས་ཚང་མ་མིས་བསྐྲུན་ཡིན་པ་དང་། བྱམས་སྙིང་རྗེ་དང་འཚེ་མེད་ཞི་བ་ནི་ཆོས་ལུགས་ཚང་མའི་བསླབ་བྱ་ཡིན་ཡང་། དེང་སྐབས་འཛམ་གླིང་ནང་ཁོང་ཁྲོ་དང་ཕྲག་དོགས། འཇིགས་སྣང་སོགས་ཀྱིས་དཀའ་ངལ་མང་པོ་བསྐྲུན་གྱི་ཡོད་སྟབས། རྡུལ་ཕྲན་མཚོན་ཆ་གཙོས་པའི་ཕྱིའི་དངོས་པོའི་མཚོན་ཆ་མང་པོ་བཟོ་ཡི་ཡོད་པ་རེད། མཐར་གཏུག་ན་དེ་ཚོ་ཚང་མ་མིའི་དབང་ཤེས་ཀྱི་རྩལ་ལས་བྱུང་བ་རེད། ཆེས་འཇིགས་སྐྲག་དང་ཞེ་སྡང་གི་རྐྱེན་པས་མཚོན་ཆ་བཟོས་ཏེ་ཞི་བདེ་མེད་པར་བཟོ་ཡི་ཡོད། འོན་ཀྱང་། དགོས་འོས་པ་ཞིག་ལ་དེ་རིང་ཁ་སང་འཛམ་གླིང་ནང་རྡུལ་མཚོན་མེད་པའི་འཇིག་རྟེན་ཞིག་བསྐྲུན་པར་རྒྱབ་སྐྱོར་གནང་མཁན་མང་པོ་བྱུང་གི་ཡོད་པ་དེ་ཧ་ལས་པའི་ཡག་པོ་རེད་ལ། དཀོན་མཆོག་ཡོད་པ་དང་མེད་པར་འདོད་མཁན་གྱི་ཆོས་ལུགས་ཚང་མས་གསུང་གི་ཡོད་པ་ལྟར། ང་ཚོ་ཚང་མ་འགྲོ་བ་མི་གཅིག་གྱུར་ཡིན་པའི་འདུ་ཤེས་སེམས་ལ་བཅངས་ཏེ། མཐའ་མར་ང་ཚོས་དམག་མི་མེད་པའི་འཛམ་གླིང་ཞིག་བསྐྲུན་པར་བསམ་བློ་གཏོང་རྒྱུ་གལ་ཆེན་པོ་ཡིན། ཞེས་གསུངས།
དྲི་བ་དྲིས་ལན་སྐབས་ལས་འབྲས་དེ་མ་འོངས་པར་ཚན་རིག་དང་མཐུན་པ་ཞིག་ཡོང་ཐུབ་མིན་དྲིས་པར་༧གོང་ས་མཆོག་གིས། ལས་འབྲས་ཟེར་ན་བྱ་ལ་གོ་དགོས་པ་དང་བྱ་བ་དེ་སྐད་ཅིག་སྐད་ཅིག་ལ་འགག་འགྲོ་བའི་ཆོས་ཉིད་ཅིག་ཡིན། འོན་ཀྱང་། ང་ཚོའི་སྐད་དང་ལུས་པོ། དེ་བཞིན་བསམ་བློའི་བྱ་བ་བཅས་ཀྱིས་སེམས་ལ་བག་ཆགས་ཟབ་མོ་ཞིག་བསྐྲུན་གྱི་ཡོད། བག་ཆགས་ཟབ་མོ་དེ་ཚེ་རབས་གཅིག་ནས་གཅིག་ལ་འཁྱེར་འགྲོ་ཡི་ཡོད། ལས་འབྲས་ཀྱིས་བསྐྲུན་པའི་བག་ཆགས་ཟབ་མོ་དེ་དག་བསྐལ་བ་དུ་མའི་རིང་ང་ཚོའི་སེམས་རྒྱུད་ལ་འཇག་གི་ཡོད། སངས་རྒྱས་ཀྱི་གོ་འཕང་འཐོབ་པར་དགེ་བའི་བྱ་བ་མང་པོ་སྒྲུབ་སྟེ་ལས་གསོག་དགོས་པ་དང་། ལས་འབྲས་གཞིར་བཞག་ཐོག་དགེ་བའི་བྱ་བ་མང་པོ་བསྒྲུབས་པ་ལ་བརྟེན་ནས་སངས་རྒྱས་ཀྱི་གོ་འཕང་འཐོབ་ཀྱི་ཡོད་པ་རེད། ཅེས་དང་། ཚན་རིག་པ་དང་ལྷན་དུ་གྲོས་བསྡུར་བྱུང་བ་བརྒྱུད་གནད་དོན་མང་པོ་ཁ་གསལ་བྱུང་བ་དང་། ཁ་སང་དེ་རིང་ཚན་རིག་པ་ཚུད་པའི་མཁས་དབང་འདྲ་མིན་མཉམ་དུ་གྲོས་བསྡུར་བྱེད་སྐབས། དེ་སྔོན་རྒྱ་གར་གྱི་མཁས་དབང་ཞིག་གིས་འཛམ་གླིང་ལེབ་ལེབ་རེད་གསུངས་ཡོད་པར་ངོས་ལེན་མེད་སྐོར་དང་། དཔལ་ནཱ་ལནྜའི་མཁས་པའི་དབང་པོ་ཚོས་ཞིབ་འཇུག་མཐིལ་ཕྱིན་པ་བྱས་ནས་ནང་པའི་གསུང་རབ་མང་པོ་བྲིས་ཡོད་སྐོར་སོགས་གསུངས།
གསར་འགོད་པ། སྐལ་བཟང་སྦྱིན་པ།
