སྙན་གྲཊ་ཅན་གྱི་རྐང་སྤོལ་རྩེད་མོ་བ་ཞིག་འདས་གྲོངས་སུ་ཕྱིན།

འཛམ་གླིང་ནང་སྙན་གྲགས་ཆེ་བའི་ཨར་ཇེན་ཊི་ནའི་རྐང་སྤོལ་རྩེད་མོ་བ་མེ་རེ་ཌོ་ན་སྙིང་རྩ་འགག་སྟེ་དགུང་ལོ་ ༦༠ ཡི་ཐོག་འདས་གྲོངས་སུ་ཕྱིན་པར་རྐང་སྤོལ་རྩེད་མོ་བ་དང་རྐང་སྤོལ་ལ་དགའ་མོས་བྱེད་མཁན་གྱི་མི་གྲངས་ཁྲི་ཕྲག་མང་པོས་མྱ་ངན་ཞུ་ཡི་འདུགཁ་སང་ཕྱི་ཚེས་ ༢༥ ཉིན་ལྷོ་ཨ་མེ་རི་ཁའི་རྒྱལ་ཁབ་ཨར་ཇེན་ཊི་ན་ (Argentina) ནས་ཡིན་པའི་རྒྱལ་སྤྱིའི་རྐང་སྤོལ་རྩེད་འགྲན་པ་གྲགས་ཅན་ཌི་གོ་མེ་རེ་ཌོ་ན་ (Diego Maradona) སྙིང་རྩ་འགག་པའི་རྐྱེན་གྱིས་རང་ཁྱིམ་དུ་འདས་གྲོངས་སུ་ཕྱིན་ཡོད་སྟབས། དེང་སྐབས་འཛམ་གླིང་སྙན་གྲགས་རྒྱས་བཞིན་པའི་རྐང་སྤོལ་རྩེད་འགྲན་པ་མེ་སི་ ( lionel Messi) དང་རོ་ནལ་ཌོ་(Cristiano Ronaldo)སོགས་རྐང་སྤོལ་ཆེད་ལས་བ་དང་རྐང་སྤོལ་ལ་དགའ་མོས་ཡོད་མཁན་ཁྲི་ཕྲག་མང་པོས་བློ་ཕམ་ཆེན་པོས་མྱ་ངན་ཞུ་བཞིན་འདུག་ལ། ཨར་ཇེན་ཊི་ན་ཡིས་ཉིན་གྲངས་གསུམ་རིང་གཞུང་འབྲེལ་མྱ་ངན་གུས་འདུད་ཞུ་རྒྱུ་ཡིན་སྐོར་བསྒྲགས་འདུག

མེ་རི་ཌོ་ན་འདས་གྲོངས་སུ་གྱུར་བ་དེར་ཨར་ཇེན་ཊི་ན་ཡུལ་གྱི་སྲིད་འཛིན་ཨལ་བྷར་ཊོ་ཧྥེན་ནན་ཌེ་ཛི་ (Alberto Fernandez) ཡིས་རང་གི་ཊུ་ཝེ་ཊིར་སྟེང་། ཁྱེད་ཀྱིས་ང་ཚོ་གོ་ལའི་ཡང་རྩེར་ཁྲིད་སོང་། ཁྱེད་ཀྱིས་ང་ཚོར་བདེ་སྐྱིད་བླ་ལྷག་བྱིན་བྱུང་། ཁྱེད་ནི་ཆེས་ཕུལ་དུ་བྱུང་བ་ཞིག་རེད། ཁྱེད་ཡོད་པ་ཁོ་ན་དེར་བཀའ་དྲིན་ཆེ་ཞུ་རྒྱུ་ཡིན། ཞེས་བརྗོད་འདུག

ཕྱི་ལོ་ ༡༩༨༦ ལོར་མེ་རོ་ཌོ་ན་ཡིས་སྣེ་ཁྲིད་པའི་ཨར་ཇེན་ཊིའི་རྒྱལ་ཡོངས་རྐང་སྤོལ་རུ་ཁག་གིས་གོ་ལའི་རྐང་སྤོལ་རྩེད་འགྲན་གྱི་རྒྱལ་ཁ་ཆེན་པོ་བླངས་ཏེ། མེ་རོ་ཌོ་ན་ཞེས་པའི་མཚན་སྙན་དེ་འཛམ་གླིང་ཡོངས་སུ་ཁྱབ་སྟེ། འཛམ་གླིང་རྐང་སྤོལ་ལོ་རྒྱུས་ཁྲོད་ཀྱི་འགྱུར་མེད་རྡོ་རིང་ཞིག་ཏུ་གྱུར་ཡོད་པ་རེད། ད་ལན་མེ་རོ་ཌོ་ན་འདས་གྲོངས་སུ་གྱུར་པ་དེར། ཁོང་དང་ལྷན་དུ་རྐང་སྤོལ་རྩེ་མྱོང་བའི་ཨར་ཌིལ་སི་ (Ardiles) ཞེས་པས། མེ་རེ་ཌོ་ན་ནི་ཨར་ཇེན་ཊི་ན་ཙམ་དུ་མ་ཟད། འཛམ་གླིང་ཡོངས་ནང་ལྷ་ལྟ་བུ་ཞིག་ཡིན། ཁོང་ནི་རྐང་སྤོལ་གྱི་ཆེས་ཕུལ་དུ་བྱུང་བའི་མི་སྣ་ཞིག་ཏུ་གདེང་འཇོག་བྱ་ངེས་རེད། རོ་ནལ་ཌོ་དང་མེ་སི་ལྟ་བུས་རང་ཉིད་ལ་མི་མང་གི་དགའ་མོས་དེ་འདྲ་འཐོབ་རྒྱུའི་རྨི་ལམ་ཡང་གཏོང་ཐུབ་ཀྱི་མེད། ཅེས་གདེང་འཇོག་མཐོན་པོ་བྱས་འདུག་ལ། ཕྱི་ལོ་ ༢༠༠༤ ཡས་མས་སུ་སྙན་གྲགས་ཆགས་པའི་རྐང་སྤོལ་རྩེད་འགྲན་པ་གྲགས་ཅན་ཌེ་ཝིད་བྷེ་ཁམ་(David Beckham) གྱིས་ཀྱང་། དེ་རིང་ནི་ཨར་ཇེན་ཊི་ན་དང་རྐང་རྩེད་སྤོ་ལོར་མཚོན་ན་ཡིད་སྐྱོ་བའི་ཉིན་མོ་ཞིག་ཡིན་སྐོར་བརྗོད་འདུགསྙན་གྲགས་ཅན་གྱི་རྐང་སྤོལ་རྩེད་འགྲན་པ་ཁོང་འདས་གྲོངས་སུ་གྱུར་བ་དེར་ཨར་ཇེན་ཊི་ནའི་མི་རབས་རྒན་གཞོན་བར་གསུམ་གྱིས་མྱ་ངན་དང་འབྲེལ། ཁ་སང་ཡུལ་དེར་ཚོགས་གཏན་འཁེལ་བའི་རྐང་སྤོལ་རྩེད་འགྲན་ཕར་འགྱངས་བྱས་ཡོད་པ་མ་ཟད། ཁོང་དང་རྐང་སྤོལ་ལ་དགའ་མོས་བྱེད་མཁན་གྱིས་མི་བརྒྱ་ཕྲག་མང་པོ་ཡུལ་དེའི་གྲོང་ཁྱེར་བྷུ་ནོ་སི་ཨེར་སི་ (Buenos Aires) ལ་ཡོད་པའི་རྐང་སྤོལ་རྩེད་ཐང་གྱི་མདུན་ཐང་དུ་འཛོམས་ཏེ་མྱ་ངན་གུས་འདུད་ཀྱི་མེ་ཏོག་དང་མཆོད་མེ་སྒྲོན་པ་སོགས་བྱས་འདུག གཞན་ཡང་མེ་རོ་ཌོ་ནའི་རྐང་སྤོལ་རུ་ཁག་ནེ་ལོ་ལི་ (Napoli Footbal Club) ཡིས་སོ་སོའི་རྩེད་ཐང་གི་གློག་རྣམས་བཀར་ཏེ་ཁོང་ལ་མྱ་ངན་ཞུས་ཡོད་འདུག

ཕྱི་ལོ་ ༡༩༧༦ ལོར་མེ་རེ་ཌོ་ན་ཨར་ཇེན་ཊི་ནའི་ཨར་ཇེན་ཊི་ནོ་སི་ཇུ་ནར་སི་ (Argentinos Juniors) ཞེས་པའི་ས་གནས་ཀྱི་རྐང་སྤོལ་རུ་ཁག་ནང་ཞུགས་པ་དང་། རིམ་པས་རྒྱལ་ཡོངས་ནང་སྙན་གྲགས་རྒྱས་ཏེ། ཡུལ་དེའི་རྐང་སྤོལ་རུ་ཁག་བྷོ་ཁ་ཇུ་ནར་སི་ (Boca Juniors) དང་། དེ་ནས་བྷར་སེ་ལོ་ན་(Barcelona Club)། ནེ་པོ་ལི་བཅས་ནང་ཞུགས་ཏེ། ཕྱི་ལོ་ ༡༩༨༦ ལོའི་གོ་ལའི་ཧྥི་ཧྥ་རྐང་སྤོལ་རྩེད་འགྲན་ (FIFA World Cup) སྟེང་ཨར་ཇེན་ཊི་ནར་རྒྱལ་ཁ་བླངས་ཡོད་ཅིང་། ཕྱི་ལོ་ ༢༠༠༠ ལོར་ཧྥི་ཧྥ་རྩེད་འགྲན་ལྷན་ཚོགས་ཀྱིས་རྐང་སྤོལ་གྱི་རྒྱལ་པོར་གྲགས་པའི་རྩེད་འགྲན་པ་པེ་ལེ་ (Pele) དང་ཁོང་གཉིས་ལ་དུས་རབས་ ༢༠ པའི་ཕུལ་བྱུང་རྩེད་འགྲན་པའི་གཟེངས་རྟགས་ཕུལ་ཡོད་པ་རེད། ཡིན་ན་ཡང་རྩེད་འགྲན་གྱི་དུས་ཡུན་རིང་མེ་རེ་ཌོ་ནས་མྱོས་རྫས་སྤྱད་པའི་རྐྱེན་གྱིས་རྐང་སྤོལ་འགྲན་བསྡུར་ནས་ཕྱིར་འབུད་བཏང་བ་དང་། ནག་ཚོགས་དང་འབྲེལ་འདྲིས་བྱུང་བ་སོགས་རྙོག་གླེང་ཆེན་པོ་བྱུང་ཡོད་ལ། ཁོང་མྱོས་རྫས་ལ་ངན་གོམས་སོང་བའི་གནད་དོན་ཡང་བསྟུད་མར་ཐོན་ཡོད་འདུག