ཕྱི་ལོ་ ༢༠༢༡ ལོའི་སྲིད་སྐྱོང་འོས་མི་བཀྲ་ཤིས་དབང་འདུས་ལགས་ཀྱིས་སྲིད་སྐྱོང་འོས་མིའི་ཁོངས་ནས་ཕྱིར་འཐེན་གནང་བ་གསལ་བསྒྲགས་གནང་འདུག
ཁ་སང་ཕྱི་ཚེས་ ༢༩ ཉིན་ཕྱི་ལོ་ ༢༠༢༡ ལོའི་སྲིད་སྐྱོང་འོས་མི་བཀྲ་ཤིས་དབང་འདུས་ལགས་ཀྱིས་རང་གི་གཞུང་འབྲེལ་འོས་བསྡུའི་དྲིལ་བསྒྲགས་ངོ་དེབ་བརྒྱུད། འདི་ལོའི་འོས་བསྡུ་འདི་ཕྱི་ལོ་ ༢༠༡༦ ལོའི་འོས་བསྡུ་ལྟར་གཞི་མེད་སྐྱོན་བརྗོད་ཀྱི་རྣམ་པར་གྱུར་པ་དེར་བློ་ཕམ་བཅས་དང་རང་ཉིད་སྲིད་སྐྱོང་འོས་མིའི་ཁོངས་ནས་ཕྱིར་འཐེན་གནང་བ་གསལ་བསྒྲགས་གནང་འདུག
འདི་གའི་གསར་འགོད་པས་གནད་དོན་འདི་དང་འབྲེལ་ནས་བཀྲ་ཤིས་དབང་འདུས་ལགས་སུ་ཞལ་པར་བརྒྱུད་བཀའ་འདྲི་ཞུས་པར་ཁོང་གིས། ཡིག་ཐོག་གསལ་བསྒྲགས་སྟེང་གང་འཁོད་པ་ལས་གཞན་དམིགས་བསལ་ཞུ་རྒྱུ་གང་ཡང་མེད་སྐོར་བརྗོད་བྱུང་ལ། ཡིག་ཐོག་གསལ་བསྒྲགས་དེའི་ནང་། གསར་འགྱུར་བརྒྱུད་ལམ་ཁག་གིས་སྲིད་སྐྱོང་འོས་མི་རྣམས་སྡིངས་ཆ་གཅིག་གི་སྟེང་བགྲོ་གླེང་གོ་སྒྲིག་ཞུས་མ་ཐུབ་པའི་དབང་གིས་དམངས་གཙོའི་འགྲོ་ལུགས་བཞིན་འོས་མི་དང་མང་ཚོགས་དབར་གོ་རྟོགས་སྤེལ་རྒྱུའི་གོ་སྐབས་ཚད་ལྡན་ཐོབ་མེད་པ་དང་། ད་ཐེངས་ཀྱང་སྤྱི་ཚོགས་ཁྲོད་གལ་ཆེའི་ལས་འཆར་ཁག་ལ་བགྲོ་གླེང་ཟབ་མོ་མེད་པར་ཕྱི་ལོ་ ༢༠༡༦ ལོའི་ལོས་བསྡུ་ལྟར་གཞི་མེད་སྐྱོན་བརྗོད་བྱས་མགོ་བརྩམས་པར་བརྟེན། དེ་ལྟ་བུའི་འཁྲུག་ཆ་དོད་པའི་སྤྱི་ཚོགས་ནང་རང་ཉིད་སྡོད་ཐབས་མེད་པས་དོན་ཆེ་སར་བསམ་ཞིབ་ཀྱིས་སྲིད་སྐྱོང་འོས་མིའི་ཁོངས་ནས་ཕྱིར་འཐེན་བྱ་རྒྱུ་ཡིན་སྐོར་བཀོད་འདུག
ཡང་གསལ་བསྒྲགས་དེའི་མཇུག་ཏུ་ཁོང་གིས་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་དགོངས་མ་འཁྲུག་པའི་ཆེད་དུ། ད་ཡོད་སྲིད་སྐྱོང་འོས་མི་རྣམས་ཀྱིས་རང་རང་གི་རྒྱབ་སྐྱོར་བ་ཚོར་འོས་བསྡུའི་དྲིལ་བསྒྲགས་ཚུལ་ལྡན་བྱེད་དུ་འཇུག་དགོས་པའི་འབོད་སྐུལ་ནན་པོ་གནང་དགོས་སྐོར་བརྗོད་འདུག
འདི་ལོའི་ཕྱི་ཟླ་ ༩ ཚེས་ ༣ ཉིན་ཕྱི་ལོ་ ༢༠༢༡ ལོའི་སྲིད་སྐྱོང་འོས་མི་ར་རྒྱ་བསྟན་འཛིན་ལགས་ཀྱིས་ཀྱང་། ཐོག་མར་རང་ཉིད་ནས་སྲིད་སྐྱོང་འོས་མིའི་ཁྲོད་ན་གཞོན་ཤེས་ཡོན་ཅན་རེ་ཟུང་སླེབས་པའི་རེ་བ་བྱས་ཀྱང་། ད་ལྟའི་འོས་མི་རྣམས་ནི་མེ་ཚེ་ཕྱེད་ཀ་གཞུང་གི་ལས་ཀ་བྱས་ནས་བསྡད་ཀྱང་དམིགས་བསལ་གྲུབ་འབྲས་མེད་པ་ཞེ་ཅིག་ཡིན་སྐོར་བརྗོད་དེ། སྲིད་སྐྱོང་འོས་མིའི་ཁོངས་ནས་ཕྱིར་འཐེན་བྱས་ཡོད་པ་རེད། བཀྲ་ཤིས་དབང་འདུས་ལགས་ལྟ་བུ་མཚོན་ན། སྤྱི་ལོ་ ༢༠༡༦ ལོའི་སྲིད་སྐྱོང་འོས་མིར་བཞེངས་ཏེ་སྔོན་འགྲོའི་འོས་བསྡུའི་སྟེང་ཁྱོན་འོས་གྲངས་ ༡༨༨༠ ལས་མ་ཐོབ་པར་བརྟེན་དངོས་གཞི་ནང་ཞུགས་ཐུབ་མེད་པ་རེད།
གསར་འགོད་པ། པ་སངས་ཚེ་རིང་།
སྐུ་ངོ་ལགས། ཁྱེད་ཕྱིར་འཐེན་པ་མ་རེད། ཡར་འཛུལ་བ་རེད། དང་གཙང་གི་ལམ་ཁ་ཞིག་ཏུ་འཛུལ་བ་རེད། རང་བདེ་གཞན་སྐྱིད་ཀྱི་ལམ་ཁ་ཞིག་ཏུ་འཛུལ་བ་རེད། ཡང་དག་པའི་ལས་དོན་ཞིག་ཏུ་ཡར་འཛུལ་བ་རེད།