ཉམ་ཐག་ཁྱིམ་ཚང་འབུམ་གཅིག་ལ་རོགས་རམ་གནང་གི་འདུག

སེར་བྱེས་ཐང་གསག་སྒོ་མོ་རིན་པོ་ཆེ་མཆོག་གིས་རྒྱ་གར་ཡུལ་མི་དང་བཙན་བྱོལ་བོད་མི་བཅས་ཉམ་ཐག་ཁྱིམ་ཚང་འབུམ་གཅིག་ལ་བཟའ་ཆས་སོགས་ཀྱིས་རོགས་རམ་གནང་སྟེ་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་སྤེལ་བཞིན་འདུགདེ་ཡང་འདི་ལོ་ཕྱི་ཟླ་༣ པ་ནས་བཟུང་རྒྱ་གར་ནང་ཏོག་དབྱིབས་གཉན་རིམས་ཁྱབ་པའི་རྐྱེན་གྱིས་དཔལ་འབྱོར་གྱི་གནས་སྟངས་ཞན་པའི་མི་རྣམས་ཀྱི་འཚོ་བ་དང་འཕྲོད་བསྟེན་སོགས་གང་ཅིར་དཀའ་ངལ་ཆེན་པོ་འཕྲད་བཞིན་ཡོད་སྟབས། རྒྱ་གར་ལྷོ་ཕྱོགས་ཀྱི་དགོན་སྡེ་ཁག་དང་བོད་མིའི་སྤྱི་ཚོགས་ཀྱི་ངོས་ནས་རྒྱ་གར་ཡུལ་མི་ཉམ་ཐག་ཚོར་འཚོ་བའི་ཐད་རོགས་རམ་གནང་བཞིན་ཡོད་པ་ལྟར། ཉེ་སྔོན་སེར་བྱེས་ཧར་གདོང་ཐང་གསག་སྒོ་མོ་རིན་པོ་ཆེ་མཆོག་གི་བླ་བྲང་དང་I Save A life ངས་ཚེ་སྲོག་བསྐྱབས། ཞེས་པའི་སྤྱི་ཚོགས་བདེ་རྩའི་ཚོགས་པ་མཉམ་འབྲེལ་ཐོག སྦེལ་ཀོབ་བོད་མིའི་གཞིས་ཆགས་ཁུལ་ནས་འགོ་བཙུགས་ཏེ། རྒྱ་གར་རྒྱལ་ཡོངས་ཀྱི་བོད་མི་གནས་ཡུལ་ས་གནས་ཡོངས་ལ་བོད་མི་ཚུད་པའི་རྒྱ་གར་ཡུལ་མི་ཉམ་ཐག་ཁྱིམ་ཚང་འབུམ་གཅིག་ལ་འཚོ་བའི་རོགས་རམ་གནང་རྒྱུའི་གཞི་རྒྱ་ཆེ་བའི་སྤྱི་ཚོགས་ཕན་བདེའི་ལས་འགུལ་ཞིག་འགོ་འཛུགས་གནང་འདུག

ལྷོ་ཕྱོགས་སྦེལ་ཀོབ་ཁུལ་དུ་བོད་མི་དང་རྒྱ་གར་ཡུལ་མི་བཅས་ཁྱིམ་ཚང་ཆིག་སྟོང་ལ་རོགས་རམ་གནང་རྒྱུའི་འཆར་གཞི་ཡོད་པ་ནས་ད་བར་རྒྱ་གར་ཡུལ་མི་ཁྱིམ་ཚང་བཞི་བརྒྱ་བརྒལ་བར་བར་ཟླ་བ་གཅིག་ཙམ་གདེང་པའི་སྤུས་ཀ་ལེགས་པའི་འབྲས་དང་ཨ་བྲ་སྣུམ་སོགས་སྣ་ཁ་༡༢ ཡོད་པའི་བཟའ་ཆས་རོགས་རམ་གནང་ཟིན་ཡོད་པ་མ་ཟད། ཟླ་འདིའི་ཕྱི་ཚེས་༢༨ ཉིན་སྦེལ་ཀོབ་གཞིས་ཆགས་གཉིས་ནང་གི་འཚོ་བའི་གནས་སྟངས་ཅུང་ཞན་པའི་བོད་མིའི་ཁྱིམ་ཚང་༨༠ ལ་ཟླ་བ་གཅིག་ལ་འདང་ངེས་ཀྱི་བཟའ་ཆས་སྣ་ཁ་༡༠ རོགས་རམ་གནང་བ་དང་།  ད་དུང་མུ་མཐུད་སྦེལ་ཀོབ་གཞིས་ཆགས་ཉེ་ཁུལ་རྒྱ་གར་ཡུལ་མི་ཉམ་ཐག་ཚོར་རོགས་རམ་གནང་བཞིན་འདུག

དེའི་སྐོར་ལ་སེར་བྱེས་ཐང་གསག་སྒོ་མོ་རིན་པོ་ཆེར་རྒྱ་གར་བཀའ་དྲིན་རྗེས་དྲན་དང་འབྲེལ་བའི་རོགས་རམ་གྱི་ལས་འགུལ་དེ་སྤེལ་དགོས་དོན་སྐོར་བཅར་འདྲི་ཞུས་པར་རིན་པོ་ཆེ་མཆོག་གིས། དེ་ནི་གཙོ་བོ་རྒྱ་གར་གཞུང་མང་གིས་ང་ཚོ་བོད་མི་སྐྱབས་བཅོལ་བ་ཚོར་མི་ལོ་༦༠ ལྷག་རིང་གནས་ཚང་གཡར་བ་དང་རོགས་རམ་གནང་བ་བཅས་ལ་བརྟེན་ནས་ད་ལྟ་ང་ཚོ་བོད་པའི་སྤྱི་ཚོགས་དེ་ཧྲ་ཐག་ཐག་ཆགས་ཐུབ་པ་རེད། བྱས་ཙང་ད་ལྟ་ནད་ཡམས་དེའི་རྐྱེན་པས་རྒྱ་གར་ཡུལ་མི་ཚོར་དཀའ་ངལ་འཕྲད་སྐབས་གང་ཐུབ་རོགས་རམ་ཞིག་བྱས་ཏེ། ཁོང་ཚོའི་བཀའ་དྲིན་དྲན་པའི་སྒོ་ནས་ཐུགས་རྗེ་ཆེ་ཞུའི་བྱེད་སྒོ་དེ་སྤེལ་བ་ཞིག་ཡིན། སྤྱིར་བཏང་ལོ་མང་པོའི་གོང་ང་རང་སེ་རར་སློབ་གཉེར་བྱེད་སྐབས་གང་ཅིར་གནས་སྟངས་སྐྱོ་པོ་ཡིན་པ་དང་། དེ་བཞིན་ཉེ་འཁོར་རྒྱ་གར་ཡུལ་མི་ཚོ་ཡང་ཧ་ཅང་སྐྱོ་པོ་རེད། བྱས་ཙང་ང་རང་གིས་ག་དུས་ཡིན་ཡང་མ་འོངས་པར་ངས་ཁོ་ཚོར་རོགས་པ་ཞིག་བྱེད་ཐུབ་ན་བསམ་པའི་བསམ་བློ་མང་པོ་འཁོར་མྱོང་། ཕྱིས་སུ་ང་རང་ཕྱི་རྒྱལ་ཡུལ་གྲུ་ཁག་ལ་ཆོས་བཤད་དང་ཆབས་ཅིག་ངས་ཚེ་སྲོག་བསྐྱབས་ཞེས་པའི་ཚོགས་པ་དེ་བཙུགས་པ་ཡིན། ད་རེས་རྒྱ་གར་ཡུལ་མི་འབུམ་གཅིག་ལ་བཟའ་ཆས་རོགས་རམ་གྱིི་ལས་གཞི་དེ་ཚོགས་པ་དེའི་ལས་གཞི་ཆེ་ཤོས་ཐེངས་དང་པོ་དེ་ཆགས་ཀྱི་ཡོད། ཅེས་གསུངས་བྱུང་།དེ་བཞིན་འདི་ལོར་ཏོག་དབྱིབས་ནད་ཡམས་ཁྱབ་ཏེ་སེ་ར་ཐེག་ཆེན་གླིང་ཕྱི་ནང་ལ་འགྲོ་འོང་བཀག་བརྒྱ་བསྡམས་པའི་དུས་ཡུན་ནང་སྔ་རྗེས་ཐེངས་བཞི་ལ་དགེ་འདུན་པ་ཡོངས་ལ་ཚལ་རིགས་དང་། ཤིང་འབྲས། བཟའ་ཆས། སྤུས་ཀ་ལེགས་པའི་ཁ་རས་དང་དུག་སེལ་སྨན་ཆུ། སོ་བཀྲུ་སོ་སྨན་འདག་རྫས་སོགས་འཕྲོད་བསྟེན་གྱི་འཁྲུས་རྫས་བགོ་འགྲེམས་དང་ལྷན་དུ། འཛམ་གླིང་མཉམ་འབྲེལ་རྒྱལ་ཚོགས་འཕྲོད་བསྟེན་ལྷན་ཁང་ནས་འགྲེམས་སྤེལ་གནང་བའི་ཏོག་དབྱིབས་ནད་ཡམས་སྔོན་འགོག་བྱེད་ཐབས་ཀྱི་ལམ་སྟོན་ཡིག་ཆ་དེ་ཡང་བོད་ཡིག་ནང་ཕབ་བསྒྱུར་བྱས་ཏེ། དགེ་འདུན་པ་དང་གཞིས་ཆགས་མང་ཚོགས་ཚོར་འགྲེམས་སྤེལ་གནང་ཡོད་པ་དང་། འདི་ལོའི་སྤྱི་ལོའི་ལོ་གསར་རྗེས་སུ་རྒྱ་གར་རྒྱལ་ཡོངས་ཀྱི་བོད་མིའི་གཞིས་ཆགས་གཞན་ཁག་ནང་གི་རྒྱ་གར་ཡུལ་མི་ཉམ་ཐག་ལ་རོགས་རམ་གནང་གཏན་ཁེལ་ཡོད་པ་གསུང་གི་འདུག

སེར་བྱེས་ཧར་གདོང་ཚང་གསག་སྒོ་མོ་མཆོག་སྤྲུལ་རིན་པོ་ཆེས་ཆེད་བཙུགས་གནང་བའི་ངས་ཚེ་སྲོག་ཞིག་བསྐྱབས་ཞེས་པའི་སྤྱི་ཚོགས་བདེ་རྩའི་ཚོགས་པ་དེ་ནི་ཕྱི་ལོ་༢༠༡༧ ལོར་ཨི་ཀྲ་ལིར་བཙུགས་པ་དང་། སྒོ་མོ་རིན་པོ་ཆེས་ཐུགས་འགན་བཞེས་བའི་ཐོག་ལས་བྱེད་ ༥ ཙམ་ཡོད་པ་དང་། ཚོགས་པ་དེ་འཛུགས་དགོན་དོན་ནི་རྒྱལ་སྤྱིའི་སྤྱི་ཚོགས་ངོས་ནས་བཙན་བྱོལ་བོད་མི་ཚོར་རོགས་རམ་གནང་བའི་བཀའ་དྲིན་རྗེས་དྲན་མཚོན་ཕྱིར་ཚོགས་པ་དེས་མ་འོངས་པར་འཛམ་གླིང་གི་ཉམ་ཐག་སྐྱབས་བཅོལ་བ་གཞན་ཚོར་ཡང་རོགས་རམ་གནང་འཆར་ཡོད་པ་གསུང་གིི་འདུག

སྤྱིར་སེར་བྱེས་ཧར་གདོང་ཁང་ཚན་གྱི་ཐང་གསག་སྒོ་མོ་རིན་པོ་ཆེ་སྐུ་ཕྲེང་༢༣ པ་ནི་༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་སྒོ་མོ་སྐུ་གོང་མའི་ཡང་སྲིད་དུ་ངོས་འཛིན་མཛད་གནང་བ་དང་། ལོ་མང་རིང་འཕགས་ཡུལ་སེར་བྱེས་གྲྭ་ཚང་དུ་གཞུང་ཆེན་ཁག་ལ་གསན་བསམ་མཛད་རྗེས། དེང་སྐབས་ཕྱི་རྒྱལ་ཡུལ་གྲུ་ཁག་ལ་ཕེབས་ནས་ཕྱི་རྒྱལ་མི་སྣ་ཚོར་སེམས་ཀྱི་དཀའ་ངལ་སེལ་ཐབས་ཐད་སློབ་སྟོན་གནང་བཞིན་པ་དང་ཆབས་ཅིག ངས་ཚེ་སྲོག་བསྐྱབས་ཞེས་པའི་སྤྱི་ཚོགས་བདེ་རྩ་ཚོགས་པར་ཐུགས་འགན་བཞེས་བཞིན་ཡོད་འདུག

རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།