རྒྱ་གར་གྱིས་ཆུ་མཛོད་བརྒྱབ་སྟེ་རྒྱ་ནག་ལ་ཁ་གཏད་གཅོག་འཆར་འདུག

ཉིན་ཤས་གོང་དུ་རྒྱ་ནག་གཞུང་གིས་བོད་མེ་ཏོག་རྫོང་ཁོངས་ཀྱི་ཡར་ཀླུང་གཙང་པོའི་རྒྱུད་དུ་ཆུ་མཛོད་ཆེན་པོ་ཞིག་རྒྱག་འཆར་ཡོད་སྐོར་བསྒྲགས་པ་ལྟར་རྒྱ་གར་གཞུང་གིས་ཨ་རུ་ན་ཅལ་མངའ་སྡེའི་ནང་དའང་དེ་ལས་ཆེ་བའི་ཆུ་མཛོད་ཅིག་རྒྱག་འཆར་ཡོད་སྐོར་བསྒྲགས་འདུགཁ་སང་ཕྱི་ཚེས་ ༡ ཉིན། ལྷོ་རྒྱུད་རྒྱ་ནག་ཞོགས་པའི་ཆ་འཕྲིན་སོགས་རྒྱལ་སྤྱིའི་གསར་ལམ་ཁག་གི་གནས་ཚུལ་ལྟར་ན། རྒྱ་གར་གཞུང་གིས་ཀྱང་ཡར་ཀླུང་གཙང་པོའི་རྒྱུད་དུ་གློག་ཤུགས་གྷི་ག་ཝ་ (Gigawatts)  ༡༠ འདོན་ཐུབ་པའི་ཆུ་མཛོད་ཅིག་རྒྱག་འཆར་ཡོད་པ་དང་། དུས་རྒྱུན་རྒྱ་ནག་གཞུང་གིས་ལས་གཞི་གང་འདྲ་ཞིག་བརྩམས་ཀྱང་རྒྱ་གར་ཕྱོགས་སུ་ལྡོག་ཕྱོགས་ཀྱི་ཤུགས་རྐྱེན་མི་ཡོང་བ་བྱ་རྒྱུ་ཡིན་སྐོར་བརྗོད་ཡོད་ནའང་།  ད་ལྟ་རྒྱ་གར་གཞུང་གིས་རྒྱ་ནག་གི་ཁས་ལེན་དེ་དུས་ནམ་ཞིག་གི་བར་དུ་གནས་རྒྱུ་ཡིན་མིན་ཚོད་དཔག་དཀའ་བ་ཞིག་ཡིན་སྐོར་བརྗོད་འདུག

གནས་ཚུལ་དེ་དང་འབྲེལ་ནས་རྒྱ་གར་དབུས་གཞུང་གི་ཆུའི་ལྷན་ཁང་གི་མགྲིན་ཚབ་པ་ (T.S. Mehra) ལགས་ཀྱིས། ད་ལྟའི་དུས་སུ་ཁ་ཚ་དགོས་གཏུག་ཡིན་པ་ནི་ཨ་རུ་ན་ཅལ་མངའ་སྡེའི་ནང་ཆུ་མཛོད་ཆེན་པོ་ཞིག་བརྒྱབས་ཏེ། རྒྱ་ནག་གི་ཆུ་མཛོད་ཀྱི་ལས་གཞི་དེའི་ལྡོག་ཕྱོགས་ཀྱི་ཤུགས་རྐྱེན་ཆུང་དུ་གཏོང་རྒྱུ་དེ་ཡིན་པ་རེད། ཨ་རུ་ན་ཅལ་ནང་ཆུ་མཛོད་གསར་རྒྱག་གི་ལས་གཞི་དེ། རྒྱ་གར་གཞུང་གི་ལས་གཞི་གལ་ཆེ་ཤོས་སུ་བཞག་ཡོད་པ་རེད། ཅེས་འགྲེལ་བརྗོད་བྱས་འདུག

ཉེ་སྔོན་ཕྱི་ཟླ་ ༡༡ ཚེས་ ༢༦ ཉིན། རྒྱ་ནག་གི་ཆུ་མཛོད་འཛུགས་བསྐྲུན་ཚོགས་པ་མགོ་འཛུགས་བྱས་ཏེ་མི་ལོ་ ༤༠ འཁོར་བའི་དུས་དྲན་སྟེང་། རྒྱ་ནག་གཞུང་གིས་རྒྱ་གར་དང་ས་འབྲེལ་དུ་ཡོད་པའི་བོད་ཀྱི་མེ་ཏོག་རྫོང་གི་ཡར་ཀླུང་གཙང་པོའི་རྒྱུད་དུ། རྒྱ་སྒོར་དུང་ཕྱུར་ ༢༠ ལྷག་དང་གློག་གི་ནུས་ཤུགས་ཀེ་ལོ་ཝ་ཊི་ (kilowatts) ས་ཡ་ ༦༠ འདོན་ཐུབ་པའི་ཆུ་མཛོད་ཆེན་པོ་ཞིག་རྒྱག་འཆར་ཡོད་པ་དང་། དེ་ཡིས་རྒྱ་ནག་གི་རྒྱལ་སྲུང་དང་རྒྱལ་ནང་བདེ་འཇགས་ཅན་དུ་བསྒྱུར་ཐུབ་པ། དེ་བཞིན་ཆུ་མཛོད་དེ་ཡིས་རྒྱ་ནག་དང་ལྷོ་ཨེ་ཤ་ཡའི་གློག་དང་གཞུང་ལམ་མཉམ་འབྲེལ་ལ་ཞི་འཇགས་ཡོང་གི་ཡོད་སྐོར་བསྒྲགས་ཡོད་པ་དང་། དེ་ཡིས་རྒྱ་གར་དང་བྷང་གྷ་ལ་གཉིས་ཀྱི་ཡུལ་མིར་ཡུར་ཆུ་ཆད་པ་དང་ཆུ་ལོག་འབྱུང་སྲིད་པའི་བློ་འཚབ་བསླངས་ཡོད་པ་རེད།

དེ་དང་འབྲེལ་ནས་བྷང་ག་ལའི་ཆུ་བོ་གཙང་སེལ་གྱི་ལས་འགུལ་ཚོགས་པའི་ (Riverine People) སྤྱི་ཁྱབ་དྲུང་ཆེ་ (Sheikh Rokon) ལགས་ཀྱིས། རྒྱ་ནག་གཞུང་གིས་ཆུ་མཛོད་ལས་གཞི་མགོ་འཛུགས་མ་བྱས་གོང་ནས་རྒྱལ་སྤྱིའི་རང་བཞིན་ལྡན་པའི་གྲོས་མོལ་ཞིག་བྱེད་དགོས་པ་དང་། ཆུ་མཛོད་ཀྱི་ལས་གཞི་རྒྱ་ཆེན་སྤེལ་འཆར་ཡོད་པ་དེ་ཡིས་གཙང་པོའི་སྨད་རྒྱུད་དུ་ཆགས་པའི་ཁྱིམ་མཚེས་རྒྱལ་ཁབ་ཁག་ལ་བློ་འཚབ་སྐྱེ་གཞིར་འགྱུར་བ་ནི་རྒྱུ་མཚན་དང་ལྡན་པ་དང་། དེ་ཡིས་གཙང་པོའི་བཞུར་རྒྱུན་ལ་དོ་ཕོག་གཏོང་གི་ཡོད་སྐོར་བརྗོད་འདུག

རྒྱ་ནག་གཞུང་གིས་བོད་ནས་བཞུར་བཞིན་པའི་གཙང་པོ་ཁག་གི་རྒྱུད་དུ་ཆུ་མཛོད་ཤུགས་ཆེན་རྒྱག་བཞིན་པར་བརྟེན། གཙང་པོའི་སྨད་རྒྱུད་ཀྱི་ཁྱིམ་མཚེས་རྒྱལ་ཁབ་ཁག་ལ་ཡུར་ཆུ་དང་འཐུང་ཆུའི་དཀའ་འཕྲད་བཞིན་ཡོད་ནའང་། རྒྱ་ནག་གཞུང་གིས་དེ་ལ་ངོས་ལེན་བྱེད་ཀྱི་མེད་པ་རེད། ཐེངས་འདིའི་རྒྱ་ནག་གཞུང་གི་ཆུ་མཛོད་ལས་འཆར་དེའི་ཐད་གནད་དོན་དབྱེ་ཞིབ་པས་ཡར་ཀླུང་གཙང་པོའི་བཞུར་རྒྱུན་ལྷོ་ངོས་སུ་དཀྱོག་པའི་མཚམས་སུ་ཆུ་ལག་མང་པོ་ཡོད་པ་དང་། རྒྱ་གར་ནང་མ་བཞུར་གོང་གཙང་པོ་ཤུགས་ཆེན་རྒྱས་ཀྱི་ཡོད་སྟབས། དེར་ཆུ་མཛོད་ཅིག་རྒྱག་རྒྱུར་དཀའ་ཚེགས་ཆེན་པོ་ཡོད་པ་དང་། ས་གཤིས་སོགས་ལ་བརྟེན་ནས་གཙང་ཆུའི་སྨད་རྒྱུད་དུ་ཆུ་ལོག་འབྱུང་སྲིད་པའི་ཚོད་དཔག་བྱེད་ཀྱི་ཡོད་འདུག

བོད་མཐོ་སྒང་ནི་ཨེ་ཤ་ཡའི་ཆུ་བོ་ཆེན་པོ་ཁག་གི་འབྱུང་ཁུངས་ཡིན་ལ། ཆུ་བོ་དེ་དག་རྒྱ་ནག་དང་རྒྱ་གར། གྷང་ག་ལ་དང་འབར་མ། པ་ཀི་སི་ཐན་སོགས་ཀྱི་ནང་བཞུར་ཏེ་འཛམ་གླིང་གི་མི་འབོར་གྱི་བརྒྱ་ཆའི་ ༢༠ ལྷག་གི་འཚོ་རྟེན་དུ་གྱུར་ཡོད་པ་རེད། ལྷག་པར་དུ་རྒྱ་གར་དུ་ཡར་ཀླུང་གཙང་པོ་དང་སེང་གེ་ཁ་འབབ། གླང་ཆེན་ཁ་འབབ་དང་རྨ་བྱ་ཁ་འབབ་སོགས་ཆུ་བོ་མང་པོ་འབབ་ཀྱིན་ཡོད་པ་དང་། རྒྱ་དཀར་ནག་གཉིས་སུ་བོད་ནས་བཞུར་གྱིན་པའི་ཆུ་བོ་དང་འབྲེལ་ནས་གཞུང་འབྲེལ་གྱི་གྲོས་ཆོད་མེད་ནའང་། ཕྱོགས་གཉིས་ཀྱིས་གཙང་པོ་དེ་དག་གི་རྒྱུད་ཀྱི་ལས་གཞི་ཁག་ཕན་ཚུན་ལ་མཁོ་སྤྲོད་བྱེད་རེས་བྱེད་ཀྱི་ཡོད་པ་རེད།

གསར་འགོད་པ། ཀླུ་མགོན་ཐར།