རོང་བོ་དགེ་འདུན་ལྷུན་གྲུབ་ལཊ་འཛིན་བཟུང་བྱས།

བོད་ནང་གི་སྙན་ངག་པ་གྲགས་ཅན་རོང་བོ་དགེ་འདུན་ལྷུན་གྲུབ་ལཊ་རྒྱུ་མཚན་གང་ཡིན་གསལ་ཁ་མེད་པར་རྒྱ་ནག་གཞུང་གིས་འཛིན་བཟུང་བྱས་ཡོད་འདུག་ལ་དེ་སྔོན་ཡང་ཁོང་ལ་འཛིན་བཟུང་འདྲི་རྩད་མང་པོ་བྱས་མྱོང་ཡོད་འདུག

ཉིན་ཤས་སྔོན་བོད་ནང་གི་རྩོམ་པ་པོ་དང་སྙན་ངག་པ་གྲགས་ཅན་རོང་བོ་དགེ་འདུན་ལྷུན་གྲུབ་ལགས་རྒྱ་ནག་གཞུང་གིས་རྒྱུ་མཚན་ཅི་ཡིན་མ་བཤད་པར་གློ་བུར་དུ་འཛིན་བཟང་བྱས་ཡོད་པ་དང་། ད་ལྟའི་ཆར་ཁོང་གི་གནས་སྟངས་ག་འདྲ་ཡིན་སོགས་གང་ཡང་ཤེས་རྟོགས་ཐུབ་ཀྱི་མི་འདུག་ལ། ཁོང་གི་སྐད་འཕྲིན་རྒྱབ་ལྗོངས་ཀྱི་གནས་ཚུལ་ཚང་མ་ལྟ་ཀློག་མ་ཐུབ་པ་ཞིག་ཆགས་འདུག

དྷ་རམ་ས་ལར་གནས་སྡོད་རེབ་གོང་ནས་ཡིན་པ་ཞིག་གིས་འདི་གའི་གསར་འགོད་པར་དགེ་འདུན་ལྷུན་གྲུབ་ལགས་ཟླ་འདིའི་ཕྱི་ཚེས་ ༢ ཉིན་འཛིན་བཟུང་བྱས་ཡོད་སྐོར་བོད་རང་ནས་གསུངས་བྱུང་ཞེས་གནས་ཚུལ་མཁོ་སྤྲོད་གནང་བྱུང་ལ། ཁོང་གི་གྲོགས་པོ་ཞིག་ལ་དེའི་སྐོར་དྲིས་པར་ཁོང་གིས། རོང་བོ་དགེ་འདུན་ལྷུན་གྲུབ་ལགས་དང་སྒེར་འབྲེལ་ཡོད་ཀྱང་། ཉེ་སྔོན་ནས་འབྲེལ་གཏུག་བྱས་མེད་པ་དང་། དེ་རིང་ཁོང་གི་སྐད་འཕྲིན་གྱི་རྒྱབ་ལྗོངས་སུ་ལྟ་སྐབས་གནས་ཚུལ་ཚང་མ་ལྟ་མི་ཐུབ་པའམ་ནག་གསུབ་བཏང་ཚར་འདུག དེ་སྔོན་ནས་ཁོང་ལ་རྒྱ་ནག་གཞུང་གིས་དོགས་ཟོན་བྱེད་ཀྱི་ཡོད་པ་མ་ཟད། ཐེངས་མང་པོར་བཀག་ཉར་བྱས་ཏེ་འདྲི་རྩད་བྱས་ཡོད་པ་རེད། ཅེས་བརྗོད་བྱུང་།

ཕྱི་ལོ་ ༢༠༡༣ ལོར་ཀན་ལྷོ་གཙོས་ནས་མི་རིགས་རྩོམ་རིག་དང་འབྲེལ་བའི་ཚོགས་འདུའི་ཐོག་ཁོང་གིས། ངེད་ཅག་བོད་རིགས་ལྟ་བུར་མཚོན་ན་ནང་བསྟན་རིག་གནས་ཀྱིས་གཙོས་རིག་པའི་གནས་མང་པོར་དར་རྒྱས་བྱུང་ཡོད་མོད། དམངས་ཀྱི་འདོད་འདུན་མཚོན་པའི་རྩོམ་རིག་གི་ཕྱོགས་ནས་དར་རྒྱས་དེ་ཙམ་བྱུང་མེད་པའི་ཁར། དེང་རབས་ཀྱི་རྩོམ་རིག་གསར་བའི་ཕྱོགས་ནས་དེ་བས་དར་རྒྱས་བྱུང་མེད་ཙང་། དུས་དེབ་འདིར་གཞན་རྩོམ་སྒྱུར་བའི་ལག་ལེན་གྱི་ཁྲོད་ནས་སྔར་མེད་པའི་བརྡ་དང་ཐ་སྙད་དག་གཏན་ལ་དབབ་ཚེ་བྱེད་པོ་ལོ་ཙཱ་བ་དག་གིས་ངེས་པར་དུ་བོད་ཡུལ་གཅིག་གྱུར་གྱི་སྐད་བརྡར་གཟབ་ནན་བྱ་རྒྱུ་གལ་བོ་ཆེ་རུ་འདོད། སྔོན་གྱི་ལོ་པཎ་དག་གིས་བསྒྱུར་བའི་བཀའ་དང་བསྟན་བཅོས། ཡང་ན་སྙན་ངག་གི་གཞུང་དང་སྙན་ངག་གི་བསྟན་བཅོས་ད་ལྟ་མཇལ་དུ་ཡོད་པ་འདི་དག་གི་ཁྲོད་ན། བོད་མདོ་དབུས་ཁམས་གསུམ་གང་དུ་ཁྱེར་ཡང་བོད་ཡིག་ཤེས་མཁན་ཞིག་ཡིན་ཕྱིན་ཀློག་ཐུབ་ལ་དོན་ཡང་གོ་བ་མ་ཟད། བོད་ཡིག་མི་ཤེས་མཁན་ཞིག་ཡིན་རུང་དེའི་རྣ་བར་ཤེས་མཁན་ཞིག་གིས་བཀླགས་ན་གོ་ནུས་པ་ཡིན་པར་མངོན་སུམ་དུ་གྲུབ་པ་ལགས་ན། ད་ལྟའི་ལོ་ཙཱ་བ་གསར་པ་དག་གིས་ལོ་ཙཱ་བ་སྔོན་མ་དག་དང་ལོ་ཙཱ་བ་རྒན་པ་དག་གི་རྗེས་སུ་བསླབ་པར་སྙིང་ནས་རེ། ཞེས་གསུངས་འདུག

བཙན་པོ་དྲ་བའི་ནང་བཀོད་པའི་ཁོང་གིས་བྲིས་པའི་<<ང་ཚོའི་སྙན་ངག་ནི་གོ་སླ་བའི་ཕྱོགས་སུ་སོང་ན་འགྲིག>>ཅེས་པའི་ནང་དུ། སྐབས་འདིར་ངས་བཤད་དགོས་པ་ནི་སྙན་ངག་གི་སྣང་ཚུལ་ཞིག་སྟེ། དེང་སྐབས་སྙན་ངག་པ་མང་པོ་ཞིག་ལ་རྩོད་གླེང་འབུད་བཞིནཔའམ་སྙན་ངག་གི་སྤྱི་འགྲོས་ཤིག་ལ་ལྟ་ཚུལ་འདོན་པ་དེ་ཡིན། འདི་ནི་དགའ་འོས་པ་ཞིག་སྟེ་མི་རིགས་ཤིག་དང་རིག་གཞུང་ལ་དོ་སྣང་བྱེད་པའི་མཚོན་རྟགས་སུ་ངེས། ལྷག་པར་དུ་སྦྲང་ཆར་གཙོས་དུས་དེབ་འགའ་རེ་ན་རྩོམ་ཡིག་གི་དཔྱད་བརྗོད་སྤེལ་བ་ནི་ང་ཚོ་ལ་རྩོམ་རིག་གི་གཞུང་ལུགས་ཆ་ཚང་ཞིག་མི་རིང་བར་འགྲུབ་རྒྱུའི་སྔོན་འགྲོའི་རོལ་དབྱངས་ལྟ་བུ་རེད། ༡༩༩༩ ལོའི་<<སྦྲང་ཆར>>་དུས་དེབ་དང་བོར་སྤེལ་བའི་སྐུ་ཞབས་གངས་ཞུན་གྱི་དཔྱད་རྩོམ་<<གོ་དགའ་བ་སྙན་ངག་གི་ཡོན་ཏན་ཡིན་ནམ>>ཞེས་པ་ལ། ༢༠༠༠ ལོའི་སྦྲང་ཆར་དེབ་བཞི་བའི་སྟེང་སྐུ་ཞབས་སྐྱ་བྷས་<<གོ་དཀའ་བ་སྙན་ངག་གི་ཡོན་ཏན་ཡིན>> ཞེས་ལན་བཏབ་འདུག ངོ་མ་བགྲོ་གླེང་འདི་ནི་མཁོ་བའི་ཟས་དང་འདྲ་བར་ང་ཚོའི་ན་གཞོན་སྙན་ངག་པ་ཚོས་མུ་མཐུད་གླེང་དགོས། ད་ལྟ་ང་ཚོས་སྙན་ངག་གི་ཁྱད་ཆོས་དང་དམིགས་ཡུལ་ཕན་འབྲས་ལ་ལྟོས་ཏེ་དཔྱད་བརྗོད་སྤེལ་ན་གདོན་མི་ཟ་བར་རྐང་རྗེས་ཤིག་འཇོག་ཐུབ་ཐུབ་ཡིན་པས་ངེས་པར་དུ་ཕྱོགས་གང་ནས་ཀྱང་རང་རང་གི་འདོད་ཚུལ་བརྗོད་དགོས།ཕྲན་གྱིས་ཀྱང་རང་གི་འདོད་ཚུལ་སྐུ་ཞབས་འདི་རྣམ་པ་གཉིས་གཙོས་ཕྱོགས་ཡོངས་ཀྱི་སྨྱུག་འཛིན་པ་ཚོར་འབུལ་ཁུལ་བགྱིས་ན། སྤྱིར་སྙན་ངག་གི་ཡོན་ཏན་ལ་གོ་དཀའ་སླ་གཉིས་སུ་དབྱེ་དགོས་ཤིང་ཕྱོགས་གཅིག་ཏུ་ཐག་བཅད་ན་ཅུང་འཐུས་ཚང་མ་ཡིན་པའི་སྐྱོན་འབྱུང་སྲིད། རྒྱ་གར་བའི་སྙན་དག་ལའང་གོ་དཀའ་བ་དང་སླ་བ་གཉིས་སུ་ཕྱེ་ཡོད་པ་དེས་གོ་དཀའ་བ་སྙན་ངག་གི་ཡོན་ཏན་དུ་ཐག་བཅད་ན་ག་ལ་འགྲིག སྙན་ངག་འདི་གོ་སླ་བའི་ཕྱོགས་སུ་གོམ་པ་སྤོས་ན་སྙན་ངག་གི་ཁྱད་ཆོས་འཆོར་མི་འཆོར་དང་དེས་ཀློག་པ་པོ་གང་མང་ཞིག་ལ་ཞབས་འདེགས་སྒྲུབ་ཐུབ་མིན། དེ་ལས་ལྡོག་སྟེ་གོ་དཀའ་བའི་ཕྱོགས་སུ་སོང་ན་སྙན་ངག་གི་ཁྱད་ཆོས་སུ་འགྱུར་ཚུལ། ཀློག་པ་པོ་དང་འབྲེལ་ཡོད་ཡོངས་ལ་ཕན་མི་ཕན་གྱི་ཐད་ནས་ལྟ་བ་འདི་གཉིས་ལ་ང་ཚོས་གཤིབ་སྡུར་བྱེད་དགོས། ཞེས་གསུངས་འདུག

སྙན་ངག་པ་གྲགས་ཅན་རོང་བོ་དགེ་འདུན་ལྷུན་གྲུབ་བམ་དྲ་མིང་ལ་ལྷམ་ཀོག་ལགས་ནི་ཕྱི་ལོ་ ༡༩༧༤ ལོར་རེབ་གོང་མདོ་བ་འབྲོག་ནས་སྐྱེས་ཤིང་། ཕྱི་ལོ་ ༡༩༩༤ ལོ་ནས་གསར་རྩོམ་ལ་ཞུགས་ཏེ་<<རྐང་གླིང་སྐྱ་བོ>> <<ལྷ་ཆེན་པོའི་སྙན་ངག>> <<ཕྲེང་བ་ནག་པོ>> <<མི་ཚེའི་དབྱངས་རྟ>> <<གླེགས་བམ་དཀར་བོ>>སོགས་སྒེར་དེབ་ཁག་ཅིག་ཡོད་པ་དང་། འདི་ལོའི་ཕྱི་ཟླ་ ༡༠ པའི་ནང་ཁོང་གི་སྙན་ངག་སྒེར་དེབ་གསར་ཤོས་<<འཁོར་བ>>་བཏོན་གནང་ཡོད་འདུག ཕྱི་ལོ་ ༢༠༠༠ ལོ་ནས་བཟུང་རོང་བོ་དགོན་ཆེན་ནས་ཐུན་མོང་རིག་གནས་ཀྱི་སྐོར་དཔེ་འཁྲིད་རྒྱུན་དུ་གནང་བ་དང་། བོད་ཁུལ་གྱི་ས་གནས་གཞན་དུ་གདན་ཞུའི་དགེ་རྒན་ཡང་གནང་མྱོང་ཡོད་པ་དང་། ཁོང་གི་བརྩམས་ཆོས་དག་ལ་བོད་ཁུལ་ནས་གདེང་འཇོག་ཆེན་པོ་ཐོབ་སྟེ་བྱ་དགའ་ཁག་ཅིག་ཐོབ་ཡོད་འདུག