བོད་མི་མང་སྤྱི་འཐུས་ཚོགས་གཙོ་མཆོག་ནས་སྐུ་ཞབས་མའེ་ཊེའོ་མཱག་སེ་ལགས་སུ་འཚམས་འཕྲིན་གནང་།

སྤྱི་འཐུས་ཚོགས་གཙོ་པདྨ་འབྱུང་གནང་མཆོག་གིས་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་མའེ་ཊེའོ་མཱག་སེ་ལགས་རྒྱལ་སྤྱིའི་འགྲོ་བ་མིའི་ཐོབ་ཐང་དང་དམངས་གཙོ་གོང་མཐོར་ལྟེ་གནས་ཁང་གི་འགན་འཛིན་དུ་བསྐོ་བཞག་བྱུང་བར་འཚམས་འདྲི་ཞུས། དེ་རིང་བོད་མི་མང་སྤྱི་འཐུས་ཚོགས་གཙོ་མཆོག་གིས། བོད་ཕྱི་ནང་གཉིས་ཀྱི་བོད་མི་རྣམས་དང་སྐབས་བཅུ་དྲུག་པའི་བོད་མི་མང་སྤྱི་འཐུས་རྣམ་པའི་ཚབ་ཞུས་ཏེ། རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་མའེ་ཊེའོ་མཱག་སེ་ (Matteo Mecacci) ལགས། རྒྱལ་སྤྱིའི་འགྲོ་བ་མིའི་ཐོབ་ཐང་དང་དམངས་གཙོ་གོང་མཐོར་ལྟེ་གནས་ཁང་གི་འགན་འཛིན་དུ་བསྐོ་བཞག་བྱུང་བར་འཚམས་འདྲིའི་གསུང་འཕྲིན་གནང་འདུག

དེ་ཡང་ཚོགས་གཙོ་པདྨ་འབྱུང་གནས་མཆོག་གི་འཚམས་འདྲིའི་ནང་། འཛམ་གླིང་ནང་ཏོག་དབྱིབས་གཉན་རིམས་ཀྱི་དཀའ་ངལ་འཕྲད་དེ་ངེས་གཏན་མིན་པའི་དུས་སྐབས་འདིར། ཁྱེད་རང་པོའོ་ལན་ཌིའི་རྒྱལ་ས་ (Warsaw) རྟེན་གཞི་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་དང་དམངས་གཙོ་གོང་མཐོར་ལྟེ་གནས་ཁང་གི་འགན་འཛིན་དུ་བསྐོ་བཞག་གི་གཏམ་བཟང་ཐོས་པར། ངས་བོད་ཕྱི་ནང་གཉིས་ཀྱི་བོད་མི་རྣམས་དང་སྐབས་བཅུ་དྲུག་པའི་བོད་མི་མང་སྤྱི་འཐུས་རྣམ་པའི་ཚབ་ཞུས་ཏེ་ཁྱེད་ལ་སྙིང་ནས་རྟེན་འབྲེལ་ཞུ་རྒྱུ་ཡིན། ཞེས་གསུངས་འདུག

ཡང་འཚམས་འཕྲིན་ནང་། ང་ཨི་ཊ་ལི་དང་ཨ་རི། དེ་བཞུགས་སྒར་དྷ་ས་བཅས་ནས་ཁྱེད་ལ་མཇལ་རྒྱུའི་བསྐལ་བཟང་བྱུང་སྟེ། བོད་དོན་ཐོག་གྲོས་མོལ་ལྷུག་པོ་བྱེད་རྒྱུ་བྱུང་། ཕྱི་ལོ་ ༢༠༠༩ ལོར་ཨེ་ཊ་ལིའི་རྒྱལ་ས་རཱོམ་ནས་ཁྱེད་ཀྱིས་བོད་མི་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་བྱེད་སླད་རྒྱལ་སྤྱིའི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ལྔ་བ་གཙོ་སྐྱོང་གནང་བར་བཀའ་དྲིན་ཆེ་ཞུ་རྒྱུ་ཡིན། ཁྱེད་ཀྱིས་ད་སྔ་བར་བོད་དོན་ལས་འགུལ་དང་འབྲེལ་བའི་ལས་དོན་རིགས་མང་པོའི་ནང་ཆ་ཤས་བཞེས་པ་དང་། ཕྱི་ལོ་ ༢༠༡༣ ལོ་ནས་ད་བར་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཡིན་སྐབས། བོད་ནང་འགྲོ་འོང་འདྲ་མཉམ་གྱི་སྲིད་བྱུས་དང་ཉེ་སྔོན་རང་བོད་དོན་ལ་རྒྱབ་སྐྱོར་གྱི་སྲིད་བྱུས་སོགས་ཨ་རིའི་གྲོས་ཚོགས་ནང་བོད་དོན་དང་འབྲེལ་བའི་ཁྲིམས་བཟོས་ཡོད་པ་མ་ཟད། ཁྱེད་རང་ཨེ་ཊ་ལིའི་གྲོས་ཚོགས་འཐུས་མི་ཡིན་སྐབས་ནས་ད་བར། ཁྱེད་ཀྱིས་རྒྱལ་སྤྱིའི་སྲིད་གཞུང་དང་རྒྱལ་སྤྱིའི་ལྷན་ཁང་ཁག་ཏུ། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་དང་བོད་མི་རྣམས་ལ་ཕན་ཐོགས་ཆེ་བའི་སྲིད་བྱུས་རྣམས་ལག་བསྟར་ཡོང་ཐབས་བྱས་པ་སོགས། ཁྱེད་ནི་ང་ཚོའི་བློས་ཐུབ་ཀྱི་གྲོགས་པོ་ཞིག་དང་བོད་དོན་དྲིལ་བསྒྲགས་བྱེད་མཁན་ཤུགས་ཆེན་ཆེ་ཤོས་ཤིག་ཡིན་པས། ངས་ཁྱེད་ཀྱི་ཁས་ལེན་དམ་བཅའ་དང་བློས་གཏོང་། དེ་བཞིན་བློ་བརྟན་འགྱུར་མེད་ངང་བོད་དོན་ཐད་རྒྱབ་སྐྱོར་གནང་བར་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས་འདུག

དེ་བཞིན་འཚམས་འདྲིའི་མཇུག་ཏུ། རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་མའེ་ཊེའོ་མཱག་སེ་ལགས་རྒྱལ་སྤྱིའི་འགྲོ་བ་མིའི་ཐོབ་ཐང་དང་དམངས་གཙོ་ལྟེ་གནས་ཁང་གི་འགན་འཛིན་དུ་བསྐོ་བཞག་བྱུང་བ་ནི། བོད་མི་ཡོངས་དང་འཛམ་གླིང་ནང་འགྲོ་བ་མིའི་ཐོབ་ཐང་གི་དཀའ་ངལ་འཕྲད་བཞིན་པ་རྣམས་ལ་རེ་བ་གསར་པ་ཞིག་ཤར་ཡོད་སྐོར་གསུངས་པ་དང་འབྲེལ། ཁྱེད་རང་རྒྱལ་སྤྱིའི་འགྲོ་བ་མིའི་ཐོབ་ཐང་དང་དམངས་གཙོ་ལྟེ་གནས་ཁང་དུ་བསྐོ་བཞག་བྱུང་བ་དེས་མགྲིན་ཚབ་མེད་པའི་མིའི་རིགས་ཀྱི་མགྲིན་ཚབ་པ་ཞིག་ཏུ་གྱུར་བ་དང་བྱ་གཞག་རླབས་ཆེན་མངོན་འགྱུར་ཡོང་བར་ང་ལ་ཡིད་ཆེས་བརྟན་པོ་ཡོད། ཅེས་གསུངས་འདུག

སྐུ་ཞབས་མའེ་ཊེའོ་མཱག་སེ་ལགས་རྒྱལ་སྤྱིའི་འགྲོ་བ་མིའི་ཐོབ་ཐང་དང་དམངས་གཙོ་གོང་མཐོར་ལྟེ་གནས་ཁང་གི་འགན་འཛིན་དུ་བསྐོ་བཞག་བྱུང་བར། རྒྱལ་སྤྱིའི་བོད་དོན་ལས་འགུལ་ཁང་གིས་སྐུ་ཞབས་ཁོང་ལ་འཚམས་འདྲི་ཞུས་ཏེ། སྐུ་ཞབས་མའེ་ཊེའོ་མཱག་སེ་ལགས་ཕྱི་ལོ་ ༢༠༡༣ ལོ་ནས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་དུ་བསྐོ་བཞག་བྱུང་སྟེ། ད་སྔ་བར་ཨ་རིའི་རྒྱལ་ས་ཝང་ཤི་ཊོན་ཏུ་ཨ་རིའི་ཕྱོགས་གཉིས་ཀྱི་སྲིད་དོན་ཚོགས་པ་དང་ཡུ་རོབ་མཉམ་འབྲེལ་མཐུན་ཚོགས་ནང་རྒྱལ་སྤྱིའི་བོད་དོན་ལས་འགུལ་ཁང་གི་སྟོབས་ཤུགས་རྒྱ་བསྐྱེད་དང་བོད་ནང་འགྲོ་འོང་འདྲ་མཉམ་དང་བོད་དོན་རྒྱབ་སྐྱོར་གྱི་ཁྲིམས་སོགས་གཏན་འབེབས་བྱེད་ཐུབ་ཡོད་པ་སོགས་ལ་ཡི་རངས་བསྔགས་བརྗོད་དང་སྦྲགས། རྒྱལ་སྤྱིའི་བོད་དོན་ལས་འགུལ་ཁང་གིས་མུ་མཐུད་སྐུ་ཞབས་མའེ་ཊེའོ་མཱག་སེ་ལགས་ཀྱི་ཕྱག་ལས་ཁག་རྒྱུན་སྐྱོང་དང་མཉམ་འབྲེལ། དེ་བཞིན་ཁོང་གི་བྱ་གཞག་ཐམས་ཅན་ལམ་ལྷོང་ཡོང་བའི་སྨོན་འདུན་སོགས་ཞུས་གནང་འདུག

གསར་འགོད་པ། སྐལ་བཟང་སྦྱིན་པ།་