རྒྱ་ནག་དམར་ཤོག་གཞུང་གིས་དྲ་ལམ་ཐོག་ཚོགས་པའི་ཕྱི་ལོ་༢༠༢༠ ལོའི་ཇི་ནི་བ(Geneva)ཡི་ཚོགས་འདུ་བཙན་ཁྲིད་བྱེད་ཐབས་བྱས་པ།

བསྟན་འཛིན་དགྲ་ལྷས་བྲིས།
དབང་ཆེན་ཚེ་རིང་གྱིས་བསྒྱུར།

རྒྱ་ནག་དམར་ཤོག་རྗེས་འབྲང་པ་ཚོས་ཕྱི་ལོ་༢༠༢༠ ལོའི་ཇི་ནི་བ་དྲ་ལམ་ཚོགས་འདུ་དེ་བཞིན་ཁ་ཐོར་གཏོང་ཆེད་ངོ་དེབ་ཐད་གཏོང་ཐོག་མཆན་འགྲེལ་སྟོང་ཚོ་མང་པོ་བཀོད་སྤེལ་བྱས་ཡོད་པ་རེད། དེང་སྐབས་རྒྱ་ནག་གཞུང་ནི་རྒྱལ་སྤྱི་ཁྱོན་ཡོངས་སུ་དཀྲོག་གཏམ་ཁྱབ་སྤེལ་བྱེད་མཁན་གྱི་རྒྱལ་ཁབ་ཁྱབ་ཆེ་ཤོས་ཤིག་ཡིན་པར་ངོས་འཛིན་བྱེད་ཅིང་། འཁྱོག་བཤད་གྱི་གནས་ལུགས་ཁྱབ་སྤེལ་བཏང་བ་དེས་རྗེས་འབྲས་སུ་འཛམ་གླིང་སྤྱི་ཡོངས་དང་རྒྱལ་ནང་གི་གནས་སྟངས་སོགས་ལ་ཤུགས་རྐྱེན་ཆེན་པོ་ཐེབས་ཀྱི་ཡོད། ད་རེས་རྒྱ་ནག་གཞུང་གི་རོགས་དངུལ་བཏང་བའི་ཐོག་དམིགས་གསལ་གྱི་ཚོགས་པ་ཞིག་བཙུགས་ཡོད་པ་དེའི་མིང་ལ་སྒོར་ཟུར་༥༠ ཡི་དྲ་དམག་གམ(50 cent army)ཞེས་བརྗོད་ཀྱི་ཡོད། ཁོང་ཚོས་ལས་དུས་འཕར་མ་བྱས་ཏེ་བོད་མིའི་སྒྲིག་འཛུགས་ནས་གོ་སྒྲིག་ཞུས་པའི་དྲ་ལམ་ཐོག་ཚོགས་པའི་ཕྱི་ལོ་༢༠༢༠ ལོའི་ཇི་ནི་བའི་ཚོགས་འདུ་དེ་བཞིན་ཁ་ཐོར་གཏོང་ཐབས་བྱས་ཡོད།

ད་ལོ་ཇི་ནི་བའི་Genevaཡི་ལོ་འཁོར་ཚོགས་ཆེན་དེ་བཞིན་ཕྱི་ལོ་༢༠༢༠ ལོའི་ཟླ་བ་༡༡ པའི་ཚེས་༩ ནས་༡༣ བར་དྲ་ལམ་བརྒྱུད་ཐད་གཏོང་གིས་བསྐོང་ཚོགས་གནང་ཞིང་། ཚོགས་ཆེན་གྱི་བརྗོད་གཞི་གཙོ་བོ་ནི་རྒྱ་ནག་གཞུང་གི་ཆོས་དད་རང་དབང་ཐོག་འཛིན་པའི་སྲིད་བྱུས་དང་རྒྱལ་སྤྱིའི་ཤུགས་རྐྱེན་ཞེས་པའི་བརྗོད་ཚིག་འོག་རྒྱ་ནག་གི་ཆ་ཤས་སུ་ཡིན་པའི་ས་ཁུལ་ཁག་ཏུ་ཆོས་དད་རང་དབང་ཉམས་རྒུད་དུ་འགྲོ་གཞིན་པ་དང་ཆོས་ལུགས་ཀྱི་གནས་ཚུལ་རྐྱེན་པས་ཆོས་ཚོགས་མང་པོར་སྡུག་སྦྱོང་གནར་གཅོད་གཏོང་བཞིན་ཡོད་པ། ལྷག་པར་དུ་བོད་པའི་ནང་པ་དང་། ཡུ་གུར་ཁ་ཆེ། དེ་བཞིན་ཆོས་འཁོར་རྩ་རླུང་སྒོམ་སྒྲུབ་(Falun Gong)ཉམས་ལེན་པ་སོགས་དེའི་ནང་ཚུད་ཡོད།

འདས་པའི་ཉིན་ལྔའི་རིང་གི་ཚོགས་ཆེན་ནང་རྒྱ་ནག་དམར་ཤོག་གཞུང་གི་ཐབས་བྱུས་སྣ་ཚོགས་བརྒྱུད་དཀྲོག་གཏམ་ཁྱབ་སྤེལ་དང་། འཁྱོག་བཤད་ཀྱི་གནས་ཚུལ་རྒྱུན་ཆད་མེད་པ་ཁྱབ་སྤེལ་བྱས་ཡོད་པ་མ་ཟད། དེའི་དམིགས་ཡུལ་གཙོ་བོ་ནི་ཐད་གཏོང་དྲ་ལམ་ཐོག་མཆན་འགོད་སྣ་ཚོགས་ཀྱིས་ཚོགས་ཆེན་གོ་སྒྲིག་པས་འབྲེལ་ཡོད་དྲི་བ་ཁག་བསྡུ་རུབ་བྱེད་པར་འགོག་རྐྱེན་བཟོ་རྒྱུ་དེ་ཡིན། རྒྱ་ནག་གཞུང་གིས་དམིགས་སུ་བཀར་ནས་སྐད་རིགས་འདྲ་མིན་ཤེས་མཁན་གྱི་གང་ཟག་ཚོར་ལས་ཀ་དེ་བཀོད་སྒྲིག་བྱས་ཤིང་། དེ་ལྟ་བུའི་ལས་ཀ་བྱེད་མཁན་གྱི་གྲངས་འབོར་ནི་འབུམ་༥་ནས་ས་ཡ་ལྔ་བར་ཡོད་པ་སྙན་ཐོའི་ནང་ཐེར་འདོན་བྱས་ཡོད་ལ། ཁོང་ཚོའི་དམིགས་བསལ་ལས་འགན་ནི་དྲ་རྒྱའི་ཐོག་མཆན་བཀོད་ཀྱིས་རྒྱ་ནག་དམར་ཤོག་གཞུང་གི་ལྟ་སྤྱོད་ཡག་པོ་དང་དྲང་བདེན་ཡིན་ལུགས་འགྲེལ་བརྗོད་བྱེད་རྒྱུ་དེ་ཡིན་པ་མ་ཟད། རྒྱ་ནག་གཞུང་གི་ལས་དོན་བྱེད་ཕྱོགས་ཐད་ཐེ་བྱུས་བྱེད་མཁན་ཚོར་འཐབ་རྒོལ་དང་། རྒྱ་གཞུང་གི་བཀོད་སྒྲིག་བྱེད་པའི་དྲ་དམག་དེ་ཚོས་རྒྱལ་ཁབ་ཁག་གི་གསང་བའི་ལས་ཁུངས་ཁག་དང་སྒེར་གྱི་ཁེ་གཉེར་ལས་ཁང་། དེ་བཞིན་གསར་འགྱུར་བརྒྱུད་ལམ་ཁག་ནང་ལས་ཀ་བྱེད་བཞིན་ཡོད་ཅིང་། ཝ་ཤིན་ཊོན་གསར་སྤེལ་ཁང་ངམ (Washington post ) གྱིས་གནས་ཚུལ་སྤེལ་བར་གཞིགས་ན། ཕྱི་ལོ་༢༠༡༢ནས་བཟུང་རྒྱ་ནག་གཞུང་གི་ལས་མི་དེ་རྣམས་ཀྱིས་ལོ་རེའི་ནང་མཆན་འགྲེལ་ས་ཡ་༤༤༨ཙམ་འགོད་སྤེལ་བྱས་ཡོད་འདུག

ཏོག་དབྱིབས་ནད་དུག་ཁྱབ་གདལ་གྱི་དུས་སྐབས་དེར་རྒྱལ་སྤྱི་ཁྱོན་ཡོངས་སུ་དྲ་ལམ་ཐད་གཏོང་བརྒྱུད་ལས་དོན་གཉེར་མཁན་ཇེ་མང་དུ་འགྲོ་བཞིན་ཡོད་པ་དང་། འཆལ་གཏམ་སྤེལ་བ་བཞིན་རྒྱ་ནག་གཞུང་གི་དྲ་དམག་སྒོར་ཟུར་༥༠་ཅན་གྱི་ལས་མི་དེ་དག་གིས་མཆན་ཡིག་འབྲུ་གཅིག་འགོད་སྤེལ་བྱས་པ་དང་། ཡང་ན་ནག་གསུབ་བཏང་བ་ཡིན་ན་ཨ་སྒོར་སེན་ཊ་(cent )༥༠ ནས་༧༠ བར་སྤྲོད་ཀྱི་ཡོད་འདུག ཁོང་ཚོས་གཞི་རྩའི་དམིགས་ཡུལ་ནི་རྒྱ་ནག་གཞུང་གིས་ལྟ་སྤྱོད་མི་མཐུན་པའི་བསྒྲགས་གཏམ་ཅི་འདྲ་ཞིག་འགོད་སྤེལ་བྱས་ཚེ། དེ་ནག་གསུབ་གཏོང་རྒྱུ་དེ་ཡིན་པ་མ་ཟད། སྲིད་འཛིན་ཞིན་ཅིན་ཕན་(xi jinping)ནི་རྒྱལ་ཁབ་ཀྱི་སྐྱབས་མགོན་ཡིན་པའི་འཆར་སྣང་བསྐྲུན་རྒྱུ་དེ་རེད། ཕོགས་ཡོད་ལས་མི་དེ་རྣམས་ཀྱིས་རྒྱལ་སྤྱིའི་སྤྱི་ཚོགས་དྲ་ལམ་ཁག་མང་པོའི་ནང་ཧུར་བརྩོན་ཆེན་པོའི་ངང་རྒྱ་ནག་གཞུང་གི་ལས་དོན་སྒྲུབ་བཞིན་ཡོད། དཔེར་ན་ ཊུས་ཊར་(Twitter )དང་། ཨིན་སཊ་གརམ་(Instagram) དེ་བཞིན་ངོ་དེབ་སོགས་བརྒྱུད་རྒྱ་ནག་གཞུང་ལ་སྐྱོན་བརྗོད་བྱེད་མཁན་རྒྱལ་སྤྱི་ཡང་ན་རྒྱལ་ནང་ནས་ཡིན་རུང་། ཚང་མར་ཕར་རྒོལ་བྱ་རྒྱུ་དེ་ཡིན།

ཕྲིན་ལས་ཆོས་སྐྱིད་ལགས་ནི་ཇི་ནི་བ་བོད་ཀྱི་སྐུ་ཚབ་དོན་གཅོད་ཁང་ནས་འགྲོ་བ་མིའི་ཐོབ་ཐང་ཆེད་དུ་དམིགས་བསལ་བསྐོ་བཞག་བྱས་པ་ཞིག་ཡིན་པ་མ་ཟད། གོང་ཞུས་ཚོགས་ཆེན་དེ་གོ་སྒྲིག་ཞུ་མཁན་ཡང་ཡིན་པས། ཁོང་མོས་གསུངས་བར་གཞིགས་ན། ཇི་ནི་བ་གླེང་སྟེགས་ནི་རྒྱ་ནག་དམར་ཤོག་གཞུང་ནས་འགྲོ་བ་མིའི་ཐོབ་ཐང་རྩིས་མེད་བཏང་བའི་ལས་གཞི་རྣམས་གོ་བསྡུར་བྱེད་སའི་རྒྱལ་སྤྱིའི་སྡེངས་ཆ་གནད་འགག་ཆེ་ཤོས་ཤིག་ཡིན་པ་དང་། སྡིངས་ཆ་དེ་བརྒྱུད་ནས་འགྲོ་བ་མིའི་ཐོབ་ཐང་གི་ཁྲིམས་རྩོད་པ་དང་། ལས་འགུལ་བ། ཆབ་སྲིད་པ། དེ་བཞིན་གཞུང་འབྲེལ་སྐུ་ཚབ་ཁག་སོགས་གནད་ཡོད་མི་སྣ་ཁག་གི་བར་སྲ་བརྟན་གྱི་འབྲེལ་ལམ་འཛུགས་རྒྱུ་དེ་ཡིན་པ་འགྲེལ་བརྗོད་བྱས་ཡོད་པ་རེད།

ད་དུང་ཁོང་མོས་མུ་མཐུད་འགྲེལ་བརྗོད་གནང་གསལ་ལ། སྒོར་ཟུར་༥༠ཅན་གྱི་དྲ་དམག་དེ་དག་ཀྱི་ངོ་དེབ་ཐད་གཏོང་གི་ང་ཚོའི་ལས་གཞི་ལ་བཙན་རྒོལ་བྱས་པ་དེ་ནི་ང་ཚོའི་ངོས་ནས་ལས་དོན་གལ་འགངས་ཆེན་པོ་ཞིག་སྒྲུབ་ཀྱི་ཡོད་པར་ངོས་འཛིན་བྱེད་ཀྱི་ཡོད་པ་མ་ཟད། འབྱུང་འགྱུར་ང་ཚོས་ལས་གཞི་དེ་འདྲའི་ཐོག་ནུས་ཤུགས་ཆེ་རུ་གཏོང་རྒྱུ་ཡིན་ཞེས་བརྗོད་ཡོད་པ་རེད། ཡང་ངོ་དེབ་བརྒྱུད་ཇི་ནི་བའི་ཚོགས་འདུ་ཐད་གཏོང་སྐབས་རྒྱ་ནག་དམར་ཤོག་གཞུང་གི་ལས་དོན་སྒྲུབ་རྒྱུའི་ཆེད་དུ་གླས་པའི་གང་ཟག་དེ་དག་གིས་གོང་ཞུས་ཚོགས་འདུ་དང་། དེའི་ནང་མཉམ་བཞུགས་གནང་མཁན། དེ་བཞིན་འགྲོ་བ་མིའི་ཐོབ་ཐང་ལས་འགུལ་བ་ཚོར་སྐྱོན་བརྗོད་རང་བཞིན་གྱི་མཆན་བཀོད་ཅིང་། ད་དུང་ཁོང་ཚོས་རྒྱ་ནག་དམར་ཤོག་གཞུང་གིས་བོད་དང་ཤར་ཏུར་ཀི་སི་ཏན་(east Turkistan)སོགས་ཀྱི་ནང་ཡར་རྒྱས་ཤུགས་ཆེན་བཏང་ཡོད་ལུགས་ལོག་བཤད་རྫུན་གཏམ་སྣ་ཚོགས་སྤེལ་སྟེ། ཚོགས་ཆེན་གོ་སྒྲིག་པ་དང་མཉམ་བཞུགས་བྱེད་མཁན་ཚོའི་འཆར་སྣང་དཀྲོག་ཐབས་བྱས་ཡོད་ལ། ཐད་གཏོང་ཚོགས་འདུའི་ཐོག་རྒྱ་ནག་དམར་ཤོག་གཞུང་གི་ཆབ་སྲིད་དྲིལ་བསྒྲགས་དང་ལྟ་སྤྱོད་སོགས་སྟོང་ཕྲག་མང་པོ་མཆན་འགོད་བྱས་ཡོད།

ཁ་པར་ཐོག་པར་ལེན་བྱེད་པའི་འདྲ་པར་དང་པོའི་ནང་རྒྱ་ནག་གཞུང་གི་དྲ་དམག་སྒོར་ཟུར་༥༠ ( 50 cent army) ལྡན་པ་དངོས་སུ་མཐོང་རྒྱུ་ཡོད་པ་ཁ་གསལ་ཡིན་ལ། ཁོང་ཚོས་བོད་ཡིག་དང་། ཨིན་ཡིག རྒྱ་ཡིག་སོགས་ཀྱི་ལམ་ནས་མཆན་བཀོད་ཡོད་པ་དང་། དཔེར་ན་ངོ་དེབ་ནང་མི་སྣ་ཨེཀ་གྷཛི་(AK Gazi)ཞེས་པ་དེ་ཇི་ནི་བ་གླེང་སྟེགས (Geneva forum)མཇུག་མ་སྒྲིལ་བར་ཧུར་བརྩོན་ངང་མཉམ་ཞུགས་ཀྱིས་རྒྱ་ནག་གཞུང་གིས་བོད་དང་ཤར་ཏུ་ཀི་སི་ཏན་བཅས་ནང་ཡར་རྒྱས་ཤུགས་ཆེར་བཏང་ཡོད་ལུགས་སོགས་བཀོད་སྤེལ་བྱས་ཡོད་པ་རེད།

དེ་དང་ཕྱོགས་མཚུངས་ཁ་པར་ཐོག་པར་ལེན་བྱས་པའི་འདྲ་པར་གཉིས་པའི་ནང་ངོ་དེབ་ཁ་བྱང་རྫུན་བཟོ་བྱེད་པའི་(MD mosarep)ཟེར་བས་བོད་ཡིག་དང་ཨིན་ཡིག་ཐོག་ཐད་གཏོང་ཚོགས་འདུའི་སྐོར་ལ་མཆན་འགོད་སྤེལ་བྱས་ཡོད་ཅིང་། དེ་ཡང་ཨིན་ཡིག་ཐོག་མཆན་འགོད་སྐབས། གོང་ཞུས་ངོ་དེབ་ཁ་བྱང་དེའི་ཐོག་མི་རིགས་ནག་པོ་ཡིན་ཁུལ་གྱིས་མི་རིགས་དཀར་ནག་གི་གནས་ཚུལ་སྤེལ་ཐབས་དང་ཡང་བོད་སྐད་ཐོག་མཆན་འགོད་སྐབས་བོད་རིགས་ཡིན་ཁུལ་གྱིས་མ་རྩ་རིང་ལུགས་དང་དམར་པོའི་རིང་ལུགས་སྐོར་གླེང་ཐབས་བྱས་ཡོད།

ཡང་ཚོགས་འདུའི་ཐོག་མཆན་འགྲེལ་རྣམས་དཔྱད་ཞིབ་བྱེད་སྐབས། གང་ཟག་དེ་དག་ཐད་ཀར་མཉམ་ཞུགས་བྱེད་པ་ལས་གྲོས་བསྡུར་ལ་གཡོལ་ཐབས་བྱེད་པ་ནི་ཁོང་ཚོར་བགྲོ་གླེང་དང་འབྲེལ་བའི་ཤེས་བྱ་གང་ཡང་མེད་པ་ཁ་གསལ་དུ་གྱུར་ཡོད། དེ་ལས་ལྡོག་སྟེ་ཁོང་ཚོས་གཞི་མེད་སྐྱོན་བརྗོད་དང་། སྐད་རིགས་འདྲ་མིན་ཐོག་རྒྱ་ནག་གཞུང་གི་གཡོ་སྒྱུ་རང་བཞིན་དྲིལ་བསྒྲགས་རིགས་འགོད་སྤེལ་བྱས་ཡོད། བོད་ཡིག་ཐོག་མཆན་འགོད་མཁན་རྣམས་ལ་དཔྱད་ཞིབ་བྱེད་སྐབས་ལས་མི་དེ་རྣམས་བོད་ནང་གི་བོད་མི་ཡང་ན་རྒྱ་ནག་གི་མི་རིགས་ཡིན་པ་བོད་ཡིག་ཐོག་ཕུལ་དུ་བྱུང་བ་ཤ་སྟག་ཡིན་པ་ང་ཚོས་ཚོད་དཔག་བྱེད་ཐུབ།

འབུམ་རམས་པ་བསྟན་འཛིན་ཚུལ་ཁྲིམས་ལགས་ནི་བོད་ཀྱི་སྲིད་བྱུས་ཉམས་ཞིབ་ཁང་གིས་གདན་ཞུ་ཉམས་ཞིབ་པ་ཞིག་ཡིན་ཞིང་། ཁོང་ནི་ཇི་ནི་ཝ་གླེང་སྟེགས་ཐོག་གཏམ་བཤད་པ་ཞིག་ཡིན་པས། ཁོང་གིས་བརྗོད་གསལ་ལ་” ཚོགས་འདུ་ཐད་གཏོང་ཐོག་མཆན་འགོད་མཁན་ཚོའི་ཐོག་ནས་ང་ཚོས་གང་ཤེས་ཐུབ་ཟེར་ན། གལ་ཏེ་གནད་དོན་གང་རུང་ཞིག་རྒྱ་ནག་གཞུང་གི་ཁ་གཏད་དུ་ཡིན་ཚེ་དེར་རྒྱ་ནག་གཞུང་གི་སྙིང་སྟོབས་ཆེན་པོའི་ངང་ཁ་འཐོར་གཏོང་ཐབས་བྱས་པའི་གནས་ཚུལ་དེ་དག་གིས་རྒྱལ་སྤྱིའི་རང་བཞིན་གྱི་ལས་འགུལ་ཁག་གིས་རྒྱ་ནག་དམར་ཤོག་གཞུང་ལ་གནོད་ཤུགས་ཆེན་པོ་སྤྲོད་བཞིན་ཡོད་པ་གསལ་པོ་མཚོན་ཐུབ་ཅེས་འགྲེལ་བརྗོད་གནང་ཡོད་པ་རེད།

རྒྱ་ནག་གཞུང་གིས་གླས་པའི་ལས་མི་དེ་རྣམས་ཀྱིས་ངོ་དེབ་ཁ་བྱང་རྫུན་བཟོ་བྱས་ཏེ་དྲ་ཐོག་བརྒྱུད་མཆན་འགོད་ལས་གཞི་སྤེལ་བ་ནི་བོད་པའི་སྤྱི་ཚོགས་ནང་གནས་ཚུལ་གསར་པ་གང་ཡང་མིན་པར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་འབུམ་རམས་པ་བློ་བཟང་སེང་གེ་མཆོག་གིས་དེ་སྔོན་ངོ་དེབ་ཁ་བྱང་རྫུན་བཟོ་བྱས་ཏེ་དཀྲོག་གཏམ་སྤེལ་མཁན་རིགས་ལ་དོགས་ཟོན་དགོས་གལ་ཆེ་བའི་སྐོར་གསུངས་ཡོད་ལ། ལྷག་དོན་དུ་བཙན་བྱོལ་བོད་མིའི་དབུས་བསྡུ་ཆེན་མོའི་སྐབས་དེ་འབྲེལ་གནས་ཚུལ་ལྷག་ངེས་ཡིན་པས། ཚང་མས་གཟབ་ནན་བྱེད་དགོས་པ་གསུངས་ཡོད།

ཇི་ནི་བ་གླེང་སྟེགས་ཐོག་རྒྱ་ནག་གཞུང་གི་དྲ་དམག་རྣམས་ཀྱིས་ལས་གཞི་དེ་དག་དང་ད་ལྟ་ཁྱབ་གདལ་འགྲོ་བཞིན་པའི་ཏོག་དབྱིབས་རིམས་ནད་དམག་འཐབ་གཉིས་ལ་གཞིགས་ན། རྒྱ་ནག་དམར་ཤོག་གཞུང་གིས་དྲ་རྒྱའི་འཕྲུལ་རིག་ཐོག་ལ་མ་རྩ་ཤུགས་ཆེར་བཅུག་སྟེ་དྲིལ་བསྒྲགས་ཁྱབ་སྤེལ་བྱས་པ་དེས་རྒྱ་ནག་དེ་བཞིན་སྔར་ལས་ལྷག་པར་རྙོག་གླེང་ཆེ་རུ་ཕྱིན་ཡོད་པ་དང་། རྒྱ་ནག་གཞུང་གིས་དཀྲོག་གཏམ་རྒྱ་ཁྱབ་སྤེལ་བའི་དབང་གིས་རྒྱ་ནག་དམར་ཤོག་གི་སྒོར་ཟུར་༥༠ ལྡན་པའི་དྲ་དམག་མང་དུ་ཕྱིན་པ་དེས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་དེ་ལམ་ལྷུང་བྱུང་མེད་པ་ཁ་གསལ་དུ་གྱུར་ཡོད་ལ། བོད་མིའི་འགྲོ་བ་མིའི་ཐོབ་ཐང་ཐོག་རྡོག་རོལ་བཏང་དང་གཏོང་མུས་ཡིན་པ་ཁ་གསལ་དུ་གྱུར་ཡོད། ལྷག་དོན་འཛམ་གླིང་མི་མང་གིས་ངེས་པར་དུ་མཁྱེན་རྟོགས་དགོས་པ་ཞིག་ནི། རྒྱ་ནག་དམར་ཤོག་གཞུང་གི་དྲ་དམག་དང་འབྲེལ་བའི་དྲིལ་བསྒྲགས་དེ་དག་ནི་འཕྲུལ་རིག་གསར་རྗེས་དུས་རབས་འདིར་ཉེན་ཁ་ཞིག་ཀྱང་ཡིན་པ་མ་ཟད། དྲང་བདེན་གྱི་གནས་གནས་ཚུལ་ཁྱབ་སྤེལ་ཡོང་བར་འགོག་རྐྱེན་བཟོ་མཁན་དེ་ཡང་ཆགས་ཡོད་པ་ངེས་པར་དུ་མཁྱེན་དགོས།

ཉམས་ཞིབ་པ་བསྟན་འཛིན་དགྲ་ལྷ་ནི་ཕྱི་ལོ་༢༠༡༤ལོར་མ་དྷ་ར་སི་Madras གཙུག་ལག་སློབ་ཆེན་དུ་གསར་འགོད་རིག་པའི་ཐོག་ཞིབ་འཇུག་པའི་( M. Phil) ལག་འཁྱེར་ཐོབ་ཡོད་པ་དང་། ད་ལྟའི་ཆར་བོད་ཀྱི་སྲིད་བྱུས་ཉམས་ཞིབ་ཁང་དུ་བོད་ཕྱི་ནང་གཉིས་ཀྱི་དེང་གི་སྤྱི་ཚོགས་དྲ་ལམ་གྱིས་ཤུགས་རྐྱེན་ཇི་ལྟར་སྤྲོད་མིན་ཐད་ཞིབ་འཇུག་གནང་མུས་ཡིན་པ་མ་ཟད། རྒྱ་ནག་གཞུང་གི་དྲ་རྒྱའི་བདེ་འཇགས་ཐོག་ཉམས་ཞིབ་ཀྱང་གནང་གི་ཡོད་པ་རེད།