རྒྱ་གར་ནང་ནང་པའི་དཔེ་མཛོད་ཁང་ཆེན་པོ་ཞིག་འཛུགས་སྐྲུན་གནང་འཆར་འདུག

རྒྱ་གར་ནང་ནང་པའི་དཔེ་མཛོད་ཁང་ཞིག་འཛུགས་སྐྲུན་གྱིས་འཛམ་གླིང་རྒྱལ་ཁབ་འདྲ་མིན་གྱི་ནང་པའི་གཞུང་ལུགས་ཚང་མ་ཕབ་སྒྱུར་བྱས་ཏེ་རིན་མེད་ངང་མཁོ་སྤྲོད་གནང་འཆར་འདུགརྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཉི་ཧོང་དང་རྒྱ་གར་གྱི་ལྷན་ཚོགས་ཐེངས་ ༦ པའི་སྟེང་། རྒྱ་གར་སྲིད་བློན་མུ་དྷི་མཆོག་གིས། འབྱུང་འགྱུར་ནང་པ་སངས་རྒྱས་པའི་ལྟ་གྲུབ་སྲུང་སྐྱོབ་དང་དར་སྤེལ་སླད། རྒྱ་གར་ནང་ནང་པའི་དཔེ་མཛོད་ཁང་ཆེན་པོ་ཞིག་བརྒྱབ་སྟེ། འཛམ་གླིང་རྒྱལ་ཁབ་འདྲ་མིན་ནང་གནས་པའི་ནང་པའི་གསུང་འབུམ་ཁག་དང་འབྲེལ་བའི་ཡིག་ཆ་ཚང་མ་བསྡུ་རུབ་བྱས་ཏེ། རྒྱ་གར་གཞུང་གི་དཔལ་འབྱོར་མཐུན་འགྱུར་འོག་ཡིག་སྒྱུར་བྱས་ཏེ། ནང་པའི་དགེ་འདུན་པ་དང་མཁས་དབང་རྣམས་ལ་རིན་མེད་ངང་མཁོ་སྤྲོད་གནང་རྒྱུ་ཡིན་སྐོར་གསུངས་འདུག

སྲིད་བློན་མུ་དྷི་མཆོག་གིས། དཔེ་མཛོད་ཁང་དེ་ནི་ཤེས་རིག་གི་མཛོད་ཁང་ཞིག་ཏུ་འགྱུར་རྒྱུ་ཙམ་མ་ཟད། མི་དང་མིའི་བར་དང་སྤྱི་ཚོགས་དང་སྤྱི་ཚོགས་ཀྱི་བར། དེ་བཞིན། མི་དང་རང་བྱུང་ཁམས་བར་བགྲོ་གླེང་དང་ཉམས་ཞིབ་བྱེད་སའི་སྡིངས་ཆ་ཞིག་ཀྱང་ཆགས་ཀྱི་ཡོད། ཅེས་གསུངས་ཡོད་པ་དང་། ད་ལྟ་དཔེ་མཛོད་ཁང་དེ་ས་གནས་གང་དུ་བརྒྱབ་རྒྱུ་ཡིན་པ་དང་ལས་གཞི་ག་དུས་ཤིག་ནས་མགོ་རྩོམ་རྒྱུ་ཡིན་མིན་གྱི་གནས་ཚུལ་ཁ་གསལ་མི་འདུག

༧གོང་ས་སྐྱབས་མགོན་ཆེན་པོ་མཆོག་གི་ཐུགས་སྐྱེད་དམ་བཅའ་བཞི་པ་སྟེ། རྒྱ་གར་གྱི་གནའ་བོའི་ནང་པའི་རིག་གཞུང་གིས་དཀའ་རྙོག་ཆེ་བའི་དེང་དུས་ཀྱི་འཛམ་གླིང་མི་མང་ལ་ཕན་ཐོགས་ཆེན་པོ་སྒྲུབ་ཐུབ་ཀྱི་ཡོད་སྟབས། རྒྱ་གར་གྱིས་དབུ་འཁྲིད་དེ་ནང་པའི་རིག་གཞུང་རྩ་ཆེན་པོ་དེར་བསླབ་པ་སློབ་གཉེར་གྱི་ལམ་ནས་སླར་གསོ་ཡོང་ཐབས་དགོས་པའི་བཀའ་སློབ་རིམ་པར་ཕེབས་ཀྱི་ཡོད་པ་ལྟར། འདི་ལོའི་ཕྱི་ཟླ་ ༡༡ ཚེས་ ༡༣ ཉིན་༧གོང་ས་རྒྱལ་བ་རིན་པོ་ཆེ་མཆོག་གིས། སེམས་ཁམས་རིག་པ་དེ་དེང་སྐབས་མ་འདང་པའི་ཆ་ཞིག་རེད་འདུག སྤྱིར་རྒྱ་གར་གྱི་གནའ་རབས་ཀྱི་ཤེས་ཡོན་ནང་འཚེ་བ་མེད་པ་དང་སྙིང་རྗེ་བཤད་ཡོང་དུས་སེམས་ཁམས་དང་འབྲེལ་བ་ཡོད་པ་རེད། ཕལ་ཆེར་ལོ་ཉིས་སྟོང་གོང་ནས་རྒྱ་གར་ནང་དུ་སེམས་རྩེ་གཅིག་ཏུ་གནས་པའི་ཞི་གནས་དང་། ཡིད་ལ་དཔྱད་པ་བྱེད་པའི་སོ་སོའི་ཤེས་རབ་ཀྱིས་ལྷག་པར་མཐོང་བ་ཟེར་བ་དེ་ཚོའི་གྲས་དེ་རྒྱ་གར་ལ་ལོ་ཉིས་སྟོང་གོང་ནས་ཡོད་བསྡད་པ་ཞིག་རེད་འདུག དེ་བས་སེམས་ཁམས་རིག་པ་དེ་ང་ཚོས་ཤེས་དགོས་པ་ཞིག་དང་། དེང་སྐབས་ཀྱི་དུས་ལ་དངོས་ཁམས་རིག་པ་ཡག་ཐག་ཆོད་ཡོད་པ་རེད་དེ། མ་འདང་པའི་ཆ་དེ་སེམས་ཁམས་རིག་པ་ཆགས་ཡོད་པ་རེད། དེ་ནི་ཆོས་ལུགས་ཀྱི་སྐད་ཆ་གང་ཡང་མ་རེད། ཤེས་ཡོན་གྱི་འདུ་ཤེས་འཛིན་དགོས་ཀྱི་ཡོད་པ་རེད། ཚན་རིག་པ་དང་མཉམ་དུ་ང་ཚོས་སྐད་ཆ་བཤད་དེ་སེམས་ཁམས་རིག་པའི་སྐོར་ལ་གོ་བསྡུར་མང་པོ་ཞིག་བྱེད་སྡོད་ཀྱིན་ཡོད་པ་རེད། དེ་ཕན་ཐོགས་འདུག ཚན་རིག་པའི་ནང་ནས་སེམས་ཁམས་རིག་པའི་སྐོར་ལ་རྒྱ་གར་གྱི་རིག་གཞུང་དང་དེའི་ནང་ཚན་ནས་ནང་པའི་རིག་གཞུང་ནང་གི་སེམས་ཁམས་རིག་པའི་སྐོར་ལ་གསུངས་པ་དེའི་གྲས་ལ་དམིགས་བསལ་གྱི་དོ་སྣང་ཞིག་བྱས་ནས་ཡོང་གི་འདུག ཅེས་གསུངས་ཡོད་པ་རེད།

རྒྱ་གར་དཔལ་འབྱོར་དུས་བབ་ཀྱི་གནས་ཚུལ་ལྟར་ན། དཔེ་མཛོད་ཁང་དེའི་ནང་འཛམ་གླིང་གི་ནང་པའི་ཆོས་བརྒྱུད་རིས་མེད་ཀྱི་དྲ་ཐོག་བསྟན་བཅོས་ཁག་ཉར་ཚགས་བྱ་རྒྱུ་ཡིན་པ་དང་། ལས་གཞི་དེའི་དམིགས་ཡུལ་ནི་སངས་རྒྱས་ཀྱི་གསུང་འབུམ་ཁག་ལ་ཞིབ་འཇུག་བྱས་ཏེ། སངས་རྒྱས་ཀྱི་ཆོས་ཀྱི་སྙིང་བོས་ད་ལྟ་འཛམ་གླིང་ནང་འཕྲད་བཞིན་པའི་དཀའ་ངལ་ཁག་སེལ་ཐབས་བྱ་རྒྱུ་དེ་ཡིན་འདུག

སྤྱིར་ད་ལྟའི་ཆར་སྲིད་བློན་མུ་དྷི་མཆོག་གིས་སྣེ་འཁྲིད་པའི་བྷི་ཇི་ཕི་སྲིད་དོན་ཚོགས་པས་རྒྱ་གར་ནང་ཧིན་རྡུ་ཆོས་ལུགས་ཀྱི་རྒྱལ་ཞེན་ཤུགས་ཆེན་སྤེལ་ཏེ། འདྲ་མཉམ་གྱི་ཆོས་ལུགས་དད་མོས་རང་དབང་ཐོག་དཀའ་ངལ་མི་ཉུང་བ་ཞིག་འཕྲད་ཡོད་ཀྱང་། ད་རེས་མུ་དྷི་མཆོག་གིས་སངས་རྒྱས་ཀྱི་ཆོས་ཀྱི་སྙིང་བོ་ཡིས་རྒྱ་གར་ཙམ་མ་ཟད། འཛམ་གླིང་གི་དཀའ་ངལ་སེལ་ཐབས་བྱ་རྒྱུ་ཡིན་སྐོར་གསུངས་པ་དེས་ནང་ཆོས་ཀྱིས་མི་རིགས་ལ་ཕན་བདེ་བསྐྲུན་ཐུབ་ཀྱི་ཡོད་པ་དེར་ངོས་འཛིན་གསར་པ་ཞིག་ཐོབ་པ་རེད།

རྒྱ་གར་གྱི་སྲིད་བློན་མུ་དྷི་མཆོག་གིས། སངས་རྒྱས་ཀྱི་ཆོས་རྒྱ་གར་ནས་འཛམ་གླིང་ཡོངས་ལ་དར་ཁྱབ་བྱུང་སྟེ། དུས་རབས་མང་པོ་རིང་གནས་ཐུབ་པ་བྱུང་ཡོད། དེའི་རྒྱུ་མཚན་ནི་ནང་པ་སངས་རྒྱས་པའི་ལྟ་གྲུབ་དང་རིག་གནས་འདི་ཧ་ཅང་རླབས་ཆེན་དང་གཏིང་ཟབ་པོ་ཡོད་པས་ཡིན་ལ། ཁ་སང་དེ་རིང་ཡིན་ཡང་འཛམ་གླིང་རྒྱལ་ཁབ་འདྲ་མིན་གྱི་དགོན་སྡེ་ཁག་མང་པོའི་ནང་སྐད་ཡིག་འདྲ་སྣ་ཚོགས་ཐོག་གནས་ཡོད། སངས་རྒྱས་ཀྱི་ཆོས་ཀྱི་སྙིང་བོ་ནི་མིའི་རིགས་ཡོངས་ལ་ཕན་རླབས་ཆེ་བའི་ཁྱད་ནོར་ཞིག་ཡིན། ཞེས་གསུངས་འདུག

གསར་འགོད་པ། སྐལ་བཟང་སྦྱིན་པ།