བོད་ནང་གི་བོད་མི་ཚོར་དྲ་ཐོག་ནས་དམ་དྲག་ཆེན་པོ་བྱེད་ཀྱི་ཡོད་འདུག

རྒྱ་ནག་གཞུང་གིས་སྤྱི་ཚོགས་དྲ་ལམ་ལ་དམ་དྲག་སྔར་ལྷག་གིས་རྒྱལ་ཁབ་ཁ་བྲལ་ལ་ངན་སྐུལ་གྱི་མིང་བྱང་འོག་བོད་མི་ཚོར་དྲ་ཐོག་ནས་ལྟ་སྲུང་ནན་མོ་བྱེད་ཀྱི་ཡོད་པ་རེད།རྒྱ་ནག་གིས་ཆ་བགོས་བྱས་པའི་བོད་རང་སྐྱོང་ལྗོངས་སྲིད་གཞུང་གིས་ཟླ་འདིའི་ཕྱི་ཚེས་ ༢༤ ཉིན། བོད་ལྗོངས་མཉམ་སྦྲེལ་དྲ་རྒྱའི་ཁྲིམས་འགལ་དང་ཚུལ་མིན་ཆ་འཕྲིན་ཐེར་འདོན་ལྟེ་གནས་ཟེར་བའི་དྲ་རྒྱའི་སྟེང་། དྲ་རྒྱ་དང་ཆ་འཕྲིན་བརྒྱུད་རྒྱལ་ཁབ་ཁ་བྲལ་དང་རྒྱལ་ཁབ་གཅིག་གྱུར་ལ་གཏོར་བརླག་གཏོང་བའི་བྱ་སྤྱོད་རིགས་སྤེལ་མི་ཆོག་པའི་བརྡ་ཁྱབ་ཅིག་ཡོངས་བསྒྲགས་བཏང་བའི་ནང་། མི་གཞན་ལ་རྒྱ་ནག་ནང་བཀག་སྡོམ་བྱས་པའི་ཁ་བྲལ་ལ་ངན་སྐུལ་བྱེད་པའི་དྲ་རྒྱའི་རིགས་འཚོལ་བཤེར་ལ་མཁོ་བའི་ཝི་པི་ཨེན་(VPN)བཀོལ་རྒྱུར་རམ་འདེགས་སོགས་བྱེད་མི་ཆོག་སྐོར་བཀོད་ཡོད་འདུག

དོན་ཚན་བཅུ་ཅན་གྱི་བཀག་སྡོམ་རང་བཞིན་གྱི་བརྡ་ཁྱབ་དེའི་ནང་། ལོ་རྒྱུས་ལ་འཁྱོག་བཤད་བྱེད་པ་དང་། རྒྱལ་ཁབ་ཀྱི་འདུ་ཤེས་ཞན་དུ་གཏོང་བ། དེ་བཞིན་ཆོས་ལུགས་ཀྱི་ནང་དོན་དང་ཆོས་ལུགས་ཀྱི་བྱེད་སྒོ་སོགས་ལ་ཁ་གཡར་ནས་ཏང་དང་རྒྱལ་ཁབ་ཀྱི་སྲིད་ཇུས་ལ་འགོག་རྒོལ་བྱེད་པ། སྤྱི་ཚོགས་རིང་ལུགས་ཀྱི་ལམ་ལུགས་ལ་ངན་སྨད་བྱེད་པ་བཅས་ཀྱི་ཆ་འཕྲིན་གཏོང་བ་དང་བརྒྱུད་སྤེལ་བྱས་མི་ཆོག ཅེས་དང་། ཕྱི་རྒྱལ་དྲིལ་བསྒྲགས་ཀྱི་གནས་ཚུལ་དང་། རྒྱལ་ཁབ་ཁ་བྲལ་གཏོང་བའི་ངན་སྐུལ་བྱེད་པ། རྒྱལ་ཁབ་གཅིག་གྱུར་ལ་གཏོར་བཤིག་གཏོང་བ་བཅས་ཀྱི་དྲ་ཚིགས་ལྟ་བ་དང་བཅར་འདྲི་བྱེད་མཁན་ལ་ཝི་པི་ཨེན་ (VPN) བཀོལ་རྒྱུར་རྒྱབ་སྐྱོར་རམ་ཡང་ན་རོགས་རམ་བྱས་མི་ཆོག དེ་བཞིན། རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ་ལ་གཏོར་བཤིག་གཏོང་བ་སོགས་ཀྱི་ཁྲིམས་འགལ་ཉེས་གསོག་གི་བྱེད་སྒོ་སྒྲིག་འཛུགས་དང་། ཇུས་འགོད། ལག་བསྟར་བཅས་བྱེད་པའི་དྲ་རྒྱའི་ཚོགས་པའི་ནང་ཞུགས་མི་ཆོག་པ་དང་། རྒྱལ་ཁབ་གཅིག་གྱུར་ཡོང་བར་གཏོང་བཤིག་གཏོང་བའི་ངན་སྐུལ་གྱི་ཆ་འཕྲིན་བཟོ་བ་དང་། འདྲ་བཤུ། ཀློག་བཤེར། བརྒྱུད་སྤེལ་བཅས་བྱས་མི་ཆོག ཅེས་བཀོད་འདུགགཞན་ཡང་བརྡ་ཁྱབ་དེའི་ནང་། འཕྲིན་གཏོང་ཡོ་ཆས་དང་སྤྱི་ཚོགས་དང་འབྲེལ་བའི་གླེང་སྟེགས་ཀྱི་མཉེན་ཆས་སོགས་ལ་བརྟེན་ནས་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་མཁན་རྩ་འཛུགས་སམ། ཡང་ན་མི་སྣར་འབྲེལ་བ་བྱས་ནས་རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་གཅིག་གྱུར་ལ་གཏོར་བཤིག་གཏོང་བའི་བྱེད་སྒོ་སྤེལ་མི་ཆོག ཅེས་དང་། མ་དངུལ་དང་རྒྱལ་ཁབ་ཀྱི་གསང་བ། གསང་འཕྲིན་སོགས་མཁོ་འདོན་བྱས་ནས་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་བྱེད་སྒོ་སྤེལ་མི་ཆོག་པ། གཞན་ཡང་རྣམ་པ་སྣ་ཚོགས་ཀྱི་ཐོག་ནས་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་རྩ་འཛུགས་སམ་ཡང་ན་མི་སྣར་དྲིལ་བསྒྲགས་དང་དེར་རྒྱབ་སྐྱོར་བྱས་མི་ཆོག་པ་དང་། དོན་དངོས་ལ་འཁྱོག་བཤད་དང་། དཀྲོག་གཏམ་སྤེལ་བ། ཆ་འཕྲིན་རྫུན་མ་གཏོང་བ་བཅས་བྱས་ནས་མི་རིགས་དབར་གྱི་འབྲེལ་བར་དཀྲུག་ཤིང་རྒྱག་པ་དང་། མི་རིགས་མཐུན་སྒྲིལ་ལ་གཏོར་བཤིག་གཏོང་བ་བཅས་བྱས་མི་ཆོག  ཅེས་བཀོད་ཡོད་འདུག

དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་དེ་འབྲེལ་གནས་ཚུལ་ཞིག་སྤེལ་བའི་ནང་། ད་ལན་ལྟ་བུའི་སྤྱི་ཚོགས་བརྒྱུད་ལམ་བཀག་སྡོམ་གྱི་ལས་འགུལ་འདི་བོད་རང་སྐྱོང་ལྗོངས་གཅིག་པུ་ཙམ་མིན་པར་བོད་ས་ཡོངས་སུ་ལག་བསྟར་བྱས་ཡོད་ཅིང་། མཚོ་སྔོན་ཞིང་ཆེན་ནང་རྒྱ་ནག་ས་གནས་སྲིད་གཞུང་གིས་དྲ་ལམ་དུ་ཁྲིམས་འགལ་ཉེས་གསོག་གི་ཆ་འཕྲིན་སྤེལ་མཁན་ལ་མི་ལོ་༨ ཀྱི་ཁྲིམས་ཐག་གཅོད་རྒྱུ་ཡིན་ལུགས་བསྒྲགས་ཡོད་ལ། ཕྱི་ལོ་༢༠༡༧ ལོར་ཀན་སུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་རྨ་ཆུ་རྫོང་དྲ་བའི་ཉེན་རྟོག་པས་དྲ་རྒྱ་སྤྱོད་མཁན་དང་། ལྷག་པར་དུ་སྤྱི་ཚོགས་བརྒྱུད་ལམ་གྱི་གྲོགས་ཚོམས་ཀྱི་ཚོགས་གཙོ་དང་དྲ་རྒྱ་གཉེར་མཁན་ཚོར་དྲ་ལམ་ཞིབ་བཤེར་གྱི་སྒྲིག་ཁྲིམས་བཙན་འགེལ་བྱས་ཡོད་སྐོར་དང་། རྒྱ་ནག་དམར་ཤོག་གཞུང་གིས་བཙན་དབང་གི་ཁྲིམས་སྒྲིག་ཁག་བཟོས་ཏེ་བོད་མིར་ཉེས་མེད་བསྙོན་འཛུགས་དང་། བོད་ཀྱི་སྲིད་དོན་དང་རིག་གཞུང་། དེ་བཞིན་མི་རིགས་ཀྱི་ངོ་བོ་སོགས་གླེང་སློང་བྱེད་མཁན་རིགས་ལ་ཉེས་ཆད་བཙན་འགེལ་བྱེད་ཀྱི་ཡོད་སྐོར་བཀོད་ཡོད་འདུག

གསར་འགོད་པ། པ་སངས་ཚེ་རིང་།