ལ་དྭགས་བསོད་ནམས་གླིང་གཞིས་ཆགས་ཀྱི་འོས་བསྡུའི་ས་ཚིགས་ཤིག་ཏུ་ཡིག་རྨོངས་པའི་རེ་འདོད་ལྟར་འོས་མིའི་མཚན་སོགས་བྲིས་མེད་པའི་རྐྱེན་གྱིས་ཡིག་འབྲི་བ་གནས་དབྱུང་བཏང་སྟེ་འོས་བསྐྱར་དུ་འཕེན་དགོས་བྱུང་འདུག
ཁ་སང་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་གནང་སྐབས། ལ་དྭགས་བསོད་ནམས་གླིང་གཞིས་ཆགས་ཀྱི་འོས་བསྡུའི་ས་ཚིགས་ཤིག་ཏུ། འོས་འཕེན་པ་ཡིག་རྨོངས་རྣམ་པར་ཆེད་དུ་བཀོད་སྒྲིག་བྱས་པའི་ཡིག་འབྲི་བས་འོས་འཕེན་པའི་རེ་འདོད་ལྟར་འོས་མིའི་མཚན་དང་ཕ་ཡུལ། ལས་གནས་སོགས་བཀོད་མེད་པའི་གནད་དོན་བྱུང་བར་བརྟེན། འོས་ཤོག་བསྐྱར་དུ་འཕེན་དགོས་བྱུང་ཡོད་འདུག་ལ། ཚོགས་འདུ་བསྡུས་ཏེ་ཡིག་འབྲི་བ་དེར་ཉེས་ཆད་ཐག་གཅོད་གནང་འཆར་འདུག
ལ་དྭགས་གླེ་བྱང་གི་ས་གནས་འོས་བསྡུའི་འགན་འཛིན་ཚེ་བརྟན་དབང་ཕྱུག་ལགས་ཀྱིས་ཞལ་པར་བརྒྱུད་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། ལ་དྭགས་བསོད་ནམས་གླིང་གཞིས་ཆགས་ཁྱོན་ཡོངས་ནང་འོས་བསྡུའི་ས་ཚིགས་ ༦ བཀོད་སྒྲིག་བྱས་ཡོད་ཅིང་། ས་ཚིགས་རེར་ས་གནས་འོས་བསྡུའི་ཚོགས་མི་རེ་དང་། ཕྱག་རོགས་དྲུང་ཡིག ཟུར་དཔང་བཅས་བསྐོ་གཞག་བྱས་ཡོད་པའི་ཁྲོད་ནས། བརྒྱ་ཤོག་ ༨ པའི་སྤྱི་ཁང་དུ་ཡོད་པའི་འོས་བསྡུའི་ས་ཚིགས་སུ། རོགས་པ་བྱེད་མཁན་མེད་པའི་ཡིག་རྨོངས་པ་ཚོར་དྲུང་ཡིག་དེས་རོགས་སྐྱོར་བྱེད་དུ་བཅུག་ཡོད་ཀྱང་། ཁ་སང་ཉིན་རྒྱབ་ཆུ་ཚོད་ ༡ མ་ཟིན་ཙམ་ལ་ཟུར་དཔང་བརྒྱ་ཤོག་ ༩ པའི་བརྒྱ་དཔོན་གྱིས། དྲུང་ཡིག་དེས་འོས་མི་ཡིག་རྨོངས་བ་ཞིག་གི་རེ་འདོད་ལྟར་གྱི་འོས་མི་བྲིས་མེད་པ་ཤེས་རྟོགས་བྱུང་འཕྲལ། ས་གནས་འོས་བསྡུ་འགན་འཛིན་དང་འགན་འཛིན་ལས་རོགས་རྣམས་ཡུལ་དངོས་སུ་བཅར་ཏེ། དྲུང་ཡིག་དེ་གནས་དབྱུང་བཏང་ནས་གསར་པ་ཞིག་བསྐོས་ཡོད་པ་མ་ཟད། མང་ཚོགས་ཁྲོད་འོས་བསྡུ་དྲང་བདེན་བྱུང་མེད་པའི་བློ་འཚབ་བྱེད་མཁན་མང་པོ་བྱུང་ཡོད་སྟབས། དབུས་འོས་བསྡུ་ལས་ཁང་གི་ལམ་སྟོན་བཀོད་ཁྱབ་བཞིན་གནད་དོན་མ་བྱུང་གོང་གི་འོས་ཤོག་ཁྱོན་ ༡༩༢ རྣམས་ཆ་ཚང་རྩིས་མེད་བཏང་སྟེ། ཉིན་རྒྱབ་ཆུ་ཚོད་ ༣ པའི་ཐོག་འོས་བསྡུ་བསྐྱར་དུ་གནང་ཡོད་འདུག
ཡང་ཁོང་གི་འགྲེལ་བརྗོད་ལྟར་ན། འདི་ལོའི་འོས་བསྡུའི་ནང་ལ་དྭགས་གླེ་བྱང་ནང་འོས་བསྡུའི་ས་ཚིགས་ ༡༦ ཡོད་པའི་ཁྲོད་ནས། ༡༠ ལ་དྭགས་བྱང་ཐང་ཁུལ་དུ་ཡོད་པ་དང་། ས་གནས་འོས་བསྡུ་ལས་ཁང་ངོས་ནས་ལ་དྭགས་བྱང་ཐང་ཁུལ་དུ་ཆེད་མངགས་འོས་བསྡུའི་ཚོགས་མི་རེ་བཏང་ཡོད་པ་མ་ཟད། བདུན་ཕྲག་གཅིག་གཉིས་གོང་ནས་ས་གནས་ཀྱི་འགན་འཁུར་བ་རྣམས་ལ་འོས་བསྡུ་དང་འབྲེལ་བའི་ལམ་སྟོན་རྣམས་ཞུས་ཟིན་པ་ལྟར། ད་ལྟའི་ཆར་ལ་དྭགས་ཀྱི་འོས་བསྡུའི་ས་ཚིགས་གཞན་ནས་དྲང་བདེན་མ་བྱུང་བ་སོགས་ཀྱི་གནས་ཚུལ་བྱུང་མེད་པ་མ་ཟད། འབྱུང་འགྱུར་དངོས་གཞིའི་འོས་བསྡུའི་སྐབས་ད་ཐེངས་ལྟ་བུའི་གནད་དོན་མི་བྱུང་བའི་ཆེད་དུ། ས་གནས་འོས་བསྡུའི་ཚོགས་མི་རྣམས་འཛོམས་ཏེ་ཐབས་ལམ་གསར་པ་འཚོལ་རྒྱུ་ཡིན་སྐོར་བརྗོད་བྱུང་།
ཐེངས་འདིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་དེ་ཕྱི་ཟླ་ ༡ ཚེས་ ༣ ཉིན་གཏན་འཁེལ་ཡོད་ཀྱང་། དབྱིན་ཡུལ་གཙོ་བོར་གྱུར་བའི་ཡུ་རོབ་ཁུལ་དུ་ཏོག་དབྱིབས་གཉན་རིམས་འགོས་ཁྱབ་དང་། བལ་ཡུལ་སོགས་ཀྱི་ནང་ཆབ་སྲིད་ཀྱི་གནས་སྟངས་འོག་དཀའ་ངལ་མང་པོ་ཞིག་ཡོང་གི་ཡོད་པར་བརྟེན། སྔོན་འགྲོའི་འོས་བསྡུ་སྔ་ནུར་གྱིས་དུས་ཡུན་རིང་དུ་གཏོང་དགོས་བྱུང་ཡོད་སྟབས། འོས་སྒམ་ཉིན་ཤས་རིང་བདག་ཉར་བྱེད་དགོས་པའི་གནས་སྟངས་ཆགས་ཡོད་པར་བརྟེན། འོས་སྒམ་བདག་ཉར་དོ་དམ་ག་འདྲ་གནང་ཐུབ་ཀྱི་ཡོད་མེད་ཐད་སེམས་འཚབ་གནང་མཁན་ཡོང་གི་ཡོད་པ་དང་། དེའི་ཐད་དབུས་འོས་བསྡུའི་འགན་འཛིན་དཔེ་ཟུར་དབང་འདུས་ཚེ་རིང་མཆོག་ནས་འོས་སྒམ་བདག་ཉར་གང་ལེགས་གནང་གི་ཡོད་སྐོར་གསུངས་འདུག
གཞན། ད་ལན་གྱི་སྔོན་འགྲོའི་འོས་བསྡུའི་སྐབས་རྒྱ་གར་ནང་གི་ས་གནས་གྲངས་ ༢༡ དང་། བལ་ཡུལ་གྱི་ས་གནས་གྲངས་ ༣ བཅས་བོད་མིའི་སྒྲིག་འཛུགས་ནས་མཐུན་འགྱུར་གནང་བའི་ཟུར་འཇོག་ཁང་ཁྱོན་ ༢༤ ནང་ཡོད་པའི་བོད་མི་གྲངས་ ༢༥༧ གྱིས་སྔོན་འགྲོའི་འོས་བླུགས་ཐུབ་མེད་པ་རེད། དེ་བཞིན། འོས་བསྡུའི་སྒྲིག་གཞི་གཞིར་བཟུང་གདམ་བྱ་འདེམས་བྱེད་ཀྱི་ཐོབ་ཐང་བཀག་བསྐྱིལ་བྱས་པ་བོད་མི་ ༦ དང་། སྔོན་འགྲོའི་སྐབས་འདེམས་བྱེད་ཀྱི་ཐོབ་ཐང་བཀག་བསྐྱིལ་བྱས་པ་སྤྱི་འཐུས་རྒྱུན་ལས་གྲངས་ ༡༡ ཆགས་ཡོད་པ་རེད།
གསར་འགོད་པ། པ་སངས་ཚེ་རིང་།
ཡིག་རྨོངས་པའི་འོས་མིའི་མཚན་བྲིས་མེད་པས་འོས་བསྐྱར་དུ་འཕེན་དགོས་ཐུག་པ་མ་རེད། གཙོ་བོར་མི་ངན་ཚོས་བོད་སྤྱི་པའི་མང་གཙོ་ལ་རྡོག་རོལ་དང་སྒེར་གྱི་རང་དབང་འཕྲོགས་བྱས་ནས་ཉེས་པ་རྫབ་ཆེན་བསགས་པ་ཤེས་རྟོགས་བྱུང་བར་བརྟེན་འོས་བསྐྱར་ཏུ་བླུགས་དགོས་བྱུང་བ་རེད།