འདས་ལོའི་ཕྱི་ཟླ་ ༡༠ ཙམ་ནས་བཟུང་འཛམ་གླིང་ནང་མིང་དུ་གྲགས་པའི་རྒྱ་ནག་གི་ཕྱུག་བདག་ཆེན་མོ་མ་ཡོན་གར་སོང་ཆ་མེད་དུ་གྱུར་ཡོད་པ་དང་རྒྱ་ནག་གཞུང་ཕྱོགས་ནས་མ་ཡོན་གྱི་སྐོར་ལ་གསལ་བཤད་གང་ཡང་བྱས་མེད་པ་རེད།
ཉེ་ལམ་རྒྱ་ནག་གཞུང་གིས་རྒྱ་ནག་གི་ཕྱུག་བདག་མ་ཡོན་གྱིས་བཙུགས་པའི་རྒྱ་ནག་གི་དྲ་ལམ་ཚོང་གཉེར་ཁང་ཆེ་ཤོས་ཨ་ལི་བྷ་བྷ་ཡིས་གཙོ་གཉེར་བྱེད་བཞིན་པའི་ཨེན་ཊི་ཚོང་སྡེ་ (Ant Group)ཡི་མ་རྐང་ཚོང་འགྲེམ་བཀག་སྡོམ་བྱས་ཡོད་པ་དང་བསྟུན། བར་སྐབས་ནས་མ་ཡོན་ཡང་མང་ཚོགས་ཀྱི་འདུ་འཛོམས་རིགས་དང་སྤྱི་ཚོགས་དྲ་ལམ་སོགས་ནང་མཐོང་རྒྱུ་མེད་པར་གྱུར་འདུག
གསར་ལམ་ཁག་གི་གནས་ཚུལ་ལྟར་ན། མ་ཡོན་གྱིས་འདི་ལོའི་ཕྱི་ཟླ་ ༡༠ པའི་ཟླ་དཀྱིལ་ཙམ་ནས་ད་བར་རྒྱ་ནག་གི་སྤྱི་ཚོགས་ནང་གནས་ཚུལ་གང་ཡང་སྤེལ་མེད་པ་མ་ཟད། འདས་ལོའི་ཕྱི་ཟླ་ ༡༡ ཚེས་ ༡༤ ཉིན་ཁོང་གིས་གསར་འཛུགས་བྱས་པའི་ཨ་ཧྥེ་རི་ཁའི་ཚོང་དོན་དཔའ་བོ་ (Africa’s Business Heroes) ཞེས་པའི་ཁེ་ལས་འགྲན་རྩོད་ཀྱི་བརྙན་འཕྲིན་ལས་རིམ་གྱི་དཔྱད་འདེམས་པར་ཞུགས་གཏན་འཁེལ་ཡོད་ཀྱང་། མཐའ་མ་དེར་ལས་རིམ་དེའི་ནང་ཞུགས་མེད་འདུག
འདས་ལོའི་ཕྱི་ཟླ་ ༡༠ པའི་ནང་ཧྲང་ཧེ་(Shanghai) རུ་བསྡུས་པའི་ཚོགས་འདུ་ཞིག་གི་ཐོག མ་ཡོན་གྱིས་རྒྱ་ནག་ངོས་ནས་ཚོང་དོན་སྒྲིག་སྲོལ་ལེགས་པོ་ཞིག་བསྐྲུན་དགོས་པ་ལས། དཔལ་འབྱོར་གྱི་ཉེན་ཚབས་ཡོད་པའི་སྒྲིག་སྲོལ་ཞིག་གཏོད་རྒྱུ་མེད་སྐོར་དང་། ཉེན་ཁ་མེད་པའི་གསར་གཏོད་བྱེད་ཚུལ་དེས་དོན་དངོས་ཐོག་གསར་གཏོད་རྩ་མེད་གཏོང་གི་ཡོད་སྐོར་སོགས་མངོན་གསལ་དོད་པོའི་ཐོག་ནས་རྒྱ་ནག་གི་ཚོང་འབྲེལ་བཀོད་འདོམས་ཚན་པར་སྐྱོན་བརྗོད་བྱས་ཡོད་པ་དང་། གཏམ་བཤད་བྱས་ནས་ཉིན་ཤས་ཀྱང་མ་འགོར་བར། ཕྱི་ཟླ་ ༡༡ ཚེས་ ༣ ཉིན་རྒྱ་ནག་ཧྲང་ཧེ་མ་རྐང་བརྗེ་སྒྱུར་ལྷན་ཚོགས་ (The Shanghai Stock Exchange) ཀྱིས་ཨ་ལི་བྷ་བྷའི་ཁྱབ་ཁོངས་ཨེན་ཊི་ཚོང་སྡེ་ཡིས་འགྲན་ཡ་རྣམས་ཁྲོམ་ར་ནས་ཕུད་ཐབས་དང་འཛད་སྤྱོད་པའི་ཐོབ་ཐང་ལ་དོ་ཕོག་གཏོང་གི་ཡོད་སྐོར་བརྗོད་དེ། སྤྱི་གཉེར་ཁང་གི་ཧྲང་ཧེ་དང་ཧོང་ཀོང་ཁུལ་དུ་མ་རྐང་ཚོང་བསྒྱུར་བྱ་རྒྱུའི་ལས་གཞི་དེ་བཀག་ཡོད་པ་མ་ཟད། མ་ཡོན་དང་ཨེན་ཊི་ཚོང་སྡེ་འགན་འཛིན་རྣམས་འབོད་འགུག་བྱས་ཡོད་འདུག གཞན་ཡང་རྒྱ་ནག་གི་ཕྱི་སྲིད་མགྲིན་ཚབ་པ་ཝང་ཝེན་པིན་ཟེར་བ་དེས་ཀྱང་དེ་ནི་ཁྲོམ་རའི་བརྟན་བརླིང་སྲུང་སྐྱོབ་དང་མ་འཛུགས་མཁན་གྱི་ཐོབ་ཐང་དང་ཁེ་དབང་སྲུང་སྐྱོབ་བྱ་ཆེད་ཡིན་སྐོར་འགྲེལ་བརྗོད་བྱས་ཡོད་པ་རེད།
འོན་ཀྱང་དབྱེ་ཞིབ་པ་རྣམས་ཀྱིས་ད་ལན་རྒྱ་ནག་གཞུང་གི་ཐག་གཅོད་དེ་ནི་མ་ཡོན་དང་འབྲེལ་བ་ཡོད་པ་དང་། ལྷག་པར་དུ་མ་ཡོན་གྱི་མངོན་གསལ་དོད་པོའི་ཐོག་ནས་རྒྱ་ནག་གཞུང་ལ་སྐྱོན་བརྗོད་བྱས་པ་དེར་བརྡ་ལན་སྤྲད་པ་ཞིག་ཡིན་པ་དང་། ཡང་ཕྱོགས་གཞན་ནས་རྒྱ་ནག་གཞུང་གིས་ཆབ་སྲིད་ཙམ་དུ་མ་ཟད་ཚོང་དོན་སོགས་སྤྱི་ཚོགས་ཀྱི་སྡེ་ཁག་ཚང་མའི་ནང་ཆེས་མཐོའི་དབང་ཆ་སྲུང་སྐྱོབ་དང་སྟངས་འཛིན་བཀོད་འདོམས་བྱ་ཆེད་ཡིན་སྐོར་རྗོད་ཀྱིན་འདུག དེ་ཡང་འདས་ལོའི་ཕྱི་ཟླ་ ༩ པའི་ནང་རྒྱ་ནག་གཞུང་གིས་ཡོངས་ཁྱབ་ལམ་སྟོན་ཞིག་སྤེལ་བའི་ནང་། མང་ཚོགས་ཁྲོད་ཤུགས་རྐྱེན་ཆེ་བའི་གཞུང་འབྲེལ་མིན་པའི་ཚོགས་སྡེའམ་མི་སྒེར་རྣམས་ཀྱིས་ངེས་པར་དུ་དམར་ཤོག་ཚོགས་པའི་བཀའ་ལ་ཉན་དགོས་སྐོར་བཀོད་ཡོད་པ་རེད།
ཕྱི་ལོ་ ༢༠༡༩ ལོར་མ་ཡོན་གྱིས་ཨ་ལི་བྷ་བྷ་སྤྱི་གཉེར་ཁང་གི་སྤྱི་ཁྱབ་འགན་འཛིན་གྱི་ལས་གནས་ནས་རྒས་ཡོལ་ཞུས་ཡོད་ནའང་། ད་ལྟའི་ཆར་མ་ཡོན་ལ་སྤྱི་གཉེར་ཁང་དེའི་མ་རྐང་གི་བརྒྱ་ཆ་ ༥ ཡོད་པས། ཨ་ལི་བྷ་བྷ་ཡི་མི་སྒེར་མ་འཛུགས་མཁན་ཆེ་ཤོས་དེ་ཡིན་པ་རེད། གལ་ཏེ་ད་ཐེངས་ཨེན་ཊི་ཚོང་སྡེ་ཡིས་ཧོང་ཀོང་དང་ཧྲང་ཧེ་ཁུལ་དུ་མ་རྐང་ཚོང་འགྲེམ་བྱ་ཐུབ་ཚེ། ཚོང་གཉེར་ཁང་དེར་ཨ་སྒོར་ཐེར་འབུམ་ ༣༧ འཐོབ་སྲིད་པ་དང་། དེ་ནི་འཛམ་གླིང་ལོ་རྒྱུས་ཁྲོད་ཀྱི་མ་རྐང་ཚོང་འགྲེམ་འབོར་ཆེ་ཤོས་དེ་ཆགས་ཀྱི་ཡོད་འདུག
རྗེ་ཁི་མཱའམ་མ་ཡོན་ནི་ཕྱི་ལོ་ ༡༩༦༤ ལོར་རྒྱ་ནག་ལྷོ་བརྒྱུད་ཧང་ཀྲུའུ་གྲོང་ཁྱེར་ཀྲེ་ཅིང་དུ་སྐྱེས་ཤིང་། ལོ་ ༤ བསྟུད་མར་སློབ་ཆེན་གྱི་ཚུད་རྒྱུགས་ནང་ཞུགས་མཐར་ཧང་ཀྲུའུ་དགེ་འོས་སློབ་ཆེན་ (Hangzhou Teacher’s Institute) དུ་རྒྱུགས་འཕྲོད་དེ། ཕྱི་ལོ་ ༡༩༨༨ ལོར་སློབ་ཆེན་དེ་ནས་དབྱིན་ཡིག་རབ་འབྱམས་པའི་སློབ་མཐར་ཕྱིན་པ་དང་། ཧང་ཀྲུའུ་གཙུག་སློབ་གྲྭ་ཆེན་མོ་ནས་ཚོང་ལས་རིག་པའི་ཐོག་སློབ་མཐར་ཕྱིན། སློབ་མཐར་ཕྱིན་རྗེས་ལས་ཁུངས་དང་བཟོ་གྲྭ་ ༣༠ ལྷག་ནང་ལས་ཞུགས་སྙན་ཞུ་ཕུལ་ཡང་གཅིག་གིས་ཀྱང་བླངས་མེད་པ་དང་། ཁག་ཅིག་གིས་མ་ཡོན་གྱི་སྐམ་ཞིང་རིད་པའི་གཟུགས་བྱད་ཉམ་ཆུང་དེའང་ལས་མིར་འོས་འཚམ་མིན་པའི་རྒྱུ་མཚན་དུ་བགྲངས་ཡོད་པ་རེད། དེ་བཞིན་ཕྱི་ལོ་ ༡༩༩༤ ལོ་ནས་བཟུང་ཁོས་ཨ་རིའི་ཧཱ་ཝར་ཌི་གཙུག་ལག་སློབ་གྲྭ་ཆེན་མོར་ཐེངས་ ༡༠ ལ་སློབ་ཞུགས་སྙན་ཞུ་ཕུལ་ཡང་མ་ཚུད་པར་ལུས། མཐར་ཕྱི་ལོ་ ༡༩༩༤ ལོར་ཨ་རིར་བསྐྱོད་ནས་དེར་ China Yellow Pages ཟེར་བའི་དྲ་ཐོག་ཚོང་གཉེར་ཁང་ཞིག་མགོ་བརྩམས་ཏེ་ལེགས་གྲུབ་ཆེན་པོ་བྱུང་བ་དང་། དེ་ནས་ཕྱི་ལོ་ ༡༩༩༨ ལོར་ཕྱིར་རྒྱ་ནག་ཏུ་ལོག་སྟེ་ད་ལྟ་འཛམ་གླིང་ནང་སྐད་གྲགས་ཡོད་པའི་ཨ་ལི་བྷ་བྷ་ཚོང་གཉེར་ཁང་དེ་བཙུགས། རིམ་པས་མ་ཡོན་རྒྱ་ནག་ཙམ་དུ་མ་ཟད་ཨེ་ཤི་ཡ་དང་། འཛམ་གླིང་གི་ཕྱུག་བདག་ཆེ་ཤོས་གྲས་སུ་ཚུད་ཡོད་ཅིང་། ཨ་རིའི་ཚོང་འབྲེལ་དུས་དེབ་ཧྥོར་བྷི་སི་ (Forbes Magazine) ལྟར་ན། ད་ལྟ་རང་ལོ་ ༥༦ ལ་སོན་པའི་མ་ཡོན་ལ་ཨ་སྒོར་ཐེར་འབུམ་ ༥༧།༩ ཡོད་འདུག
གསར་འགོད་པ། པ་སངས་ཚེ་རིང་།
