རྒྱ་གར་གྱི་ཞིང་ལས་ཁྲིམས་སྒྲིག་གསུམ་ལ་བསྐྱར་ཞིབ་བྱ་རྒྱུ་ཡིན་འདུག

རྩོད་རྙོག་ཆེན་པོར་གྱུར་བའི་རྒྱ་གར་རྒྱལ་ཡོངས་ཀྱི་ཞིང་ལས་དང་འབྲེལ་བའི་ཁྲིམས་སྒྲིག་གསར་པ་གསུམ་ལ་སོ་ནམ་པས་ངོ་རྒོལ་ཤུགས་ཆེན་བྱེད་ཀྱི་ཡོད་པས་གནས་སྐབས་ལག་བསྟར་མཚམས་འཇོག་བྱས་ཏེ་བསྐྱར་ཞིབ་བྱ་རྒྱུའི་ཐག་གཅོད་གནང་འདུགདེ་རིང་ཉིན་རྒྱབ་ཆུ་ཚོད་ ༡།༣༠ ཙམ་ལ་རྒྱ་གར་གྱི་ཆེས་མཐོའི་ཁྲིམས་ཁང་གིས་རྒྱ་གར་གྱི་ཞིང་ལས་དང་འབྲེལ་བའི་རྩོད་རྙོག་ཅན་གྱི་ཁྲིམས་སྒྲིག་གསར་པ་ ༣ དེའི་ཐད་ཉན་ཞིབ་ཚོགས་སྟེ། དབུས་གཞུང་ལ་ཁྲིམས་སྒྲིག་ ༣ དེ་གནས་སྐབས་ལག་བསྟར་བྱེད་མཚམས་འཇོག་དགོས་པའི་བཀའ་ཁྱབ་བཏང་ཡོད་པ་མ་ཟད། ཁྲིམས་སྒྲིག་ ༣ ལ་བསྐྱར་ཞིབ་བྱ་ཆེད་མཁས་པ་ ༤ ལས་གྲུབ་པའི་རང་དབང་ཅན་གྱི་ཚོགས་ཆུང་ཞིག་བཙུགས་ཡོད་འདུག

ཆེས་མཐོའི་ཁྲིམས་ཞིབ་པ་ཆེ་བ་བྷོབ་དྷེ་ (S A Bobde) ལགས་ཀྱིས། ང་ཚོས་དོན་མེད་ཐོག་ཞིང་ལས་ཁྲིམས་སྒྲིག་དེ་དག་མཚམས་འཇོག་བྱ་རྒྱུ་མིན། ང་ཚོས་ཚོགས་ཆུང་དེ་བརྒྱུད་ནས་ཁྲིམས་སྒྲིག་གི་འགག་རྩ་རྣམས་སེལ་ཐབས་བྱ་རྒྱུ་ཡིན་པས། ཕྱོགས་གཉིས་ཀས་ཚོགས་ཆུང་དེ་འགྲིག་མིན་གྱི་ལན་འདེབས་བྱ་ཆོག་ལ། ང་ཚོས་ཚོགས་ཆུང་དེ་ཉིད་བརྒྱུད་མཐའ་མའི་ཐག་གཅོད་བྱ་རྒྱུ་ཡིན། ཞེས་བརྗོད་འདུུག་ལ། ཉེ་ལམ་ཞིང་པའི་སྒྲིག་འཛུགས་རྣམས་ཚོགས་ཆུང་དེའི་སར་བཅར་རྒྱུ་མིན་པའི་གནས་ཚུལ་ཐོན་བཞིན་པ་དང་འབྲེལ། ཆེས་མཐོའི་ཁྲིམས་ཞིབ་ཁང་གི་ངོས་ནས་གནས་ཚུལ་མཐིལ་ཕྱིན་པ་ཤེས་རྟོགས་ཡོང་ཆེད་ཚོགས་ཆུང་དེ་བཙུགས་པ་ཞིག་ཡིན་སྟབས། ཚོགས་ཆུང་དེས་གནད་དོན་ལ་དབྱེ་ཞིབ་ཀྱིས་ཆེས་མཐོའི་ཁྲིམས་ཞིབ་ཁང་ལ་སྙན་ཐོ་འབུལ་རྒྱུ་ཡིན་པ་དང་། ཆེས་མཐོའི་ཁྲིམས་ཞིབ་ཁང་གི་ངོས་ནས་སྙན་ཐོ་དེ་གཞིར་བཟུང་ཐག་གཅོད་བྱ་རྒྱུ་ཡིན་པས། ཞིང་པའི་མཐུན་ཚོགས་རྣམས་ཀྱིས་ཚོགས་ཆུང་གི་བྱ་འགུལ་ལ་གཞོགས་འདེགས་ཞུ་དགོས་སྐོར་བསྒྲགས་ཡོད་འདུག

སྲིད་བློན་མུ་དྷི་མཆོག་གིས་སྣེ་ཁྲིད་པའི་བྷི་ཇེ་པི་སྲིད་གཞུང་གིས་གྲོས་ཚོགས་ནང་བཏོན་ཅིང་གཏན་འབེབ་ལག་བསྟར་ཟིན་པའི་ཞིང་ལས་དང་འབྲེལ་བའི་ཁྲིམས་སྒྲིག་གསར་པ་ ༣ དེས། ཞིང་པ་གཙོས་པའི་ཞིང་ལས་ཐོན་སྐྱེད་ཚན་པར་དོ་ཕོག་ཆེན་པོ་ཐེབས་ཀྱི་ཡོད་སྐོར་བརྗོད་དེ། འདས་པའི་ཟླ་ཤས་ནང་ཞིང་པའི་མཐུན་ཚོགས་མི་ཉུང་བས་རྒྱ་གར་གྱི་ཆེས་མཐོའི་ཁྲིམས་ཞིབ་ཁང་ལ་ཁྲིམས་སྒྲིག་དེ་ཉིད་རྩ་ཁྲིམས་དང་འགལ་ཡོད་པའི་གནད་དོན་ཐོག་ནས་ཞུ་གཏུག་བྱས་རྐྱེན། ད་ཐེངས་ཆེས་མཐོའི་ཁྲིམས་ཞིང་ཁང་གིས་ཁྲིམས་སྒྲིག་དང་འབྲེལ་བའི་གྱོད་དོན་སྐོར་ཞིག་གི་ཐོག་ཉན་ཞིབ་ཚུགས་ཡོད་པ་རེད།འདས་པའི་ཟླ་ ༡ དང་ཕྱེད་ཀ་ལྷག་རིང་ལྡི་ལིའི་མཐའ་མཚམས་སུ་གཞུང་རྒོལ་ལས་འགུལ་ནང་ཞུགས་པའི་ཞིང་པ་སྟོང་ཕྲག་མང་པོའི་དགོས་འདུན་ནི། ཞིང་ལས་ཁྲིམས་སྒྲིག་དེ་ཉིད་ཕྱིར་འཐེན་བྱ་རྒྱུ་དེ་ཡིན་འདུག  དེ་ཡང་ཁྲིམས་སྒྲིག་གསར་པ་ ༣ དེས་ཁྱོན་ཡོངས་ནས་ཞིང་ལས་ཐོན་རྫས་ཀྱི་རིན་གོང་དང་། ཉོ་ཚོང་། གསོག་ཉར་སོགས་དང་འབྲེལ་བའི་བཀག་སྡོམ་རང་བཞིན་གྱི་ཁྲིམས་རྣམས་ལྷོད་དུ་བཏང་ཡོད་ཅིང་། དེ་བས་ཀྱང་གལ་ཆེ་བ་ནི། ད་བར་རྒྱ་གར་གྱི་ཞིང་པ་ཕལ་མོ་ཆེས་རང་གི་ཞིང་ལས་ཐོན་རྫས་རྣམས་གཞུང་གིས་བཀོད་སྒྲིག་བྱས་པའི་ཁྲོམ་ར་ (Mandi) བརྒྱུད་བཙོང་གི་ཡོད་ཅིང་། ཁྲོམ་ར་དེའི་ནང་ཞིང་པ་ཚོར་རང་གི་སྟོན་ཐོག་གམ་ཞིང་ལས་ཐོན་རྫས་ལ་གཞུང་གི་གཏན་འབེབ་གཞིར་བཟུང་གི་དམའ་མཐའི་རིན་གོང་ཞིག་ཐོབ་ཀྱི་ཡོད་ཀྱང་། ད་ཐེངས་ཀྱི་ཁྲིམས་ཡིག་གསར་པ་དེའི་ནང་གཞུང་གི་ཁྲོམ་ར་དེ་མེད་པར་བཟོས་ཏེ། ཞིང་པ་རྣམས་ལ་ཁྲོམ་རའི་རིན་གོང་ཐོག་རང་གི་ཞིང་ལས་ཐོན་རྫས་རྣམས་སྤྱི་གཉེར་ཁང་ཆེ་ཁག་དང་། ཚོང་པ་ཆེ་ཁག་གིས་མཚོན་པའི་ཕྱིའི་ཁྲོམ་ར་ལ་ཐད་ཀར་བཙོང་ཆོག་པ་བཟོས་ཡོད་པ་རེད། སྤྱིར་ད་ལྟའི་ཆར་རྒྱ་གར་གྱི་མངའ་སྡེ་རེ་ཟུང་ལ་ཞིང་པས་ཐད་ཀར་ཕྱིའི་ཁྲོམ་ར་བཙོང་ཆོག་པའི་ལམ་བུ་ཡོད་ནའང་། ད་ལྟའི་ཁྲིམས་ཡིག་དེས་རྒྱལ་ཡོངས་ཀྱི་ཞིང་པའི་ཁྲོམ་རའི་སྒྲོམ་གཞི་ལ་བསྒྱུར་བཅོས་བཏང་ཡོད་སྟབས། ཞིང་པ་རྣམས་ལ་མཚོན་ན། འབྱུང་འགྱུར་ཁྲིམས་ཡིག་དེའི་རྐྱེན་པས་གཞུང་གི་སྟངས་འཛིན་འོག་ཡོད་པའི་ཁྲོམ་རའི་ལམ་ལུགས་དེ་མེད་པར་ཆགས་རྒྱུ་མ་ཟད། ཞིང་པ་རྣམས་ལ་ད་ལྟ་ཐོབ་བཞིན་པའི་གཞུང་གི་གཏན་འབེབ་བྱས་པའི་ཉུང་མཐའི་རིན་གོང་དེ་ཡང་མེད་པར་ཆགས་ཏེ། མཐར་སྒེར་གཉེར་ཚོང་པའི་སྟངས་འཛིན་འོག་ཤོར་ཏེ་ཞིང་པ་ཚོར་གདམ་ཀ་མེད་པར་འགྱུར་ཉེན་ཡོད་པའི་བློ་འཚབ་བྱེད་ཀྱི་ཡོད་པ་རེད་འདུག

སྤྱིར་རྒྱ་གར་གྱི་མི་འབོར་གྱི་ཕྱེད་ཀ་ཙམ་ཞིང་ལས་ལ་བརྟེན་ཡོད་ཀྱང་། ཞིང་ལས་ཐོན་སྐྱེད་ཀྱིས་རྒྱལ་ཡོངས་ཀྱི་ལོ་རེར་སྤྱི་སྙོམས་ཐོན་སྐྱེད་ཀྱིས་བརྒྱ་ཆ་ ༦ མ་གཏོགས་ཟིན་གྱི་མེད་སྟབས། དཔལ་འབྱོར་དང་ཞིང་ལས་དབྱེ་ཞིབ་པ་ཚང་མས་རྒྱ་གར་གྱི་ཞིང་ལས་ཚན་པར་བཅོས་བསྒྱུར་དགོས་པར་འདོད་ཀྱི་ཡོད་ནའང་། ཐེངས་འདིའི་ཞིང་ལས་ཁྲིམས་སྒྲིག་དེ་དག་ཞིང་པའི་བསམ་ཚུལ་ལ་བསྟུན་མེད་ཀྱི་ཐོག་ནས་གཏན་འབེབ་ལག་བསྟར་བྱས་པའི་རྐྱེན་གྱིས་ལེགས་གྲུབ་བྱུང་མེད་སྐོར་རྗོད་ཀྱིན་འདུག

དེ་ཡང་འདས་ལོའི་ཕྱི་ཟླ་ ༩ ཚེས་ ༢༠ ཉིན་རྒྱ་གར་གྱི་གྲོས་ཚོགས་གོང་མས་ཞིང་ལས་ཁྲིམས་འཆར་ ༣ ལ་རྒྱབ་སྐྱོར་དང་སྲིད་འཛིན་གྱིས་མཚན་རྟགས་བསྐྱོན་ཏེ་དངོས་སུ་ལག་བསྟར་བྱས་ཡོད་ཅིང་། སྐབས་དེར་གཞུང་འཛིན་ཁ་གཏད་ཚོགས་པ་ཁག་གི་ཁྲིམས་ལུགས་གཏན་འབེབ་ཀྱི་འགྲོ་ལུགས་ལ་རྩིས་མེད་དང་། ཁྲིམས་འཆར་དེ་དག་ལ་གྲོས་ཚོགས་ཀྱི་ཚོགས་ཆུང་གིས་བསྐྱར་ཞིབ་དགོས་སྐོར་བསྐྱོན་བརྗོད་དྲག་པོ་བྱས་ཡོད་ལ། ཁྲིམས་འཆར་ཐོག་བགྲོ་གླེང་བྱེད་སྐབས་ཁ་གཏད་ཚོགས་པའི་ཚོགས་མི་ ༨ ཀྱིས་གྲོས་ཚོགས་ཀྱི་མདུན་དུ་ངོ་རྒོལ་བྱས་པ་དང་། རྒྱ་གར་རྒྱལ་ཡོངས་ཞིང་ལས་མཐུན་ཚོགས་ཀྱིས་ཁྲིམས་འཆར་དེ་ནི་ཞིང་པར་ངོ་ལོག་དང་སྲོག་ཁྲིམས་ཤིག་ཡིན་སྐོར་བརྗོད་ཡོད་པ་རེད། འདས་ལོའི་ཕྱི་ཟླ་ ༡༡ ཚེས་ ༢༦ ཉིན་ཞིང་ལས་ཐོན་ཁུངས་ཆེ་བའི་པཱན་ཇབ་ (Punjab) དང་ཧར་ཡ་ན་ (Haryana) མངའ་སྡེ་གཙོས་པའི་མངའ་སྡེ་གཞན་གྱི་ཞིང་པ་རྣམས་རྒྱལ་ས་ལྡི་ལིའི་ས་མཚམས་སིང་གྷུ་ (Singhu Border) སུ་འཛོམས་ཏེ་ད་བར་ངོ་རྒོལ་སྐད་འབོད་བྱེད་མུས་ཡིན་པ་དང་། ངོ་རྒོལ་ལས་འགུལ་ཁྲོད་ཞིང་པ་ ༤ ཡིས་རང་སྲོག་ཀྱང་བཅད་ཡོད་པ་རེད། དེ་བཞིན་ད་བར་ཞིང་པའི་མཐུན་ཚོགས་ཀྱི་སྐུ་ཚབ་དང་དབུས་གཞུང་བར་ལ་གྲོས་མོལ་ཐེངས་ ༨ བྱས་ཡོད་ནའང་གྲུབ་འབྲས་ཐོན་མེད་པ་རེད་འདུག

གསར་འགོད་པ་ཀླུ་མགོན་ཐར་དང་། པ་སངས་ཚེ་རིང་།