དེ་རིང་དྲ་ལམ་བརྒྱུད་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ལགས་དང་ཁོང་གི་ཕྱག་རོགས་རྣམ་པས་༧གོང་ས་མཆོག་ལ་མཇལ་མོལ་ཞུས་ཡོད་འདུག
དེ་རིང་ཕྱི་ཚེས་ ༡༣ ཉིན་གྱི་སྔ་དྲོར་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ (Robert A. Destro) ལགས་དང་། ཨ་རིའི་རྒྱལ་སྲིད་ལྷན་ཁང་གི་ཁོང་གི་ཕྱག་རོགས་རྣམ་པས་དྲ་ཐོག་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་མོལ་ཞུས་ཡོད་འདུག་ལ། ཁ་སང་ཕྱི་ཚེས་ ༡༢ ཉིན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་དབུས་བཀའ་བློན་རྣམ་པ་དང་། བོད་མི་མང་སྤྱི་འཐུས་སྦྲེལ་པོའི་དབུས་རྒྱུན་ལས་རྣམས་ལ་བོད་དོན་ཐོག་བཀའ་མོལ་གནང་ཡོད་འདུག
ཁ་སང་དྲ་ལམ་བརྒྱུད་བོད་མིའི་སྒྲིག་འཛུགས་ཀྱི་མཛད་གཙོ་རྣམ་ལ་བཀའ་མོལ་གནང་སྐབས། ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ལགས་ཀྱིས། ཨ་རིའི་ཕྱི་སྲིད་ལས་ཁུངས་དང་ཨ་རིའི་གཞུང་གཉིས་ཀྱིས་བོད་མིའི་ངོ་བོ་སྲུང་སྐྱོབ་བྱེད་ཐབས་སུ་རམ་འདེགས་བྱེད་པར་རྒྱབ་སྐྱོར་ཤུགས་ཆེན་གནང་གི་ཡོད་སྐོར་དང་། མི་འགྱངས་བར་ཁོང་གི་ཨ་རིའི་བོད་དོན་དམིགས་བསལ་འབྲེལ་མཐུད་པའི་ལས་ཡུན་རྫོགས་ཀྱི་ཡོད་ནའང་། ཁོང་གིས་བོད་དོན་ཀྱི་ཕྱག་ལས་མུ་མཐུད་གནང་རྒྱུ་ཡིན་སྐོར། དེ་བཞིན་ཨ་རི་གཞུང་གིས་བོད་ནང་འགྲོ་འོང་འདྲ་མཉམ་གྱི་ཁྲིམས་གཞི་གཏན་འབེབ་བྱས་ཡོད་པ་བཞིན། ཁོང་གིས་རྒྱལ་ཁབ་མང་པོར་གཅིག་མཚུངས་ཀྱི་ཁྲིམས་གཞི་གཏན་འབེབ་བྱེད་དགོས་པའི་འབོད་བསྐུལ་ཞུས་ཡོད་སྐོར་སོགས་གསུངས་འདུག
སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས། སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ (Robert A. Destro) ལགས་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་པ་དེ་ནི་ཨ་རི་གཞུང་གིས་བོད་དོན་དང་བོད་མི། ཁྱད་པར་དུ་གཞིས་ལུས་བོད་མི་ས་ཡ་དྲུག་ལ་རྒྱབ་སྐྱོར་ཡོད་པའི་རྣམ་པ་ཤུགས་ཆེན་ཞིག་བསྟན་པ་ཡིན་སྐོར་དང་། དམིགས་བསལ་འབྲེལ་མཐུད་པར་བསྐོས་པའི་འདས་པའི་ཟླ་ཤས་རིང་རྒྱལ་སྤྱིའི་ཐོག་ཁོང་གིས་བོད་དོན་དང་འབྲེལ་བའི་གནས་ཚུལ་གླེང་སློང་ཤུགས་ཆེནགནང་ཡོད་པར་བསྔགས་བརྗོད་གནང་འདུག
དེ་བཞིན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་བོད་མིའི་སྒྲིག་འཛུགས་ཀྱི་དམངས་གཙོའི་བྱུང་རིམ་ངོ་སྤྲོད་གནང་ཡོད་པ་དང་། ཐེངས་འདིར་དྲ་ལམ་བརྒྱུད་མཇལ་མོལ་བྱུང་བར་དགའ་ཚོར་ཆེན་པོ་བྱུང་བ། དེ་བཞིན་མ་འོངས་པར་དངོས་སུ་མཇལ་རྒྱུའི་འདུན་པ་ཆེན་པོ་ཡོད་སྐོར་དང་། སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ལགས་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་པར་འཚམས་འདྲི་གནང་འདུག
འདས་ལོའི་ཕྱི་ཟླ་ ༡༠ ཚེས་ ༡༤ ཉིན་ཨ་རིའི་རྒྱལ་སྲིད་དྲུང་ཆེ་མེག་པོམ་པེའོ་མཆོག་གིས་གསར་འགོད་གསལ་བསྒྲགས་ཤིག་གི་སྟེང་། ཨ་རིའི་རྒྱལ་སྲིད་ལྷན་ཁང་གི་དམངས་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་ལས་ཁུངས་ཀྱི་དྲུང་ཆེའི་ལས་རོགས་སྐུ་ཞབས་རོ་བྷར་ཊི་ཨེ་ཌེ་སི་ཊོ་རོ་ (Robert A. Destro) ལགས། ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་བའི་གསལ་བསྒྲགས་གནང་ཡོད་པ་དང་། ཟླ་འདིའི་ཕྱི་ཚེས་ ༢༠ ཉིན་ཨ་རིའི་སྲིད་འཛིན་ཊོམ་ཕུ་སྲིད་གཞུང་གི་དུས་ཡུན་རྫོགས་པ་དང་བསྟུན། ཁོང་གི་བོད་དོན་དམིགས་བསལ་འབྲེལ་མཐུད་པའི་ལས་ཡུན་ཀྱང་གཞུང་འབྲེལ་ཐོག་ནས་མཚམས་འཇོག་བྱེད་དགོས་ཀྱི་ཡོད་པ་རེད། འདས་པའི་ལོ་བཞི་ཙམ་གྱི་རྗེས་ཨ་རི་གཞུང་གིས་བོད་དོན་དམིགས་བསལ་འབྲེལ་མཐུད་པ་ཞིག་བསྐོ་བཞག་གནང་པར་བོད་མིའི་སྒྲིག་འཛུགས་ཀྱི་དབུས་གཞུང་འབྲེལ་མིན་པའི་ཚོགས་སྡེ་སོགས་བོད་གཞུང་མང་གཉིས་ནས་དགའ་བསུ་ཞུས་ཡོད་ཀྱང་། ཚོགས་སྡེ་ཁག་ཅིག་ནས་བོད་དོན་དམིགས་བསལ་འབྲེལ་མཐུད་པ་དེ་དྲུང་ལས་ཀྱི་གནས་རིམ་ཅན་ཞིག་བསྐོ་བཞག་མ་གནང་བར་བློ་ཕམ་བྱུང་བའི་དགོངས་ཚུལ་བཏོན་ཡོད་པ་རེད།
གསར་འགོད་པ། ཀླུ་མགོན་ཐར།
