ཕྱི་ལོ་ ༢༠༢༠ ལོར་རྒྱ་ནག་གཞུང་གིས་བོད་ནང་དང་བལ་ཡུལ་བོད་མིའི་འགྲོ་བ་མིའི་ཐོབ་ཐང་ལ་བཙན་གནོན་བྱས་ཡོད་པ་མ་ཟད་བོད་སྐད་ཡིག་གི་བསླབ་གཞི་ཉེན་ཁའི་ནང་དུ་ཡོད་ཅེས་པའི་སྙན་ཐོ་ཤོག་གྲངས་ ༩༡ ཅན་ཞིག་བཏོན་འདུག
ཁ་སང་ཕྱི་ཚེས་ ༡༣ ཉིན་ཨ་རིའི་ནང་ཡོད་པའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་ཕྱི་ལོ་ ༢༠༢༡ ལོའི་སྙན་ཐོ་བཏོན་པའི་ནང་། ཞི་ཅིན་ཕིན་གྱི་མགོ་འཁྲིད་འོག་བོད་ནང་དྲག་གནོན་ཤུགས་ཆེ་རུ་བཏང་ཡོད་པ་དང་། ཤར་ཏུར་ཀི་སི་ཐན་ནང་གི་ཁ་ཆེ་བ་རྣམས་ལ་རང་ཉིད་ཀྱི་ཆོས་ལུགས་འདོར་དུ་འཇུག་པ་དང་། ཧོང་ཀོང་བའི་རང་དབང་ལ་ཚོད་འཛིན་བྱས་ཏེ། ཕྱི་ལོ་ ༡༩༨༩ ལོའི་པེ་ཅིན་གྱི་གནམ་བདེ་སྒོ་མོ་ཆེའི་དོན་རྐྱེན་གྱི་རྗེས། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་སྡུག་ཤོས་དེ་ཆགས་ཡོད་པ་བཀོད་འདུག
བོད་དང་འབྲེལ་ནས་སྙན་ཐོ་དེའི་ནང་། བོད་ཁུལ་དུ་རྒྱ་ནག་གཞུང་གིས་མུ་མཐུད་ཆོས་ལུགས་དང་སྨྲ་བརྗོད། འགྲོ་སྐྱོད་དང་འདུ་འཛོམས་ཀྱི་རང་དབང་སོགས་ལ་དམ་དྲག་བྱེད་བཞིན་པ་མ་ཟད། ས་གནས་སྲིད་གཞུང་གིས་ཁྲིམས་མཐུན་མིན་པའི་གཏེར་ཁ་སྔོག་འདོན་དང་ས་ཆ་འཕྲོག་ལེན་བྱེད་པའི་གནས་སྟངས་ཐེར་འདོན་བྱེད་ཀྱི་མེད་སྐོར་དང་། བོད་ཁུལ་གྱི་ཕྱི་ལོ་ ༢༠༡༥ ནས་ ༢༠༢༠ བར་གྱི་ལྔ་ཚན་གཅིག་གི་འཆར་གཞིའི་ནང་དབུལ་ཕོངས་ལས་གྲོལ་ཐབས་ལ་ཁ་གཡར་ཏེ། བོད་མི་སྟོང་ཕྲག་མང་པོ་གྲོང་ཁྱེར་ལ་གནས་སྤོ་བྱེད་དུ་བཅུག་ཡོད་པ་དང་། སྐད་གཉིས་སློབ་གསོའི་སྲིད་ཇུས་སྤེལ་ཏེ་བོད་མི་ཚོར་བཙན་གྱིས་རྒྱ་ཡིག་སྦྱོང་དུ་འཇུག་པ། རྒྱ་ནག་གཞུང་གི་སྲིད་ཇུས་ལ་ངོ་རྒོལ་བྱེད་པ་སྔོན་འགོག་ཆེད་བོད་མིའི་ལས་གནས་དང་ཁྲོམ་ར་སོགས་སུ་ཉུལ་ཞིབ་བརྙན་མིག་མང་དུ་བཏང་ཡོད་པ་དང་། འདས་ལོའི་བོད་ཀྱི་ལས་དོན་སྐོར་གྱི་ཚོགས་འདུ་ཐེངས་ ༧ པ་ཟེར་བའི་ཐོག ཞི་ཅིན་ཕིན་གྱིས་སློབ་གྲྭ་ཁག་གི་ནང་ཆབ་སྲིད་ཀྱི་སློབ་གསོ་ཤུགས་ཆེར་གཏང་དགོས་སྐོར་བརྗོད་དེ་དབུས་གཞུང་གིས་སྲིད་ཇུས་དེར་རྒྱབ་སྐྱོར་ཡོད་པའི་རྣམ་འགྱུར་བསྟན་པར་སྐྱོན་བརྗོད་བྱས་པ་སོགས་བཀོད་འདུག
ཡང་བལ་ཡུལ་ནང་གི་བོད་མིའི་གནས་སྟངས་དང་འབྲེལ་ནས་སྙན་ཐོ་དེའི་ནང་། ཉེ་ལམ་བལ་ཡུལ་གཞུང་གིས་རྒྱ་ནག་དང་འབྲེལ་ལམ་ཤུགས་ཆེར་བཏང་བ་དང་། རྒྱ་ནག་གཞུང་གིས་གནོན་ཤུགས་སྤྲད་པ་ལ་བརྟེན། ད་ལྟ་མུ་མཐུད་བལ་ཡུལ་ནང་གི་བོད་མི་ཚོའི་འདུ་འཛོམས་དང་སྨྲ་བརྗོད་རང་དབང་བཀག་སྡོམ་འོག་ཡོད་པ་དང་། ཕྱི་ལོ་ ༢༠༡༩ ལོར་ཞི་ཅིན་ཕིན་བལ་ཡུལ་ནང་སྐོར་སྐྱོད་དུ་འགྲོ་སྐབས་ཕྱོགས་གཉིས་དབར་ཆིངས་ཡིག་ཁག་ཅིག་བཞག་ཡོད་པའི་ཁྲོད་ཉེས་ཅན་རྩིས་སྤྲོད་ཚུད་ཡོད་སྟབས། བོད་དོན་ལས་འགུལ་བ་དང་བོད་མི་བཙན་བྱོལ་བ་རྣམས་ཉེན་ཁ་ཆེན་པོའི་འོག་ལྷུང་ཡོད་སྐོར་བཀོད་འདུག
འགྲོ་བ་མིའི་ཐོབ་ཐང་ལྟ་ཞིབ་ཁང་གིས་བཏོན་པའི་འཛམ་གླིང་གི་རྒྱལ་ཁབ་ ༡༠༠ ཙམ་གྱི་འགྲོ་བ་མིའི་ཐོབ་ཐང་གི་སྙན་ཐོ་དེར་ཤོག་གྲངས་ ༣༨༦ ཡོད་འདུག་པ་དང་། སྙན་ཐོ་དེའི་གླེང་བརྗོད་ནང་། ཨ་རིའི་སྲིད་འཛིན་ཊོམ་ཕུ་ནི་འགྲོ་བ་མིའི་ཐོབ་ཐང་ཉམ་ཉེས་གཏོང་མཁན་ཞིག་ཏུ་གྱུར་ཡོད་པ་དང་། ཇོ་བྷའེ་ཌེན་ (Joe Biden) ལགས་ཨ་རིའི་སྲིད་འཛིན་ལ་འདེམས་ཐོན་བྱུང་བ་ནི་ད་ལྟའི་འགྲོ་བ་མིའི་ཐོབ་ཐང་གི་གནས་སྟངས་སྤྱི་ཡོངས་ནས་ཡར་རྒྱས་གཏོང་བའི་གོ་སྐབས་ཤིག་ཡིན་སྐོར་བཀོད་འདུག
ཏོག་དབྱིབས་གཉན་རིམས་དང་འབྲེལ་ནས་རྒྱ་ནག་གཞུང་གིས་གནས་ཚུལ་ལ་སྤས་གསང་བྱས་པ་དང་། གྲོང་ཁྱེར་ཝུ་ཧན་ནང་ཁྱིམ་སྡོད་བཀའ་རྒྱ་སྡོམ་སྐབས་སྤྱི་མང་ལ་འཕྲོད་བསྟེན་དང་ཟས་རིགས་སོགས་ཀྱི་མཐུན་རྐྱེན་དུས་ལྟར་མཁོ་སྤྲོད་བྱེད་ཐུབ་མེད་པ་དང་། ཤར་ཏུ་ཀི་སི་ཐན་ནང་ཁ་ཆེ་བ་ཚོར་རྒྱ་སྨན་བཙན་གྱིས་བསྟེན་དུ་བཅུག་པ་དང་། གསར་འགོད་པ་དང་ཚོང་པ་སོགས་འཛིན་བཟུང་བྱས་པ་དང་། གཉན་རིམས་དང་འབྲེལ་ནས་མི་རིགས་ནག་པོ་ཚོར་དབྱེ་འབྱེད་བྱས་པ། དེ་བཞིན་རྒྱལ་སྤྱིའི་ཆེད་མཁས་པ་རྒྱ་ནག་ནང་ནད་ཡམས་ཀྱི་འབྱུང་ཁུངས་ལ་རྟོག་ཞིབ་བྱེད་པར་ཐོག་མའི་ཆར་རྒྱ་ནག་གཞུང་གིས་བཀག་འགོག་བྱས་ཏེ། ལས་གཞི་དེར་རྒྱབ་སྐྱོར་བྱེད་མཁན་ཨོ་གླིང་སོགས་ལ་ཚོང་འབྲེལ་གྱི་ཐོག་ནས་རྒོལ་ལན་སློག་པ་སོགས་བཀོད་འདུག
འདས་ལོའི་ཕྱི་ཟླ་ ༣ ནང་འགྲོ་བ་མིའི་ཐོབ་ཐང་ལྟ་ཞིབ་ཁང་དེས་བོད་ནང་གི་བོད་མིར་བཅར་འདྲི་བྱས་པ་བརྒྱུད། རྒྱ་ནག་གཞུང་གིས་རྗོད་བཞིན་པའི་སྐད་གཉིས་སློབ་གསོའི་སྲིད་ཇུས་འོག བོད་སྐད་ཡིག་གི་བསླབ་གཞི་ཉེན་ཁའི་ནང་དུ་ཡོད་ཅེས་པའི་སྙན་ཐོ་ཤོག་གྲངས་ ༩༡ ཅན་ཞིག་བཏོན་ཡོད་པ་དང་། དེའི་ནང་། རྒྱ་ནག་གཞུང་གིས་བོད་ནང་བུ་བཅོལ་ཁང་གི་བྱིས་པ་ལོ་ ༣ ཙམ་ལོན་པ་ཚོ་ལའང་མི་རིགས་མཐུན་སྒྲིལ་ཁ་ལ་ཁྱེར་ཏེ། བཙན་གྱིས་སྐད་གཉིས་སློབ་གསོ་ཟེར་བ་ལག་བསྟར་བྱེད་མགོ་བཙུགས་ཡོད་སྐོར་དང་། འདས་པའི་ལོ་བཅུའི་རིང་བོད་ནང་སློབ་གྲྭ་མང་དུ་ཕྱིན་པ་དང་བསྟུན། བོད་ཡིག་ཆེད་སྦྱོང་བྱེད་ས་མ་གཏོགས་སློབ་གྲྭ་གཞན་ཁག་གི་ནང་རྒྱའི་སྐད་ཡིག་གི་བསླབ་གཞི་གཙོར་བཟུང་གི་སློབ་ཁྲིད་སྲིད་ཇུས་ལག་བསྟར་བྱེད་ཤུགས་ཆེ་རུ་ཕྱིན་ཏེ། བོད་སྐད་ཡིག་གི་བསླབ་གཞི་ཉེན་ཁའི་ནང་ལྷུང་ཡོད་སྐོར་བཀོད་ཡོད་པ་རེད།
གསར་འགོད་པ། ཀླུ་མགོན་ཐར།
