རྒྱ་ནག་གི་ཚོང་གཉེར་ཁང་དགུ་ལ་བཀག་སྡོམ་གྱི་བཀའ་རྒྱ་བསྒྲགས།

རྒྱ་ནག་གི་དམག་དོན་དང་འབྲེལ་བ་ཡོད་པའི་དོགས་གཞིའི་འོག་འཕྲུལ་ལས་ཚོང་གཉེར་ཁང་ཞའོ་མི་དང་རྒྱ་ནག་རྒྱལ་ཡོངས་མཁའ་འགྲུལ་ཚད་ཡོད་ཚོང་གཉེར་ཁང་སོགས་ཚོང་ལས་ཁང་ ༩ ཡི་ཨ་རིའི་ནང་གི་ཚོང་འབྲེལ་མ་འཛུགས་མཚམས་འཇོག་དགོས་པའི་བཀའ་རྒྱ་བསྒྲགས།

ཁ་སང་ཕྱི་ཚེས་ ༡༤ ཉིན་ལ་ཨ་རིའི་རྒྱལ་སྲུང་ལྷན་ཚོགས་ཀྱིས་ (US Department of Defense) ཐད་ཀར་དང་ཐད་ཀར་མིན་པའི་ཐོག་ནས་ཨ་རིའི་ཚོང་སྡེ་ཁག་གི་ནང་ཚོང་འབྲེལ་མ་འཇོག་བྱས་པའི་རྒྱ་ནག་དམར་ཤོག་ཚོགས་པའི་དམག་དོན་ཚོང་གཉེར་ཁང་དགུ་ལ་འདི་ལོའི་ཕྱི་ཟླ་ ༡༡ ཚེས་ ༡༡ ཉིན་ནང་ཚུན་དུ་ཚོང་འབྲེལ་མ་འཇོག་མཚམས་འཇོག་དགོས་པའི་བཀའ་རྒྱ་བསྒྲགས་ཡོད་འདུག

ད་ལན་ཚོང་འབྲེལ་མ་འཇོག་མཚམས་འཇོག་དགོས་པའི་བཀའ་རྒྱ་བསྒྲགས་པའི་ཚོང་གཉེར་ཁང་དགུ་ནི། ཁ་པར་འཕྲུལ་ལས་ཚོང་གཉེར་ཁང་ཞའོ་མི་(Xiaomi Corporation)དང་། རྒྱ་ནག་མཁའ་འགྲུལ་ཚད་ཡོད་ཚོང་གཉེར་ཁང་། (China National Aviation Holding Co. Ltd.）རྒྱ་ནག་ཚོང་དོན་གནམ་གྲུ་ཚད་ཡོད་ཚོང་གཉེར་ཁང་(Commercial Aircraft Corporation of China, Ltd.）དཱ་ཤིན་ཧྭ་གནམ་འགྲུལ་ཚོང་གཉེར་ཁང（Grand China Air Co.,Ltd. སོགས་ཡིན་འདུག

འདས་ལོའི་ཕྱི་ཟླ་ ༡༡ ཚེས་ ༡༣ ཉིན་ཨ་རིའི་སྲིད་འཛིན་ཊོམ་ཕུ་མཆོག་གིས། རྒྱ་ནག་གི་དམག་དོན་དང་འབྲེལ་བ་ཡོད་པའི་བཟོ་གྲྭ་ཁག་ལ་ཨ་རིའི་ཚོང་པས་མཉམ་འབྲེལ་མ་འཇོག་མཚམས་འཇོག་དགོས་པའི་ཁྲིམས་གཞིར་མཚན་རྟགས་བསྐྱོན་ཡོད་པ་དང་། ཁྲིམས་གཞི་དེའི་ནང་། རྒྱ་ནག་གི་བཟོ་གྲྭ་ཁག་ ༣༡ གིས་རྒྱ་ནག་གི་འཕྲུལ་རིག་དང་དམག་དོན་དེང་རབས་ཅན་དུ་བསྒྱུར་ཏེ། ཐད་ཀར་ཨ་རིའི་རྒྱལ་སྲིད་བདེ་འཇགས་ལ་ཉེན་ཁ་བསྐྲུན་གྱི་ཡོད་སྐོར་སྐྱོན་བརྗོད་བྱས་པ་དང་། དེ་བཞིན་ཨ་རིའི་ཚོང་ལས་མི་སྣས་རྒྱ་ནག་གི་བཟོ་གྲྭ་ཁག་དང་ལྷན་དུ་མཉམ་ལས་ཚོང་འབྲེལ་དང་མ་འཛུགས།  ད་དུང་ལས་བྱེད་ཀྱི་གསོག་དངུལ་དང་ཚོང་པ་རང་ཉིད་ལ་བདག་པའི་མ་དངུལ་དང་ཚོང་རྫས་གང་ཡོད་པ་ཚང་མ་ལོགས་སུ་བྱས་ཏེ་གཙང་བཟོ་བྱེད་དགོས་པ་དང་། ཨ་རིའི་ཚོང་པ་ཚོས་ཕྱི་ལོ་ ༢༠༢༡ ཟླ་ ༡༡ བར་རྒྱ་ནག་གི་བཟོ་གྲྭ་དང་མཉམ་ལས་ཚོང་འབྲེལ་ཁག་ཏུ་ཡོད་པའི་སྒེར་གྱི་མ་དངུལ་དང་མ་རྐང་སོགས་ཕྱིར་ཨ་རིའི་ནང་ཁ་བསྒྱུར་བྱེད་དགོས་ཀྱི་ཡོད་པ་སོགས་ཐག་གཅོད་གནང་ཡོད་འདུག

ཕྱི་ལོ་ ༢༠༢༠ ཟླ་ ༦ པའི་ནང་ཐོག་མར་ཨ་རིའི་བདེ་འཇགས་ལྷན་ཁང་ནས་རྒྱ་ནག་དམག་དོན་ཚོང་གཉེར་ཁང་ ༢༠ ཐེར་འདོན་བྱས་ཡོད་པ་དང་། དེའི་ཁྲོད་དུ་འཛམ་གླིང་ནང་བརྙན་མིག་དང་ཁ་པར་གྱི་བཟོ་སྐྲུན་ཐོན་སྐྱེད་ཆེ་ཤོས་སུ་གྱུར་བའི་རྒྱ་ནག་གི་ཧཱ་ཝེ་དང་ (Hikvision)། རྒྱ་ནག་ཁ་པར་(China Mobile)དང་གློག་འཕྲིན་(China Telecom)སོགས་ཡོད་འདུག ཡིན་ནའང་། ཊོམ་ཕུ་གཞུང་གིས་རྒྱ་ནག་ཚན་རྩལ་ལས་རིགས་ཀྱི་རྩེ་མོར་སོན་པའི་ཨ་ལི་བྷ་བྷ་དང་ཐིན་ཤིན། བྷའེ་ཏུའུ་བཅས་མིང་ཐོ་ནག་པོའི་ནང་བཅུག་པའི་ལས་འཆར་དེ་ཕྱིར་འཐེན་བྱས་ཡོད་འདུག

ཨ་རིའི་སྲིད་འཛིན་འོས་བསྡུའི་སྐབས་ཊོམ་ཕུ་མཆོག་ནས་རྒྱ་ནག་གིས་ལོ་རེར་ཨ་སྒོར་ཐེར་འབུམ་ ༣༠༠ ཙམ་གྱི་ཨ་རིའི་འཕྲུལ་རིག་ལག་རྩལ་རྐུ་འཁྱེར་བྱེད་བཞིན་ཡོད་པ་མ་ཟད། ཨ་རིས་རྒྱ་ནག་ལ་ཕྱིར་ཚོང་བྱེད་བཞིན་པའི་དངོས་ཟོག་གི་མ་རྩ་ནི་ནང་འདྲེན་ལས་ཨ་སྒོར་ཐེར་འབུམ་ ༥༠༠ ལྷག་གིས་ཉུང་བ་ཡོད་པ་དེ་དོ་མཉམ་ཡོང་ཐབས་གནང་རྒྱུ་ཡིན་སྐོར་གསུངས་ཡོད་པ་ལྟར། ཕྱི་ལོ་ ༢༠༡༨  ཟླ་ ༧ ཙམ་ནས་ཨ་རྒྱའི་ཚོང་དམག་མགོ་བཙུགས་ཡོད་པ་རེད།

བསྟན་འཛིན་ཕུར་བུ།