བདེ་ལེགས་སྨན་ཁང་གི་བོད་རིཊ་སྨན་པ་དང་འཕྲོད་ལས་བ་འགར་ཏོག་དབྱིབས་འགོག་ཁབ་བརྒྱབས།

རྒྱ་གར་རྒྱལ་ཡོངས་ནང་འདས་པའི་ཉིན་གྲངས་གཉིས་ནང་ཁྱོན་མི་གྲངས་ ༢,༢༤,༣༠༡ ལ་ཏོག་དབྱིབས་འགོག་ཁབ་བརྒྱབས་ཡོད་པ་དང་དེའི་ཁྲོད་མི་གྲངས་ ༤༤༧ ལ་ཟུར་སྐྱོན་ཕོག་ཡོད་ཀྱང་མི་ ༣ མ་གཏོགས་སྨན་ཁང་དུ་སྨན་བཅོས་བྱེད་དགོས་བྱུང་མི་འདུག

དེ་རིང་རྒྱ་གར་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཁེ་ཉིན་ཕྱི་ཚེས་ ༡༦ དང་ ༡༧ ཉིན་གཉིས་རིང་རྒྱ་གར་གཞུང་གིས་རྒྱལ་ཡོངས་ནང་སྨན་པ་དང་། འཕྲོད་བསྟེན་མི་སྣ་རྣམས་ལ་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་དངོས་སུ་རྒྱག་པའི་མགོ་བརྩམས་ཏེ། ཉིན་གྲངས་གཉིས་ནང་ཁྱོན་མི་གྲངས་ ༢,༢༤,༣༠༡ ལ་སྨན་ཁབ་བརྒྱབས་ཚར་ཡོད་པ་དང་། དེའི་ཁྲོད་མི་གྲངས་ ༤༤༧ ལ་ཟུར་སྐྱོན་ཕོག་ཡོད་ཀྱང་། མི་གྲངས་ ༣ མ་གཏོགས་སྨན་ཁང་དུ་སྨན་བཅོས་བྱེད་དགོས་བྱུང་མི་འདུག

དེ་བཞིན་དེ་རིང་ཞོགས་པར་བཞུགས་སྒར་དྷ་སའི་བདེ་ལེགས་སྨན་ཁང་གི་བོད་རིགས་སྨན་པ་དང་འཕྲོད་བསྟེན་མི་སྣ་བཅུ་ལ་དངོས་སུ་སྔོན་འགོག་སྨན་ཁབ་བརྒྱབས་ཡོད་པ་དང་། དེ་བཞིན་རྒྱ་གར་ལྷོ་ཕྱོགས་བྷེང་ལོང་དུ་ཡོད་པའི་ལྷོ་སྤྱི་ཁྱབ་ཁོངས་ཀྱི་བོད་མི་སྨན་པ་དང་འཕྲོད་བསྟེན་མི་སྣ་ ༣༧༥ ལྷག་གིས་འགོག་ཁབ་བརྒྱབ་རྒྱུའི་ཐོ་འགོད་བྱས་པ་ལྟར། འབྱུང་འགྱུར་ཉིན་གྲངས་གཉིས་གསུམ་ནང་བརྒྱབ་ཐུབ་རྒྱུའི་རེ་བ་བྱེད་ཀྱི་ཡོད་འདུག

ཁེ་ཉིན་ཕྱི་ཚེས་ ༡༦ ཉིན་སྲིད་བློན་མུ་དྷི་མཆོག་གིས་རྒྱལ་ཡོངས་ཀྱི་འགོག་ཁབ་ལས་གཞི་དབུ་འབྱེད་དང་འབྲེལ། རྒྱ་གར་རྒྱལ་ཡོངས་ནང་འགོག་ཁབ་བརྒྱབ་སའི་ས་ཚིགས་ ༣༠༠༦ གཏན་འབེབ་ཀྱིས། རྒྱ་གར་གྱི་རྫོང་ཁག་ ༧༠༠ ནང་ཁྱོན་སྔོན་འགོག་སྨན་ཁབ་ཆེད་ལས་བྱེད་འབུམ་ ༡ དང་ཕྱེད་ཀ་བསྐོ་བཞག་བྱས་ཡོད་པ་དང་། ས་ཚིགས་རེར་མི་གྲངས་ ༡༠༠ རེ་ལ་འགོག་ཁབ་བརྒྱབ་གཏན་ཁེལ་ཏེ། ཉིན་དང་པོར་རྒྱལ་ཡོངས་ཀྱི་མི་གྲངས་འབུམ་ ༡།༩༡ ལ་འགོག་ཁབ་བརྒྱབས་ཡོད་པ་དང་། འཕྲོད་བསྟེན་སྨན་བཅོས་ཚན་པར་བརྡབ་གསིག་མི་ཡོང་བའི་ཆེད་དུ་ཁ་སང་ཕྱི་ཚེས་ ༡༧ ཉིན་རྒྱ་གར་གྱི་མངའ་སྡེ་ ༦ ཁོ་ནའི་ནང་འགོག་ཁབ་ལས་གཞི་བརྩམས་ཏེ། ཁྱོན་མི་གྲངས་ ༡༧,༠༠༠ ལ་འགོག་ཁབ་བརྒྱབ་ཐུབ་ཡོད་འདུག རྒྱ་གར་གྱིས་ཉིན་གྲངས་གཉིས་ནང་ཁྱོན་མི་གྲངས་ ༣,༡༦,༣༧༥ ལ་འགོག་ཁབ་བརྒྱབ་རྒྱུའི་འཆར་གཞི་གཞིར་བཟུང་བརྒྱ་ཆ་ ༦༤ ལ་དངོས་སུ་བརྒྱབ་ཐུབ་ཡོད་འདུག

རྒྱ་གར་གྱི་འཕྲོད་བསྟེན་ལྷན་ཁང་གི་དྲུང་འཕར་མ་ནོ་ཧར་ཨག་ན་ནི་ (Manohar Agnani) ཡིས། རྒྱ་གར་གྱིས་ཉིན་གཅིག་ནང་སྨན་ཁབ་བརྒྱབས་པའི་གྲངས་ཚད་དེ་ཨ་རི་དང་། དབྱིན་ཡུལ། ཧྥ་རན་སི་བཅས་ལས་མང་བ་ཆགས་ཡོད་སྐོར་བསྒྲགས་ཡོད་ཅིང་། སྔོན་འགོག་སྨན་ཁབ་ལས་གཞི་དབུ་འབྱེད་ཐོག་སྲིད་བློན་མུ་དྷི་མཆོག་གིས། མང་ཚོགས་རྣམས་ཀྱིས་དཀྲོག་གཏམ་དང་གནས་ཚུལ་རྫུན་མར་གཞི་མ་འཛིན་པར། འགོག་ཁབ་ལས་གཞིའི་ནང་མཉམ་ཞུགས་དགོས་སྐོར་འབོད་སྐུལ་གནང་ཡོད་འདུག

སྤྱིར་རྒྱ་གར་གཞུང་གིས་ད་ལྟའི་ཆར་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་གཉིས་ལ་ཛ་དྲག་གནས་སྟངས་འོག་བཀོལ་སྤྱོད་ཆོག་པའི་ཆོག་མཆན་སྤྲད་ཡོད་པ་ལྟར། ད་ལན་མི་གྲངས་འབུམ་ ༢ དང་ཕྱེད་ཀ་མ་ཟིན་ཙམ་ལ་བརྒྱབས་པའི་འགོག་ཁབ་ནི། ཨོག་སི་ཧྥོར་ཌི་གཙུག་ལག་སློབ་ཆེན་དང་དབྱིན་ཡུལ་དུ་རྟེན་གཞི་བྱས་པའི་ཨ་སི་ཏྲ་ཛེ་ནེ་ཁ་སྨན་སྦྱོར་བཟོ་སྐྲུན་ཁང་ (AstraZeneca) གཉིས་ཀྱིས་མཉམ་འབྲེལ་འོག་བཟོ་སྐྲུན་བྱས་པའི་ཀོ་ཝི་ཤིལ་ཌི་ (Covishield) འགོག་ཁབ་དང་། རྒྱ་གར་རང་གིས་བཟོ་སྐྲུན་བྱས་པའི་ཀོ་ཝེག་སིན་ (Covaxin) གཉིས་ཡིན་ཞིང་། དེ་ཡང་རྒྱ་གར་དབུས་གཞུང་གིས་རྒྱུན་ལྡན་གྱི་སྨན་བཅོས་ཚན་པར་དོ་ཕོག་མི་འགྲོ་བའི་ཆེད་དུ། མངའ་སྡེ་རྣམས་ལ་བདུན་ཕྲག་རེར་ཉིན་གྲངས་བཞི་རེར་འགོག་ཁབ་བརྒྱབ་དགོས་པའི་ལམ་སྟོན་བྱས་ཡོད་ཀྱང་། མངའ་སྡེ་འགའ་ཤས་ཀྱིས་རང་གི་གནས་སྟངས་གཞིར་བཟུང་ཉིན་གྲངས་གཅིག་དང་། ཡང་སྐོར་ཞིག་གིས་ཉིན་ ༦ བསྟུད་མར་འགོག་ཁབ་ལས་གཞི་སྤེལ་མུས་ཡིན་འདུག

རྒྱ་གར་གྱི་སྔོན་འགོག་སྨན་ཁབ་ཀྱི་ཐོག་མའི་ལས་གཞི་དེ་རིམ་པ་ཆེན་པོ་གཉིས་ལ་ཆ་བགོས་ཀྱིས། རིམ་པ་དང་པོའི་ནང་སྨན་པ་དང་། སྨན་ཞབས་པས་མཚོན་པའི་འཕྲེལ་བསྟེན་མི་སྣ་བྱེ་བ་ ༡ དང་། དེ་བཞིན་ཉེན་རྟོག་པ་དང་། གཙང་བཟོ་བ་བཅས་ཀྱིས་མཚོན་པའི་གལ་ཆེའི་ལས་དོན་ནང་ཡོད་པའི་མི་གྲངས་བྱེ་བ་ ༢ ལ་བརྒྱབ་རྒྱུ་ཡིན་འདུག་པ་དང་། དེའི་རྗེས་རིམ་པ་གཉིས་པའི་ནང་། ལོ་ན་ ༥༠ ཡན་གྱི་མི་རབས་རྒན་པ་དང་། ནད་གཞི་ལྕི་མོ་ཡོད་པའི་མི་བཅས་ཁྱོན་མི་གྲངས་བྱེ་བ་ ༢༧ ལྷག་ལ་འགོག་ཁབ་བརྒྱབ་རྒྱུ་ཡིན་འདུག

གཞན་ཡང་། རྒྱ་གར་རྒྱལ་ཡོངས་ནང་ཉིན་རེར་ཏོག་དབྱིབས་ནད་པ་གསར་པ་ཇེ་ཉུང་དུ་འགྲོ་བཞིན་ཡོད་པ་ལྟར། འདས་པའི་ཆུ་ཚོད་ ༢༤ རིང་རྒྱ་གར་རྒྱལ་ཡོངས་ནང་ཏོག་དབྱིབས་ནད་པ་གསར་པ་ ༡༣༧༨༨ ལས་ཐོན་མེད་པ་མ་ཟད། ནད་པའི་འདས་གྲངས་ཀྱང་མར་ཆག་བཞིན་ཡོད་པ་རེད་འདུག རྒྱ་གར་གཞུང་གི་གྲངས་ཐོ་ལྟར་ན། ད་ལྟའི་ཆར་རྒྱལ་ཡོངས་ནང་ཏོག་ནད་ཀྱིས་མནར་བཞིན་པའི་མི་གྲངས་ ༢,༠༨,༠༡༢ དང་། འདས་གྲོངས་སུ་ཕྱིན་པའི་མི་གྲངས་ ༡,༥༢,༤༡༩ བྱུང་ཡོད་འདུག

གསར་འགོད་པ། པ་སངས་ཚེ་རིང་།