ཨ་རིའི་འོས་འདེམས་སྲིད་འཛིན་ཇོ་བྷའེ་ཌིན་སྲིད་གཞུང་གིས་བསྐོ་བཞག་གནང་གཏན་འཁེལ་བའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken) ལགས་ཀྱིས་ཊོམ་ཕུ་སྲིད་གཞུང་ནས་རྒྱ་ནག་གཞུང་གིས་ཡུ་གུར་མི་རིགས་རྩ་མེད་གཏོང་ཐབས་བྱེད་ཀྱི་ཡོད་པའི་ངོས་འཛིན་དེར་མོས་མཐུན་ཡོད་སྐོར་བརྗོད་འདུག
ཁ་སང་ཨ་རིའི་སྲིད་འཛིན་ཊོམ་ཕུ་འཛིན་སྐྱོང་གི་ཉིན་མཐའ་མ་དང་བསྟུན། ཨ་རིའི་རྒྱལ་སྲིད་ལས་ཁུངས་ཀྱིས་གཞུང་འབྲེལ་ཐོག་རྒྱ་ནག་གཞུང་གིས་ཕྱི་ལོ་ ༢༠༡༧ ནས་བཟུང་ཤར་ཊུར་ཀི་སི་ཐན་(ཤིན་ཅང་)ཁུལ་གྱི་ཡུ་གུར་མི་རིགས་རྣམས་རྩ་མེད་ (Genocide) གཏོང་རྒྱུའི་སྲིད་ཇུས་ལག་བསྟར་བྱེད་མུས་ཡིན་པའི་ངོས་འཛིན་བྱས་ཏེ། རྒྱལ་ཁབ་གཞན་གྱིས་ཀྱང་ཨ་རི་བཞིན་རྒྱ་ནག་གཞུང་གི་མིའི་རིགས་ཀྱི་ཐོག་གཏུམ་སྤྱོད་སྤེལ་བཞིན་པར་མཉམ་གཅིག་ཏུ་འགོག་རྒོལ་བྱེད་སྐོར་འབོད་སྐུལ་ཞུས་ཡོད་འདུག ཡིན་ནའང་། ད་ལྟའི་ཆར་རྒྱ་ནག་གཞུང་གིས་ཨ་རིའི་ཐག་གཅོད་དེར་གཞུང་འབྲེལ་ལན་འདེབས་སོགས་གང་ཡང་བྱས་མི་འདུག
ཨ་རིའི་རྒྱལ་སྲིད་དྲུང་ཆེ་སྐུ་ཞབས་མེག་པོམ་པེ་མཆོག་གིས་གསར་འགོད་བསྒྲགས་གཏམ་སྤེལ་བའི་སྟེང་། ད་ཡོད་ཀྱི་དངོས་ཡོད་གནས་ཚུལ་ལ་ཞིབ་འཇུག་ཟབ་ནན་བྱས་པ་གཞིར་བཟུང་། རྒྱ་ནག་དམར་ཤོག་ཚོགས་པའི་བཀའ་ཁྱབ་དང་སྟངས་འཛིན་འོག་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་ཕྱི་ལོ་ ༢༠༡༧ ཟླ་ ༣ པ་ནས་བཟུང་ཤིན་ཅང་ཁུལ་དུ་ཡོད་པའི་ཁ་ཆེ་ཡུ་གུར་མི་རིགས་གཙོས་པའི་ཁུལ་དེའི་གྲངས་ཉུང་མི་རིགས་ཐོག་གཏུམ་སྤྱོད་ (crimes against humanity) སྤེལ་བའི་ནག་ཉེས་བསགས་ཡོད་པར་ངོས་འཛིན་བྱས་ཡོད་པ་དང་། ནག་ཉེས་ཀྱི་ཁོངས་སུ་གང་བྱུང་བཙོན་འཇུག་དང་། མི་སེར་ས་ཡ་ ༡ ལྷག་གི་ཕྱིའི་རང་དབང་བཀག་སྐྱིལ། བཙན་གྱིས་སྐྱེ་སྒོ་འགོག་ཐབས། བཙན་བཀོལ་ངལ་རྩོལ། དེ་བཞིན་ཆོས་དད་དང་། སྨྲ་བརྗོད། འགྲིམ་འགྲུལ་རང་དབང་་བཅས་ལ་བཀག་སྡོམ་བྱེད་པ་བཅས་ཚུད་ཀྱི་ཡོད། འཛམ་གླིང་དམག་ཆེན་གཉིས་པ་མཇུག་བསྒྲིལ་མ་ཐག་འཇར་མན་གྱི་གྲོང་ཁྱེར་ནུ་རེམ་བྷག་ (Nuremberg) ཏུ་ཚོགས་པའི་རྒྱལ་སྤྱིའི་དམག་དོན་ཁྲིམས་ཞིབ་ལྷན་ཚོགས་ (The Nuremberg Tribunals) ཀྱིས་འགྲོ་བ་མིའི་ཐོག་གཏུམ་སྤྱོད་སྤེལ་བའི་ཉེས་མིང་འོག་ཉེས་ཅན་རྣམས་ལ་ཁྲིམས་ཆད་བཀལ་བ་བཞིན། ད་ལྟ་ཤིན་ཅང་ཁུལ་དུའང་ནག་ཉེས་དེ་དག་གསོག་བཞིན་ཡོད། ཅེས་བསྒྲགས་ཡོད་འདུག
ཡང་རྒྱལ་སྲིད་དྲུང་ཆེའི་བསྒྲགས་གཏམ་ནང་། རྒྱ་ནག་དམར་ཤོག་ཚོགས་པས་འཆར་གཞི་དང་ལྡན་པའི་ཐོག་ནས་ཡུ་གུར་མི་རིགས་གཙོས་པའི་ཁུལ་དེའི་གྲངས་ཉུང་མི་རིགས་རྣམས་རྩ་སྟོང་ (Genocide) གཏོང་ཐབས་བྱེད་ཀྱི་ཡོད་སྐོར་དང་། ཨ་རིའི་ངོས་ནས་རྒྱ་ནག་གཞུང་གིས་འཕྲལ་དུ་ཤིན་ཅང་ཁུལ་དུ་བཙུགས་པའི་བཀག་སྐྱིལ་ཁང་རྣམས་སྒོ་བརྒྱབ་དགོས་པ་མ་ཟད། བཟང་བཙོན་དང་། བཙན་བཀོལ་ངལ་རྩོལ་གྱི་ལམ་ལུགས་དེ་དག་འདོར་དགོས་པ། དེ་བཞིན་བཙན་གྱིས་སྐྱེ་སྒོ་འགོག་ཐབས་དང་། བཙན་གྱིས་མངལ་དབྱུང་ཐབས་སོགས་མི་འབོར་གྱི་འཕེལ་རྒྱས་ལ་སྟངས་འཛིན་བྱེད་པའི་ལས་འགུལ་རྣམས་མཚམས་འཇོག་དགོས་སྐོར་བསྒྲགས་ཡོད་འདུག
ཁ་སང་ཨ་རིའི་འོས་འདེམས་སྲིད་འཛིན་ཇོ་བྷའེ་ཌིན་སྲིད་གཞུང་གིས་བསྐོ་བཞག་གནང་གཏན་འཁེལ་བའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken) ལགས་ནས་གྲོས་ཚོགས་ཀྱི་འདྲི་རྩད་སྐབས། ད་ལྟའི་སྲིད་གཞུང་གི་ངོས་འཛིན་བྱེད་ཕྱོགས་དེར་མོས་མཐུན་ཡོད་སྐོར་དང་། ཡུ་གུར་གྱི་གནས་སྟངས་ཐད་ང་ཚོའི་བར་མི་མཐུན་པ་མེད། རྒྱ་ནག་གཞུང་གིས་སྐྱེ་ཕོ་མོ་དང་། ཕྲུ་གུ་རྣམས་བཀག་སྐྱིལ་ཁང་དུ་བཅུག་ནས་ཁོ་ཚོར་བསམ་བློའི་སློབ་གསོ་སྤྲད་དེ། རྒྱ་ནག་དམར་ཤོག་ཚོགས་པར་བློ་གཏན་བཅོལ་མཁན་ཤ་སྟག་ཏུ་སྐྲུན་བཞིན་པ་དེ་དག་ཚང་མ་མི་རིགས་རྩ་མེད་གཏོང་ཐབས་ཀྱི་ཆ་ཤས་ཤིག་རེད། ཅེས་བརྗོད་ཡོད་སྟབས། དབྱེ་ཞིབ་པས་བྷའེ་ཌིན་འཛིན་སྐྱོང་ངོས་ནས་ཀྱང་ཡུ་གུར་མི་རིགས་ཀྱི་གནས་སྟངས་དེ་ཨ་རྒྱའི་འབྲེལ་ལམ་གྱི་གནད་དོན་གལ་ཆེན་ཞིག་ཏུ་བརྩི་སྲིད་སྐོར་གྱི་ཚོད་དཔག་བྱེད་ཀྱིན་འདུག
འདས་ལོར་རྒྱ་ནག་གཞུང་གིས་ཡུ་གུར་མི་རིགས་རྣམས་བཀག་སྐྱིལ་དང་བཙན་གྱིས་ངལ་རྩོལ་བྱེད་དུ་འཇུག་གི་ཡོད་པ་མ་ཟད། སྐྱེས་མ་རྣམས་ཀྱི་སྐྱེ་སྒོ་འགོག་གི་ཡོད་པའི་དངོས་ཡོད་གནས་ཚུལ་ཕྱིར་གྱར་བྱུང་བ་དང་བསྟུན། ཨ་རི་གཙོས་པའི་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་གཞུང་ལ་སྐྱོན་བརྗོད་དང་ཁྲིམས་ཆད་བཅད་ཡོད་ནའང་། ད་ཐེངས་ཨ་རིའི་གཞུང་གིས་རྒྱ་ནག་གིས་བྱ་སྤྱོད་དེ་དག་མི་རིགས་ཤིག་རྩ་མེད་གཏོང་རྒྱུའི་ནག་ཉེས་ཤིག་ཡིན་པར་ངོས་འཛིན་བྱས་པ་དེ་ཐོག་དང་པོ་ཡིན་པ་མ་ཟད། ད་བར་རྒྱལ་ཁབ་གཅིག་གིས་རྒྱ་ནག་གཞུང་ལ་ཁ་གཏད་གཅོག་ཚུལ་ཚད་མཐོ་ཤོས་དེ་ཆགས་ཡོད་འདུག ཡིན་ནའང་ད་ལན་གྱི་ངོས་འཛིན་དེས་རང་ཤུགས་ཀྱིས་རྒྱ་ནག་ལ་ཉེས་ཆད་ལྟ་བུ་གང་ཡང་ཕོག་གི་མེད་པ་རེད་འདུག
