བོད་མིའི་གཞུང་མང་གཉིས་ཀྱི་སྐུ་ཚབ་ནས་ཨ་རིའི་སྲིད་གཞུང་གསར་པའི་ངོས་ནས་སྔར་བཞིན་བོད་དོན་ལ་རྒྱབ་སྐྱོར་གནང་རྒྱུའི་འབོད་སྐུལ་ཞུས་པ་དང་སྦྲགས་ཇོ་བྷའེ་ཌིན་མཆོག་གི་སྲིད་འཛིན་ལས་ཡུན་རིང་ཕྱག་ལས་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུས་འདུག
ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་རྣམ་གཉིས་ནས་ཨ་རིའི་སྲིད་འཛིན་གསར་པ་ཇོ་བྷའེ་ཌིན་མཆོག་ལ་འཚམས་འདྲི་གནང་བའི་ནང་། སྲིད་འཛིན་ཇོ་བྷའེ་ཌིན་གི་འཛིན་སྐྱོང་ནས་སྔར་རྒྱུན་བཞིན་བོད་དོན་ཐོག་རྒྱབ་སྐྱོར་དང་། རྒྱ་ནག་གཞུང་ལ་སྔར་ལྟར་གནོན་ཤུགས་སྤྲད་དེ་བོད་རྒྱ་འབྲེལ་མོལ་ཡོང་ཐབས་གནང་རྒྱུའི་འབོད་སྐུལ་ཞུས་ཡོད་འདུག
དེ་ཡང་སྲིད་སྐྱོང་མཆོག་གིས། འདས་པའི་ལོ་ངོ་བཅུ་ཕྲག་མང་པོའི་རིང་ཨ་རིའི་གཞུང་མང་གཉིས་ནས་བོད་དོན་ཆེད་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། དེང་སང་རྒྱ་ནག་ལྟ་བུའི་དབང་ཆ་གཅིག་སྡུད་རིང་ལུགས་ཀྱི་སྲིད་གཞུང་དེ་བོད་ཙམ་དུ་མ་ཟད། རྒྱལ་སྤྱིའི་དམངས་གཙོ་དང་ཡོངས་ཁྱབ་ཀྱི་རིན་ཐང་དག་ལའང་ཉེན་ཁ་ཆགས་ཡོད། ཅེས་དང་། སྐུ་ཉིད་ཀྱིས་ལོ་མང་རིང་ཨ་རིའི་རྒྱལ་ཁབ་དང་མི་མང་གི་ཆེད་དུ་ཞབས་འདེགས་རླབས་ཆེན་ཞུས་པ་དང་། ད་ཐེངས་སྐུ་ཉིད་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་པ་དེ། ཨ་རིའི་མི་མང་གིས་སྐུ་ཉིད་དང་སྐུ་ཉིད་ཀྱི་ལངས་ཕྱོགས་ལ་ཡིད་ཆེས་མངའ་བ་མཚོན་གྱི་ཡོད། ངས་སྐུ་ཉིད་ལ་ལྷག་བསམ་རྣམ་དག་གིས་འཚམས་འདྲི་དང་སྦྲགས། སྲིད་འཛིན་ལས་ཡུན་རིང་བྱ་གཞག་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས་ཡོད་འདུག
དེ་བཞིན་སྲིད་སྐྱོང་མཆོག་གིས་སྲིད་འཛིན་གཞོན་པ་ཀ་མ་ལ་ཧ་རི་སི་མཆོག་ལ་འཚམས་འདྲི་ཞུས་པ་དང་སྦྲགས། ཨ་རིའི་ལོ་རྒྱུས་ཁྲོད་ཐེངས་དང་པོ་བུད་མེད་ཅིག་དང་། མི་རིགས་འདྲེས་མའི་བུད་མེད་ཅིག་ཨ་རིའི་སྲིད་འཛིན་གཞོན་པར་བདམས་ཐོན་བྱུང་བ་དེ་ནི། བུད་མེད་རྣམས་ལ་མཚོན་ན་རྒྱལ་སྤྱིའི་ཆབ་སྲིད་དང་དབུ་འཁྲིད་ཀྱི་ཁོར་ཡུག་ནང་དུས་སྐབས་གསར་བ་ཞིག་གི་སྒོ་མོ་ཕྱེས་པ་ཡིན་སྐོར་དང་། དེ་བཞིན་ལྕམ་སྐུ་ཀ་མ་ལ་ཧ་རི་སི་མཆོག་ནི་རྒྱ་གར་གྱི་རིགས་རྒྱུད་ཅིག་ཡིན་པ་དེ་ནི་རྒྱ་གར་བ་ཡོངས་ལ་སྤོབས་པ་དང་སེམས་འགུལ་ཐེབས་བྱེད་ཅིག་ཡིན་པ་དང་། ལྕམ་སྐུ་མཆོག་གིས་འབྱུང་འགྱུར་འགྲོ་བ་མིའི་ཐོབ་ཐང་དང་། འདྲ་མཉམ། གོ་ལའི་གནམ་གཤིས་འགྱུར་ལྡོག་བཅས་ཀྱི་གནད་དོན་ལ་གདོང་ལེན་གནང་སྐབས། བོད་དོན་ལ་རྒྱབ་སྐྱོར་གནང་སྟེ་ཨ་རི་དང་བོད་གཉིས་ཀྱི་འབྲེལ་ལམ་སྔར་ལྷག་ཡར་རྒྱས་གོང་འཕེལ་གཏོང་གནང་རྒྱུའི་རེ་སྨོན་བྱེད་ཀྱི་ཡོད་སྐོར་གསུངས་ཡོད་འདུག
གཞན་ཡང་བོད་མི་མང་སྤྱི་འཐུས་ཚོགས་གཙོ་པདྨ་འབྱང་གནས་མཆོག་གིས་བོད་མི་ཡོངས་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཨ་རིའི་སྲིད་འཛིན་ ༤༦ པ་ཇོ་བྷའེ་ཌིན་མཆོག་ལ་འཚམས་འདྲི་གནང་བ་དང་འབྲེལ། ཨ་རིའི་གཞུང་མང་གཉིས་ཀྱིས་རྒྱུན་ཆད་མེད་པར་བོད་མི་དང་བོད་ཀྱི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་གནང་བཞིན་པར་ཐུགས་རྗེ་ཆེ་ཞུ་རྒྱུ་དང་། ང་ཚོར་སྐུ་ཉིད་ཀྱི་འཛིན་སྐྱོང་ནས་ཉེ་ཆར་ཨ་རིའི་གྲོས་ཚོགས་ཀྱིས་གཏན་འབེབ་བྱས་པའི་ཨ་རིའི་བོད་ཀྱི་སྲིད་བྱུས་དང་རྒྱབ་སྐྱོར་ཁྲིམས་ཡིག་དེ་ཉིད་ལག་བསྟར་ཚགས་ཚུད་གནང་ངེས་ཡིན་པའི་ཡིད་ཆེས་ཡོད། ཅེས་གསུངས་ཡོད་འདུག
ཡང་ཚོགས་གཙོ་མཆོག་གིས། ཨ་རི་ནི་བོད་ཀྱི་གནད་དོན་དང་བོད་མིའི་ཐུན་མིན་རིག་གཞུང་དང་ངོ་བོ་སྲུང་སྐྱོབ་ཐད་རྒྱབ་སྐྱོར་གནང་མཁན་གྱི་རྒྱལ་ཁབ་ཐོག་མའིི་གྲས་ཤིག་ཡིན་པ་མ་ཟད། ཨ་རིའི་ངོས་ནས་ད་བར་ཇི་མི་སྙམས་པར་རྒྱ་ནག་གཞུང་ལ་བོད་རྒྱ་འབྲེལ་མོལ་ཡོང་ཐབས་ཐད་ཡར་སྐུལ་དང་གནོན་ཤུགས་སྤྲད་ཡོད་ནའང་། ད་བར་རྒྱ་ནག་གི་ཕྱོགས་ནས་ང་ཚོར་བཟང་ཕྱོགས་ཀྱི་བརྡ་ལན་གང་ཡང་འབྱོར་མེད་སྟབས། ང་ཚོས་སྐུ་ཉིད་ཀྱི་འཛིན་སྐྱོང་འོག་ཨ་རིའི་གཞུང་གིས་སྔར་རྒྱུན་བཞིན་རྒྱལ་སྤྱིའི་སྤྱི་ཚོགས་ཀྱི་ནུས་པ་མཉམ་སྤུངས་ཀྱི་ཐོག་ནས་དབུ་མའི་ལམ་གྱི་སྲིད་བྱུས་འོག་བོད་རྒྱའི་གནད་དོན་སེལ་ཐབས་གནང་རྒྱུར་རེ་བ་བྱེད་ཀྱི་ཡོད་སྐོར་གསུངས་ཡོད་འདུག
