འདས་པའི་ལོ་གཅིག་ཙམ་རིང་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད་༧གོང་ས་མཆོག་ནས་འཛམ་གླིང་ཡུལ་ལུང་གང་སར་མཛད་པ་རྒྱ་ཆེན་སྐྱོང་མུས་ཡིན་ཞིང་ཏོག་དབྱིབས་གཉན་རིམས་ཀྱི་གནས་སྟངས་མུ་མཐུད་གནས་ཡོད་པས་ཕྱོགས་ཕེབས་དང་གཟིམ་ཆུང་མཇལ་ཁ་སོགས་ད་རུང་གནང་འཆར་མི་འདུག
ཁ་སང་ཕྱི་ཚེས་ ༢༡ ཉིན་རྒྱ་གར་གྱི་དཔལ་འབྱོར་དུས་བབ་ཀྱིས་དམངས་གཙོའི་ཉིན་མོའི་སྐུ་མགྲོན་གཙོ་བོ་ཏཱ་ལའི་བླ་མ་(The Dalai Lama as R-Day Chief Guest)རྩོམ་ཡིག་དེའི་ནང་། ཏོག་དབྱིབས་གཉན་རིམས་འཛམ་གླིང་གང་སར་ཁྱབ་གདལ་དུ་ཕྱིན་ཡོད་པར་བརྟེན། འདི་ལོའི་རྒྱ་གར་གྱི་དམངས་གཙོ་དབུ་བརྙེས་པའི་ཉིན་མོར་སྐུ་མགྲོན་གཙོ་བོ་མེད་པ་དང་། སྐུ་མགྲོན་གཙོ་བོ་མེད་པའི་མཛད་སྒོ་ནི་མཛད་སྒོར་སྟངས་འཛིན་བྱེད་མཁན་མེད་པ་ལྟ་བུ་ཞིག་ཡིན་སྟབས། རྒྱ་གར་མི་མང་ལ་བརྙན་འཕྲིན་བརྒྱུད་སྐུ་མགྲོན་གཙོ་བོ་ཞིག་དགོས་ངེས་ཡིན་པ་དང་། རྒྱ་གར་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་འདི་ལོའི་མཛད་སྒོའི་སྐུ་མགྲོན་གཙོ་བོར་གདན་འདྲེན་ཞུ་རྒྱུར་སྐུལ་མ་བྱེད་ཀྱི་ཡོད་སྐོར་བཀོད་འདུག
ཡང་རྩོམ་ཡིག་དེའི་ནང་། ༧གོང་ས་རྒྱལ་བ་རིན་པོ་ཆེ་མཆོག་ནི་རྒྱ་གར་ལ་དགའ་ཞེན་ཆེན་པོ་ཡོད་ཅིང་། རྒྱ་གར་གྱི་དམངས་གཙོ་དབུ་བརྙེས་པའི་དུས་ཆེན་ཐེངས་ ༩ པ་ནས་རྒྱ་གར་ནང་བཞུགས་ཡོད་པ་རེད། དེ་བཞིན་བཞུགས་སྒར་དྷ་ས་ནི་རྒྱལ་ས་ལྡི་ལི་ནས་དེ་ཙམ་ཐག་རིང་རྒྱུ་མེད་སྐོར་དང་། ༧གོང་ས་མཆོག་ནས་ཕྱི་ལོ་ ༢༠༡༡ ནས་ཆབ་སྲིད་ཀྱི་སྐུ་དབང་ཆ་ཚང་རྩིས་སྤྲོད་གནང་ཟིན་ནའང་། སྐུ་མགྲོན་གཙོ་བོར་གདན་འདྲེན་ཞུ་ཕྱོགས་ཀྱི་ཐད། སྐུ་མགྲོན་གཙོ་བོ་དེ་ཉིད་ངེས་པར་དུ་ཆབ་སྲིད་ཀྱི་མགོ་ཁྲིད་ཅིག་ཡིན་དགོས་པར་གསལ་ཁ་མེད་པ་དང་། ༧གོང་ས་མཆོག་གི་རང་བཞིན་བཟང་པོ་དང་འཛམ་གླིང་ནང་བརྩི་མཐོང་ཆེ་བ། མི་མང་གི་སྤྲོ་བ་འདྲེན་པའི་རང་བཞིན་སོགས་ལ་བརྟེན། ཁོང་ནི་སྐུ་མགྲོན་གཙོ་བོར་ཧ་ཅང་འོས་ཤིང་འཚམ་པ་ཞིག་ཡིན་སྐོར་དང་། སྲིད་གཞུང་གཞན་གྱིས་རྣམ་འགྱུར་ཇི་འདྲ་སྟོན་མིན་ལ་བལྟོས་མེད་ཀྱིས་རྒྱ་གར་གཞུང་གིས་༧གོང་ས་མཆོག་གདན་ཞུ་བྱེད་དགོས་སྐོར་བཀོད་འདུག
ཕྱི་ལོ་ ༡༩༤༧ ལོར་རྒྱ་གར་ལ་རང་བཙན་ཐོབ་སྟེ། ཕྱི་ལོ་ ༡༩༤༩ ལོའི་ཟླ་ ༡ ཚེས་ ༢༦ ཉིན་དམངས་གཙོའི་ལམ་ལུགས་ཀྱི་རྩ་ཁྲིམས་གཏན་འབེབ་དང་། ཕྱི་ལོ་ ༡༩༥༠ ལོའི་ཟླ་ ༡ ཚེས་ ༢༦ ཉིན་དངོས་སུ་ལག་བསྟར་བྱས་པ་ནས་བཟུང་། ལོ་ལྟར་ཕྱི་ཟླ་ ༡ ཚེས་ ༢༦ ཉིན་རྒྱ་གར་གྱིས་གཞུང་འབྲེལ་ཐོག་དམངས་གཙོ་དབུ་བརྙེས་པའི་ཉིན་མོར་སྲུང་གཙི་གནང་གི་ཡོད་པ་དང་། རྒྱལ་ས་ལྡི་ལིར་མཛད་སྒོ་རྒྱ་ཆེན་འཚོགས་ཏེ་རྒྱ་གར་གྱི་སྟོབས་འབྱོར་མངའ་ཐང་འགྲེམས་སྟོན་བྱེད་ཀྱི་ཡོད་པ་དང་། དེའི་ཐོག་སྐུ་མགྲོན་དུ་མཛའ་འབྲེལ་ཤིན་ཏུ་ཆེ་ཞིང་ཆེ་མཐོང་ཆེ་ཤོས་ཀྱི་མགོ་ཁྲིད་མང་པོ་གདན་འདྲེན་ཞུ་སྲོལ་ཡོད་པ་རེད།
འདས་ལོའི་ཕྱི་ཟླ་ ༡༢ ཚེས་ ༡༥ ཉིན་དབྱིན་ཡུལ་གྱི་ཕྱི་སྲིད་དྲུང་ཆེ་ཌོ་མི་ནེག་རཱབ་ (Dominic Raab) རྒྱ་གར་གྱི་རྒྱལ་ས་ལྡི་ལིར་ཕེབས་སྐབས། དབྱིན་ཡུལ་གྱི་སྲིད་བློན་བྷོ་རིས་སི་ཇོ་ཧན་སཱན་ ( Boris Johnson) ལགས་འདི་ལོའི་དམངས་གཙོ་དབུ་བརྙེས་པའི་དུས་སྟོན་གྱི་སྐུ་མགྲོན་གཙོ་བོར་ཕེབས་རྒྱུ་ཡིན་སྐོར་བསྒྲགས་ཡོད་པ་དང་། དེ་ནི་ཕྱོགས་གཉིས་བར་དུ་མཛའ་འབྲེལ་གསར་པ་དང་དུས་རབས་གསར་པ་ཞིག་མགོ་འཛུགས་བྱས་པའི་མཚོན་རྟགས་ཡིན་སྐོར་བསྒྲགས་ཡོད་ནའང་། འདི་ལོའི་ཕྱི་ཟླ་ ༡ ཚེས་ ༥ ཉིན་དབྱིན་གཞུང་སྲིད་བློན་ལས་ཁུངས་ཀྱིས་གསལ་བསྒྲགས་ཤིག་སྤེལ་ཏེ། དབྱིན་ཡུལ་ནང་རྣམ་པ་གསར་པའི་ཏོག་དབྱིབས་ནད་འབུ་འགོས་ཁྱབ་ཕྱིན་ཡོད་པ་དང་། རྒྱལ་ནང་དུ་གནས་སྟངས་ཛ་དྲག་ཏུ་གྱུར་ཡོད་སྟབས། སྲིད་བློན་མཆོག་རྒྱ་གར་གྱི་དམངས་གཙོ་དབུ་བརྙེས་པའི་དུས་སྟོན་གྱི་སྐུ་མགྲོན་གཙོ་བོར་ཕེབས་ཐུབ་རྒྱུ་མིན་སྐོར་བསྒྲགས་ཡོད་པ་རེད་ལ། ད་སྔ་རྒྱ་གར་གཞུང་གིས་སྐུ་མགྲོན་གཙོ་བོ་གཞན་ཞིག་ཡོད་མེད་ཐད་ཅི་ཡང་བསྒྲགས་མེད་པ་རེད།
ཕྱི་ལོ་ ༢༠༡༩ ལོའི་ལོ་མཇུག་ནས་བཟུང་རྒྱ་ནག་ཝུ་ཧན་ནས་འཛམ་གླིང་གང་སར་ཏོག་དབྱིབས་གཉན་རིམས་རྒྱ་ཁྱབ་ཏུ་ཕྱིན་པ་དང་། ༧རྒྱལ་བ་རིན་པོ་ཆེ་མཆོག་ལོ་ལྟར་སྐུ་མཚམས་སུ་བཞུགས་པའི་དུས་ལ་འཁེལ་བར་བརྟེན། ཕྱི་ལོ་ ༢༠༢༠ ཟླ་ ༡ ཚེས་ ༢༨ ནས་བཟུང་ཕྱི་མིར་གཟིམ་ཆུང་མཇལ་ཁ་དང་ཕྱོགས་མཐའ་ཁག་ཏུ་ཕེབས་པའི་མཛད་འཆར་རྣམས་གནས་སྐབས་རིང་མཚམས་འཇོག་གནང་བ་ཡོངས་ཁྱབ་གསལ་བསྒྲགས་གནང་ཡོད་སྟབས། དེ་རིང་ཕྱི་ཟླ་ ༡ ཚེས་ ༢༢ ཉིན་འདི་གའི་གསར་འགོད་པས་ཞལ་པར་བརྒྱུད་སྐུ་སྒེར་དྲུང་ཆེ་སྟག་ལྷ་བསྟན་འཛིན་ལགས་སུ། ད་ལྟའི་ཆར་གཟིམ་ཆུང་མཇལ་བཅར་དང་ཕྱོགས་ཕེབས་སོགས་གནང་འཆར་ཡོད་མེད་དྲིས་པར་ཁོང་གིས། ད་ལྟ་ན་ཚའི་གནས་སྟངས་མུ་མཐུད་གནས་ཡོད་སྟབས། གནས་སྐབས་རིང་མཇལ་ཁ་གཏོང་བ་སོགས་ཀྱི་ཐད་འཆར་གཞི་གང་ཡང་ཡོད་པ་མ་རེད་ཅེས་གསུངས་བྱུང་ལ། འདས་པའི་ལོ་གཅིག་ཙམ་རིང་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད་འཛམ་གླིང་ཡུལ་ལུང་གང་སར་གནས་བའི་གནད་ཡོད་མི་སྣར་མཇལ་མོལ་དང་དད་ལྡན་དོན་གཉེར་ཅན་གྱི་སེར་སྐྱ་མང་པོར་ཆོས་འབྲེལ་བཀའ་སློབ་སྩལ་གནང་གི་ཡོད་པ་རེད།
གསར་འགོད་པ། ཀླུ་མགོན་ཐར།
དགའ་ལྡན་ཕོ་བྲང་ལས་བྱས་ཡོངས་ལ་ སྐུ་མཁྱེན་ཐུགས་རྗེ་གཟིགས་ ? རྒྱ་གར་དབུས་གཞུང་གིས་ སྐུ་མགྲོན་ངོ་ལེན་གནང་མདོག་ཁ་པོ་མ་རེད། མིའི་རྣམ་སྤྱོད་ཡོད་ན་ སྐུ་མགྲོན་ངོ་ལེན་མ་གནང་རོགས། བོད་མི་མང་དོད་པ་མིན་འདུག་ཞུས་རོགས། ནད་ཡམས་དེའི་ནང་ འུ་ཐུགས་དུས་༧གོང་ས་མཆོག ཞང་མགོ་ རྒྱ་གར་དམངས་གཙོ་དུས་ཆེན་མ་རེད། (Republic Day) རྒྱ་གར་མངའ་སྡེ་ཚང་མ་གཅིག་དུ་སྒྲིལ་བས་ཉིན་མོ་རེད། Republic དང་ Democracy Day གཉིས་ཁ་ཁ་རེད། (Republic Day ཉིན་མོ་ནི་་་རྒྱ་གར་གྱི་དམག་གིས་དཔང་ཤུག་ཡོད་ཚད་ངོམ་ཡ་ཉིན་མོ་རེད། ༧གོང་ས་མཆོག་ ཤཱ་ཀྱའི་དགེ་སློང་བསྟན་འཛིན་རྒྱ་མཚོ་མཆོག་འཚེ་བ་མེད་པ་ལྟ་གྲུབ། Non-Violence འཚེ་མེད་ཞི་བའི་ལམ་ལ་ཕེབས་མཁན་ཞིག་རེད་ད། རྒྱ་གར་བོད་དོན་ཐོག་ཁ་དུར་ཁོག་འདྲ་གཅིག་བཙུམ། ད་ རྒྱ་གར་གྱིས་གཡོ་ངན་ཆབ་སྲིད་པ་ཚོ་གཙུག་གི་སྡད་ཤེས་ན་ཡག་པོ་ཡོང་བ་འདུག