བཀྲ་ཤིས་དབང་ཕྱུག་ལགས་བཙོན་གྲོལ་ཐོབ་ཡོད་ཀྱང་འབྱུང་འགྱུར་ལོ་ ༥ ནང་ཆབ་སྲིད་ཀྱི་ཐོབ་ཐང་མེད་ལ་དོགས་ཟོན་མྱུལ་ཞིབ་འོག་ནས་འགྲོ་འདུག་སྤྱོད་གསུམ་ལ་རང་དབང་མེད་འདུག
ཁ་སང་ཕྱི་ཚེས་ ༢༨ ཉིན་བོད་ནང་གི་སྐད་ཡིག་སློབ་གསོའི་ཐོབ་ཐང་དོན་གཉེར་བ་བཀྲ་ཤིས་དབང་ཕྱུག་ལགས་རྒྱའི་བཙོན་ཁང་ནས་ཀློད་གྲོལ་ཐོབ་ཡོད་སྟབས། དེ་རིང་བོད་རང་བཙན་སློབ་ཕྲུག་ཚོགས་པའི་རྒྱ་གར་ཚན་པའི་ངོས་ནས་བཞུགས་སྒར་དྷ་སའི་མེ་གྷན་ཁྲོམ་གཞུང་དུ། བཀྲ་ཤིས་དབང་ཕྱུག་ལགས་ཀྱི་གནད་དོན་ངོ་སྤྲོད་ཀྱི་འཁྲབ་སྟོན་ལས་འགུལ་ཞིག་སྤེལ་བ་དང་སྦྲགས། བཀྲ་ཤིས་དབང་ཕྱུག་ལགས་ལ་མ་ཉེས་ཁག་གཡོག་བྱེད་མཁན་གྱི་ས་གནས་མགོ་འཁྲིད་ཚོར་ཞིབ་འཇུག་ཚད་ལྡན་བྱེད་དགོས་པ་མ་ཟད། བཀྲ་ཤིས་དབང་ཕྱུག་ལགས་ནས་ལོ་ ༥ རིང་ཉེས་མེད་བཙོན་འཇུག་ཁྲིམས་ཆད་མྱངས་པར་གུན་གསབ་སྤྲོད་དགོས་སྐོར་བརྗོད་འདུག
འཁྲབ་སྟོན་ལས་འགུལ་གྲུབ་རྗེས་བོད་རང་བཙན་སློབ་ཕྲུག་ཚོགས་པའི་རྒྱ་གར་ཚན་པའི་འགན་འཛིན་རིག་འཛིན་ཆོས་སྒྲོན་ལགས་ཀྱིས་འདི་གའི་གསར་འགོད་པར། བཀྲ་ཤིས་དབང་ཕྱུག་ལགས་ལ་ཁྲིམས་ཐག་བཅད་པའི་བརྒྱུད་རིམ་ཁྲོད་ནས་ག་དུས་ཀློད་གྲོལ་གཏོང་གི་ཡོད་མེད་འཁོད་ཡོད་སྟབས། ང་ཚོས་དངངས་སྐྲག་དང་བློ་འཚབ་ཀྱི་ཐོག་ནས་ཁོང་ཀློད་གྲོལ་ཡོང་རྒྱུར་རེ་སྒུག་བྱས་པ་རེད་ལ། རང་ཉིད་སྒེར་ལའང་བློ་འཚབ་ཆེན་པོ་སྐྱེས་བྱུང་། གང་ཡིན་ཟེར་ན། ཉེ་ཆར་རང་ལོ་ ༡༩ ཅན་གྱི་བོད་མི་དགེ་འདུན་པ་ཞིག་གིས་ཞི་བའི་ཐོག་ནས་རང་བཙན་འབོད་སྒྲ་བསྒྲགས་པའི་རྐྱེན་གྱིས་བཙོན་ཁང་ནང་ཚད་མེད་བཏང་རྐྱེན། མཐའ་མཇུག་དེར་ཚེ་སྲོག་ཤོར་བ་རེད། འདི་ལྟ་བུའི་གནས་ཚུལ་མང་པོ་ཐོན་གྱི་ཡོད་སྟབས། བཀྲ་ཤིས་དབང་ཕྱུག་ལགས་ལ་གནས་སྟངས་ལ་དངངས་སྐྲག་སྐྱེས་བྱུང་། ད་ལྟ་ཁོང་ཀློད་གྲོལ་ཐོབ་པ་དེར་དགའ་བ་སྐྱེ་བཞིན་ཡོད་ནའང་། མ་འོངས་པར་ཁོང་གི་གནས་སྟངས་ཇི་ལྟར་འགྱུར་མིན་ཐད་བློ་འཚབ་ཡོང་གི་འདུག ཅེས་བརྗོད་བྱུང་།
ཡང་ཁོང་གིས་བཀྲ་ཤིས་དབང་ཕྱུག་ལགས་ཀྱི་གནད་དོན་དེ་བོད་ཀྱི་སྐད་ཡིག་ཐོབ་ཐང་གི་འཐབ་རྩོད་ཙམ་དུ་མ་ཟད་འགྲོ་བ་མིའི་ཐོབ་ཐང་གི་གནད་འགག་ཅིག་ཆགས་ཡོད་སྐོར་ལ། སྐད་ཡིག་ནི་མི་རིགས་ཤིག་གི་ངོ་བོ་མཚོན་གྱི་ཡོད་པ་ཚང་མས་ངོས་འཛིན་ཞུ་ཡི་ཡོད་པ་ལྟར། རྒྱ་ནག་གཞུང་གིས་གནད་དོན་དེ་ཧ་གོ་བཞིན་དུ་བོད་ནང་འཆར་གཞི་དང་ལྡན་པའི་ཐོག་ནས་སྐད་ཡིག་རྩ་མེད་གཏོང་རྒྱུའི་སྲིད་ཇུས་མང་པོ་གཏན་འབེབ་བྱས་ཡོད་པ་རེད། དཔེར་ན་ཉེ་ཆར་རྒྱ་ནག་རྒྱལ་ཡོངས་དམངས་འཐུས་ཚོགས་ཆེན་གྱིས་མི་རིགས་སོ་སོའི་སྐད་ཡིག་སྦྱོང་རྒྱུ་དེ་ཁྲིམས་འགལ་ཡིན་སྐོར་བཤད་ཡོད་པ་རེད། ས་གནས་རང་སྐྱོང་གི་བཅའ་ཁྲིམས་ནང་གྲངས་ཉུང་མི་རིགས་རྣམས་ལ་སོ་སོའི་སྐད་ཡིག་སྲུང་སྐྱོབ་ཀྱི་རང་དབང་ཡོད་ཅེས་པ་དེ་དག་ཚང་མ་རྩིས་མེད་ཡིན་ཟེར་ན། མ་འོངས་པར་བོད་ཀྱི་སྐད་ཡིག་གི་གནས་སྟངས་དེ་གང་འདྲ་ཞིག་ལ་འགྱུར་མིན་དེ་ཛ་དྲག་པོ་ཆགས་ཡོད། ཅེས་དང་། བཀྲ་ཤིས་དབང་ཕྱུག་གི་གནས་སྟངས་ཐོག་ནས་རྒྱ་ནག་དམར་ཤོག་གཞུང་གིས་རང་གིས་བཟོས་པའི་ཁྲིམས་རྣམས་རྩིས་མེད་གཏོང་གི་ཡོད་པ་དང་། དམར་ཤོག་ཚོགས་པའི་ལྟ་བ་ལངས་ཕྱོགས་གལ་ཆེ་ཤོས་སུ་འཛིན་གྱི་ཡོད་པ་ཁ་གསལ་པོ་ཆགས་ཡོད། ཅེས་བརྗོད་བྱུང་།
དེ་བཞིན་ཁོང་གིས་རྒྱ་ནག་གཞུང་དང་རྒྱལ་སྤྱིའི་སྤྱི་ཚོགས་ངོས་ནས་བཀྲ་ཤིས་དབང་ཕྱུག་ལགས་མ་ཉེས་ཁག་གཡོག་གི་ཐོག་ནས་ལོ་ ༥ རིང་བཙོན་འཇུག་བྱས་པ་དེར་གུན་གསབ་སྤྲོད་དགོས་པ་མ་ཟད། བཀྲ་ཤིས་དབང་ཕྱུག་ལགས་ལ་མ་ཉེས་ཁག་གཡོག་བྱེད་མཁན་གྱི་ས་གནས་ཀྱི་མགོ་འཁྲིད་གཙོས་པའི་འབྲེལ་ཡོད་རྣམས་ལ་ཞིབ་འཇུག་ཚད་ལྡན་བྱེད་དགོས་ལ། དེ་བཞིན་ཆབ་སྲིད་བཙོན་པ་གཞན་གྱི་གནས་སྟངས་ལའང་རྒྱལ་སྤྱིའི་སྤྱི་ཚོགས་ཀྱིས་དོ་སྣང་ཤུགས་ཆེ་བ་བྱེད་དགོས་ཀྱི་ཡོད་སྐོར་བརྗོད་བྱུང་།
བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་ད་ཐེངས་བཀྲ་ཤིས་དབང་ཕྱུག་ལགས་ཀློད་གྲོལ་ཐོབ་པ་དེར་དགའ་བསུ་བཞུ་བཞིན་འདུག་ཀྱང་། བཙོན་གྲོལ་ཐོབ་རྗེས་འབྱུང་འགྱུར་ལོ་ ༥ ནང་ཆབ་སྲིད་ཀྱི་ཐོབ་ཐང་མེད་ལ། རྒྱ་ནག་གཞུང་གི་དོགས་ཟོན་མྱུལ་ཞིབ་འོག་ནས་འགྲོ་འདུག་སྤྱོད་གསུམ་ལ་རང་དབང་མེད་པ་རེད་འདུག
གསར་འགོད་པ། པ་སངས་ཚེ་རིང་།
