རྒྱལ་བའི་བཀའ་དྲིན་རྗེས་དྲན་ཞུ་ཆེད་ཀིརྟི་རིན་པོ་ཆེ་མཆོག་ནས་མཛད་པའི་སློབ་དེབ་ ༦༩ དབུ་འབྱེད་གནང་།

རྒྱལ་བའི་བཀའ་དྲིན་རྗེས་དྲན་ཞུ་ཆེད་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་འགྲོ་སོང་ཆ་ཚང་བཏང་སྟེ་ཀིརྟི་རིན་པོ་ཆེ་མཆོག་གིས་རྩོམ་སྒྲིག་མཛད་པའི་རིས་སུ་མ་ཆད་པའི་ཆོས་བརྒྱུད་ཁག་གི་གྲྭ་བཙུན་ལོ་ཆུང་རྣམས་ལ་སྔོན་འགྲོ་ནས་འཛིན་གྲྭ་དགུ་པ་བར་གྱི་སློབ་དེབ་ ༦༧ དང་དེའི་མཉམ་དུ་སློབ་དེབ་གཉིས་བཅས་ཁྱོན་སློབ་དེབ་ ༦༩ དབུ་འབྱེད་གནང་སོང་།

དེ་རིང་ཕྱི་དྲོར་ཆོས་རིག་ལས་ཁུངས་ཀྱི་ཚོགས་ཁང་དུ། བོད་མིའི་སྒྲིག་འཛུགས་ཀྱི་རྒྱལ་བའི་བཀའ་དྲིན་རྗེས་དྲན་གྱི་ལོར་སྲུང་གཙི་དང་འབྲེལ་ཏེ་བཀའ་ཤག་ལྷན་འཛོམས་ཀྱི་ཐོག་ནས་སྲིད་སྐྱོང་བློ་བཟང་སེང་གེ་མཆོག་གིས། བཀའ་ཟུར་སྐྱབས་རྗེ་ཀིརྟི་རིན་པོ་ཆེ་མཆོག་ནས་རིས་མེད་ཆོས་བརྒྱུད་ཁག་གི་གྲྭ་བཙུན་ལོ་ཆུང་རྣམས་ཀྱི་ཆེད་དུ་རྩོམ་སྒྲིག་མཛད་པའི་སློབ་དེབ་བློ་གསལ་མགུལ་རྒྱན་པར་ཐེངས་གཉིས་པ་དབུ་འབྱེད་གནང་སོང་བ་དང་། དབུ་འབྱེད་ཐོག་སློབ་དེབ་བློ་གསལ་མགུལ་རྒྱལ་མཛད་དགོས་པའི་དམིགས་ཡུལ་དང་བརྗོད་དོན་བཅས་ཀྱི་ཐོག་ཀིརྟིའི་བྱེས་པ་གྲྭ་ཚང་གི་རིག་གནས་སློབ་དཔོན་དང་སྐྱབས་རྗེ་ཀིརྟི་རིན་པོ་ཆེ་མཆོག་གི་གསུང་རྩོམ་ཕྱོགས་སྒྲིག་པ་རེ་མདོ་སེངྒེ་ལགས་ཀྱིས། བོད་ཕྱི་ནང་གི་དགོན་སྡེ་ཁག་ནས་འཚར་ལོངས་བྱུང་དང་འབྱུང་བཞིན་པའི་གཞོན་སྐྱེས་རབ་བྱུང་ཕོ་མོ་རྣམས་ལ་སློབ་སྦྱོང་འཐུས་སྒོ་ཚང་བ་ཞིག་དང་། ལྷག་པར་དུ་དེང་སང་གི་དུས་སྐབས་དང་འཚམ་པའི་ཤེས་ཡོན་གྱི་དགོས་མཁོ་ཆ་ཚང་ཞིག་ཡོང་ཐུབ་མིན་དེ། ཆོས་བརྒྱུད་དང་དགོན་སྡེ་བྱེ་བྲག་པ་གཅིག་ལ་རག་ལས་ཀྱི་མེད་པར། བོད་མི་རིགས་ཀྱི་བསྟན་སྲིད་དང་བཅས་པའི་རྩ་ལག་ཐུག་ས་ཆ་ཚང་བ་གནས་སྟངས་དེར་ཐུག་ཡོད་དུས། ཆོས་བརྒྱུད་རིས་མེད་ཀྱི་དགོན་སྡེ་ནང་འཚར་ལོངས་འབྱུང་བཞིན་པའི་གཞོན་སྐྱེས་རྣམས་ཚད་དང་ལྡན་ཞིང་བརྒྱུད་རིམ་ཡོད་པའི་ཤེས་ཡོན་གྱི་ཐོག་ནས་གསོ་སྐྱོང་བྱེད་དགོས་ཀྱི་རེད། ཡིན་ནའང་། བོད་ཀྱི་ལོ་རྒྱུས་སྤྱི་དང་ཤེས་ཡོན་གྱི་ལོ་རྒྱུས་ལ་ཕྱིར་ལྟ་བྱས་ན། ཆོས་བརྒྱུད་སོ་སོའི་མཐོ་རིམ་གྱི་སློབ་གསོ་འཐུས་སྒོ་ཚང་བ་ཞིག་ཡོད་ནའང་། དེ་ལ་སྔོན་འགྲོའི་རྨང་གཞིའི་ཤེས་ཡོན་སྤྲོད་ཐབས་ཀྱི་ལམ་སྲོལ་འཐུས་སྒོ་ཚང་བ་ཞིག་དང་། སློབ་དེབ་གོ་རིམ་ལྡན་པ་མེད་པའི་སྟོང་ཆ་ཆེན་པོ་ཞིག་ལྷགས་བསྡད་ཡོད། དེར་བརྟེན་༧སྐྱབས་མགོན་ཀིརྟི་རིན་པོ་ཆེས་སྟོང་ཆ་དེ་བསྐོང་བའི་ཆེད་དང་གཞོན་སྐྱེས་རབ་བྱུང་ཕོ་མོ་རྣམས་ལ་ཤེས་ཡོན་ཆ་ཚང་བ་ཡོང་ཆེད་སློབ་དེབ་བློ་གསལ་མགུལ་རྒྱན་འདི་ཉིད་མཛད་ཡོད་པ་རེད། ཅེས་བརྗོད་སོང་།

དེའི་རྗེས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས། ༧སྐྱབས་རྗེ་ཀིརྟི་རིན་པོ་ཆེ་མཆོག་གི་སྐུ་ཚེའི་ལོ་རྒྱུས་ངོ་སྤྲོད་དང་འབྲེལ། ༧སྐྱབས་རྗེ་ཀིརྟི་རིན་པོ་ཆེ་མཆོག་གི་སློབ་དེབ་བློ་གསལ་མགུལ་རྒྱན་མཛད་དགོས་པའི་དམིགས་ཡུལ་ནི་སྲོལ་རྒྱུན་གྱི་ཁྱད་ཆོས་ཆ་ཚང་ལྡན་པའི་ཐོག་ནས་དེང་རབས་ཀྱི་ཤེས་ཡོན་ཡང་དགོས་གལ་ཆེན་པོ་ཡོད་པ་དང་། བཙན་བྱོལ་དུ་ཡོང་བའི་རྩ་དོན་ནི་མི་ཐོག་ནས་མི་ཐོག་སོ་སོའི་སྐད་ཡིག་དང་ཆོས་དང་རིག་གཞུང་མི་ཉམས་རྒྱུན་འཛིན་བྱེད་དགོས་པས་སློབ་གྲྭ་ཁག་མང་པོ་ཞིག་བོད་པའི་སློབ་གྲྭ་རང་བཙུགས་ཏེ། བོད་པའི་སྐད་ཡིག་དང་རིག་གནས་བསླབ་ཀྱི་ཡོད་རེད་ལ་བསླབ་དགོས་ཀྱི་ཡོད་རེད། ད་དུང་ཕྱི་ལོ་ ༡༩༦༣ ཟླ་ ༣ ཚེས་ ༣ ཉིན་མཱ་སུ་རིའི་སློབ་གྲྭ་དང་པོ་སྒོ་འབྱེད་གནང་བའི་སྐབས་༧གོང་ས་མཆོག་གིས། བོད་པའི་གཞོན་སྐྱེས་ཕོ་མོ་ཡོངས་རྫོགས་ཀྱིས་སྲོལ་རྒྱུན་གྱི་ཤེས་ཡོན་དང་དེང་རབས་ཀྱི་ཤེས་ཡོན་གཉིས་འདབ་གཤོག་གཉིས་ལྡན་དགོས་པའི་བཀའ་སློབ་གནང་བ་སོགས་ལ་གཞི་བཞག་པའི་ཐོག་ནས། བཙན་བྱོལ་ནང་གི་དགོན་པ་དང་སློབ་གྲྭར་སློབ་དེབ་དང་བསླབ་གཞི་གཏན་འབེབས་མེད་པ་དང་། རིས་སུ་མ་ཆད་པའི་ཆོས་བརྒྱུད་ཁག་གི་དགོན་པའི་གྲྭ་བཙུན་རྣམས་ཀྱི་ཆེད་དུ་སྔོན་འགྲོ་ནས་འཛིན་གྲྭ་དགུ་པ་བར་དུ་ཁྱོན་བསྡོམས་པའི་སློབ་དེབ་ ༦༧ དང་དེའི་མཉམ་དུ་སློབ་དེབ་གཉིས་བརྩམས་གནང་བ་རེད། བོད་མིའི་སྒྲིག་འཛུགས་ཀྱིས་འགྲོ་གྲོན་ཆ་ཚང་བཏང་བའི་ཐོག་སློབ་དེབ་རེ་རེ་པར་སྐྲུན་གྲངས་༡༠༠༠ བྱས་ཡོད་པ་དང་དགོན་པ་དང་དགོན་པའི་སློབ་གྲྭ། དེ་བཞིན་གཞི་རིམ་སློབ་གྲྭ། དེ་མིན་རིག་གནས་ཀྱི་སྡེ་ཚན་དང་ཧི་མ་ལ་ཡའི་རི་རྒྱུད་ཀྱི་དགོན་པ་དང་སློབ་གྲྭ་དེ་ཚོར་རིན་མེད་འགྲེམས་སྤེལ་བྱ་རྒྱུ་ཡིན། ཞེས་གསུངས་སོང་།

མཇུག་ཏུ། སློབ་དེབ་བློ་གསལ་མགུལ་རྒྱན་གྱི་སློབ་གསོའི་རིན་ཐང་སྐོར་ལ་སྲིད་སྐྱོང་བཟང་སེང་གེ་མཆོག་གིས། ཉེ་བའི་ཆར་བོད་པའི་སློབ་གྲྭ་འགྲིམ་མཁན་གྱི་བོད་ཕྲུག་ཚོར་བསམ་བློ་གཏོང་སྟངས་ཀྱི་ཆ་ནས་དཀའ་ངལ་མང་པོ་འཕྲད་ཀྱི་འདུག གཞིས་ཆགས་ཁག་ལ་སྐོར་སྐྱོད་དུ་འགྲོ་སྐབས་ཕ་མ་ཚོས་སྡུག་བསྔལ་བཤད་དུ་ཡོང་གི་འདུག ཕྲུ་གུ་ཚོ་སེམས་ཁམས་ཀྱི་རྐྱེན་པས་ཕྱིར་མི་ཐོན་པར་ནང་ལ་འཛུལ་ནས་སྡོད་ཀྱི་ཡོད་སྐོར་དང་། ཕ་མའི་ངོས་ནས་རང་གི་བུ་ཕྲུག་དེ་ཉིན་གང་སྲུང་ནས་སྡོད་དགོས་ཀྱི་ཡོད་སྐོར་བཤད་བྱུང་། ཕྱོགས་གཅིག་ནས་ང་ཚོ་བཙན་བྱོལ་ལ་སླེབས་ནས་དཔལ་འབྱོར་དང་མཐུན་རྐྱེན་ཐད་ནས་བཟང་དུ་འགྲོ་ཡོད་ལ། སློབ་གྲྭ་ཁག་ཏུའང་ཟབ་སྦྱོང་མང་པོ་རག་ཡོད་ཀྱང་། ཕྲུ་གུའི་སེམས་ཁམས་ཀྱི་གནས་སྟངས་དེ་སྐྱོ་རུ་འགྲོ་ཡི་ཡོད་པ་ལྟ་བུ་འདུག ཅེས་དང་། ད་ཐེངས་ཀིརྟི་རིན་པོ་ཆེ་མཆོག་ནས་མཛད་པའི་སློབ་དེབ་འདིའི་ནང་གཞི་རྩའི་སྲོལ་རྒྱུན་གྱི་སློབ་གསོའི་ཐོག་ཡ་རབས་བཟང་སྤྱོད་དང་ལས་རྒྱུ་འབྲས། སྐྱེ་བ་ཕྱི་མ་སོགས་ཚང་མ་ཡོད་སྟབས། ང་ཚོར་ལས་རྒྱུ་འབྲས་དང་བྱམས་བརྩེ་སོགས་ཕྱི་དངོས་པོ་ལས་འདས་པའི་བཟང་སྤྱོད་ཀྱི་སློབ་གསོ་འདུག ཅེས་གསུངས་སོང་།

སྔོན་འགྲོ་ནས་འཛིན་གྲྭ་ ༩ པའི་བར་ཁྱོན་དེབ་གྲངས་ ༦༨ ཡོད་པའི་སློབ་དེབ་བློ་གསལ་མགུལ་རྒྱན་དེ་ཉིད་ཕྱི་ལོ་ ༢༠༡༧ ལོར་པར་འགྲེམས་ཐོག་མ་བྱས་ཡོད་ནའང་། ཕྱི་ལོ་ ༢༠༡༩ ལོའི་ཟླ་ ༧ ཚེས་ ༡༢ ཉིན་ཀིརྟིའི་བྱེས་པ་གྲྭ་ཚང་ཕྱག་བཏབས་ནས་མི་ལོ་ ༢༥ འཁོར་བའི་མཛད་སྒོའི་སྟེང་༧གོང་ས་རྒྱལ་བ་རིན་པོ་ཆེ་མཆོག་ནས་ཞལ་འབྱེད་གནང་ཡོད་པ་དང་། ད་ཐེངས་ཆོས་རིག་ལས་ཁུངས་ནས་༧རྒྱལ་བའི་བཀའ་དྲིན་རྗེས་དྲན་གྱི་ལོར་སྲུང་གཙི་ཞུ་རྒྱུའི་ལས་གཞིའི་ངོ་བོའི་ཐོག་ནས་པར་སྐྲུན་གྱི་འགྲོ་གྲོན་བཏང་སྟེ། ཆོས་རིག་ལས་ཁུངས་ཀྱི་ཁྱབ་ཁོངས་དགོན་སྡེ་ཁག་དང་། རང་སྐྱོང་སྡེ་ཚན། ཤེས་རིག་ཁྱབ་ཁོངས་ཀྱི་སློབ་གྲྭ་ཁག་དང་། དེ་བཞིན་ཧི་མ་ལ་ཡའི་རི་རྒྱུད་ཀྱི་དགོན་པ་དང་སློབ་གྲྭ་བཅས་ལ་རིན་མེད་ཐོག་འགྲེམས་སྤེལ་ཞུ་རྒྱུ་ཡིན་འདུག

གསར་འགོད་པ། པ་སངས་ཚེ་རིང་། བསྟན་འཛིན་ཕུར་བུ།