ལྷ་རྒྱལ་རི་བྱམས་པ་གླིང་རྒན་གསོ་ཁང་གི་རྒན་འཁོགས་མི་གྲངས་ ༥༠ དང་ལས་བྱེད་ཆ་ཚང་ལ་བརྟག་དཔྱད་བྱས་རྗེས་རྒན་འཁོགས་ ༡༡ དང་ནད་གཡོག་ ༡ བཅས་ད་བར་དུ་ཁྱོན་མི་གྲངས་ ༡༣ ལ་ཏོག་དབྱིབས་གཉན་རིམས་འགོས་ཡོད་པ་ཤེས་རྟོགས་བྱུང་འདུག
ཁེ་ཉིན་ཕྱི་ཚེས་ ༣༠ ཉིན་དྷ་རམ་ས་ལའི་ལྷ་རྒྱལ་རི་བྱམས་པ་གླིང་རྒན་གསོ་ཁང་གི་རྒན་འཁོགས་ ༡༢ དང་ནད་གཡོག་གཅིག་ལ་ཏོག་དབྱིབས་གཉན་རིམས་ཕོག་པ་ཤེས་རྟོགས་བྱུང་ཡོད་པ་དང་། དེ་བཞིན་ཉེ་སྔོན་རྒྱ་གར་སྨན་ཁང་ནས་བྱམས་པ་གླིང་གི་རྒན་འཁོགས་ཤིག་ལ་ཏོག་དབྱིབས་ནད་རྟགས་ཐོན་ཡོད་སྟབས། རྒན་གསོ་ཁང་གི་ཉེ་འཁོར་སྨི་ ༥༠ མཚམས་ཀྱི་ས་ཁུལ་ཡོངས་རྫོགས་ཉེན་སྲུང་ས་ཚིགས་སུ་བཟོས་ཏེ་ཟླ་འདིའི་ཕྱི་ཚེས་ ༡༤ བར་གླིང་སྐོར་དུ་མི་འགྲོ་རྒྱུའི་འབོད་སྐུལ་གནང་འདུག
འདི་གའི་གསར་འགོད་པས་བོད་མིའི་སྒྲིག་འཛུགས་ནང་སྲིད་ལྷན་ཁང་གི་བདེ་དོན་ཚན་པའི་འགན་འཛིན་བཀྲ་ཤིས་བདེ་སྐྱིད་ལགས་སུ་གཉན་རིམས་འགོས་རྐྱེན་དང་ཇི་ལྟར་ཤེས་རྟོགས་བྱུང་ཡོད་མེད་དྲིས་པར་ཁོང་མོས། དུས་རྒྱུན་བདུན་ཕྲག་རེར་སྨན་པ་ཞིག་རྒན་གསོ་ཁང་ལ་ཆེད་བཅར་གྱིས་རྒན་འཁོགས་རྣམས་ལ་ནད་གཞི་ཡོད་མེད་བརྟག་དཔྱད་བྱེད་ཀྱི་ཡོད་ནའང་། འདི་ལོར་གཉན་རིམས་ཀྱི་རྐྱེན་པས་ཡུན་རིང་བརྟག་དཔྱད་བྱེད་ཐུབ་མེད་པ་དང་། ཉེ་ལམ་རྒན་འཁོགས་ཁྲོད་ཆམ་རིམས་ཕོག་མཁན་མང་དུ་ཕྱིན་པའི་གནས་ཚུལ་བྱུང་བར་བརྟེན། ཕྱི་ཟླ་ ༡ ཚེས་ ༢༨ ཉིན་རྒན་གསོ་ཁང་གི་འབྲེལ་ཡོད་ལས་བྱེད་དང་སྨན་ཞབས་པའི་འབོད་སྐུལ་བཞིན་བདེ་ལེགས་སྨན་ཁང་གི་སྨན་པ་ཞིག་དེར་བཅར་ཏེ། རྒན་འཁོགས་རྣམས་ལ་ཏོག་དབྱིབས་གཉན་རིམས་ཡོད་མེད་ཀྱི་བརྟག་དཔྱད་དགོས་སྐོར་ལམ་སྟོན་གནང་བ་ལྟར། ཉིན་དེར་རྒན་གསོ་ཁང་གི་རྒན་འཁོགས་མི་གྲངས་ ༥༠ དང་ལས་བྱེད་ཆ་ཚང་ལ་བརྟག་དཔྱད་བྱས་རྗེས་རྒན་འཁོགས་ ༡༡ དང་། ནད་གཡོག་ ༡ བཅས་ཁྱོན་མི་གྲངས་ ༡༢ དང་། དེའི་ཐོག་ཉེ་ཆར་ནད་གཞི་ཞིག་གི་རྐྱེན་པས་རྒན་འཁོགས་ཤིག་རྒྱ་གར་སྨན་ཁང་དུ་བསྟེན་གཏུག་བྱེད་སྐབས། སྨན་ཁང་དེས་ཐོག་མར་གཉན་རིམས་བརྟག་དཔྱད་བྱས་འབྲས་སུ་གཉན་རིམས་ཡོད་པ་ཤེས་རྟོགས་བྱུང་བར་བརྟེན། ད་ལྟའི་ཆར་བྱམས་པ་གླིང་རྒན་གསོ་ཁང་ནས་རྒན་འཁོགས་ ༡༢ དང་ནད་གཡོག་ ༡་བཅས་ཁྱོན་མི་གྲངས་ ༡༣ ལ་གཉན་རིམས་འགོས་ཡོད་འདུག ཅེས་བརྗོད་བྱུང་།
ཡང་ཁོང་མོས། ད་ལྟའི་ཆར་གཉན་རིམས་ཕོག་པའི་ནད་པའི་ཁྲོད་ནས་རྒན་འཁོགས་ ༡༠ དང་ནག་གཡོག་ ༡ དེ་རྒན་གསོ་ཁང་རང་དུ་ཟུར་བཀག་འོག་ཡོད་པ་དང་། གཞན་གཉིས་རྒྱ་གར་གཞུང་གི་ཊན་ཊ་སྨན་ཁང་དུ་སྨན་བཅོས་བྱེད་མུས་ཡིན་སྐོར་དང་། དེ་བཞིན་ཁ་སང་ཕྱི་ཚེས་ ༣༡ ཉིན་དེ་སྔ་བརྟག་དཔྱད་བྱས་མེད་པའི་རྒན་འཁོགས་གཞན་རྣམས་དང་ནད་གཡོག་རྣམ་པའི་ནང་མི་རྣམས་ལ་བརྟག་དཔྱད་བྱས་ཏེ་བརྟག་འབྲས་དེ་རིང་འབྱོར་རྒྱུའི་རེ་བ་བྱེད་ཀྱི་ཡོད་སྐོར་བརྗོད་བྱུང་ལ། གལ་ཏེ་དེ་རིང་གི་བརྟག་འབྲས་ནང་ནད་པ་གཞན་ཐོན་ཚེ། རྒན་འཁོགས་རྣམས་སྣེ་ལེན་ཁང་དུ་ཡོད་པའི་འགོག་དབྱེ་ཟུར་འཇོག་ཁང་དུ་ཟུར་བཀག་བྱ་གཏན་ཁེལ་ཡོད་སྐོར་འགྲེལ་བརྗོད་གནང་བྱུང་།
སྤྱིར་འདས་ལོའི་ཕྱི་ཟླ་ ༣ པ་ནས་བྱམས་པ་གླིང་རྒན་གསོ་ཁང་གི་རྒན་འཁོགས་རྣམས་ཕྱིར་མི་ཐོན་རྒྱུའི་འབོད་སྐུལ་གནང་ཡོད་པ་དང་། ལས་བྱེད་རྣམས་ཉིན་རེའི་དགོས་མཁོའི་དབང་གིས་ཕྱི་ལ་འགྲོ་དགོས་ཀྱི་ཡོད་ནའང་། ནད་གཡོག་གཅིག་ལས་ལས་བྱེད་གཞན་ལ་གཉན་རིམས་འགོས་མེད་པ་དང་། ད་ལན་གྱི་ཏོག་དབྱིབས་གཉན་རིམས་ཀྱི་བྱུང་རྩ་ཅི་ཡིན་ཤེས་རྟོགས་མེད་པ་དང་། ཉེ་ལམ་བྱམས་པ་གླིང་རྒན་གསོ་ཁང་གི་རྒན་འཁོགས་འདས་གྲོངས་སུ་ཕྱིན་པ་རྣམས་ཏོག་དབྱིབས་གཉན་རིམས་ཀྱི་རྐྱེན་པས་ཡིན་མིན་དྲིས་པར། ཁོང་རྣམས་སྔར་ནས་ནད་གཞི་ཡོད་པ་ཤ་སྟག་ཡིན་པ་དང་། ཉེ་སྔོན་གྲོངས་པའི་རྒན་འཁོངས་དེའང་ཏོག་དབྱིབས་བརྟག་དཔྱད་སྐབས་གཉན་རིམས་མེད་པ་གཏན་ཁེལ་བྱུང་ཡོད་སྐོར་གསལ་བཤད་གནང་བྱུང་།
གསར་འགོད་པ། པ་སངས་ཚེ་རིང་།
