འབར་མའི་དྲག་དམག་སྲིད་གཞུང་གིས་ལྕམ་ཨང་སན་སུའུ་སྐྱིད་ཀྱི་གཙོས་དམངས་གཙོ་ཡར་ཐོན་ཚོགས་པའི་མགྲིན་ཚབ་པ་དང་གནད་ཡོད་མི་སྣ་ཁག་ཅིག་འཛིན་བཟུང་བྱས་ཏེ་རྒྱལ་ཡོངས་ཀྱི་འབྲེལ་ལམ་ཡོངས་བཀག་སྡོམ་བྱེད་བཞིན་ཡོད་པ་རེད།
དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། འདས་ལོའི་ཕྱི་ཟླ་ ༡༡ ནང་འབར་མའི་དམག་གཞུང་གི་ཕྱོགས་གཏོགས་ཚོགས་པ་དང་ལྕམ་ཨང་སན་སུའུ་སྐྱིད་(Aung San Suu Kyi)ལགས་ཀྱིས་སྣེ་ཁྲིད་པའི་འབར་མའི་རྒྱལ་ཡོངས་དམངས་གཙོ་ཡར་ཐོན་ཚོགས་པའི་བར་འོས་བསྡུ་དང་འབྲེལ་བའི་རྩོད་རྙོག་འབྱུང་གི་ཡོད་པ་ལྟར། ཁ་སང་འབར་མའི་དྲག་དམག་སྲིད་གཞུང་གིས། གློ་བུར་དུ་འབར་མ་རྒྱལ་ཁབ་ཀྱི་སློབ་སྟོན་པ་ལྕམ་ཨན་སན་སོའུ་སྐྱིད་ལགས་དང་དམངས་གཙོ་ཚོགས་པའི་མགྲིན་ཚབ་པ་གཙོས་སྲིད་དོན་པ་རྒན་གྲས་ཁག་ཅིག་འཛིན་བཟུང་བྱས་ཡོད་པ་དང་། ལོ་གཅིག་རིང་རྒྱལ་ཡོངས་ཛ་དྲག་གནས་སྟངས་འོག་སྡོད་དགོས་པའི་བཀའ་བཏང་ཡོད་པ་རེད།
ཁ་སང་རྒྱལ་ཡོངས་དམངས་གཙོ་ཡར་ཐོན་ཚོགས་པའི་གནད་ཡོད་མགོ་འཁྲིད་ཚོ་འཛིན་བཟུང་བྱས་པ་དང་འབར་མའི་རྒྱལ་ས་ནའེ་པེ་ཊའོ་ (Nay Pyi Taw) དང་གྲོང་ཁྱེར་གཙོ་བོ་ (Yangon) གཉིས་ཀྱི་སྲང་ལམ་དུ་དམག་མི་འགྲེམས་འཇོག་བྱས་པ་དང་བསྟུན། འབར་མའི་དྲག་དམག་སྲིད་གཞུང་གིས་ལྕམ་ཨང་སན་སུའུ་སྐྱིད་ལགས་ཀྱི་ཚབ་ཏུ་ད་ལྟའི་འབར་མའི་སྤྱི་ཁྱབ་དམག་སྤྱི་ཆེན་མོ་མེན་ཨན་ལིན་(Min Aung Hlaing ) ཟེར་བ་བསྐོས་ཏེ། སྲིད་དོན་གྱི་དབང་ཆ་ཡོངས་རྫོགས་ལ་ཁོས་སྟངས་འཛིན་བྱ་རྒྱུ་ཡིན་པ་དང་། ལོ་ ༡ རིང་འབར་མའི་མི་མང་ཡོངས་རྒྱལ་ཡོངས་ཛ་དྲག་གནས་སྟངས་འོག་སྡོད་དགོས་སྐོར་བསྒྲགས་ཡོད་པ་རེད།
ཨ་རི་དང་ཡུ་རོབ་མཐུན་ཚོགས། དབྱིན་ཡུལ། དེ་བཞིན་ཨོ་གླིང་སོགས་གཙོས་པའི་འཛམ་གླིང་རྒྱལ་ཁབ་ ༢༠ ཡས་མས་ཀྱིས་འབར་མའི་དམག་གཞུང་གི་བྱ་སྤྱོད་དེར་སྐྱོན་བརྗོད་ཤུགས་ཆེན་བྱས་ཡོད་པ་དང་། དེ་ཡང་ཨ་རིའི་རྒྱལ་སྲིད་དྲུང་ཆེ་ཨན་ཊོ་ནེ་བྷེ་ལིན་ཁན་ (Antony Blinken ) ལགས་ཀྱིས། ཨ་རི་འབར་མའི་མི་མང་གི་མངོན་འདོད་དུ་གྱུར་བའི་དམངས་གཙོ་དང་རང་དབང་། ཞི་བདེ་སོགས་ཀྱི་རྒྱབ་ཏུ་ལངས་ཀྱི་ཡོད། འབར་མའི་དམག་གཞུང་གིས་འཛིན་བཟུང་བྱས་པའི་དམངས་གཞུང་གི་མགོ་འཁྲིད་རྣམས་འཕྲལ་མར་ཀློད་གྲོལ་གཏོང་དགོས་ཀྱི་ཡོད། ཅེས་བརྗོད་ཡོད་པ་རེད།
ཡང་ཨོ་གླིང་ཕྱི་སྲིད་བློན་ཆེན་མཱ་རེ་སི་པའེ་ནེ་ (Marise Payne) ལགས་ཀྱིས། འབར་མའི་དམག་གཞུང་གིས་ཁྲིམས་ཀྱི་དབང་སྒྱུར་ལ་བརྩི་བཀུར་དང་། ཁྲིམས་འགལ་ཐོག་འཛིན་བཟུང་བྱས་པའི་དམངས་ཀྱི་མགོ་འཁྲིད་ཡོངས་འཕྲལ་དུ་ཀློད་གྲོལ་བཏང་སྟེ། ཁྲིམས་མཐུན་ངང་རྩོད་རྙོག་ཞི་འགྲིག་བྱ་དགོས་པའི་སྐུལ་མ་གཏོང་གི་ཡོད། ཅེས་བརྗོད་ཡོད་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་འགན་འཛིན་ཇོན་སའེ་ཧྥི་ཊོན་ (John Sifton) ལགས་ཀྱིས། དམག་གཞུང་གིས་དམངས་ཀྱི་མགོ་འཁྲིད་ཚོར་ཐོག་མ་ཉིད་ནས་གོ་བརྡ་ཙམ་ཡང་སྤྲད་མེད་སྟབས། ད་རེས་གནད་དོན་འདིའི་ཐོག་ནས་འབར་མའི་ནང་སྔོན་མ་ནས་ཆབ་སྲིད་ཀྱི་རྩོད་རྙོག་ཅིག་ཡོད་པ་གསལ་བོ་བསྟན་ཡོད། ཅེས་བརྗོད་ཡོད་པ་རེད།
བྷི་བྷི་སི་གསར་ཁང་གི་གནས་ཚུལ་ལྟར་ན། ད་ལྟའི་ཆར་འབར་མའི་རྒྱལ་ས་གཙོས་གྲོང་ཁྱེར་ཆེ་ཁག་ཚང་མའི་ནང་། ཁ་པར་དང་གློག་ཀླད་སོགས་ཀྱི་དྲ་ལམ་ཡོངས་རྫོགས་བཀག་སྡོམ་བྱས་ཏེ། འབར་མ་ནང་ཁུལ་གྱི་གནས་ཚུལ་ཕྱིར་གྱར་རྒྱུ་ཁག་པོ་བཟོས་ཡོད་པ་དང་། གྲོང་ཁྱེར་ཆེ་ཤོས་ཡཱང་གྷོན་(Yangon) ནང་གི་མི་མང་པོས་རྒྱལ་ཡོངས་ཛ་དྲག་གི་བཀའ་ཁྱབ་འོག ཕྱིར་བསྐྱོད་ཆོག་གི་མེད་པའི་དཀའ་ངལ་ལ་བརྟེན་ནས་དངུལ་འདང་ངེས་ལེན་ཆེད་དངུལ་ཁང་དུ་འཚང་ཁ་རྒྱག་གི་ཡོད་པ་དང་། ད་ལྟ་ནས་རང་འགུལ་དངུལ་ལེན་འཕྲུལ་ཆས་ཁག་ཅིག་སྟོང་པ་ཆགས་པ་དང་འབར་མའི་དངུལ་ཁང་ཁག་མུ་མཐུད་སྒོ་ཕྱེ་རྒྱུ་ཡིན་མིན་སོགས་ངེས་གཏན་མེད་པ་རེད།
ཐེངས་འདིར་དམངས་གཙོ་ཡར་ཐོན་ཚོགས་པའི་མགོ་འཁྲིད་ཚོ་འཛིན་བཟུང་བྱེད་དོན་ནི་རྒྱལ་ཡོངས་འོས་བསྡུ་ཆེན་མོ་དང་འབྲེལ་བ་ཡོད་པ་ལྟར། འདས་ལོའི་ཕྱི་ཟླ་ ༡༡ ཚེས་ ༨ ཉིན་འབར་མའི་རྒྱལ་ཡོངས་འོས་བསྡུའི་ཁྲོད། ལྕམ་ཨང་སན་སུའུ་སྐྱིད་ཀྱིས་སྣེ་འཁྲིད་པའི་དམངས་གཙོ་ཡར་ཐོན་ཚོགས་པར་གྲོས་ཚོགས་སྤྱི་ཡོངས་ཀྱི་སྲིད་སྟེགས་བརྒྱ་ཆའི་གྲངས་ ༨༣ ཐོབ་སྟེ། དམངས་གཙོ་ཡར་ཐོན་ཚོགས་པར་རྒྱལ་ཁ་ཆེན་པོ་ཐོབ་ཡོད་ནའང་། དམག་གཞུང་གིས་འོས་བསྡུའི་གྲུབ་འབྲས་དྲང་པོ་མ་བྱུང་བའི་རྒྱུ་མཚན་དྲངས་ཏེ། འབར་མའི་འོས་བསྡུའི་འགན་འཛིན་ (Hla Thein) ཆེས་མཐོའི་ཁྲིམས་ཁང་ལ་ཞུ་གཏུག་བྱས་ཡོད་པ་དང་། འབར་མའི་འོས་བསྡུ་ལྷན་ཁང་ནས་འོས་བསྡུའི་མཇུག་འབྲས་དང་འབྲེལ་བའི་སྐྱོན་འཛུགས་དེ་ནི་བདེན་པ་མིན་པ་དང་ངོས་ལེན་མ་ཞུས་པར་བརྟེན། ཉེ་ལམ་ནས་དམག་གཞུང་གིས་འོས་བསྡུ་དང་འབྲེལ་བའི་གནད་དོན་ཐད་དྲག་ཤུགས་བཀོལ་རྒྱུ་ཡིན་པའི་འཇིགས་སྐུལ་གཏོང་གི་ཡོད་པ་རེད།
ད་རེས་ནི་འབར་མའི་ནང་ཕྱི་ལོ་ ༢༠༡༡ ལོར་དྲག་དམག་སྲིད་གཞུང་གི་དབང་སྒྱུར་མཚམས་འཇོག་བྱས་ཏེ། དམངས་གཙོའི་ལམ་ནས་འོས་བསྡུ་བྱས་པ་ཐེངས་གཉིས་པ་ཆགས་ཀྱི་ཡོད་པ་ལྟར། ཕྱི་ལོ་ ༢༠༡༥ དང་ ༢༠༢༠ བསྟུད་མར་ལྕམ་ཨང་སན་སུའུ་སྐྱིད་ཀྱིས་སྣེ་འཁྲིད་པའི་དམངས་གཙོ་ཡར་ཐོན་ཚོགས་པར་འོས་བསྡུའི་ཁྲོད་རྒྱལ་ཁ་ཆེན་པོ་ཐོབ་ཡོད་པ་དང་། ཕྱི་ལོ་ ༢༠༡༥ ལོར་འབར་མའི་གྲོས་ཚོགས་གོང་འོག་གཉིས་ཀྱི་སྲིད་སྟེགས་ ༤༩༨ ལས་རྒྱལ་ཡོངས་དམངས་གཙོ་ཡར་ཐོན་ཚོགས་པར་སྲིད་སྟེགས་ ༣༨༧ ཐོབ་པ་རེད།
ཕྱི་ལོ་ ༢༠༡༨ དང་ ༢༠༡༩ རིམ་པར་འབར་མའི་ནང་རོ་ཧིན་གྷ་ཁ་ཆེ་གྲངས་ཉུང་མི་རིགས་ཀྱི་དཀའ་རྙོག་དང་འབྲེལ། ནུབ་ཕྱོགས་པའི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་མང་པོས་ལྕམ་ཨང་སན་སུའུ་སྐྱིད་ལགས་སུ་སྐྱོན་བརྗོད་བྱས་ཡོད་པ་མ་ཟད། རྒྱལ་སྤྱིའི་ཉེས་ཡངས་ཚོགས་པས་ཕྱི་ལོ་ ༢༠༠༩ ལོར་ལྕམ་ཨང་སན་སུའུ་སྐྱིད་ལགས་སུ་ཕུལ་བའི་དཔྱོད་ཤེས་ཀྱི་བཙོན་པ་ཞེས་པའི་གཟེངས་རྟགས་ཕྱིར་བསྡུ་བྱས་ཡོད་པ་དང་། འཛམ་གླིང་གི་ཚད་མཐོ་ཤོས་ཀྱི་གཟེངས་རྟགས་སུ་ངོས་འཛིན་བྱེད་བཞིན་པའི་ནོར་སྦེལ་ཞི་བདེའི་གཟེངས་རྟགས་དང་ཨ་རིའི་གྲོས་ཚོགས་ཀྱི་གཟེངས་རྟགས་སོགས་ཀྱང་ཕྱིར་བསྡུ་དགོས་པའི་འབོད་སྐུལ་བྱས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
