ཤྲི་ལངྒའི་རྒྱལ་སའི་ནང་ཨེ་ཤ་ཡའི་ནང་པའི་ཞི་བདེ་ཆོས་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༣ པའི་ཐོག་རྒྱ་ནག་གཞུང་གིས་༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཡང་སྲིད་འོས་མི་འདེམས་སྒྲུག་དང་ངོས་འཛིན་བྱས་ཚེ་བོད་མི་ཚོས་གཏན་ནས་ངོས་ལེན་བྱ་རྒྱུ་མེད་པ་དང་དུས་རབས་བརྒྱད་ཙམ་འགོར་ཟིན་པའི་བོད་མིའི་ཐུན་མོང་མ་ཡིན་པའི་སྲོལ་རྒྱུན་གྱི་འགྲོ་ལུགས་ཐོག་ནས་༧གོང་ས་མཆོག་གི་སྐུའི་ཡང་སྲིད་འཚོལ་བ་དང་ངོས་འཛིན་ཞུ་དགོས་པ་སོགས་ཀྱི་གྲོས་ཆོད་བཞག་འདུག
བོད་མིའི་སྒྲིག་འཛུགས་ཀྱི་དབྱིན་ཡིག་དྲ་བས་དེ་རིང་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༡ ཚེས་ ༡༤ ཉིན་ཤྲི་ལངྒའི་ནང་འཚོགས་པའི་ཨེ་ཤ་ཡའི་ནང་པའི་ཞི་བདེ་ཆོས་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༣ པའི་ཐོག ༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཕེབས་ཕྱོགས་དང་འབྲེལ་བའི་དོན་ཚན་གསུམ་ཅན་གྱི་གྲོས་ཆོད་ཅིག་བཞག་འདུག་ཡོད་ལ། ལྷན་ཚོགས་ཐོག་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཕྱག་བསྟར་ངེས་སྟོན་པ་དང་། དགའ་ལྡན་ཁྲི་ཐོག་ཁང་གི་དྲུང་ཆེ་གཅིག་ལྕོགས་ཤར་རྩེའི་མཁན་ཟུར་བྱང་ཆུབ་ཆོས་ལྡན་མཆོག་རྣམ་གཉིས་དྲ་ལམ་ནས་མཉམ་ཞུགས་གནང་སྟེ། ཆོས་རིག་བཀའ་བློན་མཆོག་ནས་༧སྐུའི་ཡང་སྲིད་སྐོར་དང་བོད་ནང་གི་ཛ་དྲག་གནས་སྟངས་སོགས་ཀྱི་ཐོག་གསུང་བཤད་གནང་ཡོད་འདུག
ཨེ་ཤ་ཡའི་ནང་པའི་རྒྱལ་ཁབ་ ༢༥ ཡི་འཐུས་མི་ཡོད་པའི་ཚོགས་ཆེན་དེའི་ཐོག གྲོས་ཆོད་དོན་ཚན་ཆེན་པོ་ ༡༨ བཞག་ཡོད་པ་དང་། དེའི་ཁྲོད་ཀྱི་གཅིག་ནི་༧གོང་ས་མཆོག་གི་༧སྐུའི་ཡང་སྲིད་དང་འབྲེལ་བའི་གྲོས་ཆོད་ཡིན་པ་དེར་ནང་གསེས་དོན་ཚན་གསུམ་ཡོད་པའི་ནང་དང་པོའི་ནི། དགའ་ལྡན་ཕོ་བྲང་སྒྲིག་འཛུགས་དང་༧གོང་ས་མཆོག་གི་སྐུའི་ཡང་སྲིད་དེ་བཞིན་མུ་མཐུད་གནས་རྒྱུ་དང་། གཉིས་པ་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ཇི་ལྟར་ཕེབས་ཕྱོགས་ཀྱི་སྐུ་དབང་༧གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་མཆོག་ཁོ་ནར་ཡོད་པ་དང་། བོད་མི་ཚོས་རྒྱ་ནག་གཞུང་གིས་ཡང་སྲིད་འོས་མི་འདེམས་སྒྲུག་དང་ངོས་འཛིན་བྱས་པའི་ཡང་སྲིད་ལ་ངོས་ལེན་ནམ་ཡང་མི་བྱ་རྒྱུ། དེ་བཞིན་དོན་ཚན་གསུམ་པ་དུས་རབས་བརྒྱད་ཙམ་འགོར་ཡོད་པའི་བོད་མིའི་ཐུན་མོང་མ་ཡིན་པའི་སྲོལ་རྒྱུན་གྱི་འགྲོ་ལུགས་ཐོག་ནས་༧གོང་ས་མཆོག་གི་སྐུའི་ཡང་སྲིད་འཚོལ་བ་དང་ངོས་འཛིན་བྱེད་དགོས་པ་བཅས་བཀོད་འདུག
ཨེ་ཤ་ཡའི་ནང་པའི་ཞི་བདེ་ཆོས་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༣ ཐོག བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ནས་དྲ་ལམ་བརྒྱུད་མཉམ་ཞུགས་གནང་སྟེ། ༧གོང་ས་མཆོག་གི་སྐུའི་ཡང་སྲིད་དང་འབྲེལ་ནས་འདས་ལོའི་བོད་ཀྱི་ཆོས་བརྒྱུད་ཁག་གི་བླ་ཆེན་རྣམ་པ་དང་། ཚོགས་ཞུགས་སྐུ་ཚབ་ཡོངས་ནས་སྤྱི་མོས་ཀྱིས་གཏན་ལ་ཕབ་པའི་གྲོས་ཆོད་ཁག་སྙན་སྒྲོན་ཞུས་ཡོད་པ་མ་ཟད། ཡང་སྲིད་ཀྱི་གནད་དོན་སོགས་ཀྱི་གཙོས་བོད་ནང་གི་ཆོས་དད་རང་དབང་གི་གནས་སྟངས་ཛ་དྲག་ཏུ་གྱུར་དང་འགྱུར་བཞིན་པ་ནི་བློ་འཚབ་སྐྱེ་གཞི་ཞིག་དང་། དེ་བཞིན་ཨེ་ཤ་ཡའི་ས་ཁུལ་གཞན་ཁག་གི་ཆོས་དད་རང་དབང་གི་ཆེད་དུ་རྒྱབ་སྐྱོར་དང་གྲོས་ཆོད་ཁག་འཇོག་དགོས་པའི་འབོད་སྐུལ་ཞུས་ཡོད་འདུག
འདི་ལོའི་ཕྱི་ཟླ ༡ ཚེས་ ༡༤ ཉིན། ཤྲི་ལངྒའི་རྒྱལ་སའི་ནང་ཨེ་ཤ་ཡའི་ནང་པའི་ཞི་བདེ་ཆོས་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༣ པ་དྲ་ལམ་བརྒྱུད་འཚོགས་ཡོད་པ་དང་། ཚོགས་ཆེན་གྱི་དབུ་འབྱེད་མཛད་སྒོའི་ཐོག་ཤྲི་ལངྒའི་སྲིད་འཛིན་རཱ་ཇཱཔག་སཱ་ (Gotabaya Rajapaksa)མཆོག་ཕེབས་ཡོད་འདུག་ལ། ༧གོང་ས་རྒྱལ་བ་རིན་པོ་ཆེ་མཆོག་དང་སོག་པོའི་སྲིད་བློན། ཤྲི་ལངྒའི་སྲིད་བློན་དང་གྲོས་ཚོགས་ཀྱི་ཚོགས་གཙོ་སོགས་ནས་འཚམས་འདྲི་གནང་ཡོད་འདུག ཚོགས་ཐོག་ཏུ་འཛམགླིང་ཞི་བདེ་སྐྲུན་ཐབས་དང་ཁོར་ཡུག་དང་འབྲེལ་བའི་གནད་དོན་དོན་ཁག་དང་། འཛམ་གླིང་ཁྱོན་ཡོངས་ཀྱི་ནང་པ་དབར་འདྲ་མཉམ་དང་ཆིག་སྒྲིལ་ཡོང་ཐབས་སོགས་ཀྱི་ཐོག་གོ་སྡུར་གནང་ཡོད་འདུག
གསར་འགོད་པ། ཀླུ་མགོན་ཐར།
