དྲ་ཐོག་བུན་གཡར་གྱི་ལས་གཞིའི་འོག་བོད་མི་གཉིས་ཚུད་པའི་མི་བཞི་ཡིས་གཞན་ལ་ཁྲིམས་འགལ་གནོད་སྐྱོན་བཏང་བའི་ནག་ཉེས་བཙུགས་ཏེ་འཛིན་བཟུང་བྱས་ཡོད་འདུག
རྒྱ་གར་དུས་བབ་གསར་ཁང་གིས་སྤེལ་བའི་གནས་ཚུལ་ནང་། ཉིན་ཤས་སྔོན་དེ་ཕྱི་ཟླ་ ༡ ཚེས་ ༣༠ ཉིན་རྒྱ་གར་ལྷོ་ཕྱོགས་ཧེ་ཌིར་བྷ་ཌི་གྲོང་ཁྱེར་ཉེན་རྟོག་པས། བོད་མི་གཉིས་ཚུད་པའི་མི་ ༤ འཛིན་བཟུང་བྱས་ཡོད་པ་དང་། ཁོ་ཚོས་ལས་མི་ ༢༠༠ ཙམ་གླས་ཏེ་འབྲེལ་མཐུད་ཁང་(Call center)ཞེས་པ་ཞིག་བཙུགས་ཏེ་ཁ་པར་གྱི་མཉེན་ཆས་ ༡༩ ཙམ་བརྒྱུད། དྲ་ལམ་ནས་མི་གཞན་ལ་བརྙས་བཅོས་དང་གཉའ་ཕབ་པ་སོགས་ཀྱི་ཁྲིམས་འགལ་བྱས་པའི་ནག་ཉེས་བསགས་ཡོད་སྐོར་བརྗོད་འདུག
ཧེ་ཌིར་བྷ་ཌི་གྲོང་ཁྱེར་གྱི་སྤྱི་ཁྱབ་ཉེན་རྟོག་དཔོན་ཨ་ཝི་ནཱ་ཤི་མའོ་ཧན་ཊའེ་ (Avinash Mohanty) ལགས་ཀྱིས། ང་ཚོས་བྷང་ལོར་དུ་གནས་སྡོད་པ་ནའེ་རན་ཇན་ (Niranjan Umapathi) དང་ཨའོ་ཤ (Usha)། དེ་བཞིན་བོད་མི་སྐྱབས་བཅོལ་བ་ཡེ་ཤེས་རྒྱ་མཚོ་དང་སྙིང་ལྕགས་དོན་འགྲུབ་ཞེས་པ་བཅས་འཛིན་བཟུང་བྱས་ཡོད། ཅེས་དང་། ཁོ་ཚོས་དྲ་ལམ་ནས་མི་གཞན་ལ་བུ་ལོན་གཡར་རྗེས། གཏན་འབེབ་བྱས་པའི་དུས་བཀག་ཉིན་གྲངས་ ༧ ནང་ཚུད་དུ་བུ་ལོན་སྤྲོད་མ་ཐུབ་ཚེ། བུན་གཡར་སྐབས་ཀྱི་ཐོག་མའི་ཆ་རྐྱེན་འོག་མཁོ་སྤྲོད་བྱས་པའི་མི་དེའི་གཉེན་ཉེ་འཁོར་གྱི་ཁ་པར་དང་ཡིག་ཟམ་སྟེང་། ཁ་པར་བཏང་བ་དང་ཡང་ན་འཕྲིན་ཐུང་བསྐུར་ཏེ་ངོ་ཚ་བོ་དང་། མི་ཚེར་གནོད་སྐྱོན་བཟོ་ཐབས་བྱས་ཡོད་སྐོར་བརྗོད་འདུག
ཉེན་རྟོག་ཁང་ནས་བསྒྲགས་པའི་གནས་ཚུལ་ནང་། ཁོ་ཚོ་བཞི་ཡིས་ཁྲིན་ཝའོ་ (Cheen Wu) དང་ཨན་ཌའི་ལའོ་ཝིན་ཇེ་ (Andy Lu Wenjie) ཟེར་བའི་རྒྱ་རིགས་ཚོང་པ་གཉིས་ཀྱི་ལག་འོག་ཏུ་ལས་ཀ་བྱས་ཡོད་པ་དང་། རྒྱ་རིགས་དེ་གཉིས་ཀྱིས་རྒྱ་གར་ནང་མཉམ་འདུས་ཁེ་ལས་ཁང་བཙུགས་རྗེས་ཕྱིར་རྒྱ་ནག་ལ་ལོག་ཡོད་པ་དང་། འཛིན་བཟུང་བྱས་པའི་ལས་མི་བཞི་དེར་ཟླ་རེར་ཁྱོན་ཧིན་སྒོར་འབུམ་ ༡ རེ་ཡི་གླ་ཆ་སྤྲོད་ཀྱི་ཡོད་འདུག
གཞན་ཡང་། ཟླ་སྔོན་མར་ལྷོ་ཕྱོགས་མངའ་སྡེ་ཊའེ་ལན་གྷ་ནའི་(Telangana) ནང་བུན་གཡར་གྱི་ལས་གཞི་སྤེལ་མཁན་རྒྱ་རིགས་ ༦ གཙོས་པའི་ལག་འོག་ལས་བྱེད་རྒྱ་གར་བ་སོགས་ཁྱོན་མི་གྲངས་ ༡༡ ཙམ་ཀྱིས་དྲ་ཐོག་ཁྲིམས་འགལ་གྱི་ལས་རིགས་སྤེལ་བའི་ཉེས་མིང་འཛིན་བཟུང་བྱས་ཡོད་པ་དང་། ཕྱི་ཟླ་ ༡ ཚེས་ ༨ ཉིན་རྒྱ་གར་ལྷོ་ཕྱོགས་བྷང་ལོར་གྲོང་ཁྱེར་ནང་བུན་གཡར་གྱི་ལས་གཞི་དང་འབྲེལ་ཏེ། རང་ལོ་ ༢༤ ཡིན་པའི་གཞོན་སྐྱེས་ཤིག་གིས། དུས་ཐོག་བུ་ལོན་སྤྲོད་མ་ཐུབ་པར་བརྟེན། བུ་ལོན་གཡར་མཁན་གྱི་གནོན་ཤུགས་འོག་རང་ཤི་བརྒྱབ་ཡོད་པ་དང་། ཉེ་བའི་དུས་ཡུན་ཐུང་ཐུང་ཞིག་གི་རིང་ནང་ཁྱོན་མི་ ༦ གིས་བུན་གཡར་གྱི་དཀའ་ངལ་འོག་རང་ཤི་བརྒྱབས་ཡོད་འདུག
སྤྱིར་བཏང་འཛམ་གླིང་ནང་དྲ་ཐོག་བུན་གཡར་ལས་གཞི་སྤེལ་མཁན་མང་པོ་ཡོད་པ་དང་། དྲ་ཐོག་ནས་བུ་ལོན་གཡར་ཚེ་སྐྱེད་ཀ་ཉུང་ཉུང་ཡིན་པ་མ་ཟད། དངུལ་གཡར་སྐབས་ཀྱི་བརྒྱུད་རིམ་སོགས་སྟབས་བདེ་བོ་ཡིན་པ་རེད། འོན་ཀྱང་། དྲ་རྒྱའི་རིག་གནས་དར་ཁྱབ་ཤུགས་ཆེན་འབྱུང་གི་ཡོད་པ་དང་བསྟུན། དྲ་ཐོག་བུན་གཡར་དང་འབྲེལ་མགོ་སྐོར་གཏོང་མཁན་ཡང་མང་པོ་འབྱུང་གི་ཡོད་པ་མ་ཟད། བུན་གཡར་དང་འབྲེལ་ནས་རང་སྲོག་འདོར་བ་སོགས་དོན་རྐྱེན་མང་དག་ཅིག་འབྱུང་གི་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
