ཕྱི་ལོ་ ༢༠༢༢ ལོའི་དགུན་དུས་ཨོ་རྩལ་འགྲན་ཚོགས་རྒྱ་ནག་ཏུ་འཚོག་རྒྱུ་བྱས་པའི་མཇུག་འབྲས་ཀྱི་འགན་དེ་རྒྱལ་སྤྱིའི་ཨོ་རྩལ་འགྲན་ཚོགས་ཀྱི་རྒྱུན་ལས་འགན་འཛིན་ནས་འཁུར་དགོས་པ་མ་ཟད་རྒྱལ་སྤྱིའི་རྒྱལ་ཁབ་ཁག་ནས་འགྲན་ཚོགས་དེར་རྒྱབ་སྐྱོར་དང་མཉམ་ཞུགས་གནང་རྒྱུ་མེད་པའི་འབོད་སྐུལ་བྱེད་ཀྱི་འདུག
དེ་རིང་ཕྱི་ཚེས་ ༣ ཉིན་བཞུགས་སྒར་དྷ་སའི་དབུས་གཞོན་ནུ་ལྷན་ཚོགས་ཀྱི་ཚོགས་ཁང་དུ་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ལྔའི་གོ་སྒྲིག་འོག ཕྱི་ལོ་ ༢༠༢༢ ལོའི་རྒྱ་ནག་པེ་ཅིན་གྱི་དགུན་ཁའི་ཨོ་རྩལ་འགྲན་ཚོགས་ལ་ངོ་རྒོལ་གྱི་གསར་འགོད་གསལ་བསྒྲགས་ཤིག་སྤེལ་སོང་བ་དང་སྦྲགས། མེག་གྷན་བཞི་མདོ་རུ་ངོ་རྒོལ་འགྲེམས་སྟོན་ཞིག་ཀྱང་སོང་། དེ་རིང་ནས་བཟུང་གཞུང་འབྲེལ་མིན་པའི་ཚོགས་པ་ ༡༦༠ ལྷག་གིས་རྒྱལ་ཁབ་ཁག་གི་སྲིད་གཞུང་རྣམས་ལ་ཞུ་ཡིག་ཐད་ཀར་ཕུལ་ཏེ། ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་ལ་རྒྱབ་སྐྱོར་མི་བྱེད་པ་དང་མཉམ་ཞུགས་མི་བྱེད་པའི་ཞུ་སྐུལ་བྱེད་ཀྱི་ཡོད་སྐོར་བསྒྲགས་སོང་།
ཚོགས་པ་བཞིའི་གསར་འགོད་བསྒྲགས་གཏམ་དེའི་ནང་། བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ལྔས་རྒྱལ་སྤྱིའི་ཨོ་རྩལ་འགྲན་ཚོགས་ཀྱི་ལས་འཛིན་རྣམ་པས་བསྐྱར་དུ་རྒྱ་ནག་ནང་རྒྱལ་སྤྱིའི་དགུན་ཁའི་ཨོ་རྩལ་འགྲན་ཚོགས་ཚུགས་རྒྱུའི་ཐག་གཅོད་ལ་མཐའ་གཅིག་ཏུ་ངོ་རྒོལ་གྱི་བསྒྲགས་གཏམ་སྤེལ་གྱི་ཡོད་སྐོར་དང་། རྒྱ་ནག་ལ་ཨོ་རྩལ་འགྲན་ཚོགས་སྣེ་ལེན་བྱེད་དུ་འཇུག་པ་དེ་ནི་རྒྱ་ནག་དམར་གཞུང་གི་བཙན་འོག་དུ་ཡོད་པའི་གྲངས་ཉུང་མི་རིགས་རྣམས་རྩ་གཏོར་དང་། མི་མང་སྡེབ་གསོད་ཀྱི་བྱ་སྤྱོད་ལ་བསམ་ཤེས་མ་བྱས་པ་ཞིག་དང༌། བཙན་གནོན་ཅན་གྱི་རྒྱལ་ཁབ་རྒྱ་ནག་དམར་པོའི་སྲིད་གཞུང་དེ་ཁྲིམས་མཐུན་ཞིག་ཡིན་པར་ངོས་འཛིན་བྱས་པ་དང་མཚུངས་སྐོར། དེ་བཞིན་རྒྱ་ནག་ནང་དགུན་ཁའི་ཨོ་རྩལ་འགྲན་ཚོགས་ཚུགས་རྒྱུའི་ཐག་གཅོད་བྱས་པ་དེ་ནི། རྒྱལ་སྤྱིའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གྱི་བྱ་སྤྱོད་ཅིག་ཡིན་པའི་ངོས་འཛིན་དང་། དེའི་མཇུག་འབྲས་རྒྱལ་སྤྱིའི་ཨོ་རྩལ་འགྲན་ཚོགས་ཀྱི་རྒྱུན་ལས་འགན་འཛིན་ནས་འགན་འཁུར་དགོས་པ་སོགས་བཀོད་འདུག
ཡང་བསྒྲགས་གཏམ་ནང་། རྒྱ་ནག་གི་མགོ་ཁྲིད་ཞི་ཅིང་ཕིན་གྱིས་བོད་ཙམ་མ་ཟད་རྒྱལ་ཁབ་གཞན་གྱི་ནང་བཙན་འཛུལ་དང་རྒྱ་སྐྱེད་བྱ་ཆེད། བོད་ཀྱི་གཙོས་རྒྱ་ནག་རྒྱལ་ཡོངས་སུ་འགྲོ་བ་མིའི་ཐོབ་ཐང་དང་། རང་དབང་དོན་གཉེར་བ་རྣམས་ལ་སྔར་ལས་དྲག་གནོན་ཇེ་ཆེར་གཏོང་གི་ཡོད་པ་མ་ཟད། ཡུ་གུར་དང༌། ཤར་ཏུར་ཀི་སི་ཐན་གྱི་མི་སེར་ས་ཡ་ ༡།༨ ནས་ས་ཡ་ ༣ ཙམ་ལ་སློབ་གསོའི་མིང་ཐོག་ནས་ཉེས་མེད་བཀག་ཉར་བྱས་ཏེ་མི་སྤྱོད་ལས་འདས་པའི་སྡུག་སྦྱོང་མྱངས་དང་མྱོང་བཞིན་པ། ཧོང་ཀོང་དུ་རྒྱལ་ཁབ་བདེ་འཇགས་ཀྱི་ཁྲིམས་ཟེར་བའི་འོག་འགྲོ་བ་མིའི་ཐོབ་ཐང་རྩོད་ལེན་པ་དང༌། ཤེས་ཡོན་ཅན་རྣམས་ལ་དྲག་གནོན་དང་འཛིན་བཟུང་བྱེད་པ། ལྷོ་སོག་པོའི་མི་རིགས་ཀྱི་སྐད་དང་རིག་གཞུང་རྩ་མེད་བཟོ་བཞིན་པ། ཐའེ་ཝན་ལ་ས་མཚམས་ཀྱི་དཀའ་རྙོག་སློང་བ་དང་དྲག་དམག་སྤྱོད་རྒྱུའི་འཇིགས་སྐུལ་བྱེད་པ། རྒྱ་ནག་དམར་གཞུང་གི་དབང་འོག་ཏུ་ཡོད་པའི་ཁྲིམས་རྩོད་པ་དང༌། དམངས་གཙོ་དོན་གཉེར་བ། རྩ་རླུང་སྒོམ་སྒྲུབ་པ་དང་བུད་མེད་ཐོབ་ཐང་རྩོད་ལེན་པ་རྣམས་དམར་པོའི་སྲིད་གཞུང་ལ་ཉེན་ཁ་ཞིག་ཏུ་མཐོང་སྟེ། འཇིགས་སྐུལ་དང་བཙོན་འཇུག གར་སོང་ཆ་མེད་དུ་འགྱུར་བཞིན་ཡོད་པའི་གནས་ཚུལ་རྣམས་རྒྱལ་སྤྱིའི་ཨོ་རྩལ་ཚོགས་པར་གསལ་སྟོན་བྱས་ཀྱང༌། ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་རྒྱ་ནག་ལ་སྤྲད་པ་ཕྱིར་འཐེན་མ་བྱས་ཚེ། རྒྱ་གཞུང་གི་ཆབ་སྲིད་ལངས་ཕྱོགས་ཀྱི་འགན་འཁྲི་ཨོ་རྩལ་འགྲན་ཚོགས་ཀྱི་ད་ལྟའི་ལས་འཛིན་རྣམ་པར་ཡོད་པས་ཉེས་འཛུགས་བྱ་རྒྱུ་ཡིན་སྐོར་བཀོད་འདུག
རྒྱལ་སྤྱིའི་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས། ཕྱི་ལོ་ ༢༠༢༠ ཟླ་ ༩ པའི་ནང་ཨོ་རྩལ་འགན་འཛིན་ལྷན་ཚོགས་ཀྱི་ཚོགས་འདུ་དང་སྟབས་བསྟུན། རྒྱལ་སྤྱིའི་ཚོགས་པ་ ༡༦༠ ལྷག་གིས་མཉམ་འབྲེལ་བྱས་ཏེ་ཞུ་ཡིག་ཞིག་ཕུལ་ཡོད་པ་དང་། འགན་འཛིན་ལྷན་ཚོགས་དང་མཉམ་དུ་ཐད་ཀར་ཚོགས་འདུ་ཞིག་ཀྱང་འཚོགས་ཡོད་པ་རེད། ཚོགས་འདུ་དེ་བརྒྱུད་ད་ལྟའི་བོད་ནང་དང་ཡུ་གུར། དེ་བཞིན་ཧོང་ཀོང་སོགས་སྤྱི་ཡོངས་ཀྱི་དཀའ་ངལ་དང་། ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་དེ་པེ་ཅིན་ནས་ཕྱིར་འཐེན་བྱས་ཏེ་རྒྱལ་ཁབ་གཞན་ཞིག་ཏུ་འཚོག་དགོས་པ་ཞུས་ཡོད་ནའང་། ཨོ་རྩལ་འགྲན་ཚོགས་ཀྱིས་ཞུ་ཡིག་དེ་སྣང་མེད་དུ་བཞག་པ་མ་ཟད། རྒྱ་ནག་གཞུང་དང་ལག་འབྲེལ་བྱས་ཏེ་མི་རིགས་རྩ་མེད་གཏོང་བའི་སྲིད་ཇུས་ལ་རྒྱབ་སྐྱོར་བྱས་པ་ནི་ངོས་ལེན་བྱེད་ཐབས་མེད་པ་ཞིག་ཡིན་སྟབས། དེ་རིང་ནས་འཛམ་གླིང་གི་རྒྱལ་ཁབ་ཁག་གི་སྲིད་གཞུང་ཁག་ལ་ཞུ་ཡིག་ཐད་ཀར་ཕུལ་ཏེ། ཐེངས་འདིའི་ཨོ་རྩལ་འགན་འཛིན་ལྷན་ཚོགས་ལ་རྒྱབ་སྐྱོར་མི་བྱེད་པ་དང་མཉམ་ཞུགས་མི་བྱེད་པའི་ཞུ་སྐུལ་བྱེད་ཀྱི་ཡོད་སྐོར་འགྲེལ་བརྗོད་བྱས་སོང་།
དེའི་རྗེས་གསར་འགོད་པས་ཕྱི་ལོ་ ༢༠༢༠ ནང་ཨོ་རྩལ་འགན་འཛིན་ལྷན་ཚོགས་ལ་ཞུ་གཏུག་གི་ལས་འགུལ་སྤེལ་བར་གྲུབ་འབྲས་གང་ཐོན་ཡོད་མེད་དྲིས་པར་རྡོ་རྗེ་ཚེ་བརྟན་ལགས་ཀྱིས། ཕྱི་ལོ་ ༢༠༢༠ ལོའི་ཟླ་ ༩ པའི་ངོ་རྒོལ་གྱི་ལས་འགུལ་དེའི་ནང་བོད་དང་ཐའེ་ཝན། ཧོང་ཀོང་དང་ཡུ་གུར་སོགས་ཚོགས་པ་ ༡༦༠ ལྷག་གིས་མཉམ་འབྲེལ་བྱས་ཏེ་ཨོ་རྩལ་འགན་འཛིན་ལྷན་ཚོགས་ལ་ཞུ་ཡིག་ཕུལ་ཡོད་པར་བརྟེན། ཞུ་ཡིག་དེར་ནུས་པ་མ་འདྲ་བ་ཞིག་བྱུང་ཡོད་པ་དང་། ཕྱི་ཟླ་ ༡༠ པའི་ནང་ཨོ་རྩལ་འགན་འཛིན་ལྷན་ཚོགས་དང་མཉམ་དུ་ཐད་ཀར་ཚོགས་འདུ་ཞིག་འཚོགས་ཐུབ་པ་བྱུང་ཡོད་སྐོར་དང་། འགན་འཛིན་ལྷན་ཚོགས་ཀྱིས་ཞུ་ཡིག་ལ་སྣང་འཇོག་བྱས་མེད་ནའང་། ཕྱོགས་གཞན་ཞིག་ནས་འགན་འཛིན་ལྷན་ཚོགས་ལ་གནོན་ཤུགས་ཆེན་པོ་ཞིག་སླེབས་ཡོད་སྐོར། དེ་བཞིན་ཟླ་ཤས་གོང་དུ་འགན་འཛིན་ཐོ་མ་སི་བྷག་ (Thomas Bach) སྒེར་གྱིས་ཨོ་རྩལ་ལ་ངོ་རྒོལ་བྱས་ན་ཡག་པོ་མིན་ཚུལ་གྱི་རྩོམ་ཡིག་ཞིག་ཀྱང་སྤེལ་དགོས་བྱུང་ཡོད་པ་མ་ཟད། ཨ་རི་དང་དབྱིན་ཡུལ་སོགས་ཀྱི་གྲོས་ཚོགས་འཐུས་མི་མང་པོ་ཞིག་གིས་ཨོ་རྩལ་འགན་འཛིན་ལྷན་ཚོགས་ལ་ངོ་རྒོལ་བྱེད་དགོས་པའི་གྲོས་འཆར་ཞིག་བསླེབ་ཀྱི་ཡོད་སྐོར་དང་། འཛམ་གླིང་གི་སྲིད་གཞུང་ཁག་གིས་ཕྱི་ལོ་ ༡༩༣༦ ལོར་འཇར་མན་གྱི་ཨོ་རྩལ་རྩེད་འགྲན་གྱི་ཐོག་ནཱ་ཛི་ཡིས་ཇེའུ་མི་རིགས་རྩ་མེད་གཏོང་བཞིན་པའི་རྣམ་པ་བསྟན་པ་ལྟ་བུ་ཞིག་ཐེངས་འདིར་སྟོན་ཐུབ་དགོས་སྐོར་བརྗོད་བྱུང་།
ཁ་སང་ཕྱི་ཚེས་ ༢ ཉིན། ཨ་རིའི་གྲོས་ཚོགས་གོང་མའི་འཐུས་མི་རིག་སི་ཀོ་ཊི་ (Rick Scott) ལགས་ཀྱིས་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་དེ་འགྲོ་བ་མིའི་ཐོབ་ཐང་ལ་ངོ་འཛིན་དང་གུས་བརྩི་བྱེད་མཁན་གྱི་རྒྱལ་ཁབ་ཞིག་གིས་གོ་སྒྲིག་བྱེད་དགོས་པ་དང་། རྒྱ་ནག་གཞུང་གིས་བོད་དང་ཡུ་གུར། ཧོང་ཀོང་སོགས་ཀྱི་ནང་འགྲོ་བ་མིའི་ཐོབ་ཐང་རྡོག་རོལ་དང་ཆོས་དད་རང་དབང་སྤྲོད་ཀྱི་མེད་པ་སོགས་ལ་བརྟེན། རྒྱལ་སྤྱིའི་ཨོ་རྩལ་འགན་འཛིན་ལྷན་ཚོགས་ཀྱིས་ཕྱི་ལོ་ ༢༠༢༢ ལོའི་དགུན་ཁའི་རྩེད་འགྲན་གྱི་གོ་སྒྲིག་བྱེད་མཁན་བསྐྱར་དུ་འདེམས་སྒྲུག་བྱེད་དགོས་པའི་གྲོས་འཆར་བཏོན་ཡོད་འདུག
གསར་འགོད་པ། ཀླུ་མགོན་ཐར།
