མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཁང་ནས་འབར་མའི་དམག་གཞུང་ལ་རྒོལ་གཏམ་སྒྲོག་རྩིས་བྱས་པར་རྒྱ་ནག་གིས་རྒྱལ་ཚོགས་ཀྱི་གཏན་འཇགས་ཚོགས་མིའི་དབང་ཆ་སྤྱད་དེ་རྒོལ་གཏམ་མཚམས་འཇོག་བྱེད་དུ་བཅུག་ཡོད་པ་རེད།
དེ་རིང་རྒྱལ་སྤྱིའི་གསར་ལམ་ཁག་ཏུ་སྤེལ་བའི་གནས་ཚུལ་ལྟར་ན། ཉེ་སྔོན་འབར་མའི་དྲག་དམག་སྲིད་གཞུང་གིས། ལྕམ་ཨང་སན་སུའུ་སྐྱིད་ལགས་ཀྱིས་སྣེ་ཁྲིད་པའི་འབར་མའི་རྒྱལ་ཡོངས་དམངས་གཙོ་ཡར་ཐོན་ཚོགས་པའི་མགོ་འཁྲིད་ཁག་ཅིག་འཛིན་བཟུང་བྱས་པར་བརྟེན། འཛམ་གླིང་རྒྱལ་ཁབ་མང་པོས་འབར་མའི་དྲག་དམག་སྲིད་གཞུང་ལ་སྐྱོན་བརྗོད་ཀྱིས། འཛིན་བཟུང་བྱས་པའི་མགོ་འཁྲིད་ཚོ་འཕྲལ་དུ་ཀློད་གྲོལ་དགོས་པའི་སྐུལ་མ་གཏོང་གི་ཡོད་པ་ལྟར། ཁ་སང་མཉམ་འབྲེལ་རྒྱལ་ཚོགས་ཀྱི་བདེ་སྲུང་ལྷན་ཁང་ནས་འབར་མའི་དྲག་དམག་སྲིད་གཞུང་ལ་སྐྱོན་བརྗོད་ཀྱི་བསྒྲགས་གཏམ་ཞིག་སྤེལ་རྩིས་བྱས་པར། རྒྱ་ནག་གཞུང་གིས་རྒྱལ་ཚོགས་ཀྱི་གཏན་འཇགས་ཚོགས་མིའི་དབང་ཆ་སྤྱད་དེ་དགག་བྱ་བཏོན་པར་བརྟེན། མཉམ་འབྲེལ་རྒྱལ་ཚོགས་ངོས་ནས་འབར་མའི་དྲག་དམག་སྲིད་གཞུང་ལ་རྒོལ་གཏམ་སྤེལ་ཐུབ་མེད་པ་རེད།
དེ་འབྲེལ་ཐད་རྒྱ་ནག་གཞུང་འབྲེལ་གོ་ལའི་དུས་བབ་ཟེར་བའི་སྟེང་། ཨང་སན་སུའུ་སྐྱིད་སོགས་འཛིན་བཟུང་བྱས་པའི་གནད་དོན་དེ་ནི་འབར་མའི་གཞུང་འཛིན་བློན་ཆེན་ནང་ཁུལ་གྱི་གོ་གནས་བཅོས་སྒྱུར་བྱས་པ་ཙམ་ཡིན་སྐོར་བརྗོད་ཡོད་པ་དང་། ད་ལྟ་འབར་མའི་དྲག་དམག་སྲིད་གཞུང་གིས། དམངས་གཙོ་ཡར་ཐོན་ཚོགས་པ་དང་འབྲེལ་ནས་དམངས་གཙོའི་ལམ་ནས་འོས་འདེམས་བྱུང་བའི་གཞུང་གི་ཆབ་སྲིད་མི་སྣ་བརྒྱ་ལྷག་འཛིན་བཟུང་བྱས་ཡོད་པ་རེད།
ཡང་ཁེ་ཉིན་ཚེས་ ༡ ལ་ཨ་རིའི་སྲིད་འཛིན་རྗོ་བྷའེ་ཌན་ལགས་ཀྱིས། འབར་མའི་དྲག་དམག་སྲིད་གཞུང་གིས་དམངས་ཀྱི་མགོ་འཁྲིད་དང་གཞུང་འཛིན་པ་ཚོ་འཛིན་བཟུང་བྱས་པ་དེས་ཐད་ཀར། འབར་མའི་དམངས་གཙོའི་འཕེལ་རིམ་དང་ཁྲིམས་ཀྱི་དབང་སྒྱུར་ལ་རྒོལ་རྡུང་བཏང་ཡོད།། ཅེས་སྐྱོན་བརྗོད་བྱས་པ་མ་ཟད། ཨ་རིས་འབར་མའི་དྲག་དམག་གཞུང་དང་དེ་འབྲེལ་གྱི་མགོ་འཁྲིད་ཚོར་ཉེས་ཆད་གཅོད་རྒྱུའི་ཉེན་བརྡ་འང་བཏང་ཡོད་པ་རེད་ལ། ཨ་རིའི་གཞུང་འབྲེལ་གྱི་བསྒྲགས་གཏམ་ནང་། རྒྱལ་སྤྱིའི་ཚོགས་སྡེ་ཁག་མཉམ་འབྲེལ་གྱིས། འབར་མའི་དམག་གཞུང་ལ་གནོན་ཤུགས་སྤྲད་དེ། བཙན་འཕྲོག་བྱས་པའི་དབང་ཆ་མཚམས་འཇོག་དང་། འཛིན་བཟུང་འོག་ཡོད་པའི་མགོ་འཁྲིད་དང་ལས་འགུལ་བ་རྣམས་འཕྲལ་དུ་ཀློད་གྲོལ་ཡོང་ཐབས་བྱེད་དགོས་ཀྱི་ཡོད། ཅེས་བརྗོད་ཡོད་པ་དང་། ཕྱི་ཚེས་ ༡ ཉིན་ཡུ་རོབ་མཐུན་ཚོགས་གཙོས་འཛམ་གླིང་རྒྱལ་ཁབ་ ༢༠ ལྷག་གིས་འབར་མའི་དམག་གཞུང་ལ་སྐྱོན་བརྗོད་དང་སྦྲགས། ཨང་སན་སུའུ་སྐྱིད་གཙོས་འཛིན་བཟུང་བྱས་དམངས་ཀྱི་མགོ་འཁྲིད་ཚོ་ཀློད་གྲོལ་དགོས་པའི་སྐུལ་མ་བཏང་ཡོད་པ་རེད།
བྷི་བྷི་སིའི་གནས་ཚུལ་ལྟར་ན། ཨང་སན་སུའུ་སྐྱིད་དང་ཆབ་སྲིད་ཀྱི་མགོ་འཁྲིད་གཙོ་གྲས་ཁག་འཛིན་བཟུང་བྱས་པ་དང་། ཨང་སན་སུའུ་སྐྱིད་ཀྱིས་སྣེ་ཁྲིད་པའི་འབར་མའི་དམངས་གཙོ་ཚོགས་པས། མང་ཚོགས་ནས་དྲག་དམག་གཞུང་ལ་ངོ་རྒོལ་བྱེད་དགོས་པའི་རེ་སྐུལ་ཞུས་ཡོད་ཀྱང་། ད་ལྟ་འབར་མའི་གྲོང་ཁྱེར་ཁག་གི་སྲང་ལམ་ཡོངས་ཁུ་སིམ་མེར་སྟོང་ལྷིང་ངང་གནས་ཡོད་པ་རེད།
ལོ་བཅུའི་རྗེས་ནས་སླར་ཡང་འབར་མའི་དྲག་དམག་གིས་རྒྱལ་ཁབ་ཀྱི་དམངས་གཙོར་རྡོག་རོལ་གཏོང་གི་ཡོད་པ་དང་། དམངས་གཙོ་ཡར་ཐོན་ཚོགས་པའི་མགོ་འཁྲིད་ཁག་རྒྱལ་ཡོངས་འོས་བསྡུ་ཆེན་མོ་དང་འབྲེལ་ནས་འཛིན་བཟུང་བྱས་ཡོད་པ་ལྟར། ད་རེབ་འབར་མའི་དྲག་དམག་གིས་ཕྱི་ལོ་ ༢༠༡༦ ལོའི་ཨ་རིའི་འོས་བསྡུར་མིག་དཔེ་བལྟས་ཏེ་འོས་བསྡུའི་གྲུབ་འབྲས་དྲང་པོ་མིན་པའི་རྒྱུ་མཚན་འོག་དམངས་ཀྱི་གཞུང་མགོ་རྟིང་སློག་པ་དང་། ཡང་དཔྱད་བརྗོད་པ་ཁག་ཅིག་གིས་ཕྱི་ལོ་ ༢༠༡༡ ནས་དྲག་དམག་སྲིད་གཞུང་གིས་དབང་སྒྱུར་མཚམས་འཇོག་གིས་ཨང་སན་སུའུ་སྐྱིད་ལ་སྲིད་ཀྱི་གོ་གནས་སྤྲད་དེ། རོ་ཧིན་གྷའི་རྩོད་རྙོག་གཙོ་བྱས་པའི་འགྲོ་བ་མིའི་ཐོབ་ཐང་སོགས་ཀྱི་དཀའ་ངལ་རིགས་སེལ་ཐབས་བྱས་པ་དང་། ད་ནི་ཨང་སན་སུའུ་སྐྱིད་སོགས་དམངས་གཙོ་ཚོགས་པའི་མགོ་འཁྲིད་ཁག་དགོས་མེད་དུ་མཐོང་སྟེ་འཛིན་བཟུང་བྱས་ཡོད་སྐོར་སོགས་རྗོད་ཀྱི་འདུག
འབར་མ་གཞུང་གིས་རོ་ཧིན་གྷ་ཁ་ཆེ་གྲང་ཉུང་མི་རིགས་རྩ་སྟོང་བཟོ་ཡི་ཡོད་པའི་གནས་སྟངས་འོག ཕྱི་ལོ་ ༢༠༡༩ ལོར་རྒྱལ་ཁབ་ཀྱི་སློབ་སྟོན་པ་ཨང་སན་སུའུ་སྐྱིད་ཀྱིས་རྒྱལ་སྤྱིའི་དྲང་བདེན་ཁྲིམས་ཁང་དུ་འབར་མའི་ནང་རོ་ཧིན་གྷ་རྩ་སྟོང་བཟོ་ཐབས་བྱེད་ཀྱི་མེད་ལུགས་བརྗོད་དེ། མོས་སྣེ་ཁྲིད་པའི་འབར་མ་གཞུང་གིས་རྒྱལ་སྤྱིའི་ཁྲིམས་ཁང་གི་བཅད་ཁྲར་ངོས་ལེན་བྱས་མེད་པར་བརྟེན། ཨང་སན་སུའུ་སྐྱིད་ཀྱིས་རྒྱལ་སྤྱིའི་སྟེང་གི་རང་ཉིད་ཀྱི་མཚན་སྙན་བརླག་པ་ཙམ་མ་ཟད། མོ་དང་མོའི་གཞུང་ལ་རྒྱལ་སྤྱིའི་སྟེང་སྐྱོན་བརྗོད་ཤུགས་ཆེན་བྱས་ཡོད།
གསར་འགོད་པ། སྐལ་བཟང་སྦྱིན་པ།
