རྒྱ་གར་རྒྱལ་ཡོངས་རླུང་འཕྲིན་ཁང་གི་བོད་སྐད་སྡེ་ཚན་ནང་ལས་བྱེད་ཀྱིས་མ་འདང་བར་བརྟེན་གོང་རིམ་ནས་བཀའ་ཁྱབ་འབྱོར་ཏེ་འདས་ལོའི་ཕྱི་ཟླ་ ༡༢ ནས་བཟུང་སྒོ་བརྒྱབས་ཟིན་ཡོད་ཀྱང་བསྐྱར་དུ་སྒོ་འབྱེད་ཐུབ་པར་ཐབས་ལམ་འཚོལ་བཞིན་འདུག
རྒྱ་གར་དབུས་གཞུང་གི་ཁྱབ་ཁོངས་རྒྱ་གར་རྒྱལ་ཡོངས་རླུང་འཕྲིན་ཁང་གི་བོད་སྐད་སྡེ་ཚན་གྱི་དྲ་རྒྱ་དང་། མཉེན་ཆས། ཡུ་ཊུབ་བརྒྱུད་ལམ་བཅས་ནང་འདས་ལོའི་ཕྱི་ཟླ་ ༡༢ ནས་བཟུང་། རྒྱ་གར་གྱི་སྲིད་བློན་མུ་དྷི་མཆོག་གི་སེམས་ནང་གི་སྐད་ཆ་ (Mann Ki Baat)ཞེས་པའི་ཟླ་རེའི་གནས་ཚུལ་དེ་མ་གཏོགས་གཞན་གསར་པ་གཅིག་རྐྱང་སྤེལ་མི་འདུག་པས། དེ་རིང་འདི་གའི་གསར་འགོད་པས་རླུང་འཕྲིན་ཁང་དེའི་བོད་སྐད་སྡེ་ཚན་གྱི་འགན་འཛིན་བསོད་ནམས་དབྱངས་ཅན་ལགས་སུ་ཞལ་པར་བརྒྱུད་རྒྱུ་རྐྱེན་ཅི་ཡིན་སྐོར་སྐད་ཆ་དྲིས་པར་ཁོང་མོས། བོད་སྐད་སྡེ་ཚན་ནང་ལས་བྱེད་ཀྱིས་མ་འདང་བའི་རྐྱེན་གྱིས་གོང་རིམ་ནས་བཀའ་ཁྱབ་འབྱོར་བ་ལྟར། ཕྱི་ལོ་ ༢༠༢༠ ཟླ་ ༡༢ པའི་ནང་ནས་བཟུང་བོད་སྐད་སྡེ་ཚན་ཚུད་པའི་སྡེ་ཚན་ཁག་ཅིག་སྒོ་བརྒྱབས་ཟིན་ཡོད་པ་དང་། ད་ལྟའི་ཆར་བསྐྱར་དུ་སྒོ་འབྱེད་ཐུབ་པའི་ཐབས་ལམ་འཚོལ་བཞིན་ཡོད་སྐོར་བརྗོད་བྱུང་།
ཁ་སང་རྒྱ་གར་གྱི་པི་རིན་ཊི་(The Print) གསར་ཁང་གིས་སྤེལ་བའི་དེ་འབྲེལ་གནས་ཚུལ་ནང་། མིང་བརྗོད་འདོད་མེད་པའི་རྒྱ་གར་རྒྱལ་ཡོངས་རླུང་འཕྲིན་ཁང་གི་ལས་བྱེད་ཟུར་པ་ཞིག་གིས། རྒྱ་གར་རྒྱལ་ཡོངས་རླུང་འཕྲིན་ཁང་ནང་སྐད་ཡིག་སོགས་ཀྱི་ཤེས་ཚད་ལྡན་པའི་བོད་མི་ཉུང་ཤས་མ་གཏོགས་མེད་སྟབས། ཁོང་ཚོར་སྒྲིག་གཞིའི་ནང་གསལ་བའི་དུས་ཡུན་ལས་རིང་བ་ལས་ཀ་བྱེད་དུ་འཇུག་གི་ཡོད། འོན་ཀྱང་ཁོང་ཚོར་གླ་ཆ་འཕར་མ་གང་ཡང་སྤྲོད་ཀྱི་མེད་པ་རེད། དེར་བརྟེན་བོད་མི་ཚུད་པའི་སྐད་ཡིག་སྡེ་ཚན་གྱི་ལས་བྱེད་མང་པོ་རླུང་འཕྲིན་ཁང་གཡུགས་ཏེ་ལས་ཀ་གཞན་གྱི་རྗེས་སུ་སྙེག་གི་ཡོད་པ་རེད། ཅེས་བརྗོད་དེ། ད་ཐེངས་བོད་སྐད་སྡེ་ཚན་གྱི་ལས་རིམ་ཆད་དགོས་དོན་དེ་ལས་བྱེད་འདང་ངེས་མེད་པའམ་འཛིན་སྐྱོང་གི་ཆ་ནས་ཡིན་སྐོར་འགྲེལ་བརྗོད་བྱས་འདུག
ད་ལྟའི་ཆར་རྒྱ་གར་རྒྱལ་ཡོངས་རླུང་འཕྲིན་ཁང་གི་བོད་སྐད་སྡེ་ཚན་གྱི་དྲ་རྒྱའི་སྟེང་བཀོད་པའི་གསར་འགྱུར་གསར་ཤོས་ནི། ཕྱི་ལོ་ ༢༠༢༠ ཟླ་ ༡༡ ཚེས་ ༣༠ ཉིན་སྤེལ་བའི་ཁ་བྱང་ལ་ Guru Nanak Jayanti གྱིས་རྒྱལ་ཡོངས་དང་ཕྱི་རྒྱལ་དུ་སྲོལ་རྒྱུན་གྱི་སྤྲོ་སེམས་འཁོལ་བའི་རྟེན་འབྲེལ་ཞུས། ཞེས་པ་དེ་ཡིན་པ་དང་། དེ་བཞིན་བོད་སྐད་སྡེ་ཚན་གྱི་ཡུ་ཊུབ་བརྒྱུད་ལམ་སྟེང་གསར་འགྱུར་གསར་ཤོས་དེ། འདས་ལོའི་ཕྱི་ཟླ་ ༨ ཚེས་ ༩ ཉིན་སྤེལ་བ་ཞིག་རེད་འདུག
སྤྱིར་འདས་ལོའི་ཕྱི་ཟླ་ ༦ པའི་ནང་ལ་དྭགས་བོད་ཧིན་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་བྱུང་རྗེས། རྒྱ་གར་རྒྱལ་ཡོངས་རླུང་འཕྲིན་ཁང་གིས་བོད་སྐད་སྡེ་ཚན་དེ་སྔར་བས་འཐུས་སྒོ་ཚང་དུ་བཏང་སྟེ། སྔར་དང་མི་འདྲ་བར་བོད་སྐད་ཚན་པའི་ནང་རྒྱ་གར་གྱིས་བོད་ཐོག་བཞག་པའི་ཤུགས་རྐྱེན་དང་། རྒྱ་གར་ནང་ཡོད་པའི་བཙན་བྱོལ་བོད་མིའི་གནས་སྟངས། དེ་བཞིན་རྒྱ་གར་གྱི་ཕྱི་འབྲེལ་གནས་སྟངས་སོགས་ཀྱི་སྐོར་ནས་གླེང་མོལ་དང་གནས་ཚུལ་འགོད་རྒྱུ་ཡིན་སྐོར་བརྗོད་ཡོད་པ་མ་ཟད། རྒྱ་གར་གྱི་གཞུང་འབྲེལ་རིན་མེད་དྷུར་དྷར་ཤན་བརྙན་འཕྲིན་བརྒྱུད་ལམ་ (DD Freedish) ནང་བོད་སྐད་ཀྱི་རླུང་འཕྲིན་ཚན་པ་ཁ་སྣོན་བྱ་རྒྱུ་ཡིན་སྐོར་བསྒྲགས་ཡོད་པ་རེད།
པི་རིན་ཊི་གསར་ཁང་གི་གནས་ཚུལ་ལྟར་ན། རྒྱ་གར་རྒྱལ་ཡོངས་རླུང་འཕྲིན་ཁང་གི་བོད་སྐད་སྡེ་ཚན་འདི་ཐོག་མར་ཧི་མ་ལ་ཡའི་རི་བརྒྱུད་དང་འབྲས་ལྗོངས། ཨ་རུ་ན་ཅལ་ནང་གནས་སྡོད་རྒྱ་གར་མི་སེར་བོད་སྐད་ཤེས་མཁན་རྣམས་ལ་དམིགས་ཏེ། ཕྱི་ལོ་ ༡༩༥༦ ལོར་མགོ་བརྩམས་པ་ཞིག་ཡིན་ཞིང་། ཉིན་རེར་རྒྱ་གར་གྱི་ཕྱི་དྲོའི་ཆུ་ཚོད་ ༥།༤༥ ནས་ ༦།༤༥ བར་ཆུ་ཚོད་ ༡ རིང་རྒྱང་སྲིང་ཞུ་ཡི་ཡོད་ནའང་། འདས་ལོར་ཏོག་དབྱིབས་གཉན་རིམས་ཀྱི་རྐྱེན་པས་བོད་སྐད་སྡེ་ཚན་ཚུད་པའི་སྐད་ཡིག་སྡེ་ཚན་ཕལ་ཆེ་བ་གནས་སྐབས་མཚམས་འཇོག་བྱེད་དགོས་བྱུང་འདུག་ཀྱང་། གནས་སྟངས་རིམ་པས་ཡར་རྒྱས་སོང་བ་དང་བསྟུན་རྒྱང་སྲིང་ལས་རིམ་གཞན་ཁག་བསྐྱར་གསོ་བྱས་ཡོད་འདུག
འབྲེལ་ཡོད་འགན་ཁུར་ཚང་མས་ལས་དོན་མ་འགྲུབ་པ་མ་རེད་ནམ་?