ཁ་སང་ཕྱི་ཚེས་ ༤ ཉིན་དབྱིན་ཡུལ་གཞུང་གིས་ཡུལ་དེའི་ནང་རྟེན་གཞི་བྱས་པའི་རྒྱ་ནག་གོ་ལའི་བརྙན་འཕྲིན་ཁང་ (CGTN) གི་ཡུ་རོབ་ཡན་ལག་ལས་ཁུངས་ཀྱིས་ཆོག་མཆན་ལག་ཁྱེར་ཁྲིམས་འགལ་ཐོག་བེད་སྤྱོད་བཞིན་ཡོད་པ་ཤེས་རྟོགས་བྱུང་སྟེ་ནུས་མེད་དུ་བཏང་ཡོད་སྐོར་བསྒྲགས་འདུག
དེའི་ཐད་དབྱིན་གཞུང་གི་གསར་འགྱུར་དོ་དམ་ཁང་ (Ofcom) གིས་བསྒྲགས་ཡིག་ཅིག་སྤེལ་པའི་ནང་། རྒྱ་ནག་སྐར་མ་བརྒྱུད་ལམ་ (Star China Media Limited) གྱིས་རྒྱ་ནག་གོ་ལའི་བརྙན་འཕྲིན་ཁང་གི་ཆོག་མཆན་ལག་འཁྱེར་ལ་འགན་འཁུར་བྱེད་ཀྱི་ཡོད་ནའང་། རྒྱ་ནག་གོ་ལའི་བརྙན་འཕྲིན་ཁང་གི་གནས་ཚུལ་གྱི་ནང་དོན་ལ་འགན་འཁུར་བྱེད་ཀྱི་མེད་པ་མ་ཟད། རྒྱ་ནག་སྐར་མ་བརྒྱུད་ལམ་ལ་གསར་ཁང་གཞན་གྱི་ལས་དོན་ལ་འགན་འཁུར་བྱེད་པའི་ཁྲིམས་མཐུན་ཡིག་ཆ་མེད་པ་དང་། དེའི་ཆོག་མཆན་ལག་ཁྱེར་ནི་གསར་འགྱུར་འདོན་སྤེལ་གྱི་ལག་ཁྱེར་མིན་སྐོར་དང་། རྒྱ་ནག་གོ་ལའི་བརྙན་འཕྲིན་ཁང་ནི་རྒྱ་ནག་དབུས་དྲིལ་བསྒྲགས་ལས་ཁུངས་ཀྱིས་སྟངས་འཛིན་བྱེད་ཀྱི་ཡོད་སྟབས། ད་ལྟ་གསར་ཁང་དེར་ཆོག་མཆན་ཡི་གེ་སྤྲོད་ཐབས་མེད་སྐོར་བརྗོད་འདུག
དེ་བཞིན་བསྒྲགས་ཡིག་དེའི་ནང་། གསར་ཁང་ཞིག་གི་ཆོག་མཆན་ལག་ཁྱེར་ནུས་མེད་བཟོས་པ་ནི་གསར་ཁང་དེའི་སྨྲ་བརྗོད་རང་དབང་ལ་ཐེ་ཇུས་བྱས་པ་ཞིག་ཡིན་ནའང་། རྒྱ་ནག་གོ་ལའི་བརྙན་འཕྲིན་ཁང་ལ་དུས་ཚོད་འདང་ངེས་ཤིག་སྤྲད་དེ་དབྱིན་ཡུལ་གྱི་གསར་འགྱུར་དོ་དམ་གྱི་ཁྲིམས་དང་མཐུན་ཐབས་ཐེངས་མང་བྱས་པ་མ་ཟད། ཟླ་བདུན་ཙམ་གྱི་རིང་དགོས་ངེས་གྱི་གནས་ཚུལ་རྣམས་གསར་འགྱུར་དོ་དམ་ཁང་ལ་མཁོ་སྤྲོད་ཐུབ་མེད་སྐོར་དང་། འདས་ལོའི་ཕྱི་ཟླ་ ༩ ནང་རྒྱ་ནག་གོ་ལའི་བརྙན་འཕྲིན་ཁང་རང་ལ་ཆོག་མཆན་ལག་ཁྱེར་སྤྲོད་དགོས་པའི་ཞུ་ཡིག་འབྱོར་ཡོད་ནའང་། དེའི་ནང་གནས་ཚུལ་ཁ་གསལ་བཀོད་མེད་སྐོར་སོགས་བསྒྲགས་འདུག
རྒྱ་ནག་གོ་ལའི་བརྙན་འཕྲིན་གྱི་ལག་ཁྱེར་ནུས་མེད་བཟོས་པའི་གནས་ཚུལ་ཐོན་མ་ཐག རྒྱ་ནག་ཕྱི་སྲིད་ལས་ཁུངས་ཀྱིས་དབྱིན་ཡུལ་གྱི་བྷི་བྷི་སི་གསར་ཁང་གི་རྒྱ་ནག་ནང་ཏོག་དབྱིབས་གཉན་རིམས་དང་འབྲེལ་ནས་གནས་ཚུལ་རྫུན་མ་སྤེལ་ཡོད་པ་མ་ཟད། ཉེ་ལམ་ཤར་ཏུར་ཀི་སི་ཐན་ནང་གི་རྒྱ་ནག་གཞུང་གི་ཡུ་གུར་མི་རིགས་ལ་འཛིན་པའི་སྲིད་ཇུས་དང་འབྲེལ། ཡུ་གུར་བ་རྣམས་བཀག་སྐྱིལ་བྱེད་སྐབས་བུད་མེད་རྣམས་ལ་བཙན་གཡེམ་བྱེད་ཀྱི་ཡོད་པའི་གནས་ཚུལ་རྣམས་ཕྱོགས་སུ་ལྷུང་ཡོད་པའི་སྐྱོན་བརྗོད་བྱས་འདུག་ལ། གནད་དོན་དབྱེ་ཞིབ་པས་དེ་ནི་དབྱིན་གཞུང་གིས་རྒྱ་ནག་གོ་ལའི་བརྙན་འཕྲིན་གྱི་ལག་ཁྱེར་ནུས་མེད་བཟོས་པའི་ཐད། རྒྱ་ནག་གཞུང་གིས་དབྱིན་གཞུང་ལ་རྒོལ་ལན་བསློགས་པ་ཡིན་པའི་ཚོད་དཔག་བྱེད་ཀྱི་འདུག
ཡང་རྒྱ་ནག་གཞུང་འབྲེལ་དྲ་བ་གོ་ལའི་དུས་བབ་ཀྱི་སྤྱི་ཁྱབ་རྩོམ་སྒྲིག་པ་ཧོ་ཞི་ཅིན་ (Hu Xijin) གྱིས་སྒེར་གྱི་ཊི་ཝེ་ཊུར་སྟེང་། བྷི་བྷི་སི་གསར་ཁང་ནི་དབྱིན་ཡུལ་དང་ཨ་རིའི་གསང་བའི་ལས་ཁུངས་ཀྱི་ངན་བསླབ་ལ་འབྲེལ་བ་དམ་པོ་ཡོད་པའི་དོགས་པ་ཆེན་པོ་ཡོད་པ་དང་། བྷི་བྷི་སི་ནི་ནུབ་ཕྱོགས་ཀྱི་མགྲིན་ཚབ་པ་ལྟ་བུ་ཞིག་ཏུ་གྱུར་ཡོད་སྐོར་བཀོད་འདུག་ལ། རྒྱ་ནག་ཕྱི་སྲིད་མགྲིན་ཚབ་པ་ཀྲོ་ལི་ཅན་ (Zhao Lijian) གྱིས་བྷི་བྷི་གསར་ཁང་གིས་སྤེལ་བའི་ཡུ་གུར་བུད་མེད་རྣམས་ལ་བཙན་གཡེམ་བྱེད་པའི་གནས་ཚུལ་དེ་ནི་གཞི་མེད་ཞིག་ཡིན་པས། བྷི་བྷི་སི་གསར་ཁང་གསར་འགོད་རིག་པའི་ཀུན་སྤྱོད་རྣམ་བཞག་དང་ཚབས་ཆེན་འགལ་ཡོད་སྐོར་བརྗོད་ཡོད་སྟབས། བྷི་བྷི་སི་གསར་ཁང་གིས་རྒྱ་ནག་ནང་གི་དངོས་ཡོད་དང་དྲང་བདེན་གཞིར་བཞག་ཐོག་གནས་ཚུལ་སྤེལ་ཡོད་པ་དང་། ཕྱོགས་སུ་ལྷུང་བ་དང་གནས་ཚུལ་རྫུན་མ་ཡིན་པའི་སྐྱོན་བརྗོད་བྱས་ཡོད་པ་དག་ལ་ངོས་ལེན་བྱེད་ཐབས་བྲལ་སྐོར་བརྗོད་འདུག
རྒྱ་ནག་གོ་ལའི་བརྙན་འཕྲིན་ཁང་ངམ་རྒྱ་ནག་རྒྱལ་སྤྱིའི་བརྙན་འཕྲིན་ཁང་ཞེས་རྒྱ་ཡིག་ནང་མིང་གཉིས་སྤྱོད་བཞིན་ཡོད་པ་དང་། གསར་ཁང་དེ་ནི་རྒྱ་ནག་དབུས་རླུང་བརྙན་འཕྲིན་ལས་ཁུངས་ཀྱི་ཁྱབ་ཁོངས་རྒྱལ་སྤྱིའི་གསར་འགྱུར་ཚན་པ་ཞིག་ཡིན་ལ། རྒྱ་ནག་དམར་ཤོག་གི་ཆབ་སྲིད་ལངས་ཕྱོགས་སོགས་རྒྱལ་སྤྱིའི་ཐོག་ཁྱབ་བསྒྲགས་གཏོང་ཆེད་ཕྱི་ལོ་ ༡༩༩༧ ནས་ཐད་གཏོང་གི་ཚོད་ལྟའི་ལས་དོན་མགོ་བརྩམས་ཤིང་། ཕྱི་ལོ་ ༢༠༡༩ ཟླ་ ༡༠ ཚེས་ ༨ ཉིན་ཡུ་རོབ་སྡེ་ཚན་དབྱིན་ཡུལ་གྱི་རྒྱལ་ས་ལོན་ཊོན་དུ་བཙུགས་ནས་དབྱིན་སྐད་དང་ཨུ་རུ་སུའི་སྐད། སི་པིན་གྱི་སྐད། ཧྥ་རན་སིའི་སྐད། ཨ་རབ་ཀྱི་སྐད་སོགས་ཀྱི་ནང་གནས་ཚུལ་སྤེལ་བཞིན་ཡོད་འདུག
གསར་འགོད་པ། ཀླུ་མགོན་ཐར།
