ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་མཆོག་ནས་རྒྱ་ནག་གི་ཕྱི་སྲིད་བློན་ཆེན་ཡང་ཇེ་ཁྲི་ (Yang Jiechi)ལ་ཨ་རིའི་མངོན་འདོད་དང་དམངས་གཙོའི་རིན་ཐང་གི་ཐད་ལངས་ཕྱོགས་བརྟན་པོ་བཟུང་སྟེ་སྲུང་སྐྱོབ་བྱ་རྒྱུ་ཡིན་སྐོར་གསུངས་འདུག
ཁ་སང་ཕྱི་ཚེས་ ༥ ཉིན་ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken) ལགས་ཀྱིས་རྒྱ་ནག་གི་ཕྱི་སྲིད་བློན་ཆེན་ཡང་ཇེ་ཁྲི་ (Yang Jiechi) ལ་ཁ་པར་བརྒྱུད་ཨ་རིའི་སྲིད་གཞུང་གིས་བོད་དང་ཤར་ཏུར་ཀི་སི་ཐན། ཧོང་ཀོང་ནང་གི་འགྲོ་བ་མིའི་ཐོབ་ཐང་དང་དམངས་གཙོའི་རིན་ཐང་ཐད་མུ་མཐུད་ལངས་ཕྱོགས་རྒྱུན་སྐྱོང་གནང་རྒྱུ་ཡིན་སྐོར་གསུངས་ཡོད་འདུག་ལ། དྲུང་ཆེ་མཆོག་གི་སྒེར་གྱི་ཊི་ཝེ་ཊུར་ནང་། པེ་ཅིན་གྱི་མགོ་ཁྲིད་ (Yang Jiechi) ལ་སྐད་ཆ་བཤད་སྐབས། ཨ་རི་ངོས་ནས་ཨ་རིའི་མངོན་འདོད་དང་། དམངས་གཙོའི་རིན་ཐང་གི་ཐད་ལངས་ཕྱོགས་བརྟན་པོ་བཟུང་སྟེ་སྲུང་སྐྱོབ་བྱ་རྒྱུ་ཡིན་པ་དང་། རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་ལོག་སྤྱོད་བྱེད་བཞིན་པར་འགན་ལེན་དགོས་པ་ནན་ཏན་ཀྱིས་བརྗོད་ཡོད་སྐོར་བཀོད་འདུག
ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken) མཆོག་གིས་རྒྱ་ནག་གི་ཆེས་མཐོ་མགོ་ཁྲིད་ (Yang Jiechi) ལ་ཁ་པར་བརྒྱུད། ད་ལྟའི་འབར་མའི་དྲག་དམག་གིས་སྲིད་དབང་བཙན་འཕྲོག་བྱས་པའི་ཐད་སྐྱོན་བརྗོད་བྱེད་དགོས་པ་དང་། ཨ་རིའི་མནའ་འབྲེལ་རྒྱལ་ཁབ་ཁག་གིས་མཉམ་འབྲེལ་བྱས་ཏེ། ཐའེ་ཝན་མཚོ་འགག་ཚུད་པའི་རྒྱ་གར་ཞི་བདེ་རྒྱ་མཚོའི་ཁུལ་གྱི་བདེ་འཇགས་ལ་རྒྱ་ནག་གིས་འཇིགས་སྐུལ་བྱེད་བཞིན་པར་གདོང་ལེན་བྱ་རྒྱུ་ཡོད་སྐོར་སོགས་བརྗོད་ཡོད་འདུག་ལ། དེ་ནི་ཨ་རིའི་ཇོ་བྷའེ་ཌིན་སྲིད་གཞུང་གསར་པ་བསླེབས་རྗེས་ཀྱི་ཆེས་མཐོའི་དཔོན་རིགས་བར་ཕྱི་འབྲེལ་གྱི་གནད་དོན་ཐོག་ཚད་མཐོའི་འབྲེལ་མོལ་བྱུང་བ་ཐོག་མ་དེ་ཆགས་ཡོད་པ་རེད།
ཡང་ཟླ་འདིའི་ཕྱི་ཚེས་ ༢ ཉིན་ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་མཆོག་གིས་སྣེ་ཁྲིད་པའི་ཨ་རིའི་རྒྱལ་སྲིད་ལས་ཁུངས་ (State Department) ཀྱི་མགྲིན་ཚབ་པས་ཨེ་ཤ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་ལ་ཡིག་ཐོག་ནས་བཀའ་ལན་གནང་བའི་ནང་། རྒྱལ་སྲིད་དྲུང་ཆེ་མཆོག་ནས་བོད་དོན་དམིགས་བསལ་འབྲེལ་མཐུད་པ་སྐུ་ཞབས་རོ་བྷར་ཊི་ཌེ་ཊོ་རོ་སིས་ (Robert Detros) རྩ་དགོངས་ཞུས་པའི་ཚབ་ཏུ་གང་མགྱོགས་འབྲེལ་མཐུད་པ་གསར་པ་ཞིག་བསྐོ་བཞག་གནང་རྒྱུའི་ཆོད་སེམས་བརྟན་པོ་ཡོད་སྐོར་དང་། ཨ་རིའི་ངོས་ནས་བོད་ཀྱི་མིང་དོན་མཚུངས་པའི་རང་སྐྱོང་ལ་རྒྱབ་སྐྱོར་བྱེད་ཀྱི་ཡོད་པ་མ་ཟད། རྒྱ་ནག་གཞུང་ངོས་ནས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་དང་། བོད་ཀྱི་ཁོར་ཡུག བོད་ཀྱི་ཐུན་མོང་མ་ཡིན་པའི་སྐད་ཡིག་རིག་གནས་དང་བཅས་པ་ཉར་ཚགས་བྱ་རྒྱུར་བརྩི་བཀུར་ཞུ་དགོས་སྐོར་གསུངས་ཡོད་འདུག དེ་བཞིན་ཨ་རིའི་གཞུང་ངོས་ནས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་གྱི་མགོ་འཁྲིད་ཚོའི་ཐོངས་མཆན་བཀག་འགོག་དང་དཔལ་འབྱོར་ཉེས་ཆད་གཅོད་རྒྱུ་ཡིན་སྐོར་ཡང་གསུངས་ཡོད་པ་རེད།
གསར་འགོད་པ། ཀླུ་མགོན་ཐར། པ་སངས་ཚེ་རིང་།
