—གདན་ས་ཁག་ལ་ཚན་རིག་གི་འབར་རྫས་འཐོར་བ།
ཀླུ་སྨྱོན་ཧེ་རུ་ཀ
ཁ་སང་དེ་རིང་ཕྱི་སྡོད་བོད་ཀྱི་སྐྱ་བོ་ཚོ་སྲིད་སྐྱོང་གསར་རྙིང་གི་རྩོད་རྙོག་གིས་ཉིན་མཚན་དུས་དྲུག་དང་ཆུ་ཚོད་ཉི་ཤུ་རྩ་བཞིར་ཁོམ་གྱི་མེད་པ་དང་། སེར་མོ་བའི་སྡེ་ཡི་དགེ་བཤེས་མང་པོ་ཞིག་ཀྱང་ལྟ་གྲུབ་ཀྱི་རྩོད་པས་མ་ཁོམ་པར་འདུག དེ་ཡང་དགོན་པའི་ཆོས་གྲྭའི་ནང་གི་རྩོད་པ་ལྟ་བུ་སྤྱི་ཚོགས་ཆུང་ཆུང་ཞིག་གི་དཀྱིལ་འཁོར་ལས་བརྒལ་ཏེ། འཛམ་གླིང་གི་སྤྱི་ཚོགས་དྲ་རྒྱ་ཆེ་ཤོས་ངོ་དེབ་དང་སྐད་འཕྲིན་སོགས་ཀྱི་བརྒྱུད་ལམ་བེད་སྤྱད་ནས་རྩོད་གླེང་བྱེད་བཞིན་འདུག་ལ། དཔེར་ན་དགེ་བཤེས་ངག་གི་དབང་ཕྱུག་གིས་བོད་སྡོད་དགེ་རྒན་ཆེན་མོའི་མིང་འཛིན་ཐུབ་བསྟན་ཕུན་ཚོགས་ལ་མགོ་ལྕག་ཐད་གཞུ་བྱེད་པའི་ཞོར་ལ། ཕྱི་སྡོད་དགེ་བཤེས་ཆེ་གེ་མོ་དང་ལོག་སྨྲ་ཚར་གཅོད་གཉིས་ལ་འགྲམ་ལྕག་ཞོར་གཞུ་བྱེད་ཀི་ཡོད་ཟེར་བའི་རྩོད་གླེང་གི་སྒྲ་འཇུག་དེ་ཚོར་ཉན་ན་རྟོགས་ཡོང་།
ཡིན་ན་ཡང་དེ་རིང་འདིར་གླེང་བྱ་ནི་དོན་དག་དམིགས་བསལ་བ་ཞིག་སྟེ། ཉེ་ཆར་ཕྱི་ཕྱོགས་ཀྱི་དགེ་ལུགས་པའི་གདན་ས་གསུམ་གྱི་ཡ་གྱལ་འབྲས་སྤུངས་བློ་གསལ་གླིང་གི་དགེ་བཤེས་ལོག་སྨྲ་ཚར་གཅོད་ཟེར་བ་ཞིག་གིས། ལུས་སེམས་རྫས་གཅིག་པ་སྟེ་རྡོ་དང་རྡོའི་རི་མོ་བཞིན་གཅིག་འཇིག་པ་ན་གཞན་དེ་ཡང་འཇིག་པའི་ལྟ་བ་འཛིན་པའི་མུ་སྟེགས་རྒྱང་འཕེན་པའི་འདོད་ཚུལ་བཟུང་སྟེ། རྣམ་ཤེས་དང་གཟུགས་པོའི་ཕྲ་ཕུང་གཉིས་རྫས་གཅིག་ཏུ་སྒྲུབ་པའི་ཚན་རིག་པའི་འདོད་ཚུལ་དུ་མ་ཞིག་གུང་བསྒྲིགས་ནས། ནང་པའི་སྐྱེ་བ་སྔ་ཕྱི་དང་ལུས་སེམས་ཐ་དད་ཀྱི་ལྟ་གྲུབ་ལ་མངོན་སུམ་འཛེམ་མེད་དུ་རྒོལ་རྡུང་ངམ་དྲག་རྒོལ་བྱས་པ་རེད།
སྤྱིར་ན་འདས་པའི་ལོ་ངོ་བཅུ་གྲངས་ལྷག་གི་རིང་ལ་རྒྱ་གར་གྱི་དགེ་ལུགས་པའི་གདན་ས་ཁག་གཙོ་བོར་བྱས་པའི་གྲྭ་ཚང་ཁག་ཅིག་ཏུ་ཚན་རིག་གི་སློབ་སྦྱོང་བྱེད་སྲོལ་ཞིག་མགོ་བཙུགས་པ་དང་། ཚན་རིག་གི་སློབ་གཞིའི་ཁྲོད་དུ་དབང་རྩའི་ཚན་རིག་དང་དངོས་ཁམས་ཚན་རིག ཚད་རྡུལ་དངོས་ཁམས་རིག་པ་དང་སྐྱེ་དངོས་འཕེལ་འགྱུར་རིག་པ་སོགས་ཡོད་ཚོད་འདུག་ལ། ལས་འགུལ་དེའི་རླབས་རྒྱུན་འཕེལ་ཚད་མགྱོགས་སུ་ཕྱིན་པ་དེའི་འབྲས་བུར་གདན་ས་ཁག་གི་གྲྭ་བཙུན་རྣམ་པའི་ཁྲོད་དུ་ཕྱི་རོལ་པའི་རིག་གཞུང་གི་ལྟེ་བ་ཚན་རིག་སློབ་གཉེར་དེ་དགེ་བཤེས་ཀྱི་བསླབ་ཚན་ཁྲོད་དུ་ཡང་བཅུག་པ་རེད། དེ་ནི་འདས་པའི་ལོ་ངོ་ཉིས་སྟོང་དྲུག་བརྒྱའི་ནང་པ་སངས་རྒྱས་པ་ཚང་གི་ལོ་རྒྱུས་ཁྲོད་དུ་སྔར་མེད་པའི་གསར་བརྗེའམ་གུ་བཤང་ཆེན་པོ་ཞིག་རེད། འདི་ནི་ཉེན་ཁ་ཆེན་པོ་ཞིག་མིན་ན་ཡང་ཧ་ཅང་གཟབ་ནན་བྱེད་དགོས་པ་ཞིག་རེད་འདོད་དེ། མཚོ་སྔོན་ཟི་ལིང་ཕྱོགས་སུ་ཨ་རི་སོགས་ནུབ་ཕྱོགས་ནས་བསླེབས་པའི་དབྱིན་ཡིག་དགེ་རྒན་ཁག་ཅིག་གིས་དང་པོར་བོད་རིགས་ན་ཆུང་ཚོར་ཤ་ཚ་མདོག་གིས་དབྱིན་ཡིག་བསླབས། ག་ལེར་དབྱིན་ཡིག་གི་སློབ་དེབ་དེ་ཚོར་ཡང་ཡེ་ཤུའི་ཆོས་ལུགས་ཀྱི་ལྷ་སྒྲུང་སྤྲོད་ཀྱི་ཡོད་པ་དེ་དྲན་པར་གྱིས།
བདག་ལ་མཚོན་ན་ལོ་སྔོན་མར་ལོག་སྨྲ་ཚར་གཅོད་ཅེས་པ་ཞིག་གིས་བཤད་པའི་སྐྱེ་བ་སྔ་ཕྱི་མེད་པར་འདོད་པའི་གཏམ་བཤད་རེ་ཟུང་རྣ་ལམ་དུ་འོངས་མྱོང་ན་ཡང་། དེ་ནི་དུས་ངན་སྙིགས་མའི་ཐན་རྟགས་སུ་སྐྱེ་བ་སྔ་ཕྱི་གཞིར་བཞག་གི་ལྟ་གྲུབ་ཀྱིས་འཚོ་བའི་རྨང་གཞི་བྱེད་པའི་ཆོས་སྡེ་ཆེན་པོ་ཞིག་ཏུ་ལོ་དེ་སྙེད་ཅིག་ལ་འབྲས་ལྡ་ལི་ཟོས་པའི་འབྲས་རྟགས་སུ། མཐའ་མཇུག་ཏུ་སྟོན་པ་དང་རྒྱན་དྲུག་མཆོག་གཉིས་རྗེ་ཙོང་པ་ཡབ་སྲས་སོགས་ཀྱི་ལེགས་བཤད་ཡོད་ཚད་ཕན་མེད་གད་སྙིགས་ཀྱི་ཁྲོད་དུ་འཕེན་ནུས་པའི་ཧམ་པ་ཆེན་པོ་དེ་འདྲ་ཞིག་སྐྱེས་འདུག་ཨང་བསམ་པ་ཙམ་ཞིག་བྱུང་ལ། རང་ཉིད་ཀྱིས་ཁ་གཏད་ས་བོད་ནང་གི་མི་སྐྱ་ཕོ་མོ་ཡིན་པའི་སྐད་འཕྲིན་གཏམ་བཤད་རེ་ཟུང་ནང་། དེང་སང་ལས་རྒྱུ་འབྲས་དང་སྐྱེ་བ་སྔ་ཕྱི་མེད་པའི་སྨྲ་བའི་ཁྲོད་དུ་དམར་ཕྱོགས་པ་ད་ལོས་ཡོད་དེ། བླ་མ་གྲྭ་པའི་ཁྲོད་ཀྱི་ལོ་དེ་སྙེད་ཅིག་ལ་ནང་པའི་གཞུང་ཆེན་ལ་སྦྱངས་པ་མཐར་སོན་པའི་དགེ་བཤེས་ཡིན་ཟེར་མཁན་དེ་འདྲ་ཡང་འདུག་ལ། སྙིང་རྗེ་ཆེན་པོ་གཞི་རྩར་བཞག་པའི་ཐེག་པ་ཆེན་པོའི་ཆོས་ལ་བརྟེན་ནས་ལྟོ་བརྒྱགས་རྒྱབ་དྲོའི་ངང་ནས་མི་ཚེ་སྐྱེལ་བཞིན་པའི་རབ་བྱུང་གི་སྡེ་ཡི་དགེ་བཤེས་མིང་ཅན་ཁྲོད་དུ་ཡང་། མ་རྒན་དུད་འགྲོ་སྐྱབས་མེད་མགོན་མེད་འདི་ཚོའི་ཚེ་སྲོག་ཅི་འདོད་དུ་གཅོད་པར་རྗེས་སུ་ཡི་རང་གིས་སྐུལ་འདེད་བྱེད་མཁན་ཡང་འདུག་པས། དེ་དག་ལ་ཧ་ཅང་གཟབ་གཟབ་བྱེད་དགོས་ཞེས་ལན་གྲངས་དུ་མར་བརྗོད་མྱོང་ཡོད།
ད་ལྟ་དགེ་བཤེས་མིང་ཅན་ལོག་སྨྲ་ཚར་གཅོད་ཀྱི་མུ་སྟེགས་རྒྱང་འཕེན་པའི་ལྟ་བ་བརྗོད་ཤུགས་ཆེ་རུ་སོང་བས། གདན་ས་གསུམ་གཙོ་བོར་གྱུར་པའི་དགོན་སྡེ་ཁག་གི་དགེ་བཤེས་ཚོ་ཡང་ལྷིང་འཇགས་སུ་བཞུགས་བཟོད་མ་བྱུང་བར། དགེ་བཤེས་ལྔ་བརྒྱས་སྐད་འཕྲིན་ནང་དགེ་བཤེས་གླིང་ཞེས་པའི་ཚོགས་པ་བཙུགས་ནས་ལོག་སྨྲ་ཚར་གཅོད་ཀྱི་གདོང་དུ་བཞེངས་ཏེ་ཧྰུཾ་ཤི་ཕཊ་འགྱེད་ཀྱིས་རྩོད་པ་སྐྱོན་དགོས་བྱུང་འདུག ལོག་སྨྲ་ཚར་གཅོད་ཀྱིས་རང་བྱུང་བཀོད་སྒྲིག་ཅེས་པའི་ཐ་སྙད་ཅིག་བེད་སྤྱོད་བཏང་སྟེ། གཟུགས་པོས་བྱ་བ་བྱེད་པ་ཐམས་ཅད་རྡུལ་རྫས་ཀྱི་ནུས་པ་མ་གཏོགས་རྣམ་ཤེས་དང་དེས་བསྐྱེད་པའི་ལས་འབྲས་ཀྱི་བྱེད་རྩོལ་ཡིན་པར་ཁས་ལེན་མ་བྱས་པ་དང་། དེའི་རྒྱབ་རྟེན་དུ་གོང་གསལ་ཚན་རིག་གི་སྡེ་ཚན་འདྲ་མིན་ནས་བཤད་པའི་རྡུལ་རྫས་སམ་ཕྲ་ཕུང་གིས་ཇི་ལྟར་རིགས་རྒྱུན་ཕྱི་མ་བསྐྱེད་ཚུལ་དྲངས་པ་རེད།
སྤྱིར་ན་བཅོམ་ལྡན་འདས་ཀྱིས་ཤྰ་རིའི་བུ་ལྟ་བུའི་ཤེས་རབ་ཆེན་པོའི་གྲས་ཀྱིས་མ་གཏོགས་ཕྱི་རོལ་པའི་གཞུང་ལུགས་ལ་ལྟ་ཀློག་བྱེད་མི་རུང་ཚུལ་གསུངས་ཡོད་ལུགས་ཡང་ཡང་ཐོས་མོད་དེའི་ཁུངས་ངོ་མ་དེ་ད་བར་མ་མཇལ་ན་ཡང་། ད་ཐེངས་ཀྱི་དགེ་བཤེས་མིང་ཅན་ལོག་སྨྲ་གཅོད་ཟེར་བ་འདིའི་བྱེད་སྟངས་འདི་ཡིས་གོང་གི་བསླབ་བྱ་དེ་འདྲ་ཞིག་བཅོམ་ལྡན་འདས་ཀྱིས་གནང་ཡོད་པར་ཐེ་ཚོམ་མི་དགོས་པ་ཞིག་ཆགས་སོང་ལ། ཀླུ་སྒྲུབ་ཀྱིས། སྟོང་པ་ཉིད་ལ་བལྟ་ཉེས་ན།། ཤེས་རབ་ཆུང་རྣམས་ཕུང་བར་འགྱུར།། ཞེས་གསུངས་པ་ལྟར། དེང་སང་གི་གདན་ས་ཁག་ལ་མཚོན་ན། ཚན་རིག་སློབ་སྦྱོང་བྱེད་ཉེས་ན།། དགེ་བཤེས་ལ་ལ་ཕུང་བར་འགྱུར།། ཞེས་ཞུ་ཆོག་པ་ཞིག་ནི་འདུག
སྐབས་འདིར་ངས་རག་ར་ཐུབ་བསྟན་ཆོས་དར་གྱིས་བྲིས་པའི་དགེ་འདུན་ཆོས་འཕེལ་གྱི་ལོ་རྒྱུས་ལས།“ང་ཚོའི་འཛིན་གྲྭའི་ནང་རྩོད་རིག་འགྲན་ཟླ་བྲལ་བ་མང་པོ་ཡོད། དེའི་ནང་ནས་དཔེ་ཆ་བ་ཆེ་གེ་མོ་ཁོའི་རྩོད་རིག་འདྲ་བོ་ངས་མ་མཐོང་། དེ་དུས་ནི་ཁོ་རྩོད་རིག་བཟང་བ། སངས་རྒྱས་ལ་དད་པ་ཆེ་བ། སྐབས་རེ། སྟོན་པ་འཇིག་རྟེན་མིག་ནི་ཟུམ་གྱུར་ཅིང་།། དཔང་གྱུར་སྐྱེ་བོ་ཕལ་ཆེར་ཟད་པ་ན།། ཞེས་སོགས་ཟེར་ནས་མིག་ཆུ་གཏོང་ལ་ཁད་བྱེད་མཁན་ཞིག་ཡོད་པ་ལ། ཕྱིས་སུ་ཁོས་རྒྱ་སྐད་ཀྱང་བསླབས་ནས་སྟོན་པ་དང་ཆོས་ལ་ཁ་གཏོང་མཁན་ཞིག་ཆགས་འདུག་ཟེར་བས། བདེན་ན་ནི་ཡ་མཚན་རེད་ཅེས་གསུངས། ཞེས་དང་། ཡང་། ལན་ཅིག དེ་དུས་ངས་ཕྱི་རོལ་པའི་འདོད་ཚུལ་ལྟར་གྱི་ཁས་ལེན་ཁ་ཤས་གང་མཁྲེགས་མཁྲེགས་བཟུང་ནས་ལན་འདེབས་དང་རྩོད་པ་བྱེད་སྐབས། གྲོགས་པོ་དཔེ་ཆ་བ་ཁ་ཤས་ནས། དགེ་འདུན་ཆོས་འཕེལ། ཁྱོད་འདི་འདྲ་རང་མ་བྱེད་ཟེར་མཁན་བྱུང་ཡང་། ང་ཕྱི་རོལ་པ་ལ་དད་པ་མིན། ཡིན་ན་ཡང་ང་རང་རྩེད་མོ་ལ་དགའ་དྲགས་ནས་འཁྱག་འཁྱག་བྱས་པ་ཡིན། ཅེས་གསུངས། རྗེས་སུ་འབྲས་སྤུངས་སུ་བཞུགས་སྐབས། ཧོར་མི་ཚན་གྱི་དཔེ་ཆ་བ་ཞིག་ཡོད་པས། ཁོང་གིས་དགེ་ཆོས་རིན་པོ་ཆེའི་མདུན་ནས་དཔེ་འཁྲིད་ཞུས་ཏེ། ཁོང་ལ་གྲངས་ཅན་པའི་འདོད་ཚུལ་ཁས་ལེན་བཟུང་སྟངས་དང་། སྒྲུབ་ངག་ཡ་མཚན་པ་མང་པོ་ཞིག་བསླབས་གནང་ནས། ཁོང་གིས་ཀྱང་རྩོད་པའི་སྐབས་ལ་དེ་ལྟར་བྱས་པས། གདན་ས་གཞན་དང་གྲྭ་ཚང་གཞན་པའི་དཔེ་ཆ་བ་ཚོས་ཁོང་ལ་གྲངས་ཅན་མཁན་པོ་ཞེས་ཀུ་རེ་མཛད་པ་ཡོངས་གྲགས་ཡིན།” ཞེས་པ་ཞིག་ཡོད་པ་ཡང་སེམས་སུ་དྲན་ཡོང་།
ཁོ་བོས་ལོ་ངོ་ཉི་ཤུའི་སྔོན་རྒྱ་གར་གྱི་རྩ་ཁྲིམས་ཟིན་བྲིས་འགོད་པ་པོ་མཁས་དབང་བྷ་བྷ་ཨམ་བྷེ་ཀར་གྱི་མི་ཚེའི་ལོ་རྒྱུས་ཤིག་བཀླགས་པ་དང་། དེའི་ནང་དུ་ཁོང་གིས་ནང་པའི་སྐྱེ་བ་སྔ་ཕྱི་དང་ལས་རྒྱུ་འབྲས་ཀྱི་སྐོར་ལ་ཡོངས་གྲགས་ཀྱི་སངས་རྒྱས་བཅོམ་ལྡན་འདས་དང་རྒྱན་དྲུག་སོགས་ཀྱི་གསུང་དང་མི་མཐུན་པ་ཞིག་བྲིས་ཡོད་པ་རོབ་ཙམ་དྲན་ཡོང་ཞིང་། ལོག་སྨྲ་ཚར་གཅོད་ཀྱི་ལོག་བཤད་དེའི་ཁུངས་གཏུགས་ས་ཡང་ཨམ་བྷ་ཀར་གྱི་འདོད་ཚུལ་དེ་ཡིན་ལུགས་དགེ་བཤེས་གླིང་གི་དགེ་བཤེས་ཚོའི་རྩོད་གླེང་གི་ཁྲོད་དུ་རྗོད་བཞིན་འདུག ཨམ་བྷེ་ཀར་ལ་མཚོན་ན་ནང་པའི་ལྟ་གྲུབ་མཁས་པ་ཅི་ཡང་མ་ཡིན་ཞིང་། ཁོའི་མི་ཚེའི་ལོ་རྒྱུས་ཁྲོད་དུ་ཡང་ནང་པའི་ལྟ་གྲུབ་ལ་མཁས་པའི་བླ་མ་དགེ་བའི་བཤེས་གཉེན་ཚད་ལྡན་དེ་འདྲ་བསྟེན་པའི་སྐོར་ཅི་ཡང་མི་གསལ་བས། ཁོ་རང་གིས་སྟོན་པ་སངས་རྒྱས་ལ་དད་པ་ཡོད་པ་ཙམ་ཞིག་གཞིར་བཞག་གིས། ནང་པའི་ལྟ་གྲུབ་ཀུན་གྱི་རྨང་གཞི་སྐྱེ་བ་སྔ་ཕྱིའི་སྐོར་ལ་རང་བཟོའི་ལྟ་གྲུབ་བརྩམས་པ་ནི་ངོས་ལེན་རྩ་བ་ནས་བྱེད་མི་ཐུབ་པ་ཞིག་ཡིན་པ་མ་ཟད། ལོ་ངོ་སྟོང་ཕྲག་གི་སྔོན་དུ་མདོ་སྡེ་གང་ཞིག་སྟོན་པའི་བཀའ་ཡིན་མིན་བརྩད་ནས་ཉན་ཐོས་སྡེ་བ་བཅོ་བརྒྱད་དུ་གྱེས་པ་ཇི་ལྟར། ང་ཚོའི་ནང་བསྟན་བསམ་བློའི་རྨང་གཞི་ཧ་ཅང་སྐྱོ་བའི་ཆོས་སྡེ་དག་གིས་བསམ་བློ་ཞིབ་ཏུ་བཏང་ནས། བྷ་བྷ་ཨམ་བྷ་ཀར་གྱི་ལྟ་གྲུབ་ངན་པ་འདི་དང་སྐྱེ་བ་སྔ་ཕྱི་མི་འདོད་པའི་ཚན་རིག་པའི་ལྟ་གྲུབ་འདི་ཚོ་སློབ་ཚན་གྱི་ཁོངས་སུ་གདམ་གསེས་ཡང་དག་པ་ཞིག་བྱས་ནས་བཞག་ན་མ་གཏོགས། གོང་གསལ་ལྟ་གྲུབ་འདི་གཉིས་ལ་འདོར་ལེན་བྱེད་མ་ཤེས་པའི་དབང་གིས། ནང་པའི་ལྟ་གྲུབ་ལ་ཤེས་ནས་ཐོབ་པའི་ཡིད་ཆེས་བརྟན་པོ་ཞིག་མ་རྙེད་པའི་སྔ་རོལ་ཏུ་ཚན་རིག་ལ་སློབ་གཉེར་ཐན་ཐུན་རེ་བྱས་པ་དེའི་འབྲས་བུར། ལོག་སྨྲ་ཚར་གཅོད་མིང་ཅན་པ་ལྟ་བུ་ཇེ་མང་ལ་སོང་བ་ཡིན་ན། ནང་པའི་སྐྱེ་བ་སྔ་ཕྱི་དང་ལས་རྒྱུ་འབྲས་ཀྱི་ལྟ་གྲུབ་གསེར་ཞུན་བཙོ་མ་ལྟ་བུ་དཔྱད་པ་གསུམ་གྱིས་ཡང་དག་པའི་གཏན་ལ་ཕབ་པ་འདི་ཉིད་ཀྱང་ཚོང་འདུས་ཀྱི་འོ་མ་ལྟ་བུར་བསྒྱུར་མི་སྲིད་པ་ཞིག་མ་རེད་སྙམ་སྟེ། དཔྱོད་ལྡན་རྣམས་ཀྱིས་ཞིབ་མོའི་བློ་ཡིས་དཔྱད་པར་འཚལ་ལོ།།
ཁ་ཤས་ཀྱིས་འོ་ན་ཁྱོད་ཀྱིས་གདན་ས་ཁག་ཏུ་ཚན་རིག་ལ་སློབ་གཉེར་བྱེད་པ་འདིར་དགག་པ་རྒྱག་གི་ཡོད་དམ་ཟེར་ན། དེ་འདྲ་མ་ཡིན་པར་ལུས་ལ་ཆོས་གོས་རྣམ་གསུམ་གྱོན། ལག་ཏུ་དགེ་བཤེས་ཀྱི་ལག་ཁྱེར་བཟུང་སྟེ་ཚན་རིག་པའི་ལྟ་གྲུབ་ཁྱེར་ཡོང་ནས་ནང་པའི་ལྟ་གྲུབ་ལ་དགག་པ་བརྒྱབ་ན་བསམ་བློའི་ན་སོ་མ་སྨིན་པ་མང་པོ་ཞིག་ལོག་ལམ་དུ་འཁྲིད་པའི་ཉེན་ཁ་འདུག་ཅེས་པ་དང་། དེ་ནི་ལོ་བཅུ་གྲངས་སྔོན་བོད་ནང་དུ་ཞོགས་དུང་སོགས་ཀྱིས་གསར་བརྗེའི་ལས་འགུལ་བསླངས་པ་ལ་བརྟེན་ནས་ཐང་ཀ་མེ་རུ་འབུད་མཁན་དང་བསང་ཁྲི་རྡུལ་དུ་བཤིག་མཁན་བྱུང་བ་དེ་འདྲ་ང་ཚོའི་སྤྱི་ཚོགས་སུ་འབྱུང་མགོ་རྩོམ་བཞིན་འདུག་སྙམ་པའི་སེམས་ཁྲལ་ཞིག་གིས་ལགས་སོ།།
རི་བོང་གི་མགོ་ལ་རི་ལུག་པའི་སེམས་ཁྲལ་ལས་མ་འདས་སོ། །
དཔེ་ཡག་པོ་གསུང་འདུག གོ་རྒྱུ་ཟབ་མོ་འདུག།
དགའ་མོ་གསུངས་འདུག ཡི་རང་ཞུ།
རི་བོང་གནམ་རྡིབ།