ལྷ་ས་གྲོང་ཁྱེར་ནང་བསྟན་མཐུན་ཚོགས་ཀྱིས་རིམས་ནད་སྔོན་འགོག་དང་འབྲེལ་ལོ་གསར་སྐབས་རྒྱལ་ས་ལྷ་སའི་ཉེ་འཁྲིས་ཀྱི་དགོན་སྡེ་ཁག་གི་ཆོས་ལུགས་ཀྱི་བྱེད་སྒོ་རིགས་སྤེལ་མི་ཆོག་པའི་བཀའ་བཏང་འདུག
དེ་རིང་ཕྱི་ཚེས་ ༩ ཉིན་གཙུག་ལག་ཁང་དོ་དམ་ཨུ་ཡོན་ལྷན་ཁང་ཟེར་བ་དེས་བརྡ་ཐོ་ཞིག་སྤེལ་ཏེ། ཉེ་སྔོན་ལྷ་ས་གྲོང་ཁྱེར་ནང་བསྟན་མཐུན་ཚོགས་གྱི་ཏོག་དབྱིབས་སྔོན་འགོག་གི་གྲོས་ཆོད་ལྟར། ཕྱི་ཟླ་ ༢ ཚེས་ ༡༠ ནས་ ༡༡ དང་། བོད་ཚེས་ ༢༩ དང་ ༣༠ ཉིན་ལ་གཙུག་ལག་ཁང་དུ་གཙང་སྦྲ་ཡིན་པས་མཆོད་མཇལ་མེད་པ་དང་། ལོ་སར་ཚེས་ ༡ ནས་༦ བར་ལོ་སར་གྱི་ངལ་གསོ་ཡིན་པས་མཆོད་མཇལ་མེད་སྐོར་བསྒྲགས་འདུག
ལྷ་ས་གྲོང་ཁྱེར་ནང་བསྟན་མཐུན་ཚོགས་ཟེར་བ་དེས་བཞག་པའི་ཏོག་དབྱིབས་སྔོན་འགོག་དང་འབྲེལ་བའི་གྲོས་ཆོད་ནང་དུ། ཕྱི་ལོ་ ༢༠༢༡ ལོའི་བོད་ཀྱི་ལོ་སར་སྐབས། སེ་ར་དགོན་པའི་ཕུར་མཇལ་དང་ཚུར་ཕུ་སྒར་ཆེན་དགུ་གཏོར། ར་མོ་ཆེ་དང་གཙུག་ལག་ཁང་གི་ལོ་སར་ཚེས་གཅིག་གི་མཆོད་མཇལ། དེ་བཞིན འབྲས་སྤུངས་དགོན་པའི་གནས་ཆུང་ལྷ་གསོལ་དང་ལྷུན་གྲུབ་རྫོང་གི་ཤར་བུམ་པའི་བཅོ་ལྔའི་དུས་ཆེན། རཱ་སྒྲེང་དགོན་པའི་མཆོད་པ། དགའ་ལྡན་སྟག་རྩེ་སྒྲུབ་མཆོད་སོགས་བོད་བརྒྱུད་ནང་བསྟན་གྱི་རྒྱུན་ལྡན་ཆོས་ལུགས་ཀྱི་བྱེད་སྒོ་ཆེ་ཁག་རིགས་སྤེལ་མི་ཆོག་སྐོར་བརྗོད་ཡོད་འདུག
ལོ་སར་ཚེས་གཅིག་ཉིན་ལྷ་སའི་སེར་སྐྱ་མི་མང་གིས་སྔ་བོ་ནས་བང་རིང་པོ་བསྒྲིགས་ཏེ། ལྷ་ལྡན་གཙུག་ལག་ཁང་སོགས་སུ་མཆོད་མཇལ་དང་ཕྱག་སྐོར་གནང་བ་ནི་རྒྱུན་ལྡན་གྱི་བྱེད་སྒོ་ཞིག་ཆགས་ཡོད་ཀྱང་། ལོ་ལྟར་རྒྱ་ནག་གཞུང་ནས་ལྷ་ལྡན་གཙུག་ལག་ཁང་དང་དགོན་སྡེ་ཁག་ནང་དམག་མི་འགྲེམ་འཇོག་བྱས་ཏེ་དོགས་ཟོན་ནན་པོ་བྱེད་བཞིན་ཡོད་པ་རེད། ད་ལོར་ཏོག་དབྱིབས་གཉན་རིམས་འགོས་ཁྱབ་སྔོན་འགོག་དགོས་སྐོར་བརྗོད་དེ། བདུན་ཕྲག་གཅིག་ལྷག་རིང་མཆོད་མཇལ་རིགས་མཚམས་འཇོག་པའི་བཀའ་ཁྱབ་བཏང་ཡོད་འདུག
གསར་འགོད་པ། སྐལ་བཟང་སྦྱིན་པ།
