བོད་སར་འབྲེལ་བའི་མངའ་སྡེའི་བློན་ཆེན་རྣམ་པར་ཞུ་ཡིག་འབུལ་དགོས་པའི་རེ་སྐུལ་གནང་འདུག

བསྟན་འཛིན་བརྩོན་འགྲུས་ལགས་ནས་བོད་དང་ས་འབྲེལ་ཡིན་པའི་རྒྱ་གར་གྱི་བྱང་ཕྱོགས་མངའ་སྡེའི་སྤྱི་ཁྱབ་བློན་ཆེན་རྣམས་ཀྱིས་རང་གི་མངའ་སྡེ་དེ་བོད་དང་ས་འབྲེལ་ཡིན་པ་ལས་རྒྱ་ནག་དང་འབྲེལ་བ་མེད་པའི་གསལ་བསྒྲགས་གནང་རྒྱུར་བོད་མི་ཚོས་འབོད་སྐུལ་ཞུ་དགོས་པའི་སྐུལ་མ་གནང་འདུག

དེ་རིང་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱི་བོད་རང་བཙན་ཆེད་ཁེར་རྐྱང་གི་གོམ་བགྲོད་ལས་འགུལ་དེ། བཞུགས་སྒར་དྷ་ས་དང་རྒྱང་ཐག་སྤྱི་ལེ་ ༩༠ མ་ཟིན་ཙམ་གྱི་མཚམས་སུ་ཡོད་པའི་ཨུ་ནཱ་རྫོང་གི་(Una)ཨམ་བྷི་(Amb) ཞེས་པའི་གྲོང་རྡལ་དུ་འབྱོར་ཡོད་ཅིང། གོམ་བགྲོད་ཀྱི་རེ་འདུན་བཞིན་བོད་མི་གང་མང་མང་གིས་བོད་དང་ས་འབྲེལ་ཆགས་པའི་རྒྱ་གར་གྱི་བྱང་ཕྱོགས་མངའ་སྡེའི་སྤྱི་ཁྱབ་བློན་ཆེན་རྣམས་ལ་ཞུ་ཡིག་སོགས་བཏང་སྟེ། སྤྱི་ཁྱབ་བློན་ཆེན་རྣམས་ཀྱིས་རང་གི་མངའ་སྡེ་དེ་ཉིད་བོད་དང་ས་འབྲེལ་ཡིན་པ་ལས་རྒྱ་ནག་དང་ས་འབྲེལ་མིན་པའི་ཡོངས་ཁྱབ་གསལ་བསྒྲགས་གནང་རྒྱུའི་རེ་སྐུལ་ཞུ་དགོས་སྐོར་བརྗོད་བྱུང་ལ། གོམ་བགྲོད་ལས་འགུལ་དང་སྦྲགས་དྲ་ལམ་https://www.ipetitions.com/petition/support-tenzin-tsundue-stand-up-for-tibet?fbclid=IwAR1qeYMM8SdquUvfpqNS3uESKvL8RQSDG6a4JMwQk6q-l039eDNEhSoGm68ནས་རྒྱབ་སྐྱོར་གྱི་མཚན་རྟགས་བསྡུ་རུབ་ཅིག་ཀྱང་གནང་གི་འདུག

བསྟན་འཛིན་བརྩོན་འགྲུས་ལགས་ཀྱིས་ཞལ་པར་བརྒྱུད་འདི་གའི་གསར་འགོད་པར། སྤྱིར་ད་ལྟའི་ཆར་གོམ་བགྲོད་ལས་འགུལ་རིང་དཀའ་ངལ་དམིགས་བསལ་གང་ཡང་བྱུང་མ་སོང་། བློ་འཚབ་ཡོང་གཞི་དེ་ངས་བོད་པའི་སྤྱི་ཚོགས་ནང་ལས་འགུལ་འདིར་རྒྱབ་སྐྱོར་གྱི་རྣམ་པའི་ཐོག་ནས་སོ་སོའི་ངོས་ནས་ལས་འགུལ་སྤེལ་རྒྱུའི་དོན་ཚན་སྣ་ཁ་གཉིས་སྤེལ་ཡོད་ཀྱང་། དེར་ལན་འདེབས་ཤུགས་ཆེན་པོ་དེ་ཙམ་བྱུང་མ་སོང་། རེ་སྐུལ་གཅིག་དེ་བོད་མི་རེ་རེས་རྒྱ་གར་གྱི་མི་བཅུ་རེར་བོད་དོན་ཐོག་གོ་རྟོགས་སྤེལ་རྒྱུ་དང་། གཉིས་པ་དེ་བོད་དང་ས་འབྲེལ་ཆགས་པའི་རྒྱ་གར་གྱི་མངའ་སྡེ་ལྔའི་ནང་ཡོད་པའི་བོད་མི་རྣམས་ཀྱིས། རང་གི་མངའ་སྡེའི་བློན་ཆེན་ལ་མངའ་སྡེ་དེ་བོད་དང་ས་འབྲེལ་ཆགས་ཡོད་པ་ལས་རྒྱ་ནག་དང་འབྲེལ་བ་མེད་ཅེས་པའི་གསལ་བསྒྲགས་གནང་རྒྱུར་ཤུགས་རྒྱག་དགོས་པའི་འབོད་སྐུལ་ཞུས་ཡོད། ཨ་རུ་ན་ཅལ་མངའ་སྡེའི་བློན་ཆེན་གྱིས་གསལ་བསྒྲགས་གནང་ཟིན་པ་ལྟར། ལ་དྭགས་དང་། ཧི་མ་ཅལ། ཨུ་ཏར་ཁན། འབྲས་ལྗོངས་བཅས་ཀྱིས་ཀྱང་དེ་ལྟར་གནང་ཐུབ་རྒྱུའི་ཐད་ཤུགས་རྒྱག་དགོས། མངའ་སྡེ་དེ་དག་གིས་གསལ་བསྒྲགས་མ་བྱས་ཚེ་ལྡི་ལི་དབུས་གཞུང་གིས་གནང་རྒྱུ་ཁག་པོ་རེད། ཅེས་བརྗོད་བྱུང་།

ཡང་ཁོང་གིས། ད་ཐེངས་ཀྱི་ལས་འགུལ་འདི་མཚོན་དོན་གྱི་ལས་འགུལ་མིན་པར། དོན་དག་འགྲུབ་ཐུབ་རྒྱུའི་ལས་འགུལ་ཞིག་ཡིན་སྟབས། བོད་མི་བྱིངས་ཀྱིས་ཤུགས་མ་བརྒྱབ་ཚེ་ལས་འགུལ་འདི་ཡང་མིང་ཙམ་ཞིག་ལ་འགྱུར་རྒྱུའི་ཉེན་ཁ་ཡོད། དེ་བཞིན་ལས་འགུལ་འདི་བོད་པའི་རྩ་དོན་རང་གི་ཆེད་དུ་ཡིན་པ་ལས། ཆབ་སྲིད་ཀྱི་ལངས་ཕྱོགས་གང་ཡིན་མིན་ལ་མ་ལྟོས་པར་བོད་དེ་ལོ་རྒྱུས་ཐོག་རང་བཙན་ཡིན་པ་ཁུངས་སྐྱེལ་བྱེད་ཀྱི་ཡོད། ལྷག་པར་དུ་དབུ་མའི་ལམ་ལྟ་བུ་ཡིན་ན། ལོ་རྒྱུས་ཐོག་ང་ཚོ་རང་བཙན་ཡིན་པའི་ཁུངས་སྐྱེལ་བྱེད་མ་ཐུབ་ན། ང་ཚོར་མདུན་ལམ་ཙམ་ཡང་ཡོད་པ་མ་རེད། ད་ལྟའི་གནས་སྐབས་སུ་རྒྱ་གར་གྱིས་བོད་དེ་རྒྱ་ནག་གི་ཆ་ཤས་ཡིན་ཟེར་གྱི་ཡོད་སྟབས། དེར་འགྱུར་བ་གཏོང་རྒྱུའི་ལས་འགན་ང་ཚོ་ཚང་མ་ལ་ཡོད་པ་རེད། ཅེས་བརྗོད་བྱུང་།

བསྟན་འཛིན་བརྩོན་འགྲུས་ལགས་ཀྱི་བོད་རང་བཙན་ཆེད་དྷ་ས་ནས་ལྡི་ལི་བར་གྱི་གོམ་བགྲོད་ལས་འགུལ་འདི་བཞིན་ཟླ་འདིའི་ཕྱི་ཚེས་ ༡༢ ཏེ་བོད་ཀྱི་ལོ་སར་ཚེས་གཅིག་ཉིན་མགོ་བརྩམས་པ་ཞིག་ཡིན་ཞིང་། འདི་ལོའི་ཕྱི་ཟླ་ ༣ ཚེས་ ༡༠ སྟེ་གསུམ་བཅུའི་དུས་དྲན་ཉིན་མཇུག་སྒྲིལ་འཆར་ཡོད་འདུག ཁེར་རྐྱང་གི་གོམ་བགྲོད་ལས་འགུལ་རིང་བསྟན་འཛིན་བརྩོན་འགྲུས་ལགས་ལ་གསར་འགོད་ལྷན་ཚོགས་བསྡུ་སྐོང་སོགས་ཀྱི་ཐད་ཕྱག་རོགས་གནང་མཁན་བོད་མི་གསུམ་ཡོད་པ་དང་། དེ་བཞིན་འདས་པའི་ཉིན་གྲངས་ ༥ རིང་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་རྡོ་རྗེ་ཚེ་བརྟན་ལགས། ལྷ་རྒྱལ་རི་རྣམ་རྒྱལ་སྒྲོལ་དཀར་ལགས་སོགས་བོད་མི་སྒེར་བ་ཁག་ཅིག་ནས་རྒྱབ་སྐྱོར་ཆེད་ཆུ་ཚོད་འགའ་ཤས་དང་ཉིན་གྲངས་གཅིག་དེ་འདྲར་ཁོང་དང་ལྷན་དུ་གོམ་བགྲོད་གནང་ཡོད་འདུག

གསར་འགོད་པ། པ་སངས་ཚེ་རིང་།