ཨ་རིའི་སྲིད་གཞུང་གསར་པས་བོད་དོན་གྲོས་ཆོད་ལག་བསྟར་གནང་གི་ཡོད་མེད་གྲོས་ཚོགས་འཐུས་མིས་ལྟ་ཞིབ་དགོས།

ཨ་རིའི་གྲོས་ཚོགས་འོག་མའི་འཐུས་མི་དང་བོད་དོན་རྒྱབ་སྐྱོར་བ་ཇིམ་སི་མེག་གྷོ་ཝན་ལགས་ཀྱིས་སྲིད་འཛིན་བྷའེ་ཌིན་མཆོག་གི་སྲིད་གཞུང་ནས་༧གོང་ས་མཆོག་ལ་མཇལ་མོལ་གནང་ཐུབ་པའི་རེ་བ་བྱེད་ཀྱི་ཡོད་སྐོར་གསུངས་འདུག

ཁ་སང་ཕྱི་ཚེས་ ༡༦ ཉིན་ཨ་རིའི་མེ་ས་ཆུ་སེཌ་ས་གནས་བོད་རིགས་སྤྱི་མཐུན་ཚོགས་པའི་གོ་སྒྲིག་འོག ཨ་རིའི་གྲོས་ཚོགས་ནང་ཕྱི་ལོ་ ༢༠༢༠ ལོའི་ཨ་རིའི་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་ཡིག་གཏན་འབེབ་བྱུང་བར་དགའ་བསུ་དང་། གཏན་འབེབ་ཀྱི་བརྒྱུད་རིམ་ཁྲོད་གྲོས་ཚོགས་ནང་ཁྲིམས་འཆར་ངོ་སྤྲོད་གནང་མཁན་གྲོས་ཚོགས་འོག་མའི་འཐུས་མི་ཇིམ་སི་མེག་གྷོ་ཝན་ (James McGovern) ལགས་དང་། གྲོས་ཚོགས་གོང་མའི་འཐུས་མི་མཱར་ཁོ་རུ་བྷི་ཡོ་ (Marco Rubio) ལགས་གཉིས་ལ་ཐུགས་རྗེ་ཆེ་ཞུ་བའི་མཛད་སྒོ་ཞིག་བོད་མིའི་སྒྲིག་འཛུགས་ཕྱི་དྲིལ་བརྙན་འཕྲིན་ཚན་པའི་དྲ་ལམ་བརྒྱུད་ཚོགས་ཡོད་པ་དང་། དེའི་ཐོག་སྲིད་སྐྱོང་བློ་བཟང་སེང་གེ་མཆོག་གི་གཙོས་ཨ་རིའི་དོན་གཅོད་དངོས་གྲུབ་ཚེ་རིང་ལགས། གྲོས་ཚོགས་འཐུས་མི་ཇིམ་སི་མེག་གྷོ་ཝན་ (James McGovern) ལགས་དང་འཐུས་མི་མཱར་ཁོ་རུ་བྷི་ཡོ་ (Marco Rubio) ལགས་ཀྱི་སྐུ་ཚབ། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བུ་ཆུང་ཚེ་རིང་ལགས་སོགས་མཉམ་ཞུགས་གནང་ཡོད་འདུག

སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས། རྒྱ་གར་གྱི་བོད་དོན་རྒྱབ་སྐྱོར་ཚོགས་པ་ཁག་གི་གཙོས་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་གིས་ཨ་རིའི་བོད་དོན་ཁྲིམས་ཡིག་གཏན་འབེབ་བྱུང་བར་དགའ་ཚོར་ཆེན་པོ་བྱུང་ཡོད་པ་དང་། ལྷག་པར་དུ་བོད་ནང་དང་བཙན་བྱོལ་བོད་མི་ཡོངས་ཀྱིས་དགའ་བསུ་ཆེན་པོ་བྱས་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་ནས་ཧ་ཅང་ཡག་པོ་བྱུང་ཡོད་པ་གསུངས་ཡོད་སྐོར་དང་།  ཁྲིམས་ཡིག་དེ་གཏན་འབེབ་བྱུང་བར་བརྟེན་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ནང་བདུན་གཅིག་ཙམ་གྱི་རིང་དྲག་དམག་འགྲེམ་འཇོག་དང་། ཕོ་བྲང་པོ་ཏ་ལའི་ཐོག་དྲག་དམག་ཐད་ཕུར་གནམ་གྲུས་སྐོར་གཡེང་བྱས་ཡོད་སྐོར་སོགས་གསུངས་འདུག

དེའི་རྗེས་གྲོས་ཚོགས་འཐུས་མི་ཇིམ་སི་མེག་གྷོ་ཝན་ (James McGovern) ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ཨ་རིར་ཕེབས་ཏེ་སྲིད་འཛིན་བྷའེ་ཌིན་མཆོག་དང་སྲིད་འཛིན་གཞོན་པ་ཀ་མ་ལ་ཧ་རི་སི་ (Kamala Harris) གཉིས་ལ་མཇལ་མོལ་གནང་ཐུབ་པའི་རེ་བ་བྱེད་ཀྱི་ཡོད་པ་དང་། ཉེ་བའི་ལོ་འགའི་ནང་ཨ་རི་གཞུང་གིས་བོད་ནང་འགྲོ་འོང་འདྲ་མཉམ་གྱི་ཁྲིམས་དང་བོད་དོན་སྲིད་ཇུས་དང་རྒྱབ་སྐྱོར་གྱི་ཁྲིམས་གལ་ཆེན་གཉིས་གཏན་འབེབ་བྱས་ཡོད་པ་དང་། ཨ་རིའི་བྷའེ་ཌིན་སྲིད་གཞུང་གིས་ཁྲིམས་དེ་དག་ལག་བསྟར་བྱེད་ཀྱི་ཡོད་མེད་ལ་བལྟ་རྒྱུ་ནི་གྲོས་ཚོགས་འཐུས་མིའི་འགན་འཁྲི་ཡིན་སྐོར་དང་། ཨ་རིའི་དམིགས་བསལ་བོད་དོན་འབྲེལ་མཐུད་པ་ཞིག་འཕྲལ་དུ་བསྐོ་བཞག་བྱ་རྒྱུའི་རེ་བ་བྱེད་ཀྱི་ཡོད་པ། དེ་བཞིན་བྷའེ་ཌིན་སྲིད་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་དང་འབྲེལ་ནས་ཐེ་ཇུས་བྱེད་མཁན་གྱི་རྒྱ་ནག་གི་མཐོ་རིམ་ལས་བྱེད་དག་ལ་ཆད་འགེལ་བྱེད་དགོས་སྐོར། དེ་བཞིན་སྟོབས་ཆེན་རྒྱལ་ཁབ་རྒྱ་ནག་ལྟ་བུ་ཞིག་༧གོང་ས་རྒྱལ་བ་རིན་པོ་ཆེ་མཆོག་ལ་ཞེད་སྣང་སྐྱེ་ཡི་ཡོད་པའི་རྒྱུ་མཚན་ནི་༧གོང་ས་མཆོག་ནི་ཞི་བདེ་དང་དྲང་བདེན། བྱམས་བརྩེའི་བདག་ཉིད་ཆེན་མོ་ཞིག་ཡིན་པ་དང་། ཨ་རིའི་གྲོས་ཚོགས་འཐུས་མི་ཚུད་པའི་མི་ཧ་ཅང་མང་པོ་ཞིག་གི་ཡིད་སྨོན་ཞུ་ས་ཞིག་ཡིན་སྐོར་དང་། ཉེ་བའི་ཨ་རིའི་བོད་དོན་ཁྲིམས་ཡིག་དེ་ནི་བོད་མི་ཡོངས་དང་ལྷག་པར་དུ་ཨ་རིར་གནས་སྡོད་བོད་མི་ཚོས་མཉམ་རུབ་ཀྱིས་འབད་བརྩོན་བྱས་པ་ཞིག་ཡིན་སྐོར་གསུངས་འདུག

ཨ་རིའི་བོད་དོན་ཁྲིམས་ཡིག་དང་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བུ་ཆུང་ཚེ་རིང་ལགས་ཀྱིས། ཁྲིམས་ཡིག་དེ་ཡིས་བོད་མི་ཚོར་རེ་བ་ཞིག་སྦྱིན་ཡོད་སྟབས་གྲོས་ཚོགས་འཐུས་མི་ཇིམ་སི་མེག་གྷོ་ཝན་ (James McGovern) དང་མཱར་ཁོ་རུ་བྷི་ཡོ་ (Marco Rubio) ལགས་གཉིས་ལ་དམིགས་བསལ་ཐུགས་རྗེ་ཆེ་ཞུས་འདུག་པ་དང་། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་ཁག་ལ་རྒྱབ་སྐྱོར་གནང་བ་དང་ཨ་རིའི་བོད་རིགས་ཡོངས་ཀྱི་མངོན་འདོད་སྣང་མེད་དུ་མ་བཞག་པ་ལའང་ཐུགས་རྗེ་ཆེ་ཞུས་འདུག ཕྱི་ལོ་ ༡༩༧༩ ལོར་༧གོང་ས་རྒྱལ་བ་རིན་པོ་ཆེ་མཆོག་ཨ་རིར་ཕེབས་པ་ནས་བཟུང་། ཨ་རིའི་གྲོས་ཚོགས་ཀྱིས་བོད་དོན་ཐད་ཁྲིམས་ཡིག་ཆེ་ཁག་ ༤ གཏན་འབེབ་བྱས་ཡོད་པ་དང་། འཐུས་མི་ཇིམ་སི་མེག་གྷོ་ཝན་ (James McGovern) ལགས་ནས་ཁྲིམས་ཡིག་དེ་དག་ཚང་མའི་ཐོག་ནུས་པ་ཆེན་པོ་བཏོན་ཡོད་པ་དང་། ཨ་རིའི་གྲོས་ཚོགས་ནང་བོད་དོན་ཁྲིམས་ཡིག་ཁག་གཏན་འབེབ་དང་འབྲེལ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་སྐུ་ལས་མང་པོ་ཞིག་བསྐྱོན་ཡོད་པ་དང་། ཁོང་གིས་ད་ལྟའི་ཨ་རི་རྒྱལ་ས་ཝ་ཤིན་ཊོན་གྱི་བོད་དོན་ལས་འགུལ་གྱི་གཞི་རྩ་བཏིང་ཡོད་སྐོར་བརྗོད་འདུག

གཞན་ཡང་། འདི་ལོའི་བོད་ཀྱི་ལོ་སར་དང་སྟབས་བསྟུན་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་བོད་དོན་རྒྱབ་སྐྱོར་ཚོགས་པས་བོད་ཀྱི་ལོ་སར་ལ་འཚམས་འདྲི་ཞུ་སྐབས། ཚོགས་པ་དེས་ཕྱི་ལོ་ ༢༠༢༠ ལོའི་ཨ་རིའི་བོད་དོན་སྲིད་ཇུས་དང་རྒྱབ་སྐྱོར་ཀྱི་ཁྲིམས་ཡིག་གཏན་འབེབ་བྱུང་བར་དགའ་བསུ་ཞུས་ཡོད་པ་དང་། ཁྲིམས་ཡིག་གཏན་འབེབ་དེ་ནི་བོད་དོན་ཆེད་ཧ་ཅང་གལ་གནད་ཆེན་པོ་ཡིན་ལ། དབུ་མའི་ལམ་གྱི་དགོངས་དོན་འོག་བོད་དོན་སེལ་བ་དང་། ༧གོང་ས་རྒྱལ་བ་རིན་པོ་ཆེ་མཆོག་ཕྱིར་བོད་དུ་མ་ཕེབས་བར་དུ་མུ་མཐུད་བོད་དོན་འཐབ་རྩོད་ལ་རྒྱབ་སྐྱོར་གནང་རྒྱུ་ཡིན་སྐོར་བཀོད་ཡོད་པ་རེད།

གསར་འགོད་པ། ཀླུ་མགོན་ཐར།