རྒྱ་ནག་གཞུང་གི་མགྲིན་ཚབ་པར་གྱུར་བའི་གོ་ལའི་དུས་བབ་ཀྱིས་རྒྱལ་ཁབ་སུ་ཞིག་གིས་ཕྱི་ལོ་ ༢༠༢༢ ལོའི་པེ་ཅིན་གྱི་དགུན་དུས་ཨོ་རྩལ་འགྲན་ཚོགས་ནས་ཕྱིར་འཐེན་བྱས་ན་དེ་ལ་ཉེས་ཆད་ལྕི་མོ་གཅོད་རྒྱུ་ཡིན་པའི་ཉེན་བརྡ་བཏང་འདུག
ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་རྒྱ་ནག་ནང་འཚོག་རྒྱུར་འཛམ་གླིང་རྒྱལ་ཁབ་ཁག་གི་གྲོས་ཚོགས་འཐུས་མི་དང་། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་༡༨༠ ལྷག་གིས་ངོ་རྒོལ་བྱེད་བཞིན་ཡོད་པར་བརྟེན། ཟླ་འདིའི་ཕྱི་ཚེས་ ༧ ཉིན་རྒྱ་ནག་གཞུང་འབྲེལ་གོ་ལའི་དུས་བབ་ཀྱི་སྤྱི་ཁྱབ་རྩོམ་སྒྲིག་པ་ཧུ་ཤི་ཅིན་(Hu Xijin)ཟེར་བ་དེས། སྒེར་གྱི་སྤྱི་ཚོགས་དྲ་ལམ་ཊི་ཝེ་ཊུར་སྟེང་དུ། ཕྱི་ལོ་ ༢༠༢༢ ལོའི་པེ་ཅིན་གྱི་དགུན་ཁའི་ཨོ་རྩལ་འགྲན་ཚོགས་ནས་ཕྱིར་འཐེན་དགོས་ཟེར་བ་དེ་ཡོངས་ཁྱབ་ཀྱི་བསམ་ཚུལ་ཞིག་མིན། དེ་ལ་རྒྱ་ཆེ་བའི་རྒྱབ་སྐྱོར་ཡང་འཐོབ་ཀྱི་མེད་ལ། རྒྱལ་སྤྱིའི་ཨོ་རྩལ་ལྷན་ཚོགས་དང་རྩེད་མོ་བས་དེ་ལ་ངོ་རྒོལ་བྱེད་ཀྱི་མ་རེད། གལ་སྲིད་རྒྱལ་ཁབ་ཅིག་གིས་རྩེད་འགྲན་ནས་ཕྱིར་འཐེན་བྱས་ཚེ་རྒྱ་ནག་གིས་དེ་ལ་ཉེས་ཆད་ལྕི་མོ་གཅོད་པ་རེད་ཅེས་ཉེན་བརྡ་བཏང་ཡོད་སྟབས། རྒྱ་ནག་གཞུང་གི་སྨྲ་ལྕེར་གྱུར་བའི་གོ་ལའི་དུས་བབ་ཀྱིས་དམངས་གཙོའི་ཐོབ་ཐང་དང་རང་དབང་ལ་འཇིགས་སྐུལ་རྡོག་རོལ་གཏོང་བཞིན་ཡོད་པའི་སྐྱོན་བརྗོད་བྱེད་བཞིན་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་བསོད་ནམས་ཚེ་རིང་ལགས་སུ། རྒྱ་ནག་གཞུང་གི་ཡོངས་ཁྱབ་ཉེན་བརྡ་དེའི་ཐད་དགོངས་ཚུལ་ཅི་ཡོད་དྲིས་པར་ཁོང་གིས། རྒྱ་ནག་གིས་ཨོ་རྩལ་འགྲན་ཚོགས་ལས་ཕྱིར་འཐེན་བྱེད་མཁན་རྒྱལ་ཁབ་ཚོར་དཔལ་འབྱོར་ཐོག་ནས་ཉེས་ཆད་གཅོད་རྒྱུ་ཡིན་ཟེར་བ་དེས། འཛམ་གླིང་རྒྱལ་ཁབ་ཁག་གི་དམངས་གཙོ་དང་ཐོབ་ཐང་། རང་དབང་སོགས་ལ་ངོ་རྒོལ་དང་སྡིགས་ར་སྐུལ་གྱི་ཡོད་པ་བསྟན་ཡོད་ལ། ཕྱོགས་གཅིག་ནས་ང་ཚོ་ཚུད་པའི་རྒྱལ་སྤྱིའི་སྟེང་གཞུང་འབྲེལ་མ་ཡིན་པའི་ཚོགས་པ་ཁག་མང་པོས་རྒྱ་ནག་ནང་ཕྱི་ལོ་ ༢༠༢༢ ལོའི་དགུན་དུས་ཨོ་རྩལ་འགྲན་ཚོགས་མཚམས་འཇོག་དགོས་པའི་ལས་འགུལ་སྤེལ་བཞིན་པར་ནུས་པ་ཐོན་གྱི་ཡོད་པའང་མཐོང་གི་འདུག ཅེས་བརྗོད་བྱུང་།
ཡང་ཁོང་གིས། འཛམ་གླིང་རྒྱལ་ཁབ་གཞན་ཞིག་ཨོ་རྩལ་འགྲན་ཚོགས་ནང་འཛུལ་ཞུགས་མ་བྱས་ཚེ། རྒྱ་ནག་གིས་དཔལ་འབྱོར་ཐོག་ནས་གྱོང་སྤྲོད་རྒྱུ་ཡིན་ཟེར་བ་ནི། རྒྱ་ནག་འོག་མྱོང་བཞིན་པའི་མི་མང་ཡོངས་དང་རྒྱལ་སྤྱིའི་སྟེང་གི་གཞུང་འབྲེལ་མིན་པའི་ཚོགས་སྡེ་ཁག་ལ་སྡིགས་ར་སྐུལ་བ་ཙམ་མ་ཡིན་པར། འཛམ་གླིང་རྒྱལ་ཁབ་ཁག་གི་དམངས་གཙོའི་རང་དབང་གཞིར་བཟུང་། རྩེད་འགྲན་ནང་འཛུལ་ཞུགས་བྱེད་འདོད་ཡོད་མེད་ལ་མ་ལྟོས་པར་སྡིགས་ར་སྐུལ་གྱི་ཡོད་པ་མ་ཟད། དེས་དམངས་གཙོ་དང་རང་དབང་། ཨོ་རྩལ་འགྲན་ཚོགས་ཀྱི་ཆེ་མཐོང་ལའང་བརྩི་འཇོག་བྱེད་ཀྱི་མེད་སྐོར་བརྗོད་བྱུང་།
ཟླ་འདིའི་ཕྱི་ཚེས་ ༡༤ ཉིན་ཨ་རིའི་གྲོས་ཚོགས་འཐུས་མི་མའེ་ཁུ་ཝོལ་རྫི་ (Mike Waltz) ལགས་ཀྱིས། ཨ་རིའི་ཨོ་རྩལ་འགྲན་ཚོགས་ཀྱི་རྒྱུན་ལས་ཡོངས་ལ་འབོད་སྐུལ་གནང་སྟེ། རྒྱ་ནག་དམར་ཤོག་ཚོགས་པས་སྲིད་དབང་སྒེར་གཅོད་འོག་དྲག་གནོན་གྱི་སྲིད་ཇུས་འདྲ་མིན་སྤེལ་ཏེ། ཧོང་ཀོང་དང་ཡུ་གུར་མི་མང་གཙོས་པའི་ཚོགས་པ་དང་མི་སྒེར་གྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པར་བརྟེན། ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་རྩེད་འགྲན་ཆེན་མོ་རྒྱ་ནག་ནང་འཚོག་རྒྱུ་ཕྱིར་འཐེན་བྱེད་དགོས་ཀྱི་ཡོད་པ་དང་། གལ་སྲིད་ཕྱིར་འཐེན་མ་བྱས་ཚེ་ཨ་རི་དང་འཛམ་གླིང་རྒྱལ་ཁབ་གཞན་རྣམས་ཕྱི་ལོ་ ༢༠༢༢ ལོའི་ཨོ་རྩལ་འགྲན་ཚོགས་ནང་འཛུལ་ཞུགས་མི་གནང་བའི་འབོད་སྐུལ་གནང་ཡོད་པ་རེད།
དེ་བཞིན། ཕྱི་ཚེས་ ༦ ཉིན་དབྱིན་ཇིའི་གྲོས་ཚོགས་འཐུས་མི་ཌའེ་ཝི་ (Ed Davey) ལགས་དང་བྷིར་ཡན་ཊི་ (Chris Bryant) ལགས་གཉིས་ནས། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ལ་དྲག་གནོན་ཐེབས་ཀྱི་ཡོད་པའི་ངོས་འཛིན་འོག དབྱིན་ཇིའི་རྩེད་འགྲན་པ་ཚོས་རྒྱ་ནག་ནང་དགུན་ཁའི་ཨོ་རྩལ་རྩེད་འགྲན་འཚོག་རྒྱུར་ངོ་རྒོལ་བྱེད་དགོས་པའི་སྐུལ་མ་བཏང་ཡོད་པ་རེད།
ཕྱི་ལོ་༢༠༢༢ ལོའི་ཨོ་རྩལ་འགྲན་ཚོགས་དེ་བཞིན་ལོ་རྗེས་མའི་ཕྱི་ཟླ་ ༢ ཚེས་ ༤ ཉིན་རྒྱ་ནག་ནང་འཚོག་གཏན་འཁེལ་བ་ལྟར། ཟླ་འདིའི་ཕྱི་ཚེས་ ༣ ཉིན་བཞུགས་སྒར་དྷ་སར་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ལྔའི་གོ་སྒྲིག་འོག ཕྱི་ལོ་ ༢༠༢༢ ལོའི་རྒྱ་ནག་པེ་ཅིན་གྱི་དགུན་ཁའི་ཨོ་རྩལ་འགྲན་ཚོགས་ལ་ངོ་རྒོལ་གྱིས། ཉིན་དེ་ནས་བཟུང་རྒྱལ་སྤྱིའི་སྟེང་གཞུང་འབྲེལ་མིན་པའི་ཚོགས་པ་ ༡༦༠ ལྷག་གིས་རྒྱལ་ཁབ་ཁག་གི་སྲིད་གཞུང་རྣམས་ལ་ཞུ་ཡིག་ཕུལ་ཏེ། ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་ལ་རྒྱབ་སྐྱོར་མི་བྱེད་པ་དང་མཉམ་ཞུགས་མི་བྱེད་པའི་འབོད་སྐུལ་བྱས་ཡོད་པ་དང་། ད་ལྟ་རྒྱལ་སྤྱིའི་སྟེང་གཞུང་འབྲེལ་མིན་པའི་ཚོགས་སྡེ་ཁག་ ༡༨༠ ལྷག་དང་གྲོས་ཚོགས་འཐུས་མི་དང་། མི་མང་སོགས་རིམ་བཞིན་ཇེ་མང་དུ་འགྲོ་བཞིན་ཡོད་པ་རེད།
རྒྱལ་སྤྱིའི་ཨོ་རྩལ་འགྲན་ཚོགས་ཀྱི་རྒྱུན་ལས་ངོས་ནས་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་རྩེད་འགྲན་མུ་མཐུད་རྒྱ་ནག་ནང་འཚོག་རྒྱུ་ཡིན་སྐོར་བརྗོད་ཡོད་ལ། རྒྱ་ནག་གཞུང་གིས་ཨ་སྒོར་ཐེར་འབུམ་མང་པོའི་འགྲོ་གྲོན་གཏང་བའི་ཐོག་འཛུགས་སྐྲུན་གྱི་ལས་གཞི་རྒྱ་ཆེར་བསྐྲུན་ཏེ། པེ་ཅིན་འཛམ་གླིང་གི་དབྱར་དགུན་གཉིས་ཀྱི་ཨོ་རྩལ་འགྲན་ཚོགས་བསྡུ་ཡུལ་ཐོག་མ་ཆགས་ཐབས་སུ་འབད་ཀྱི་ཡོད་པ་རེད། འོན་ཀྱང་། གནད་དོན་དཔྱད་ཞིབ་པ་མང་པོས་རྒྱ་ནག་གིས་ཡུ་གུར་མི་རིགས་རྩ་མེད་བཟོ་བ་དང་ཧོང་ཀོང་གི་རང་སྐྱོང་གནས་བབ་སྒྱུར་བཅོས། དེ་བཞིན། འཛམ་གླིང་ནང་ཏོག་དབྱིབས་གཉན་རིམས་འགོས་ཁྱབ་བཏང་བ་སོགས་ཀྱི་རྒྱུ་རྐྱེན་འོག ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་ཆེན་མོ་རྒྱ་ནག་ནང་འཚོག་པར་དཀའ་ངལ་འཕྲད་རྒྱུ་ཡིན་སྐོར་བརྗོད་ཀྱི་འདུག
གསར་འགོད་པ། སྐལ་བཟང་སྦྱིན་པ།
