རྒྱ་ནག་གཞུང་གིས་གྷལ་ཝན་ལུང་གཤོངས་ཀྱི་དམར་འཛིང་ཁྲོད་རྒྱ་དམག་ ༤ རྐྱེན་འདས་དང་རུ་དཔོན་ཞིག་ལ་རྨས་སྐྱོན་ཚབས་ཆེན་ཕོག་ཡོད་པའི་གནས་ཚུལ་ཐོག་མར་བསྒྲགས་པ་དང་འབྲེལ་རྒྱ་གར་གྱིས་རྐང་བཙུགས་ཏེ་འཁྲུང་ཟིང་བསླངས་ཡོད་ཚུལ་བསྒྲགས་འདུག
རྒྱ་གར་བྱང་ཕྱོགས་ལ་དྭགས་ཁུལ་གྱི་བོད་ཧིན་ས་མཚམས་ནས་རྒྱ་དཀར་ནག་གི་དམག་མི་རྣམས་དངོས་སུ་ཕྱིར་འཐེན་བྱེད་བཞིན་པ་དང་བསྟུན། དེ་རིང་རྒྱ་ནག་གཞུང་ཕྱོགས་ནས་འདས་ལོར་བོད་ཧིན་ས་མཚམས་ཀྱི་གྷལ་ཝན་ལུང་གཤོངས་ཀྱི་གདོང་ཐུག་ཁྲོད་རྒྱ་ནག་གི་དམག་མི་ ༤ རྐྱེན་འདས་དང་། རུ་དཔོན་ཞིག་ལ་རྨས་སྐྱོན་ཕོག་པའི་གནས་ཚུལ་ཐེངས་དང་པོར་བསྒྲགས་ཡོད་པ་མ་ཟད། དམར་འཛིང་ཁྲོད་རྒྱ་དམག་གིས་དཔའ་རྟགས་ཆེན་པོ་བསྟན་ཏེ་རྒྱ་གར་གྱི་དམག་མིར་ཕམ་ཉེས་ཆེན་པོ་བཟོས་ཚུལ་དང་། རྨས་སྐྱོན་དང་རྐྱེན་འདས་ཕྱིན་པའི་རྒྱ་དམག་ལྔ་ལ་རྒྱལ་ཁབ་ཀྱི་ས་མཚམས་སྲུང་སྐྱོབ་བྱེད་མཁན་དཔའ་བོ་ཡིན་པའི་ཆེ་བསྟོད་སྤྲད་འདུག
དང་བྱས་འདུག་པ་མ་ཟད། འདས་ལོའི་གདོང་ཐུག་གི་ངན་ཁག་ཡོད་ཚད་རྒྱ་གར་ལ་གཡོགས་འདུག་ལ།
དེ་ཡང་མི་མང་བཅིངས་གྲོལ་དམག་ཟེར་བའི་གཞུང་འབྲེལ་དྲ་བའི་སྟེང་། ས་མཚམས་སྲུང་སྐྱོབ་རུ་ཁག་གི་རུ་དཔོན་ཆི་ཧྥ་པའོ་ (Qi Fabao) དང་། སྐམ་དམག་རུ་ཁག་གི་རུ་དཔོན་ཁྲིན་ཧོང་ཅིན་ (Chen Hongjun)། རང་ལོ་ ༡༨ ཡིན་པའི་འཐབ་དམག་ཁྲིན་ཤང་རོང་ (Chen Xiangrong)་དང་། ཤའོ་སི་ཡན་ (Xiao Siyuan)། ཝང་ཀྲུའུ་རན་ (Wang Zhuoran) སོགས་ཀྱིས་རྒྱལ་ཁབ་ཀྱི་ས་མཚམས་སྲུང་སྐྱོབ་ཀྱི་ཐད་དཔའ་རྟགས་བསྟན་ཡོད་སྐོར་དང་། དབུས་དམག་དོན་ལྷན་ཁང་ (The Central Military Commission) ནས་དམར་འཛིང་ཁྲོད་རྨས་སྐྱོན་ཚབས་ཆེན་ཕོག་པའི་རུ་དཔོན་ཆི་ཧྥ་པའོ་ལ་མཐའ་མཚམས་རྒྱལ་སྲུང་རུ་དཔོན་དཔའ་བོ་དང་། རྐྱེན་འདས་སུ་ཕྱིན་པ་བཞི་སྟེ་ཁྲིན་ཧོང་ཅིན་མཐའ་མཚམས་རྒྱལ་སྲུང་དཔའ་བོ། དེ་མིན་གྱི་འཐབ་དམག་གསུམ་ལ་རིམ་པ་དང་པོའི་ཆེ་བསྟོད་མཚན་གནས་སྤྲད་ཡོད་སྐོར་བསྒྲགས་འདུག
གཞན་ཡང་། གཞུང་འབྲེལ་གནས་ཚུལ་དེའི་ནང་། ཕྱི་ལོ་ ༢༠༢༠ ཟླ་ ༤ པ་ནས་ཕྱིའི་དམག་གིས་རྒྱལ་ཁབ་ཕྱོགས་གཉིས་ཀྱིས་བཞག་པའི་ཆོད་ཡིག་གི་དགོངས་དོན་དང་འགལ་ཏེ། གྷལ་ཝན་ལུང་གཤོངས་ཀྱི་ཉེ་འཁྲིས་སུ་རྒྱ་ལམ་དང་ཟམ་པ་སོགས་འཛུགས་སྐྲུན་ལས་གཞི་རྒྱ་ཆེར་སྤེལ་ཏེ་ས་མཚམས་ཀྱི་ཐག་ཉེར་སླེབས་ཐབས་ཀྱིས་རྐང་བཙུགས་ནས་འཁྲུག་ཟིང་བསླངས་པས་མི་ཚད། ས་མཚམས་ཀྱི་གནས་བབ་ལ་དོ་ཕོག་དང་རྒྱ་ནག་ཐོག་འཚེ་བའི་བྱ་སྤྱོད་སྤེལ་ཡོད། ཅེས་བཀོད་འདུག འོན་ཀྱང་རྒྱ་གར་གཞུང་གིས་རྒྱ་ནག་གིས་སྔར་དང་མི་འདྲ་བར་ས་མཚམས་ཁུལ་དུ་དམག་མི་ཕོན་ཆེན་འགྲེམ་འཇོག་དང་། འདས་ལོར་གྷན་ཝན་དང་། ཉེ་ཆར་འབྲས་ལྗོངས་ཁུལ་དུ་རྒྱ་དམག་གིས་རྒྱ་གར་གྱི་མངའ་ཁོངས་སུ་བཙན་འཛུལ་ལན་མང་བྱས་ཡོད་པའི་སྐྱོན་བརྗོད་བྱས་ཡོད་པ་རེད།
དམར་འཛིང་དེ་བྱུང་མ་ཐག་རྒྱ་གར་ཕྱོགས་ནས་རྒྱ་གར་གྱི་དམག་མི་ ༢༠ རྐྱེན་འདས་སུ་ཕྱིན་པའི་གནས་ཚུལ་བསྒྲགས་ཡོད་ཀྱང་། རྒྱ་ནག་གཞུང་གིས་ཟླ་བ་ ༨ མ་ཟིན་ཙམ་རིང་དངོས་ཡོད་གནས་ཚུལ་བསྒྲགས་མེད་པ་མ་ཟད། གཞན་གྱིས་སྤེལ་བའི་དེ་འབྲེལ་གྱི་གནས་ཚུལ་རྣམས་བདེན་པ་མིན་སྐོར་བསྒྲགས་ཡོད་པ་རེད། འདི་ག་བོད་ཀྱི་དུས་བབ་ལ་བོད་ནང་ནས་ཁུངས་ལྡན་གྱི་ཡིག་ཆ་ཞིག་ལག་སོན་བྱུང་བའི་ནང་དུ། གྷལ་ཝན་ལུང་གཤོངས་ཀྱི་གདོང་ཐུག་ཁྲོད་རྒྱ་ནག་གི་དམག་མི་ཁྱོན་ ༥༦ ལ་རིམ་པ་མི་འདྲ་བའི་རྨས་སྐྱོན་ཕོག་ཡོད་པ་དང་། འདས་གྲོངས་ཕྱིན་པའི་དམག་མི་བཞི་ཡི་ནང་ནས་གཅིག་དམག་དོན་ས་ཁྲ་འབྲི་མཁན་ཞིག་ཡིན་པའི་གནས་ཚུལ་བྲིས་འདུག
འདས་ལོའི་ཕྱི་ཟླ་ ༤ པ་ཙམ་ནས་ལ་དྭགས་གཙོས་པའི་བྱང་ཕྱོགས་ཀྱི་བོད་ཧིན་ས་མཚམས་སུ་རྒྱ་དཀར་ནག་གི་དམག་མི་ཕོན་ཆེན་འགྲེམ་འཇོག་བྱེད་མགོ་བརྩམས་ཏེ། ད་བར་ཕྱོགས་གཉིས་ཀྱི་དམག་མིའི་བར་གདོང་ཐུང་ཆེ་ཆུང་མི་ཉུང་བ་ཞིག་བྱུང་ཡོད་ནའང་། ཟླ་འདིའི་ཕྱི་ཚེས་ ༡༡ ཉིན་ཕྱོགས་གཉིས་ཀས་གྲོས་མོལ་བརྒྱུད་རྩོད་རྙོག་ཆེ་བའི་ས་ཁུལ་ཁག་ནས་དམག་མི་དང་གོ་མཚོན་རྣམས་ཕྱིར་འཐེན་བྱ་རྒྱུར་མོས་མཐུན་བྱས་པ་བཞིན། བདུན་ཕྲག་སྔོན་མ་ནས་དམག་མི་དང་མེ་སྒྱོགས་རྣམས་དངོས་སུ་ཕྱིར་འཐེན་བྱས་ཡོད་པའི་སྲུང་སྐར་བརྒྱུད་བླངས་པའི་པར་རིས་དང་གནས་ཚུལ་རིགས་རྒྱ་གར་གྱི་བརྒྱུད་ལམ་ཁག་ཏུའང་བསླེབས་སོང་ལ། དམག་མི་ཡོངས་སུ་ཕྱིར་འཐེན་བྱས་རྗེས་ཕྱོགས་གཉིས་ཀས་ས་མཚམས་ཀྱི་རྩོད་རྙོག་ཞི་འགྲིག་ཡོང་ཐབས་ཐད་གྲོས་མོལ་བྱ་འཆར་ཡོད་སྐོར་བསྒྲགས་འདུག
གསར་འགོད་པ། པ་སངས་ཚེ་རིང་།
