ཁེ་ན་ཌའི་གྲོས་ཚོགས་ཀྱིས་རྒྱ་ནག་གཞུང་གིས་ཡུ་གུར་མི་རིགས་རྩ་སྟོང་གི་སྲིད་ཇུས་མུ་མཐུད་སྤེལ་ཚེ་རྒྱ་ནག་ནང་འཚོག་འཆར་ཡོད་པའི་དགུན་ཁའི་ཨོ་རྩལ་འགྲན་ཚོགས་ཕྱིར་འཐེན་བྱེད་དགོས་པའི་སྐུལ་འདེད་གཏོང་རྒྱུ་ཡིན་སྐོར་བརྗོད་འདུག
དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁེ་ན་ཌའི་གྲོས་ཚོགས་ནང་རྒྱ་ནག་གཞུང་གིས་ཡུ་གུར་མི་རིགས་རྩ་སྟོང་བཟོ་ཡི་ཡོད་མེད་ཐད་མང་མོས་འོས་བསྡུ་བྱས་སྐབས། དགག་བྱ་གཅིག་ཀྱང་མེད་པར་གྲོས་ཚོགས་འཐུས་མི་ ༢༦༦ གིས་མོས་མཐུན་བྱས་ཏེ། ཚད་མཐོའི་རྒྱབ་སྐྱོར་ཐོག་ཁེ་ན་ཌའི་གྲོས་ཚོགས་ནས། རྒྱ་ནག་གིས་ཡུ་གུར་མི་རིགས་རྩ་སྟོང་བཟོ་ཡི་ཡོད་པར་ངོས་འཛིན་བྱས་ཡོད་པ་དང་། ཁེ་ན་ཌ་ནི་ཨ་རི་རྗེས་ཀྱི་རྒྱལ་སྤྱིའི་སྟེང་རྒྱ་ནག་གིས་ཡུ་གུར་མི་རིགས་རྩ་སྟོང་གཏོང་གི་ཡོད་པར་ངོས་འཛིན་གནང་མཁན་གཉིས་པ་དེ་ཡིན་པ་རེད།
བྷི་བྷི་སི་གསར་ཁང་གི་གནས་ཚུལ་ནང་། ཁེ་ན་ཌའི་གྲོས་ཚོགས་གོང་མའི་ནང་ཡུ་གུར་མི་རིགས་རྩ་སྟོང་གཏོང་གི་ཡོད་པའི་མང་མོས་འོས་བསྡུར་ཚད་མཐོའི་རྒྱབ་སྐྱོར་ཐོབ་པ་དང་འབྲེལ། ཁེ་ན་ཌའི་གྲོས་ཚོགས་འཐུས་མི་ཚོས། གལ་སྲིད་རྒྱ་ནག་གཞུང་གིས་མུ་མཐུད་ཡུ་གུར་མི་རིགས་རྩ་སྟོང་གི་སྲིད་ཇུས་སྤེལ་ཚེ། ཁེ་ན་ཌ་གཞུང་ནས་རྒྱལ་སྤྱིའི་ཨོ་རྩལ་འགྲན་ཚོགས་ཀྱི་རྒྱུན་ལས་ཚོར་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་པེ་ཅིན་དུ་འཚོག་རྒྱུ་ཕྱིར་འཐེན་བྱེད་དགོས་པའི་སྐུལ་འདེད་གཏང་རྒྱུ་ཡིན་སྐོར་བརྗོད་ཡོད་པ་རེད།
ད་རེས་མང་མོས་འོས་བསྡུའི་སྐབས། ཁ་ན་ཌའི་སྲིད་བློན་ཇཱ་སི་ཊན་ཊུ་རུ་ཌོ་(Justin Trudeau) ལགས་ཀྱི་སྣེ་འཁྲིད་པའི་བློན་ཆེན་ཕལ་ཆེ་བས་འོས་བླུགས་མེད་པ་དང་། སྲིད་བློན་ཊུ་རུ་ཌོ་གཞུང་གིས། དེ་སྔ་ནས་རྒྱ་ནག་གིས་ཡུ་གུར་མི་རིགས་ལ་དྲག་གནོན་ཤུགས་ཆེན་བྱེད་ཀྱི་ཡོད་པའི་ངོས་འཛིན་འོག ཤིན་ཅང་ཁུལ་གྱི་ཡུ་གུར་མི་རིགས་ཀྱི་གནས་སྟངས་ལ་མུ་མཐུད་ཞིབ་འཇུག་བྱས་རྗེས། ཡུ་གུར་མི་རིགས་རྩ་གཏོར་གཏོང་གི་ཡོད་མེད་ཀྱི་ཐག་གཅོད་ལེན་རྒྱུ་ཡིན་སྐོར་བརྗོད་ཡོད་པ་དང་། འོས་བསྡུའི་སྐབས་ཁེ་ན་ཌའི་ཕྱི་སྲིད་བློན་ཆེན་མག་གྷར་ནའེ་ (Marc Garneau) ལགས་ཀྱིས། ངས་ཁེ་ན་ཌ་གཞུང་གི་ཚབ་བྱས་ཏེ་འོས་བླུགས་མེད་ཅེས་ཡོངས་བསྒྲགས་བྱས་ཡོད་པ་རེད།
དེ་རིང་རྒྱ་ནག་གཞུང་འབྲེལ་གོ་ལའི་དུས་བབ་སྟེང་། ཤིན་ཅང་རང་སྐྱོང་ཁུལ་གྱི་དམར་ཤོག་དྲུང་ཆེ་ཁྲིན་ཆན་གོ་ (Chen Quanguo) ཟེར་བས། རྒྱ་ནག་གིས་ཤིན་ཅང་ཁུལ་གྱི་དཔལ་འབྱོར་འཕེལ་རྒྱས་དང་། ས་གནས་མང་ཚོགས་ལ་སྡོད་ཁང་འཛུགས་སྐྲུན་གྱིས་མི་མང་གི་འཚོ་བ་གོང་འཕེལ། མི་རིགས་མཐུན་སྒྲིལ་དང་ཆོས་ལུགས་སྲུང་སྐྱོབ། དེ་བཞིན་ཏོག་དབྱིབས་གཉན་རིམས་འགོས་ཁྱབ་ཐད་སྔོན་འགོག་ནན་མོ་བྱས་པ་སོགས་དོན་ཚན་ཆེན་པོ་དྲུག་བགྲངས་ཏེ། ནུབ་ཕྱོགས་རྒྱལ་ཁབ་ཁག་གིས་ཡུ་གུར་མི་རིགས་རྩ་སྟོང་བཟོ་ཡི་ཡོད་ཟེར་བ་ནི་བདེན་པ་མིན་པའི་ལན་འདེབས་བྱས་ཡོད་པ་དང་། ཁ་སང་རྒྱ་ནག་ཕྱི་སྲིད་བློན་ཆེན་ཝང་ཡེ་ཡིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་སྟེང་། ཤིན་ཅང་ཁུལ་གྱི་གནད་དོན་ནི་ཁ་བྲལ་དང་འཇིགས་སྐུལ་རིང་ལུགས་ལ་ཁ་གཏད་གཅོག་པར་གནད་འགོག་ཆགས་ཡོད། འོན་ཀྱང་། དོན་དངོས་ཐོག་ཤིན་ཅང་ཁུལ་དུ་མི་རིགས་རྩ་སྟོང་དང་ངལ་སྩོལ་སྒྱུར་བཀོད་ཟེར་བ་ཁྱོན་ནས་མེད་ཅེས་བརྗོད་ཡོད་པ་རེད།
ཡང་ཁེ་ན་ཌའི་ཁ་གཏད་སྲིད་དོན་ཚོགས་པའི་ཚོགས་གཙོ་ཨའེ་རེན་ (Erin O’Toole) ལགས་ཀྱིས། ཁེ་ན་ཌས་ཚོང་འབྲེལ་གྱི་གོ་སྐབས་ཁག་ཅིག་བློས་གཏོང་བྱེད་དགོས་བྱུང་ཡང་། ང་ཚོས་རྒྱ་ནག་གིས་ཡུ་གུར་མི་རིགས་རྩ་སྟོང་བཟོ་ཡི་ཡོད་པར་རྒྱབ་སྐྱོར་གྱིས། རྒྱ་ནག་ལ་ཁེ་ན་ཌའི་གཞུང་འགྲོ་བ་མིའི་ཐོབ་ཐང་དང་དེའི་ཆེ་མཐོང་སོགས་ཀྱི་སླད་དུ་ལངས་ཕྱོགས་བརྟན་པོ་ཡོད་པའི་བརྡ་ལན་ཁ་གསལ་ཞིག་སྤྲོད་ཀྱི་ཡོད། ཅེས་བརྗོད་ཡོད་པ་རེད།
ཡུ་གུར་མི་རིགས་རྩ་སྟོང་གཏོང་གི་ཡོད་པའི་ངོས་འཛིན་བྱས་པ་ནི། ཁེ་ན་ཌ་དང་རྒྱ་ནག་བར་གྱི་འབྲེལ་ལམ་ལ་འགལ་ཟླ་བྱུང་བ་གསར་ཤོས་ཤིག་ཆགས་ཀྱི་ཡོད་པ་དང་། ཕྱི་ལོ་ ༢༠༡༨ ལོར་ཁེ་ན་ཌ་གཞུང་གིས། རྒྱ་ནག་གཞུང་འབྲེལ་གྱི་ཧཱ་ཝེ་འཕྲུལ་རིགས་བཟོ་ཚོང་ཁང་གི་ནོར་སྲིད་འགན་འཛིན་མེན་ཝན་ཀྲའོ་ (Meng Wanzhou) འཛིན་བཟུང་བཀག་ཉར་བྱས་པ་དང་། རྒྱ་ནག་གིས་ཁེ་ན་ཌའི་གཞུང་འབྲེལ་མི་སྣ་མའེ་ཁེལ་ (Michael Kovrig) དང་མའེ་ཁེལ་སི་པཱ་ཝོར་ (Michael Spavor) གཉིས་འཛིན་བཟུང་གིས་ཁེ་ན་ཌར་རྒོལ་ལན་སློག་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
འོ་དེ་རེད་། རྒྱ་མིའི་བོད་མི་རིགས་དང་། བོད་ཀྱིས་ཆོས་དང་སྐད་ཡིག་རིག་གཞུང་དང་བཅས་པ་
རྩ་མེད་བཟོ་དང་བཟོ་བཞིན་པ་ནས་མི་ལོ་དྲུག་བཅུ་ཕྱིན་པ་དེ་ཁེ་ན་ཌ་གཞུང་གི་མ་མཁྱེན་པ་རེད་དམ་
བོད་པས་འབྲེལ་བཤད་མ་ཐུབ་པ་རེད་???