བོད་ཀྱི་སྲིད་བྱུས་ཉམས་ཞིབ་ཁང་གིས་བོད་ཀྱི་གནས་ཚུལ་རྣམས་བོད་མིས་འདོན་ཐུབ་ཚེ་གདེང་འཁེལ་བ་ཞིག་ཡོང་གི་ཡོད་པས་གཞོན་སྐྱེས་ཚོས་ཉམས་ཞིབ་ཀྱི་རྩོམ་ཡིག་གང་མང་བྲིས་ཏེ་ཉམས་ཞིབ་ཁང་ལ་བསྐུར་དགོས་པའི་འབོད་སྐུལ་གནང་གི་འདུག
དེ་རིང་སྔ་དྲོའི་ཆུ་ཚོད་ ༡༠ ཐོག བོད་མིའི་སྒྲིག་འཛུགས་ཀྱི་ཕྱི་དྲིལ་གློག་ཀླད་སྡེ་ཚན་གྱི་ཚོགས་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ཉེ་ལམ་བཏོན་པའི་བོད་མདུན་ངོས་སུ་འཇོག་པ་ཞེས་པའི་དུས་དེབ་དང་འབྲེལ་ནས་བགྲོ་གླེང་ཞིག་ཚོགས་ཡོད་པ་དང་། བགྲོ་གླེང་ཐོག་དྲིལ་བསྒྲགས་དྲུང་ཆེ་འཆི་མེད་ཚེ་དབྱངས་ལགས་དང་ཕྱི་དྲིལ་རྒྱ་ཡིག་ཚན་པ། བདེ་སྲུང་ལས་ཁུངས་བཅས་ཀྱི་ལས་བྱེད་དང་། དེ་བཞིན་ས་རཱ་བོད་ཀྱི་མཐོ་སློབ་སོགས་ནས་ཁྱོན་མི་གྲངས་ ༣༠ ཙམ་འཛོམས་འདུག
ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བསྟན་འཛིན་ལེགས་བཤད་ལགས་ཀྱིས། བོད་མི་ན་གཞོན་ཉམས་ཞིབ་པ་ཚོས་བོད་ཡིག་གི་རྩོམ་གང་མང་བོད་ཀྱི་སྲིད་བྱུས་ཉམས་ཞིབ་ཁང་ལ་བསྐུར་ཐུབ་ཚེ། ཉམས་ཞིབ་ཁང་དེས་བོད་ཡིག་གི་དུས་དེབ་དེའང་མཐུག་ཏུ་གཏོང་བའི་འཆར་གཞི་ཞིག་གི་ཐོག་འབད་བརྩོན་བྱེད་བཞིན་ཡོད་སྐོར་དང་། སྲིད་བྱུས་ཉམས་ཞིབ་ཁང་གི་རེ་བ་དང་པོ་དེ་ནི་བོད་ཡིག་གི་ཐོག་ནས་གནས་ཚུལ་གང་མང་ཞིག་འདོན་རྒྱུ་དེ་ཡིན་ལ། གནས་ཚུལ་དེ་དག་ཕྱིའི་རྒྱལ་ཁབ་ཁག་ལའང་སྤེལ་དགོས་སྟབས། དབྱིན་ཡིག་ནང་འདོན་དགོས་པའི་གནས་སྟངས་ཤིག་ཆགས་ཡོད་པས། བོད་དབྱིན་གཉིས་ཀྱི་ནང་དུ་ཤུགས་རྒྱག་དགོས་རྒྱུ་གལ་ཆེན་པོ་ཡིན་སྐོར་སོགས་འགྲེལ་བརྗོད་གནང་སོང་།
བགྲོ་གླེང་གི་དགོས་དམིགས་སྐོར་ལ་འགན་འཛིན་བསྟན་འཛིན་ལེགས་བཤད་ལགས་ཀྱིས། ཕྱི་ལོ་ ༢༠༢༠ ལོའི་སྲིད་བྱུས་ཉམས་ཞིབ་ཁང་གི་དབྱིན་ཡིག་གི་དུས་དེབ་ནང་དུ་བོད་མདུན་ངོས་སུ་འཇོག་དགོས་པའི་བརྗོད་གཞིའི་ཐོག་ལ་དམིགས་བསལ་གྱི་རྩོམ་ཡིག་བསྡུས་ཏེ་འགྲེམས་སྤེལ་བྱས་ཡོད་པ་དང་། དེའི་ནང་གི་རྩོམ་སྒྲིག་པ་དགུ་ནས་སོ་སོའི་རྩོམ་ཡིག་ལ་འགྲེལ་བརྗོད་གནང་ཡོད་པ་མ་ཟད། དེའི་ཐོག་ལ་བགྲོ་གླེང་གནང་ཡོད་སྐོར་དང་། བོད་མདུན་ངོས་སུ་འཇོག་ཐུབ་རྒྱུ་ནི་བོད་མི་ཡོངས་ཀྱི་ལས་འགན་ཡིན་པ་དང་བོད་ཀྱི་སྲིད་བྱུས་ཉམས་ཞིབ་ཁང་གི་དམིགས་ཡུལ་ཡང་ཡིན་སྟབས་ཉམས་ཞིབ་པ་དག་གི་བར་བགྲོ་གླེང་གོ་སྒྲིག་བྱེད་པ་དང་། གཞུང་འབྲེལ་དང་གཞུང་མིན་པའི་ཚོགས་པ་ཁག་གི་ནང་བོད་ནང་དང་རྒྱ་ནག དེ་བཞིན་ཕྱིའི་རྒྱལ་ཁབ་ཁག་གི་གནས་ཚུལ་དང་འབྲེལ་གོ་བསྡུར་ཡོང་ཆེད་ཡིན་སྐོར། དེ་བཞིན་ས་ཕྱོགས་གང་སར་ཡོད་པའི་བོད་པའི་ཉམས་ཞིབ་པ་རྣམས་ཀྱིས་བོད་ཀྱི་གནས་ཚུལ་དང་འབྲེལ་ནས་ཆོས་དང་རིག་གཞུང་། སྐད་ཡིག གོམས་གཤིས་སོགས་ཀྱི་རྩོམ་ཡིག་རྣམས་སྲིད་བྱུས་ཉམས་ཞིབ་ཁང་ལ་བསྐུར་ཚེ་འདོན་སྤེལ་བྱེད་ཐུབ་པར་འབད་བརྩོན་བྱ་རྒྱུ་ཡིན་པའི་སྐུལ་མ་གནང་ཆེད་ཡིན་སྐོར་གསུངས་བྱུང་།
དེའི་རྗེས་གསར་འགོད་པས་བོད་མི་རང་གིས་བོད་ཀྱི་གནད་དོན་ཐོག་ཉམས་ཞིབ་བྱ་རྒྱུར་གལ་གནད་ཅི་ཙམ་མཐོང་གི་ཡོད་སྐོར་དྲིས་པར་བསྟན་འཛིན་ལེགས་བཤད་ལགས་ཀྱིས། བོད་མིས་བོད་ཀྱི་གནད་དོན་ཐོག་ཉམས་ཞིབ་བྱེད་པའི་ཐད་ཤུགས་ཧ་ཅང་ཆེན་པོ་རྒྱག་དགོས་པར་མཐོང་གི་ཡོད་པ་དང་། བོད་མི་མང་པོ་ཞིག་གིས་ཉམས་ཞིབ་བྱེད་སྐབས་སེམས་སུ་རྩོམ་ཡིག་བྲིས་རྗེས་དེ་སུས་འདོན་སྤེལ་བྱེད་པ་དང་། དེ་དང་འབྲེལ་ནས་གོ་སྐབས་ག་རེ་ཡོད་མེད་ཀྱི་དཀའ་ངལ་ཞིག་ཡོད་པ་མཐོང་གི་ཡོད་སྐོར་དང་། བོད་ཀྱི་སྲིད་བྱུས་ཉམས་ཞིབ་ཁང་གི་རྩོམ་ཙམ་མིན་པར་ལོ་རྒྱུས་དང་ཆབ་སྲིད་སོགས་དང་འབྲེལ་ནས་དཔེ་དེབ་པར་བསྐྲུན་བྱེད་པའི་གོ་སྐབས་སྤྲོད་ཀྱི་ཡོད་སྐོར། དེ་བཞིན་བོད་ཀྱི་གནས་ཚུལ་རྣམས་བོད་མིས་འདོན་ཐུབ་ཚེ་བོད་ཀྱི་འཐབ་རྩོད་དང་མི་རིགས་ཀྱི་ལ་རྒྱ་སོགས་གང་ཅིའི་ཐད་ནས་མི་རབས་རྗེས་མ་རྣམས་ལ་ལེགས་སྐྱེས་འབུལ་ཐུབ་པ་ཞིག་དང་། འཐབ་རྩོད་ཀྱི་ངོ་བོའི་ཐོག་ནས་གདེང་འཁེལ་བ་ཞིག་ཡོང་གི་ཡོད་པའི་རེ་བ་རྒྱག་གི་ཡོད་སྟབས། བོད་ཀྱི་གཞོན་སྐྱེས་ཚོས་ཉམསཞིབ་ཀྱི་རྩོམ་གང་མང་འབྲི་དགོས་སྐོར་གསུངས་བྱུང་།
བོད་ཀྱི་སྲིད་བྱུས་ཉམས་ཞིབ་ཁང་གི་ཐེངས་འདིའི་བོད་མདུན་ངོས་སུ་འཇོག་པའི་གལ་གནད་སྐོར་གྱི་བགྲོ་གླེང་ནང་། སྲིད་བྱུས་ཉམས་ཞིབ་ཁང་གི་ཉམས་ཞིབ་པ་ཁག་ཅིག་གི་གཙོས་བོད་རིགས་གཞོན་སྐྱེས་ཉམས་ཞིབ་པ་ཁག་ཅིག་ནས་རྒྱ་ནག་གིས་ལོ་ལྔ་རེའི་མཚམས་སུ་ཚོགས་སྲོལ་ཡོད་པའི་བོད་དོན་སྐོར་གྱི་བཞུགས་མོལ་ཚོགས་འདུ་དང་དམིགས་བསལ་བོད་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་སྐོར་ལ་ཉམས་ཞིབ་དང་། བཙན་བྱོལ་བོད་མི་ཚོས་རྒྱ་གར་གྱི་ཆབ་སྲིད་དང་དཔལ་འབྱོར། སློབ་གསོ། བདེ་འཇགས་དང་རིག་གཞུང་བཅས་ཀྱི་ཐད་རམ་འདེགས་ཇི་ཙམ་གནང་ཡོད་མེད། བོད་ཀྱི་གནད་དོན་ནི་ཨེ་ཤ་ཡའི་བདེ་འཇགས་དང་འཇམ་པོའི་སྟོབས་ཤུགས་དང་འབྲེལ་བ་ཡོད་པ་མ་ཟད། བོད་ཀྱི་ཆུ་ནི་རྒྱ་གར་གཙོས་པའི་ཨེ་ཤ་ཡའི་ཆུའི་འབྱུང་ཁུངས་ཡིན་སྐོར། དེ་བཞིན། རྒྱ་དཀར་ནག་གི་འཐབ་འཁྲུག་ཁྲོད་ཀྱི་བོད་དང་། རྒྱ་ནག་གིས་བོད་དང་ཧི་མ་ལ་ཡའི་རི་རྒྱུད་ཀྱི་ཁུལ་དུ་བཟུང་བའི་སྲིད་བྱུས་སོགས་ཀྱི་བརྗོད་གཞིའི་ཐོག་བགྲོ་གླེང་དང་དྲི་བ་དྲིས་ལན་གནང་གི་འདུག
གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ། ཀླུ་མགོན་ཐར།
