བོད་སོགས་གྲངས་ཉུང་མི་རིགས་ཀྱི་ཐོབ་ཐང་ལ་གུས་བརྩི་དགོས་པའི་འབོད་སྐུལ་གནང་།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༦ པའི་ཐོག་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྤྱི་ཁྱབ་འགན་འཛིན་ལགས་ཀྱིས་སྣེ་འཁྲིད་པའི་ཚོགས་ཆུང་ཞིག་རྒྱ་ནག་ནང་ཕྱིན་ཏེ་རང་དབང་ལྡན་པའི་ཐོག་ནས་འགྲོ་བ་མིའི་ཐོབ་ཐང་ལ་རྟོག་ཞིབ་བྱེད་དུ་འཇུག་དགོས་པའི་སྐུལ་མ་གནང་།

ཁ་སང་ཕྱི་ཚེས་ ༢༣ ཉིན་ཇི་ནི་ཝར་ཚོགས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༦ པ་དྲ་ལམ་བརྒྱུད་ཚོགས་ཡོད་པ་དང་། ཚོགས་ཐོག་ཏུ་ཡུ་རོབ་མཐུན་ཚོགས་ཀྱི་ཕྱི་སྲིད་སྤྱི་ཁྱབ་འགན་འཛིན་ཇོ་སིབ་བྷོ་རལ་ (Josep Borrell) ལགས་ཀྱིས། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྤྱི་ཁྱབ་འགན་འཛིན་ (Bachelet) ཚུད་པའི་རྒྱལ་སྤྱིའི་རང་དབང་གི་ཚོགས་སྡེ་ཞིག་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་རྟོག་ཞིབ་བྱེད་པར་ཆོག་མཆན་སྤྲོད་དགོས་པའི་སྐུལ་མ་བསྐྱར་དུ་བྱེད་ཀྱི་ཡོད་པ་དང་། རང་དབང་གི་རྟོག་ཞིབ་ཚོགས་པ་ཞིག་རྒྱ་ནག་ཏུ་གཏང་རྒྱུ་ནི་རྒྱལ་སྤྱིའི་སྤྱི་ཚོགས་ལ་ཡོད་པའི་བློ་འཚབ་དེ་རང་དབང་དང་ལྡན་ཞིང་ཕྱོགས་སུ་མ་ལྷུང་བ། ཕྱི་གསལ་ནང་གསལ་གྱི་ཐོག་རྟོག་ཞིབ་བྱེད་པའི་ཐབས་ལམ་ཁོ་ན་དེ་ཡིན་པ་རེད། ཅེས་དང་། ཧོང་ཀོང་དང་འབྲེལ་ནས་རྒྱ་ནག་གཞུང་གིས་གཞི་རྩའི་འགྲོ་བ་མིའི་ཐོབ་ཐང་དང་ཁྲིམས་སྒྲིག་གི་དབང་བསྒྱུར། དམངས་གཙོའི་ལྟ་གྲུབ་ལ་བརྩི་སྲུང་དགོས་སྐོར་དང་། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་འོག་ཧོང་ཀོང་གི་ཚད་མཐོའི་རང་སྐྱོང་ལ་འགན་ལེན་དགོས་སྐོར་བརྗོད་འདུག

ཡང་ཁོང་གིས་གོ་ལ་ཧྲིལ་བོར་ནད་ཡམས་ཆེན་པོ་ཞིག་གི་དཀའ་ངལ་འོག་ཡོད་པའི་གནས་སྐབས་འདིར་འགྲོ་བ་མིའི་ཐོབ་ཐང་དང་དམངས་གཙོ་ཉམ་ཆགས་སུ་འགྲོ་བཞིན་ཡོད་པར། སྲིད་གཞུང་མང་པོ་ཞིག་གིས་གསར་འགོད་པར་བཀག་སྡོམ་དང་དངོས་ཡོད་གནས་ཚུལ་འཁྱོག་བརྗོད་བྱེད་པ། ཞི་བའི་ཁྲོམ་སྐོར་བ་རྣམས་བཀག་ཉར་བྱེད་པ་དང་འགྲོ་བ་མིའི་ཐོབ་ཐང་དོན་གཉེར་བ་ཚོར་རྡུང་རྡེག་གཏོང་བ་སོགས་དང་། ལྷག་པར་དུ་རྒྱལ་སྤྱིའི་ཁྲིམས་ཁང་ (International Criminal Court) ལ་ཁྱད་གསོད་བྱེད་བཞིན་པའི་གནས་ཚུལ་ཡང་འབྱུང་གི་ཡོད་སྟབས། འཛམ་གླིང་གི་རྒྱལ་ཁབ་ཚང་མས་འགྲོ་བ་མིའི་ཐོབ་ཐང་ཡར་རྒྱས་ཐད་ཤུགས་སྣོན་རྒྱག་དགོས་སྐོར་དང་། ཡུ་རོབ་མཐུན་ཚོགས་ངོས་ནས་འགྲོ་བ་མིའི་ཐོབ་ཐང་གི་ཐད་ཤུགས་སྣོན་བྱ་རྒྱུ་ཡིན་པ་དང་། ཉེ་ལམ་ནས་ཡུ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་དང་དམངས་གཙོའི་ཐོག་ཁྲིམས་སྒྲིག་ལག་བསྟར་གྱི་འཆར་གཞི་ཞིག་མགོ་འཛུགས་བྱས་ཡོད་པ་མ་ཟད། རྒྱལ་ཁབ་གཞན་དང་མཉམ་འབྲེལ་གྱིས་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་གཏོང་ཐབས་སུ་ཡུ་རོབ་མཐུན་ཚོགས་ཀྱི་གོ་ལའི་འགྲོ་བ་མིའི་ཐོབ་ཐང་གི་ཉེས་ཆད་སྲོལ་ཡིག་ (EU Global Human Rights  Sanctions Regime) ཞིག་གཏན་འབེབ་བྱས་ཡོད་སྐོར་སོགས་བརྗོད་འདུག

དེ་བཞིན་ཕྱི་ཚེས་ ༢༢ ཉིན་གྱི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་ཆེན་གྱི་ཉིན་དང་པོའི་ཐོག་དབྱིན་ཡུལ་ཕྱི་སྲིད་དྲུང་ཆེ་ཌོ་མི་ནིག་རབ་ (Dominic Raab) ལགས་ཀྱིས། རྒྱ་ནག་གཞུང་གིས་བོད་དང་ཧོང་ཀོང་། ཤར་ཏུར་ཀི་སི་ཐན་ནང་འཆར་གཞི་ལྡན་པའི་ངང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པའི་གནས་སྟངས་ལ་སྐྱོན་བརྗོད་དང་། བོད་ནང་གི་གནས་སྟངས་ནི་ཧ་ཅང་སེམས་འཚབ་བྱ་ཡུལ་ཞིག་ཏུ་གྱུར་ཡོད་པ་མ་ཟད། རྒྱ་གཞུང་གིས་མུ་མཐུད་བོད་ཁུལ་དུ་ཕྱོགས་ཡོངས་ནས་དམ་དྲག་ཤུགས་ཆེར་བྱེད་བཞིན་ཡོད་སྐོར་དང་། རྒྱ་ནག་གཞུང་གིས་འགན་ལེན་ཡོད་པའི་ཐོག་ནས་འགྲོ་བ་མིའི་ཐོབ་ཐང་དང་འབྲེལ་ནས་རྒྱལ་ཚོགས་ལ་ལན་འདེབས་བྱེད་དུ་འཇུག་པ་ནི་རྒྱལ་ཚོགས་ཀྱི་ཁོངས་མི་ཡོངས་ཀྱི་མཉམ་འབྲེལ་གྱི་འགན་འཁྲི་ཡིན་སྐོར་སོགས་བརྗོད་ཡོད་འདུག

ཚོགས་ཐོག་ཏུ་ཡུ་རོབ་མཐུན་ཚོགས་དང་ཉི་ཧོང་། རྒྱ་གར།  ལྷོ་ཀོ་རི་ཡ། ཐའེ་ལན་ཌི། བྷང་ལ་ཌེ་ཤི། ཨི་རག ཨི་ཇེབ། བྷེ་ལ་རུ་སི།  སོ་ཌི་ཨ་རབ། བལ་ཡུལ་སོགས་རྒྱལ་ཁབ་བཅུ་ལྷག་གི་ཕྱི་སྲིད་བློན་ཆེན་དང་ཆེས་མཐོའི་དཔོན་རིགས་ཁག་གི་བར་དུ་རྒྱལ་ཁབ་སོ་སོའི་འགྲོ་བ་མིའི་ཐོབ་ཐང་གི་གནས་སྟངས་ཐད་གཏམ་བཤད་གནང་ཡོད་འདུག་ལ། སྐབས་དེར་ད་ལྟའི་འབར་མའི་འགྲོ་བ་མིའི་ཐོབ་ཐང་གི་གནས་སྟངས་དང་། ཨུ་རུ་སུའི་གནས་སྟངས། ཏོག་དབྱིབས་གཉན་རིམས་ཀྱི་འགོག་ཁབ་སོགས་ཀྱི་ཐད་གླེང་སློང་བྱུང་ཡོད་འདུག

གསར་འགོད་པ། ཀླུ་མགོན་ཐར།