ཉིན་གྲངས་ ༡༥ ཙམ་རིང་རྒྱུད་སྟོད་གྲྭ་ཚང་དུ་ཕྱི་ནང་གི་འགྲོ་འོང་བཀག་འདུག

དྷ་རམ་ས་ལའི་ཉེ་འདབས་སུ་ཡོད་པའི་རྒྱུད་སྟོད་གྲྭ་ཚང་དུ་ཏོག་དབྱིབས་གཉན་རིམས་ཀྱི་ནད་པ་ ༡༢ བྱུང་བའི་རྐྱེན་གྱིས་ཟླ་འདིའི་ཕྱི་ཚེས་ ༢༥ ནས་ཕྱི་ཟླ་ ༣ ཚེས་ ༡༠ བར་དུ་གྲྭ་ཚང་གི་ཕྱི་ནང་འགྲོ་འོང་བཀག་སྡོམ་གནང་འདུག

ཁ་སང་ཕྱི་ཚེས་ ༢༥ ཉིན་ཀང་རཱ་རྫོང་གིས་ཏོག་དབྱིབས་གཉན་རིམས་དང་འབྲེལ་ནས་བཀོད་ཁྱབ་ཞིག་བཏང་ཡོད་པའི་ནང་དྷ་རམ་ས་ལའི་ཉེ་འདབས་རྒྱུད་སྟོད་གྲྭ་ཚང་དུ་ཏོག་དབྱིབས་གཉན་རིམས་འགོས་པ་ ༡༢ གཏན་འཁེལ་བྱུང་ཡོད་སྟབས། མི་མང་འདུ་འཛོམས་མི་ཆོག་པའི་ཁྲིམས་ཡིག་དོན་ཚན་ 144 OF CrPC, 1973 འོག འདི་ལོའི་ཕྱི་ཟླ་ ༣ ཚེས་ ༡༠ ཉིན་བར་འབྲེལ་ཡོད་ས་གནས་ནད་ཡམས་ཀྱི་ལྟེ་བར་ངོས་འཛིན་བྱས་ཏེ། བཀོད་ཁྱབ་འོག་ཡོད་པའི་ས་གནས་ནང་ནད་ཡམས་སྔོན་འགོག་སོགས་ཀྱི་ལས་དོན་དང་འབྲེལ་བའི་སྨན་ཞབས་པ་དང་འབྲེལ་ཡོད་རླངས་འཁོར་ཁག་ཅིག་ལས་གཞན་སུའང་འཛུལ་མི་ཆོག་པ་དང་། ཛ་དྲག་གི་སྨན་བཅོས་བྱེད་པར་དམིགས་བསལ་ཆོག་མཆན་ཡི་གེ་ཡོད་ན་མ་གཏོགས་བཀག་སྡོམ་འོག་ཡོད་པའི་མི་སུའང་སྒོའི་ཕྱིར་ཐོན་མི་ཆོག་པ་དང་། ཉེར་མཁོའི་ཅ་དངོས་རྣམས་གྲྭ་ཚང་དང་འབྲེལ་ཡོད་ལས་མིས་མཁོ་སྤྲོད་གནང་རྒྱུ་དང་། བཀོད་ཁྱབ་འོག་གི་ལས་ཁུངས་རྣམས་ཀྱང་སྒོ་འབྱེད་མི་ཆོག་སྐོར་བསྒྲགས་འདུག

ད་ལྟ་རྒྱུད་སྟོད་གྲྭ་ཚང་གི་གནས་སྟངས་གང་འདྲ་ཡོད་མེད་ཀྱི་ཐད་འདི་གའི་གསར་འགོད་པས་ཞལ་པར་བརྒྱུད་དྷ་ས་ས་གནས་མགོ་འཛིན་ཀུན་དགའ་ཚེ་རིང་ལགས་སུ་དྲིས་པར་ཁོང་གིས། ནད་ཡམས་འགོས་ཡོད་པ་གཏན་འཁེལ་བྱུང་བ་གྲངས་ ༡༢ བྱུང་བ་གཞིར་བཟུང་། ཕྱི་ཚེས་ ༢༥ ཉིན་ནས་གྲྭ་ཚང་གི་མི་གཞན་རྣམས་ལའང་བརྟག་དཔྱད་བྱེད་བཞིན་ཡོད་པ་མ་ཟད། ནད་པ་ ༡༢ བྱུང་ཡོད་པ་རྣམས་ཟུར་བཀག་བྱས་ཡོད་པ་དང་། ད་ལྟ་རྫོང་རིམ་པའི་ལམ་སྟོན་འོག་སྔོན་འགོག་གི་ལས་དོན་རྣམས་བྱེད་ཀྱིན་ཡོད་སྐོར་བརྗོད་བྱུང་། ཡང་རྒྱུད་སྟོད་གྲྭ་ཚང་གི་ཕྱག་མཛོད་སྐལ་བཟང་རྒྱ་མཚོ་ལགས་སུ་ད་ལྟ་གྲྭ་ཚང་ལ་ཁྱོན་མི་གྲངས་ག་ཚོད་ཡོད་པ་དང་། ད་ལྟའི་གནས་སྟངས་སྐོར་ལ་བཀའ་འདྲི་ཞུ་སྐབས། ནད་ཡམས་སྔོན་འགོག་གི་ལས་དོན་དང་འབྲེལ་ནས་གནས་སྐབས་རིང་བྲེལ་བ་ཡིན་པ་དང་། ཉིན་ཤས་ནས་གནས་ཚུལ་ཆ་ཚང་ཁ་གསལ་ཆགས་འགྲོ་ངེས་སྐོར་འགྲེལ་བརྗོད་གནང་བྱུང་།

ཀང་རཱ་རྫོང་གི་གནས་ཚུལ་ལྟར་ན། རྒྱུད་སྟོད་གྲྭ་ཚང་དུ་ཁྱོན་མི་གྲངས་ ༤༠༠ ཙམ་ཡོད་འདུག་ལ། ཁ་སང་ཕྱི་ཚེས་ ༢༥ ཉིན་མི་གྲངས་ ༡༢ ལ་ནད་ཡམས་འགོས་ཡོད་པ་གཏན་འཁེལ་བྱུང་ཡོད་པའི་ཁྲོད་། དགུང་ལོ་བགྲེས་ཤོས་ ༤༨ ཅན་མི་གཉིས་དང་ཆུང་ཤོས་ལོ་ ༡༥ ཅན་མི་གཉིས་ཡོད་འདུག

ཁ་སང་ཕྱི་ཚེས་ ༢༥ ཉིན་རྒྱུད་སྟོད་གྲྭ་ཚང་གི་ནད་པའི་གྲུབ་འབྲས་མ་ཐོན་གོང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་སྤེལ་བའི་ནང་། འདས་པའི་བདུན་ཕྲག་གཅིག་གི་རིང་དྷ་ས་ཁུལ་དུ་མི་གྲངས་ ༤༨ དང་མེན་པཱཌ་གཞིས་ཆགས་སུ་མི་གྲངས་ ༡༢ བཅས་ཁྱོན་མི་གྲངས་ ༦༠ ལ་ཏོག་དབྱིབས་གཉན་རིམས་ཀྱི་འགོག་ཁབ་བརྒྱབས་ཡོད་པ་དང་། ད་བར་ཁྱོན་བོད་མི་གྲངས་ ༤༠༦ ལ་འགོག་ཁབ་བརྒྱབས་ཟིན་སྐོར་དང་། འདས་པའི་བདུན་ཕྲག་གཅིག་གི་ནང་ནད་གཞི་ཕོག་པ་གྲངས་ ༡༠ བྱུང་ཡོད་པའི་ཁྲོད། ལོ་ན་མཐོ་ཤོས་ ༩༠ དང་དམའ་ཤོས་ ༡༥ ཅན་ཡིན་ཞིང་། ནད་རྟགས་དམིགས་བསལ་མེད་པ་གྲངས་ ༦ དང་ཅུང་ཙམ་མངོན་པ་གྲངས་ ༤། དེ་བཞིན་ནད་རྐྱེན་འདས་སུ་ཕྱིན་པ་གཅིག་ཀྱང་བྱུང་མེད་སྐོར་འགྲེལ་བརྗོད་གནང་འདུག

ཁ་སང་ཕྱི་ཚེས་ ༢༥ ཉིན་གཅིག་རིང་རྒྱ་གར་རྒྱལ་ཡོངས་སུ་ཁྱོན་ཏོག་དབྱིབས་ནད་པ་གྲངས་ ༡༦༥༧༧ དང་རྐྱེན་འདས་སུ་ཕྱིན་པ་གྲངས་ ༡༢༠ བྱུང་ཡོད་འདུག་ལ། ཧི་མ་ཅལ་མངའ་སྡེའི་ནང་ནད་པ་གྲངས་ ༤༢ བྱུང་ཡོད་པའི་ཁྲོད་ཀང་རཱ་རྫོང་ཁོངས་སུ་ནད་པ་གྲངས་ ༡༨ བྱུང་སྟེ་མངའ་སྡེའི་ཉིན་གཅིག་གི་ནང་ནད་པ་གྲངས་མང་ཤོས་དེ་ཆགས་ཡོད་འདུག

གསར་འགོད་པ། ཀླུ་མགོན་ཐར།