རྒྱ་ནག་གིས་འདས་ལོ་ནས་དྲ་ལམ་འཇབ་རྒོལ་གྱི་ལས་འགུལ་སྤེལ་ཏེ་བཙན་བྱོལ་བོད་མིའི་ཚོགས་སྡེ་ཁག་ལ་གསང་ཉུལ་བྱེད་ཀྱི་ཡོད་འདུག
རྒྱལ་སྤྱིའི་དྲ་རྒྱའི་བདེ་འཇགས་དང་འབྲེལ་བའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་ཨ་རིའི་མངའ་སྡེ་ཁ་ལི་ཧྥོ་ནེ་ཡའི་གྲོང་ཁྱེར་སན་ནེ་ཝལ་ (Sunnyvale) ནང་རྟེན་གཞི་བྱས་པའི་ (Proofpoint) རྒྱལ་སྤྱིའི་དྲ་རྒྱའི་བདེ་འཇགས་ཞབས་ཞུ་དང་ཉམས་ཞིབ་ཁང་གིས་ཞིབ་འཇུག་བྱས་པ་བརྒྱུད། རྒྱ་ནག་གི་དྲ་གནས་འཇབ་རྒོལ་བ་ཚོས་དྲ་ལམ་ནས་འཇག་རྒོལ་གྱི་ལས་འགུལ་སྤེལ་ཏེ། ཕྱི་རྒྱལ་ཡུལ་གྲུ་ཁག་ཏུ་གནས་པའི་བཙན་བྱོལ་བོད་མིའི་ཚོགས་སྡེ་ཁག་ལ་གསང་ཉུལ་བྱེད་ཀྱི་ཡོད་སྐོར་བརྗོད་འདུག
དེ་འབྲེལ་ཐད་དྲ་རྒྱའི་བདེ་འཇགས་ཞབས་ཞུ་དང་ཉམས་ཞིབ་ཁང་དེས། རྒྱ་ནག་དམར་ཤོར་ཚོགས་པའི་མངོན་འདོད་སྒྲུབ་མཁན་གྱི་དྲ་གནས་འཇག་རྒོལ་བ་ཚོས། རྒྱལ་སྤྱིའི་སྟེང་ཡོངས་གྲགས་སུ་ཆགས་པའི་དྲ་གནས་འཚོལ་ཞིབ་མ་ལག་མཱོ་ཛེ་ལ་ (Mozilla Firefox) བརྒྱུད། གློག་ཀླད་སྟེང་མཉེན་ཆས་སམ་དྲ་རྒྱའི་འཚོལ་ཞིབ་མ་ལག་བེད་སྤྱོད་གཏོང་ཕྱོགས་ཀྱི་ཐོན་རིམ་གསར་པ་ཞིག་ཕབ་ལེན་བྱེད་དུ་བཅུག་སྟེ། ཚོགས་སྡེ་ཁག་དང་མི་སྒེར་གྱི་ཡིག་ཟམ་ (Gmail) ལ་སྟངས་འཛིན་དང་གསང་ཉུལ་བྱེད་ཀྱི་ཡོད་སྐོར་བརྗོད་འདུག
ཡང་གནས་ཚུལ་ནང་རྒྱ་ནག་གི་དྲ་གནས་འཇབ་རྒོལ་བ་དེ་ཚོས་དྲ་ལམ་སྒྲིག་འགལ་གྱི་བྱེད་ཐབས་འདྲ་མིན་སྤྱད་དེ། འདི་ལོའི་ཕྱི་ཟླ་དང་པོ་དང་གཉིས་པའི་ནང་བོད་མིའི་ཐོག་འཇབ་རྒོལ་བྱས་པ་དང་། དྲ་ལམ་འཇབ་རྒོལ་གྱི་ལས་འགུལ་དེ་འདས་ལོའི་ཕྱི་ཟླ་ ༣ ཙམ་ནས་བོད་མིའི་ཚོགས་སྡེ་ཁག་ལ་དམིགས་ནས་སྤེལ་ཡོད་སྐོར་སོགས་བརྗོད་འདུག་ལ། བཙན་བྱོལ་བོད་མིའི་ཚོགས་སྡེ་ཁག་ནས་རྒྱ་ནག་གི་དྲ་ལམ་འཇབ་རྒོལ་རིགས་ལ་དོགས་ཟོན་གནང་རྒྱུ་གལ་ཆེན་ཡིན་པ་ལྟར། ད་ལྟ་དྲ་ལམ་འཇབ་རྒོལ་གྱི་ལས་འགུལ་དེ་མུ་མཐུད་གནས་ཡོད་པ་དང་། ད་རེས་ནི་རྒྱ་ནག་གིས་བཙན་བྱོལ་བོད་མིའི་ཐོག་དྲ་ལམ་འཇབ་རྒོལ་བྱས་པ་ཐོག་དང་པོ་མིན་པར། ཕྱི་ལོ་ ༢༠༡༤ ལོར་རྒྱ་ནག་གིས་ (Scanbox) ཞེས་པའི་བྱེད་ཐབས་ཤིག་སྤྱད་དེ་བཙན་བྱོལ་བོད་མི་སྤྱི་དང་། རྒྱ་ནག་གཞུང་དང་འགལ་ཟླའི་ཁོངས་གཏོགས་ཀྱི་གྲངས་ཉུང་མི་རིགས་ཁག་ལ་དམིགས་འབེན་བཟུང་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
