རྒྱུད་སྟོད་གྲྭ་ཚང་གི་ལས་བྱེད་དང་དགེ་འདུན་པ་བཅས་ཁྱོན་མི་གྲངས་ ༣༢༠ ལྷག་ལ་བརྟག་དཔྱད་བྱས་རྗེས་མི་གྲངས་ ༡༥༣ ལ་ཏོག་དབྱིབས་གཉན་རིམས་འགོས་ཡོད་པ་ཤེས་རྟོགས་བྱུང་ཡོད་འདུག
ཁ་སང་ཕྱི་ཚེས་ ༡ ཉིན་སྟོད་རྒྱུད་གྲྭ་ཚང་གི་དགེ་འདུན་པ་ཡོངས་ལ་ཏོག་དབྱིབས་གཉན་རིམས་དང་འབྲེལ་ནས་བརྟག་དཔྱད་བྱས་འབྲས་སུ། ཁྱོན་ལས་བྱེད་དང་དགེ་འདུན་པ་ཞལ་གྲངས་ ༡༥༣ ལ་ཏོག་དབྱིབས་གཉན་རིམས་འགོས་ཡོད་ཀྱང་། དགེ་འདུན་པ་གཅིག་ལ་དབུགས་འབྱིན་རྔུབ་ཐད་དཀའ་ངལ་བྱུང་སྟེ་མངའ་སྡེ་གཞུང་གི་ཊན་ཌ་སྨན་ཁང་དུ་ཕྱིན་དགོས་ཁེལ་ཡོད་པ་ལས། གཞན་རྣམས་ལ་ཛ་དྲག་གི་དཀའ་ངལ་གང་ཡང་མེད་འདུག
འདི་གའི་གསར་འགོད་པས་སྟོད་རྒྱུད་གྲྭ་ཚང་གི་ཕྱག་མཛོད་བློ་བཟང་ཀླུ་སྒྲུབ་ལགས་སུ་ཞལ་པར་བརྒྱུད་བཀའ་འདྲི་ཞུས་པར་ཁོང་གིས། ད་ལྟའི་ཆར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་སོགས་ཀྱི་ལམ་སྟོན་གཞིར་བཟུང་། ནད་པ་ ༡༥༣ དེ་འགོག་དབྱེ་ཟུར་འཇོག་ཁང་དུ་བཞག་སྟེ། སྨན་རྩིས་ཁང་གི་འཁྲུལ་ཐང་གིས་མཚོན་པའི་ལུས་ཟུངས་བསྐྱེད་པའི་སྨན་རྣམས་སྦྱིན་མུས་ཡིན་ལ། ད་ལྟའི་ཆར་བརྟག་དཔྱད་བྱས་མེད་པའི་མི་གཅིག་རྐྱང་ལུས་མེད་སྐོར་འགྲེལ་བརྗོད་གནང་བྱུང་།
ད་ཐེངས་སྟོད་རྒྱུད་གྲྭ་ཚང་ནང་གཉན་རིམས་འགོས་ཁྱབ་སོང་རྐྱེན་ཤེས་རྟོགས་ཐུབ་ཐབས་མེད་སྐོར་ལ་ཕྱག་མཛོད་བློ་བཟང་ཀླུ་སྒྲུབ་ལགས་ཀྱིས། སྟོད་རྒྱུད་གྲྭ་ཚང་ངོས་ནས་འདས་ལོའི་ཕྱི་ཟླ་ ༣ ཙམ་ནས་གྲྭ་ཚང་ནང་གཉན་རིམས་འགོས་ཁྱབ་མི་འགྲོ་བའི་ཆེད་བཀག་སྡོམ་ནན་པོ་བྱས་ཡོད་ནའང་། འདི་ལོའི་ལོ་སར་ཡས་མས་ནས་དགེ་འདུན་པའི་ཁྲོད་འཆམ་རིམས་ཕོག་པ་ལྟ་བུའི་གནས་ཚུལ་བྱུང་སྟེ། བདེ་ལེགས་སྨན་ཁང་དུ་བརྟག་དཔྱད་བྱེད་སྐབས་ཏོག་དབྱིབས་གཉན་རིམས་འགོས་ཡོད་པ་ཤེས་རྟོགས་ཐུབ་ཡོད་སྐོར་བརྗོད་བྱུང་།
ཡང་ཁོང་གིས་རང་རེའི་སྤྱི་ཚོགས་ནང་ད་ལན་ཏོག་དབྱིབས་གཉན་རིམས་ཤུགས་ཆེར་འགོས་ཁྱབ་ཕྱིན་པ་དེ། ཉེ་ལམ་རྒྱུད་སྟོད་གྲྭ་ཚང་ནང་རྒྱ་གར་ལྷོ་ཕྱོགས་ཀྱི་གདན་ས་ཁག་ནས་ཆོས་ཐོག་ཏུ་བསླེབས་པའི་དགེ་འདུན་པ་རྣམས་བརྒྱུད་ནས་འགོས་ཡོད་སྐོར་གྱི་དཀྲོག་གཏམ་ཞིག་སྤེལ་བཞིན་འདུག་ཀྱང་། དོན་དངོས་ཐོག་ལྷོ་ཕྱོགས་ནས་ཕེབས་པའི་དགེ་འདུན་པ་རྣམས་ལ་བརྟག་དཔྱད་བྱེད་སྐབས་མི་གཅིག་ལའང་གཉན་རིམས་འགོས་མེད་སྐོར་བརྗོད་བྱུང་།
གསར་འགོད་པ། པ་སངས་ཚེ་རིང་། ཀླུ་མགོན་ཐར།
